1-2. (a) Uga nge Musa kalakna, janah kai si nggo ilakokenna? (b) Kai nge alasenna maka arus sipebelin sipat lembut bas dirita?

NINA Pustaka, Musa e kalak si seh kel lembutna ntah pe “ukurna si meterukna i bas kerina manusia i bas doni enda.” (Bil. 12:3) Tapi labo maksudna ia lemah, la tegas, janah mis nyerah sanga ilawan kalak. Menurut piga-piga kalak, bage me kalak si lembut. Tapi enda labo tuhu. Musa e paguh kalakna, tegas, janah pang ia bas ngelayani Dibata. Perban isampati Jahwe, pang ia njumpai penguasa Mesir si mbelin kuasana. Ipinpinna ka kira-kira 3.000.000 kalak Israel ngelewati taneh mesawang janah isampatina kalak e naluken musuh-musuhna.

² Memang labo bagi Musa tantangen si iadapi kita. Tapi tiap wari lit kalak ntah pe keadan si erban mesera siakap lembut. Tapi situhuna lit alasenna ngkai maka arus sipebelin sipat e. Kai e? Enggo erjanji Jahwe maka “kalak si meteruk rukur [“lembut,” NW] ndatken taneh e.” (Msm. 37:11) Menurutndu lembut nge kam? Adi menurut kalak uga? Sope sijawap penungkunen e, perlu siteh kai ertina jadi kalak si lembut.

3-4. (a) Sipat lembut bali bagi kai? (b) Empat sipat kai si arus lit bas kita gelah banci jadi kalak si lembut, janah ngkai?

³ Sipat lembut * bali bagi sada lukisen si mejile. Kai  maksudna? Sekalak pelukis nggunaken piga-piga warna gelah banci ibanna lukisen si mejile. Kita pe bage, arus ka lit piga-piga sipat si mehuli bas kita gelah banci jadi kalak si lembut. Piga-piga sipat e eme meteruk ukur, patuh, melias, janah perpang. Engkai maka arus lit sipat-sipat e bas kita adi siban ateta meriah ukur Jahwe?

⁴ Kalak si meteruk ukur ngenca si patuh ngelakoken kai si ngena ate Dibata. Salah sada si ngena ate Dibata eme gelah kita jadi kalak si melias janah lembut. (Mat. 5:5; Gal. 5:23) Sanga silakoken kai si ngena ate Dibata, merawa kel Setan. E me sebapna nterem kalak bas doni Setan enda segat atena kita, amin gia kita meteruk ukur janah lembut. (Joh. 15:18, 19) Emaka, arus kita pang ngelawan Setan.

5-6. (a) Engkai maka segat ate Setan kalak si lembut? (b) Penungkunen kai saja si man bahasenta?

⁵ Kalak si la lembut eme kalak si sombong, menukah merawa, janah la patuh man Jahwe. Bage me situhuna Setan. Emaka pasti segat atena kalak si lembut! Arah perbahanen kalak e teridah maka jahat kel Setan, perban sipat mehuli kalak e la lit bas ia. Terlebih ka, ibuktiken kalak e maka Setan perbual. Engkai maka bage? Sebap kai pe si ikataken ras si ilakoken Setan, la banci mpengadi kalak si lembut ngelayani Jahwe!​—Jop 2:3-5.

⁶ Bas keadan kai saja mesera siakap lembut? Janah ngkai maka arus terus sipebelin sipat e? Guna njawapsa, sibahas kari contoh arah Musa, telu anak perana Heber si itawan i Babilon, bage pe Jesus.

7-8. Kai nge si ilakoken Musa sanga ia la iergai?

⁷ Sanga lit tanggung jawapta: Banci saja mesera iakap kalak si lit tanggung jawapna guna tetap lembut. Apai ka adi kalak si iawasina la ngergai ia ntah pe sangsi kalak e man keputusenna. Pernah nge si e terjadi bandu? Uga adi lit sekalak anggota keluargandu si bage? Kai nge si ilakokenndu? Mari sibahas kai si ilakoken Musa.

