1-2. (a) Ateta uga min kalak man banta? (b) Tek kita kerna kai?

IKELENGI ateta kita janah adil ateta kalak man banta. Adi rusur kita la ikelengi janah la adil kalak man banta, banci saja la merga siakap banta janah putus asa kita.

² Iteh Jahwe maka ikelengi ateta kita janah adil min kalak man banta. (Msm. 33:5) Tek kita keleng kel ate Jahwe kita janah ateNa adil min kalak man banta. Banci siidah buktina adi sipelajari undang-undang si ibereken Jahwe man bangsa Israel arah Musa. Emaka, adi sedih kel kita perban la ikelengi kalak ntah pe lit si la adil man banta, banci siperdiateken uga Undang-Undang Musa * mbuktiken maka iperdiateken Jahwe umatNa.

3. (a) Bagi si ikataken Roma 13:8-10, kai si banci siteh sanga sipelajari Undang-Undang Musa? (b) Penungkunen kai saja si man bahasenta?

³ Adi sipelajari Undang-Undang Musa, banci siteh uga perasan Jahwe, Dibatata si perkeleng. (Baca Roma 13:8-10.) Bas artikel enda, sibahas kari piga-piga undang-undang si ibereken man kalak Israel. Sijawap ka penungkunen-penungkunen enda: Kai buktina kekelengen me dasar Undang-Undang Musa? Kai buktina Undang-Undang Musa ngiahken kalak gelah adil? Uga arusna kalak si lit tanggung jawapna ndalanken Undang-Undang Musa? Janah, ise si terutama ilindungi  Undang-Undang Musa? Jawapen penungkunen e banci ngapuli kita, erban lit arapenta, janah erban kita reh deherna ras Dibata, Bapakta si perkeleng.​—Perb. 17:27; Rom. 15:4.

4. (a) Engkai maka kekelengen me dasar Undang-Undang Musa? (b) Bas Matius 22:36-40, perentah penting kai si ikataken Jesus?

⁴ Kekelengen me si ngiahken Jahwe ngelakoken kerinana. (1 Joh. 4:8) Emaka, kekelengen me dasar Undang-Undang Musa perban Jahwe si mereken undang-undang e. Lit dua perentah penting si iban Jahwe jadi dasar kerina Undang-Undang Musa. Perentah e eme ngkelengi Dibata ras ngkelengi kalak si deban. (Im. 19:18; Ul. 6:5; baca Matius 22:36-40.) Emaka, pasti lit si banci sipelajari kerna kekelengen Jahwe arah tiap undang-undang bas Undang-Undang Musa, si 600 lebih buena. Mari siperdiateken piga-piga contohna.

5-6. Kai ate Jahwe si ilakoken perbulangen ras ndehara, janah kai si iperdiatekenNa? Bereken contohna.

⁵ Teruslah setia man teman geluhndu, janah uruslah anakndu alu mehuli. Ate Jahwe sikeleng-kelengen min perbulangen ras ndeharana gelah tahan rasa lalap kekelengen kalak e. (Kej. 2:24; Mat. 19:3-6) Erlua-lua eme salah sada perbahanen si seh kel jahatna si ilakoken kalak man teman geluhna. Emaka, erlua-lua e ilarang bas perentah si pepituken arah Sepuluh Perentah. (Ul. 5:18) Erlua-lua eme dosa “man Dibata” janah seh kel kejamna e man teman geluh. (Kej. 39:7-9) Banci jadi ertahun-tahun dekahna teman geluh kalak si erlua-lua e sakit hati perban ihianati.

⁶ Iperdiateken Jahwe kel uga perbahanen perbulangen man ndeharana bage pe perbahanen ndehara man perbulangenna. Bas jaman Israel mbarenda, ate Jahwe mehuli min perbulangen man ndeharana. Adi iergai perbulangen Undang-Undang Musa, pasti keleng atena ndeharana janah la iceraikenna perban alasen si sepele. (Ul. 24:1-4; Mat. 19:3, 8) Tapi adi memang lit masalah si mbelin janah iceraiken perbulangen atena ndeharana, arus berekenna surat cerai man ndeharana e. Adi lit surat e, la banci sekalak diberu ituduh ngelakoken perbahanen seks si salah. Selain si e, sope ibereken perbulangen surat cerai e man ndeharana, arus ka ia ngerana lebe ras peminpin-peminpin kota. Emaka lit kesempaten kalak e nampatisa gelah ula surung cerai. Memang, sanga iceraiken sekalak Israel ndeharana perban alasen si mentingken bana, labo lalap idungi Jahwe masalah e. Tapi, idahNa iluh ndehara e janah igejapkenNa uga suina iakapna.​—Mal. 2:13-16.

7-8. (a) Kai perentah Jahwe man orang tua? (Nen gambar bas sampul majalah enda.) (b) Kai pelajarenna banta?

