Uga nge Ceritana maka Lit Sinagoga?

KATA “sinagoga” rehna arah kata bahasa Junani si ertina “perpulungen” ntah pe “pulung.” Gelar enda cocok perban mbarenda nari sinagoga nggo jadi ingan pulung guna erlajar ras ibadah man kalak Jahudi. Bas Kitap-Kitap Heber la pernah langsung ituriken kerna sinagoga. Tapi, arah Kitap-Kitap Junani Kristen siteh maka ingan-ingan pulung si bage nggo lit mulai abad pertama Masehi.

Enterem pakar si tek maka sinagoga mulai lit kenca kalak Jahudi ibaba ku Babilon jadi tawanen. Nina Encyclopaedia Judaica, “Perban i negeri asing tawanen e tading janah la lit Rumah Pertoton i je, sedih kel iakap kalak e janah perlu ia iapuli. Emaka mon-mon pulung me kalak e, mungkin saja bas wari Sabat, janah ibacana Kitap si Badia.” Kenca nggo bebas, banci saja kalak Jahudi rusur denga pulung guna ertoto ras mbaca Kitap si Badia, janah ibangun kalak e sinagoga i japa pe kalak e ringan.

Emaka bas abad pertama Masehi, sinagoga nggo jadi pusat kegiaten agama ras sosial kalak Jahudi si nggo tersebar ku sekitar Laut Tengah, ku belang-belang Timur Tengah, bage pe ku Israel. Profesor Lee Levine arah The Hebrew University of Jerusalem ngataken, “[Sinagoga] jadi ingan guna erlajar, acara man-man sanga perayan, persidangen, nimpan sen kas, janah ingan rapat politik ras sosial.” Nina ka, “Tapi tentu saja, si pentingna eme acara-acara agama.” Emaka la ateta mamang ngkai maka rusur Jesus reh ku perpulungen i sinagoga, ntah pe “ingan pulung kalak Jahudi.” (Mrk. 1:21, cataten i teruh; 6:2; Luk. 4:16) Bas ingan e Jesus ngajar, mpegegehi, janah ngiahken kalak si reh. Kenca nggo lit runggun Kristen, Rasul Paulus pe rusur erberita i sinagoga. Kalak si atena ndeher ras Dibata biasana reh ku sinagoga. Emaka sanga masuk ku sada kota, biasana idahi Paulus lebe sinagoga janah erberita ia i je.​—Perb. 17:1, 2; 18:4, cataten i teruh.