⁸ Ipilih Jahwe Musa jadi peminpin kalak Israel janah isuruhNa ia nulis undang-undang man bangsa e. Pasti idukung Jahwe Musa. Aminna pe bage, kakak ras abang  Musa eme Miriam ras Arun ngelawan ia janah isalahken kalak e ia i bas milih ndeharana. Seumpama kalak si deban min ndai si jadi Musa, pasti nggo merawa ia janah ibalasna atena, tapi Musa la bage. La ia menukah tersinggung. Malahen, ipindona gelah ipengadi Jahwe ukumen man Miriam. (Bil. 12:1-13) Engkai maka bage ilakoken Musa?

9-10. (a) Kai si iajarken Jahwe man Musa? (b) Uga kepala keluarga bage pe pertua banci ngusih Musa?

⁹ Nggit Musa ilatih Jahwe. Kira-kira 40 tahun si nggo lewat, sanga Musa jadi anggota keluarga kerajan Mesir denga, la ia lembut. Situhuna, menukah kel ia merawa emaka pernah ibunuhna sekalak dilaki si la iakapna adil. Janah iakap Musa ngena ate Jahwe perbahanenna e. Emaka, 40 tahun dekahna iajari Jahwe ia gelah iangkaina maka labo bias pang saja bas minpin kalak Israel, tapi arus ka ia jadi kalak si lembut. Janah gelah banci ia jadi kalak si lembut, perlu ka ia meteruk ukur, patuh, janah melias. Erlajar ia je nari janah dungna jadi pengawas si mehuli kel ia.​—Kel. 2:11, 12; Perb 7:21-30, 36.

¹⁰ Gundari, arus iusahaken kepala keluarga bage pe pertua ngusih Musa. Ula kam menukah tersinggung sanga la iergai kalak. Adi lit salahndu, meteruk ukurlah kam ngakuisa. (Peng. 7:9, 20) Patuhlah kam ngikutken petunjuk Jahwe kerna cara ndungi masalah. Janah lalaplah melias rananndu. (Kua. 15:1) Adi bage si ilakoken kepala keluarga bage pe pengawas-pengawas, pasti meriah ukur Jahwe, lalap lit kedamen, janah kalak e banci jadi contoh kerna uga carana jadi kalak si lembut.

11-13. Kai si banci siusih arah telu kalak Heber?

¹¹ Sanga ianiaya: Mbarenda nari, nggo ianiaya pemerentah umat Jahwe. Banci saja ituduh kalak e kita ngelakoken kejahaten, tapi situhuna merawa kalak e man banta perban ‘lebih patuh kita man Dibata selaku penguasa’ asangken man kalak e. (Perb. 5:29) Banci saja itokoh-tokohi kita, ipenjaraken ntah pe isiksana kita. Tapi alu penampat Jahwe, la kita nggit mbalassa tapi tetap kita tenang.

¹² Mari sibahas contoh telu anak perana Heber si ibaba ku Babilon eme Hananya, Misael, ras Asaria. * Iperentahken raja Babilon kalak e gelah isembahna patung emas si galang. Tenang kalak e njelasken man Raja ngkai maka la kalak e nggit nembah  patung e. Tetap kalak e patuh man Dibata amin gia iancam Raja kalak e ibenterken ku bas api si seh kel garana. Memang minter iselamatken Jahwe kalak e, tapi la iarap kalak e bage iban Jahwe. Situhuna, nggit kalak e ngaloken kai pe si ipediat Jahwe terjadi. (Dan. 3:1, 8-28) Ibuktiken kalak e maka kalak si lembut tuhu-tuhu perpang. Amin gia isuruh pemerentah kita la patuh man Jahwe, ntah pe iancam kalak kita adi la siikutken ia, ntah pe iukum kalak kita, la lit ise pe si banci erban kita lanai ngelayani Jahwe.​—Kel. 20:4, 5.

¹³ Sanga iuji kesetianta man Dibata, kai si banci siusih arah telu kalak Heber e? Arus kita meteruk ukur janah tek kita maka pasti ijaga Jahwe kita. (Msm. 118:6, 7) Lembut janah mehuli min kita njawap kalak si nuduh kita. (1 Pet. 3:15) Pasti la ateta silakoken kai pe si banci ncedai hubungenta ras Bapakta si perkeleng.

