KEJADIN kai nge i bas geluhndu si erbanca meriah kal ukurndu? Paksa kam erjabu ntah paksa anakndu si pemena tubuh? Ntah, paksa kam iperidiken? Banci jadi, paksa kam iperidiken eme paksa si pentingna janah si riahna kal i bas geluhndu. Bayangken uga riahna ukur turang senina sanga ngidah kam mbuktiken dirindu ngkelengi Dibata asa atendu, tendindu, ukurndu, ras asa gegehndu lit!​—Mrk. 12:30.

Kenca iperidiken, banci saja meriah kal akapndu ngelayani Jahwe. Tapi, piga-piga perberita lanai meriah akapna bagi si mbarenda. Engkai maka enda banci terjadi? Kai alasenna maka kita banci terus ngelayani Jahwe alu ermeriah ukur?

Berita Kinirajan pasti erban meriah ukurta. Engkai? Jahwe erjanji maka KinirajanNa nandangi ngkernepken doni si jahat enda janah igantikenNa jadi doni si mbaru. Terlebih ka Sefanya 1:14 mpebetehken man banta, ”Wari TUHAN si mbelin enggo ndeher—enggo seh kal deherna janah pedas me ia reh!” Tapi, adi nggo ndekah kal siakap kita nimai asangken si enggo sibayangken, kita banci lanai ermeriah ukur. Akibatna, kita lanai ergiah-giah i bas ngelayani Dibata.​—Kua. 13:12.

Paksa kita ngerana-ngerana ras turang senina, sigejapken maka kita ipegegehi guna terus ngelayani Jahwe alu ermeriah ukur. Banci jadi, kita merincuh mpelajari kebenaren janah nggit ngelayani Dibata erkiteken lagu langkah umat Jahwe. (1 Pet. 2:12) Tapi, uga adina sekalak turang seninanta idisiplin erkiteken ngelanggar perentah Dibata? Enda banci erban piga-piga turang senina kecewa janah lanai ermeriah ukur.

Selain si e, kita pe banci lanai ermeriah ukur adi siayaki kinibayaken. Doni Setan erusaha ngajuk-ngajuk kita guna nukur barang-barang si labo situhuna siperluken. Jesus pernah ngataken, ”Ise pe labo ngasup ngikutken dua tuan. Sabap adi dua tuanna, la banci lang sekalak keleng atena janah sekalak nari nembeh atena; ntah pe mejingkat ia nandangi sekalak tuan, tapi tuan si sada nari la diatena pe. Labo kam ngasup erdahin guna Dibata adi erdahin ka kin kam guna duit.” (Mat. 6:24) Kita la banci ngelayani Jahwe alu ermeriah ukur sekaligus ngayaki kerina si itawarken doni enda.

Ngelayani Jahwe labo beban man kalak si ngkelengi Ia. (1 Joh. 5:3) Ingetlah kata-kata Jesus, ”Marilah kam si latih janah mberaten, maka kubereken pengadi-ngadinndu. Tamakenlah pasangenku ku kudukndu janah erlajarlah i bas aku nari. Sabap aku melias janah meteruk ukurku; alu bage idatndu me kemalemen ate. Sabap pasangen si kubereken man bandu ntabeh mabasa, dingen baban si kutamaken ku bas babondu menahang kap.” (Mat. 11:28-30) Erkiteken jadi kalak Kristen, kita ndatken kemalemen ate ras keriahen ukur. Pasti melala kal si erban kita ermeriah ukur ngelayani Jahwe. Mari si bahas telu alasenna.​—Haba. 3:18.

Kita ngelayani Dibata si Mereken Kegeluhen, Dibata si ermeriah ukur. (Perb. 17:28; 1 Tim. 1:11, NW) Sieteh maka kita rutang kegeluhen man Dibata si Nepa kita. Erkiteken si e, ateta min gelah terus ngelayani Ia alu ermeriah ukur, la soal asakai dekahna kita nggo iperidiken.

