1-3. (a) Engkai maka kita tek kita banci jadi teman Dibata? (b) Ise saja si man bahasenta bas artikel enda?

I BAS Pustaka si Badia, lit telu kali Abraham igelari teman Dibata. (2 Kro. 20:7; Jes. 41:8; Jak. 2:23) Janah ia ngenca si langsung igelari teman Dibata. Payo nge enda ertina Abraham ngenca manusia si pernah jadi teman Jahwe? Lang. Pustaka si Badia ncidahken maka kerina kita banci ndatken hak istimewa e.

² Pustaka si Badia nuriken kerna melala dilaki ras diberu si setia, si mbiar dingen patuh man Jahwe, tek man baNa, janah jadi temanNa. (Oge Masmur 25:14.) Kalak enda bagin i bas ’nterem saksi si ngkeleweti kita’ bagi si ituriken Paulus.​—Heb. 12:1.

³ Gundari, mari sibahas kerna telu teman Jahwe si ituriken i bas Pustaka si Badia: (1) Rut, diberu si nggo mbalu si setia i bas Moab nari, (2) Hiskia, sekalak raja si erkiniteken i bas Juda nari, janah (3) Maria, si meteruk rukur, si jadi nande Jesus. Mari sipelajari uga kalak enda banci jadi teman Dibata.

4, 5. Keputusen kai si arus ibahan Rut, janah ngkai maka enda sada keputusen si mesera? (Nehen gambar pemena artikel.)

⁴ Naomi, ras dua permainna, Rut ras Orpa, ndauh erdalan Moab nari ku kuta kemulihen Naomi i Israel. I bas perdalanen, iputusken Orpa gelah mulih ku Moab. Kai si ilakoken Rut? Ia arus erbahan keputusen si mesera. Mulihken nge ia ku Moab guna ersada ras keluargana, entah tetap nge ia ikut ku Betlehem ras Naomi?​—Rut 1:1-8, 14.

⁵ Keluarga Rut tading i Moab. Adi mulihken ia ku keluargana, kalak enda banci ngurus ia. Itandaina kalak Moab, iangkaina cakapna, ras kebudayanna. Tapi la banci ijamin Naomi maka Rut banci ndatken si e kerina i Betlehem. Janah sangsi Naomi banci ntah lang iberekenna perbulangen ntah pe rumah man bana. Emaka isuruh Naomi ia mulih ku Moab, bali bagi Orpa si ”mulih ku bangsana ras ku dibata-dibatana.” (Rut 1:9-15) Tapi Rut la nggit mulihken ku bangsana bage pe ku dibata-dibata palsu kalak Moab.

6. (a) Kai keputusen si benar si ibahan Rut? (b) Engkai maka ikataken Boas Rut ndarami perlindungen i teruh kabeng Jahwe?

⁶ Mungkin Rut erlajar kerna Jahwe arah perbulangenna ntah pe arah Naomi. Ipelajarina maka Jahwe la bali bagi dibata-dibata Moab. Ikelengina Jahwe janah ietehna maka Jahwe ngenca si metunggungna ikelengi janah isembah. Enda me si erbanca Rut erbahan sada keputusen si benar. Nina man Naomi, ”Bangsandu jadi bangsangku, janah Dibatandu jadi Dibatangku.” (Rut 1:16) Kena kal pusuhta paksa siukuri kekelengen Rut nandangi Naomi. Tapi si lebih kena kal ku pusuhta, kekelengen Rut nandangi Jahwe. Si enda ka me si ngiahken Boas mujiken ia erkiteken erlindung i teruh kabeng Jahwe janah ’ibahanna Ia jadi sikawalna.’ (Oge Rut 2:12.) Kata-kata Boas banci saja ngingetken kita man anak perik si ndarami perlindungen i teruh kabeng indungna. (Msm. 36:7; 91:1-4) Bali bagi indung perik, Jahwe mereken perlindungen man Rut janah ngupahi kinitekenna. Rut la pernah erkadiola nandangi keputusenna.

7. Kai si banci nampati kalak si ragu mbaktiken dirina man Jahwe?

⁷ Nterem kalak erlajar kerna Jahwe tapi la ndarami perlindungen si iberekenNa. Kalak e ragu mbaktiken kegeluhenna janah iperidiken. Adi bage pengakapndu cuba ukuri kai si erbanca kam ragu. Erbage-bage dibata si isembah manusia. (Jos. 24:15) Tapi pilihen si mehulina eme nembah Dibata situhu-tuhu. Paksa ibaktikenndu dirindu man Jahwe, icidahkenndu maka kam tek Jahwe banci jadi ingan perlindungenndu. Janah pasti isampatina kam guna tetap ngelayani Ia amin gia melala perbeben si niadapindu. Bagi si ilakoken Dibata man Rut.