14-15. (a) Kai si banci saja terjadi sanga kita stres? (b) Menurut Jesaya 53:7, 10, ngkai maka Jesus contoh si luar biasa kerna kalak si tetap lembut sanga stres?

¹⁴ Sanga stres: Kerina kita banci stres erkiteken erbage alasen. Misalna, sanga nandangi ujian i sekolah, ntah pe nandangi ngelakoken sada tugas bas inganta erdahin. Ntah pe banci ka kita stres sanga ngukuri pinakitta ras uga cara nambarisa. Sanga stres kita, mesera kel siakap lembut. Kai si biasana la siakap masalah, dungna dongkel siakap. Banci kasar pengeranata janah lanai kita ermediate. Adi sangana kita stres, banci siusih Jesus.

¹⁵ Piga-piga bulan sope Jesus mate, stres ntah pe tertekan kel ia. Itehna maka lanai ndekah iukum mate me ia janah seh kel suina kari akapna. (Joh. 3:14, 15; Gal. 3:13) Piga-piga bulan sope ia mate, ikatakenna maka gulut kel ukurna. (Luk. 12:50) Janah piga-piga wari sope ia mate, ikatakenna, “Latih kel ukurku.” Arah pertotonna banci siteh maka meteruk ukur ia janah patuh man Dibata, sebap nina, “O Bapak, selamatken min aku paksa kiniseran enda. Memang, guna si enda nge aku reh. O Bapak, muliakenlah gelarNdu.” (Joh. 12:27, 28) Sanga nggo seh waktuna, la Jesus mbiar nyerahken dirina man musuh-musuh Dibata. Iukum mate kalak e ia alu cara si hina janah seh kel suina. Amin pe stres kel ia janah seh kel suina akapna, tetap ia lembut janah ilakokenna peraten Dibata. Lanai kita sangsi maka Jesus me contoh si luar biasa kerna kalak si tetap lembut sanga stres!​—Baca Jesaya 53:7, 10.

16-17. (a) Kai si ilakoken teman-teman Jesus si erbanca mesera akapna lembut? (b) Uga kita banci ngusih Jesus?

¹⁶ Bas berngi sope Jesus mate, lit perbahanen teman-temanna si ndeher kel ras ia si erbanca mesera akapna lembut. Bayangken uga stresna Jesus bas berngi e. Banci nge ia tetap setia ngayak mate? Adi la ia setia, la lit arapen manusia guna nggeluh rasa lalap. (Rom. 5:18, 19) Si terpentingen ka, perbahanenna banci mpengaruhi gelar Bapakna. (Jop 2:4) Tapi, sanga terakhir ia man ras teman-temanna si ndeher kel ras ia, eme rasul-rasulna, percakapen kalak e dungna jadi “perubaten si mekelek” kerna “ise si mbelinna i bas kalak e.” Enggo mulih-ulih ipersingeti Jesus teman-temanna kerna si e, termasuk bas berngi e pe! Si luar biasana, la nembeh ate Jesus. Tapi tetap ia tenang. Alu melias tapi tegas, ijelasken Jesus ka mulihi uga arusna perbahanen kalak e. Kenca si e ipujina kalak e  perban nggo setia ndukung ia.​—Luk. 22:24-28; Joh. 13:1-5, 12-15.

¹⁷ Kai nge si ilakokenndu adi terjadi si bage bandu? Banci siusih Jesus janah tetap kita tenang sanga stres. Bas pusuhta nari patuhlah kita man perentah Jahwe kerna ‘arus tetap sabar sada ras si debanna.’ (Kol. 3:13) Banci sidalanken perentah e adi siinget maka kerina kita pernah erban kitik ukur kalak i bas ranan ras perbahanenta. (Kua. 12:18; Jak. 3:2, 5) Janah teruslah usahaken muji kalak si deban erkiteken sipat-sipatna si mehuli.​—Ep. 4:29.