Perdiateken Héctor, si pernah ngelayani Jahwe jadi pertua keliling sedekah 40 tahun. Meriah denga akapna ngelayani amin gia ia nggo metua. (Msm. 92:13-15) Erkiteken ndeharana sakit, lanai ia banci ngelayani Jahwe bagi si mbarenda, tapi Héctor tetap ermeriah ukur. Nina, ”Latih ukurku ngidah kesehaten ndeharaku reh dekahna reh kelekna, janah maun-maun mesera kuakap ngerawat ia. Tapi, aku la nggit si enda ngkurangi keriahen ukurku i bas ngelayani Dibata situhu-tuhu. Kusadari maka aku lit erkiteken Jahwe, janah lit tujunNa nepa manusia. Enda nggo cukup erbanca aku nggit ngkelengi janah ngelayani Ia alu bulat ukur. Kuusahaken gelah tetap ergiah-giah erberita janah terus kuinget arapen kerna Kinirajan gelah aku banci tetap ermeriah ukur.”

Jahwe nikapken tebusen gelah kita banci nggeluh ermeriah ukur. ”Sabab bage pengkelengi Dibata doni enda, emaka IberekenNa AnakNa sitonggal, gelah ola bene ise pe si tek man bana, tapi gelah dat kegeluhen si tuhu-tuhu si la erkeri-kerin.” (Joh. 3:16) Payo, dosa-dosanta banci ialemi janah kita banci nggeluh seh rasa lalap adi kita erkiniteken man pemere Dibata eme tebusen. Kita tuhu-tuhu ngataken bujur erkiteken si e! Erkiteken ngergai si enda, tersuruh ka ukurta guna ngelayani Jahwe alu meriah ukur.

Jesús, sekalak turang seninanta si tading i Meksiko ngataken, ”Mbarenda, aku iperbudak  dahinku. Maun-maun, erwari-wari dekahna aku erdahin seh ngasa berngi amin gia la iwajipken. Enda kulakoken guna duit. Kenca si e, aku erlajar kerna Jahwe janah uga pengorbanenNa sanga mereken anakNa man manusia. Lit sura-surangku ngelayani Ia, emaka kubaktiken geluhku man Jahwe. Aku pe ngadi i bas dahinku nari si nggo 28 tahun dekahna kudalani, janah ngelayani Jahwe sepenuh waktu. Aku ngelayani Jahwe alu ermeriah ukur.”

Moral si bersih i bas kegeluhen erbanca kita ermeriah ukur. Ingetndu nge kegeluhenndu mbarenda sope lenga nandai Jahwe? Rasul Paulus ngingetken maka kalak enda nai ”budak dosa”, tapi gundari jadi ”budak Dibata”. Erkiteken kegeluhen kalak enda bersih, lit arapen kalak e guna nggeluh si rasa lalap. (Rom. 6:17-22) Kita pe patuh man hukum Jahwe si erbanca kita la ngenanami akibat si la mehuli i bas kegeluhen si amoral janah dem alu kekerasen. Enda erban kita ermeriah ukur!

Perdiateken Jaime, sekalak petinju si ateis si tek man evolusi. Jaime mulai reh ku perpulungen janah kena kal ku pusuhna ngidah kekelengen turang seninanta. Gelah banci nadingken lagu langkahna si ndekah, Jaime mindo penampat Jahwe gelah erban ia tek maka Dibata e lit. Nina Jaime, ”Sitik-sitik mulai aku sadar maka lit kap Bapa si perkeleng janah Dibata si perkuah. Patuh man hukum Jahwe ngelindungi aku. Bicara aku la robah, banci saja aku nggo mate bagi teman-teman petinjuku. Si erbanca meriah kal ukurku eme ngelayani Jahwe.”

Uga arusna perasanta paksa nimai doni si jahat enda ikernepken? Ingetlah, kita sangana ngelakoken peraten Dibata janah nimai kegeluhen si rasa lalap.” Emaka ola min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna.” (Gal. 6:8, 9) Alu penampat Jahwe, mbera kita terus megenggeng janah siusahaken mpehuli sifat-sifat si iperluken gelah banci selamat i bas ”kiniseran si mbelin”. Mbera terus silayani Jahwe alu meriah ukur.​—Ket. 7:9, 13, 14; Jak. 1:2-4.

Banci kita tek maka Jahwe pasti masu-masu kesetianta erkiteken ietehNa kai si nggo silakoken janah kekelengen si nggo sicidahken man baNa bage pe man gelarNa. Adi terus silayani Ia alu meriah ukur, siusih pemasmur Daud si ngataken, ”Tetap kugejap maka Dibata ndeher kap ras aku, gelah aku tetap paguh. Emaka meriah kal ukurku, pusuhku pe ersurak-surak senang tendingku.”​—Msm. 16:8, 9.