8. Cuba turiken uga latar belakang Hiskia.

⁸ Latar belakang Hiskia ndauh kal bedana ras Rut. Bangsana eme bangsa si ipilih Dibata. Tapi nterem kalak Israel la setia bali bagi bapa Hiskia, Raja Ahas, si seh kal jahatna. La iergaina rumah pertoton Dibata janah iusahakenna gelah rayatna nembah dibata-dibata palsu. Piga-piga senina Hiskia itutung Ahas nggeluh-nggeluh  guna ipersembahken man dibata palsu. Hiskia ipebelin i bas keluarga si la mehuli!​—2 Raj. 16:2-4, 10-17; 2 Kro. 28:1-3.

9, 10. (a) Engkai maka banci saja lit alasen Hiskia merawa man Jahwe? (b) Engkai maka la kita perlu merawa man Dibata? (c) Engkai maka latar belakangta labo nentuken jadi kalak si uga kita?

⁹ Contoh si la mehuli si itadingken Ahas banci erban segat ate Hiskia nandangi Jahwe janah merawa man baNa. Gundari, nterem kalak banci saja ”ilepakkenna” Jahwe ntah pe la senang nandangi organisasiNa, padahal keadanna la separah keadan Hiskia. (Kua. 19:3) Si deban erpengakap maka latar belakang keluargana si la mehuli banci erbahan kegeluhenna la mehuli ntah pe ngelakoken mulihi kesalahen orang tuana. (Esek. 18:2, 3) Tapi payo nge perukuren si bage?

¹⁰ Kegeluhen Hiskia mbuktiken maka perukuren si bage salah! Labo lit alasen guna merawa man Jahwe. La pernah ibahanNa kai si la mehuli man manusia. (Jop 34:10) Payo tuhu orang tua banci ngajari anak-anakna ngelakoken kai si mehuli ntah pe si la mehuli. (Kua. 22:6; Kol. 3:21) Tapi enda labo ertina latar belakang keluarganta si nentuken jadi kalak si uga kita. Engkai? Erkiteken Jahwe mereken man banta kebebasen guna milih, enda ertina kita banci milih guna ngelakoken kai si mehuli ntah pe si la mehuli. (Ul. 30:19) Uga Hiskia nggunaken pemere si meherga enda?

11. Kai si erbanca maka Hiskia jadi salah sada raja si mehuli kal i Juda?

¹¹ Amin pe bapa Hiskia salah sada raja si jahat kal i Juda, tapi Hiskia jadi salah sada raja si mehuli kal. (Oge 2 Raja-raja 18:5, 6.) La ia nggit ngikutken contoh bapana si la mehuli. Sebalikna, ipilihna megiken nasehat ras persinget nabi-nabi Jahwe alu mehuli, bagi Jesaya, Miha, ras Hosea. Enda me si ngiahken ia guna mpesikap mbue kesalahen si ilakoken  bapana. Ibersihkenna rumah pertoton, ipindona gelah Dibata ngalemi dosa bangsa Israel, janah ikernepkenna kerina berhala-berhala i bas negeri e. (2 Kro. 29:1-11, 18-24; 31:1) Kenca si e, paksa Sanherib, raja Asiria ersura-sura nerang Jerusalem, Hiskia ncidahken maka ia pang janah erkiniteken. Ia tek man perlindungen Jahwe janah ipegegehina rayatna. (2 Kro. 32:7, 8) I bas sada paksa Hiskia jadi sombong, tapi sanga Jahwe mpersingeti ia, nggit ia robah. (2 Kro. 32:24-26) Jelas me, Hiskia contoh si luar biasa si patut siusih. La ipediatna latar belakang keluargana ncedai kegeluhenna. Sebalikna, icidahkenna maka ia teman Jahwe.

12. Bali bagi Hiskia, uga nterem kalak gundari banci jadi teman Jahwe?

¹² Gundari, doni enda kejam ras la perkeleng, janah melala anak-anak ipebelin alu la nggejapken kekelengen ras perhatin orang tua. (2 Tim. 3:1-5) Amin gia melala kalak Kristen si gundari bage latar belakang keluargana, tapi ipilihna guna jadi teman Jahwe. Bagi Hiskia, ibuktiken kalak e maka latar berlakang keluargana labo nentuken jadi kalak si uga ia i bas wari si pepagi. Dibata mereken man banta kebebasen guna milih, janah kita banci milih ngelayani ras nghamati Ia, bali bagi Hiskia.

13, 14. Engkai maka tugas si ialoken Maria jadi sada tantangen man bana, tapi uga tanggapenna nandangi kata-kata Gabriel?

¹³ Erabad-abad kenca jaman Hiskia, lit sekalak singuda-nguda si meteruk rukur, gelarna Maria si jadi teman Jahwe janah ndatken sada tugas si istimewa. Mehuli pagi kulana, mupus, janah mpebelin anak Dibata! Pasti keleng ate Jahwe nandangi Maria janah tek Ia man bana emaka iberekenNa hak istimewa si luar biasa. Tapi uga tanggapen Maria paksa tangtangna ibegina tugas e?