18. Uga cara Jahwe nampati kalak si lembut erban keputusen si mehuli, tapi kai si arus ilakoken kalak e?

¹⁸ Gelah banci siban keputusen si mehuli. Sanga mesera siakap erban keputusen si mehuli, banci isampati Jahwe kita. Tapi, nggit Ia nampatisa adi kita jadi kalak si lembut. Erjanji Ia maka pasti ibegikenNa “pertoton kalak si peteruk bana.” (Msm. 10:17) Janah labo e saja. Nina Pustaka, “IajariNa kalak meteruk rukur, maka iikutkenna peratenNa.” (Msm. 25:9) Iajari Jahwe kita arah Pustaka, baca-bacanta, * video, bage pe perpulungen si isikapkenNa arah “budak si setia janah pentar.” (Mat. 24:45-47) Tapi arus nggit kita ngaloken penampat Jahwe. Uga carana? Arus meteruk ukur kita ngakui maka perlu kita penampat. Arus ka sipelajari kerina si nggo isikapken Jahwe janah alu bulat ukur ndalankenca.

19-21. Kai kesalahen Musa sanga i Kades, janah kai pelajarenna man banta?

¹⁹ Gelah la siban melala kesalahen. Mari ka sibahas kerna Musa. Enggo puluhen tahun ia tetap lembut janah meriah ibanna ukur Jahwe. Tapi, kenca menam 40 tahun kalak Israel bas taneh mesawang, lanai Musa lembut. Kakakna, si mbelin kemungkinenna nelamatken ia i Mesir mbarenda, nggo mate janah ikuburken i Kades. Gundari mulihi ka ngidoi kalak Israel perban la akapna ia iperdiateken. Sekalenda jungut-jungut kalak e man Musa perban la lit lau. Aminna pe nggo ibereken Jahwe kuasa man Musa erban melala mukjizat janah nggo ndekah ipinpinna bangsa e alu la mentingken bana, tapi tetap kalak e jungut-jungut.  Labo kerna la lit lau saja kalak e jungut-jungut, tapi pe kerna Musa, tempa-tempa Musa si erbanca kalak e muas.​—Bil. 20:1-5, 9-11.

²⁰ Merawa kel Musa janah lanai ia lembut. Isuruh Jahwe ia ngerana ku batu, tapi la ilakokenna e. Merawa ia man kalak Israel janah ikatakenna maka ibanna kari mukjizat. Kenca bage, ipekpekna batu e dua kali jenari ndaraten me lau. Perban merawa ia janah sombong, ibanna me kesalahen si mbelin. (Msm. 106:32, 33) Ntisik saja pe ia la lembut, la ia ibereken masuk ku Taneh Perjanjin.​—Bil. 20:12.

²¹ Arah kejadin enda, banci sidat pelajaren si meherga. Si pertama, arus siusahaken gelah terus kita lembut. Adi la siusahaken e, banci meter kita jadi kalak sombong janah lanai siukuri ranan ras perbahanenta. Si peduaken, sanga stres kita, mesera siakap tetap lembut. Emaka arus kita erjuang jadi kalak si lembut, amin gia sangana kita tertekan.

22-23. (a) Engkai maka arus terus kita jadi kalak si lembut? (b) Kai maksudna kata-kata bas Sepanya 2:3?

²² Gelah kita ilindungi. Lanai ndekah ikernepken Jahwe me kerina kalak jahat bas doni enda nari. Kalak si lembut ngenca si tetap nggeluh. Dame me kerina doni enda. (Msm. 37:10, 11) Termasuk nge kam bas kalak si lembut e pagi? Termasuk, adi idalankenndu kai si ipindo Jahwe bagi si icatat Nabi Sepanya, nina, “Daramilah Jahwe, o kam kerina si lembut i doni, si ndalanken peraturenNa si benar. Lakokenlah kai si benar, janah lembutlah kam. Mbera ilindungi kam bas wari rawa Jahwe.”​—Sep. 2:3, NW.

²³ Engkai maka ikataken Sepanya 2:3, “Mbera ilindungi kam”? Labo maksudna Jahwe la ngasup ngelindungi kalak si nggit erban meriah ukurNa bage pe kalak si keleng ateNa. Tapi, maksudna arus lit usahata gelah banci ilindungi Jahwe. Banci kita selamat arah “wari rawa Jahwe” janah nggeluh rasa lalap adi gundari nari siusahaken jadi kalak si lembut janah erban meriah ukur Jahwe.