¹⁴ Rusur kal sicakapken kerna kinihamaten si mbelin si ialoken Maria. Tapi pernah nge siukuri tantangen si nihadapi Maria? Contohna, ikataken malaikat Gabriel maka mehuli pagi kulana alu la ngelakoken hubungen seksual ras sekalak dilaki. Tapi la ijelasken Gabriel man keluargana bage pe tetanggana uga maka banci mehuli kula Maria. Kai si banci saja lit i bas ukur kalak enda? Uga ia erbahan Jusup, tunangenna, tek maka ia setia? Selain si e, sada tanggung jabap  si mbelin man Maria, selaku manusia i bas mpebelin anak Dibata. La sieteh kai saja si erbahan aru ate Maria, tapi sieteh kai si ilakoken Maria kenca Gabriel ngerana bana. Nina, ”Kuendesken diringku man Tuhan. Janah jadilah i bas aku bagi si enggo ikatakenndu e!”​—Luk. 1:26-38.

15. Engkai maka kiniteken Maria luar biasa?

¹⁵ Kiniteken Maria tuhu-tuhu luar biasa! Nggit ia ngelakoken kai pe si ipindo i bas ia nari, bagi sekalak budak. Tek ia maka Jahwe pasti ngelindungi janah nampati ia. Uga maka banci bage kal paguhna kiniteken Maria? Kita tubuh labo minter erkiniteken. Tapi kita banci erkiniteken adi sipupuk janah sipindo Dibata masu-masu upayanta. (Gal. 5:22; Ep. 2:8) Pasti terus iusahaken Maria mpegegehi kinitekenna. Janari banci sieteh? Mari sibahas uga ia mbegiken ras kai si icakapkenna.

16. Kai buktina Maria kalak si metinggel?

¹⁶ Cara Maria megiken. Pustaka si Badia ngataken maka kita, ”arus metinggel, tapi ola minter ngerana.” (Jak. 1:19) Maria kalak si metinggel. Pustaka si Badia ncidahken maka Maria metinggel nandangi kai si ibegikenna, khususna kai si ipelajarina kerna Jahwe. Iukuri hal-hal si penting e. Mari siperdiateken dua contoh. Si pemena, kenca Jesus tubuh, lit permakan si mpebetehken man Maria kerna kai si nggo ikataken sekalak malekat. Si peduaken, sanga umur Jesus 12 tahun, ikataken Jesus sada hal si erbahan mamang ate Maria. I bas dua peristiwa e, Maria megiken, nginget, ras ngukuri alu megermet kerna kai si nggo ibegina.​—Oge Lukas 2:16-19, 49, 51.

17. Kai si banci sipelajari i bas kata-kata Maria?

¹⁷ Kai si icakapken Maria. La melala ituriken Pustaka si Badia kerna kai si ikataken Maria. Kata-kata Maria si gedangna kal lit i bas Lukas 1:46-55. Kata-kata enda ncidahken maka Maria ngangkai Kitap-kitap Heber alu mehuli. Kai buktina? Kata-kata Maria menam seri ras pertoton Hana, nande Samuel. (1 Sam. 2:1-10) I bas kata-kata Maria enda, banci saja lit 20 kali ikutipna Kitap-Kitap Heber. Jelas me, meriah kal ukurna ncakapken kebenaren si ipelajarina arah Temanna, Jahwe.

18. Alu cara kai saja banci siusih kiniteken Maria?

¹⁸ Bali bagi Maria, banci saja i bas sada waktu pagi sidat sada tugas i bas Jahwe nari si mesera siakap ngelakokenca. Mari siusih usihen si itadingken Maria, alu meteruk ukur sialoken tugas e, janah tek maka Jahwe pasti nampati kita. Banci ka siusih kiniteken Maria alu metinggel megiken Jahwe janah ngukuri alu mbages kai si nggo sipelajari kerna Ia bage pe sura-suraNa. Emaka, meriah ka ukurta mpebetehken man kalak si deban kerna kai si nggo sipelajari.​—Msm. 77:11, 12; Luk. 8:18; Rom. 10:15.

19. Kai si banci sidatken adi siusih usihen kiniteken i bas Pustaka si Badia?

¹⁹ Jelas me, Rut, Hiskia, bage pe Maria, kalak enda teman Jahwe, bali bagi Abraham. Kalak enda bagin i bas ’nterem saksi si ngkeleweti kita’ si nggo ndatken hak istimewa jadi teman Dibata. Mbera terus siusih usihen kiniteken si luar biasa enda. (Heb. 6:11, 12) Adi silakoken e, kita banci jadi teman Jahwe seh rasa lalap!