⁷ Arah Undang-Undang Musa, banci ka siteh maka anak-anak pe iperdiateken Jahwe kel. AteNa gelah aman kalak e ras ermeriah ukur. Iperentahken Jahwe orang tua mereken keperlun anakna. Tapi labo e saja, arus ka isampatina anakna e ndeher ras Dibata. Arus igunaken orang tua tiap kesempaten nampati anakna ngergai Undang-Undang Jahwe janah ngkelengi Ia. (Ul. 6:6-9; 7:13) Sada alasen iukum Jahwe bangsa Israel perban ngeri kel perbahanen kalak e man piga-piga anakna. (Jer. 7:31, 33) La banci ianggap orang tua anakna bagi barang si la perlu iperdiateken ntah pe banci ate-atena saja ibanna. Tapi arus ianggapna anakna e pasu-pasu ntah pe hadiah si meherga arah Jahwe.​—Msm. 127:3.

⁸ Pelajarenna: Iperdiateken Jahwe kel uga perbahanen perbulangen man ndeharana  bage pe perbahanen ndehara man perbulangenna. Selain si e, ateNa ikelengi orang tua min anak-anakna. Adi la mehuli perbahanen orang tua man anakna, arus kalak e ertanggung jawap man Jahwe.

9-11. Engkai maka iperentahken Jahwe gelah ula merhat nandangi jang kalak?

⁹ Ula merhat nandangi jang kalak. Perentah terakhir i bas Sepuluh Perentah ngelarang ise pe gelah ula merhat nandangi jang kalak. (Ul. 5:21; Rom. 7:7) Ibereken Jahwe undang-undang e guna ngajarken pelajaren si penting kel: Arus ijaga umat Jahwe pusuhna sekalak-sekalak, eme perukuren ras perasanna. Iteh Jahwe maka perbahanen si salah e rehna arah perasan ras perukuren si salah. (Kua. 4:23) Adi ipediat sekalak Israel turah sura-sura si salah bas pusuhna, dungna banci la mehuli perbahanenna. Pernah iban Raja Daud kesalahen si bage. Biasana, mehuli nge perbahanenna. Tapi bas sada wari, erdosa ia perban merhat ia ndehara kalak. (Jak. 1:14, 15) Erlua-lua Daud, itipuna perbulangen diberu e, janah iaturna gelah perbulangenna e mate ibunuh.​—2 Sam. 11:2-4; 12:7-11.

¹⁰ Iteh Jahwe isi pusuhta. Emaka banci itehNa sanga lit kalak Israel la patuh man undang-undang si ngelarang kalak e merhat nandangi jang kalak. (1 Kro. 28:9) Arah undang-undang enda, iteh umat Dibata maka arus ijagana perukurenna gelah ula lakokenna si salah. Tuhu-tuhu Jahwe e Bapak si pentar ras perkeleng!

¹¹ Pelajarenna: Iperdiateken Jahwe kai si lit bas pusuhta, itehNa uga kita situhuna. Labo si teridah saja si inenNa. (1 Sam. 16:7) Perukuren, perasan, bage pe perbahanenta la banci sibuniken arah Ia. Inen Jahwe sipat-sipat mehuli bas pusuhta, janah ateNa sipebelin sipat-sipat e. Tapi ate Jahwe arus ka min kita sadar sanga lit perukuren si salah janah sikendaliken gelah ula sempat siban si salah.​—2 Kro. 16:9; Mat. 5:27-30.

12. Kai si banci siteh arah Undang-Undang Musa?

¹² Arah Undang-Undang Musa pe siteh maka ngena ate Jahwe keadilen. (Msm. 37:28; Jes. 61:8) Ia jadi contoh si sempurna kerna keadilen. Adi patuh kalak Israel man undang-undang si ibereken Jahwe, ipasu-pasuNa kalak e. Tapi adi la ikutken kalak e patokenNa si adil ras benar, susah me kalak e. Mari sibahas dua undang-undang si deban arah Sepuluh Perentah.

13-14. Kai perentah si pertama ras si peduaken arah Sepuluh Perentah? Janah kai gunana adi ipatuhi kalak Israel perentah e?

¹³ Nembah Jahwe saja. Arah perentah si pertama ras si peduaken i bas Sepuluh Perentah, siteh maka kalak Israel arus nembah Jahwe saja janah la banci nembah berhala. (Kel. 20:3-6) Perentah-perentah e iban labo guna Jahwe tapi guna umatNa. Adi tetap kalak e setia man Jahwe, pasti sikap geluhna. Tapi adi isembah kalak e dibata-dibata bangsa si deban, susah me kalak e.

¹⁴ Ukuri kerna kalak Kanaan. Isembahna berhala si la nggeluh, labo Dibata si benar janah nggeluh. Akibatna ipermelakenna dirina. (Msm. 115:4-8) Sanga isembah kalak e dibatana, ilakokenna perbahanen seks si seh kel cigana, janah ikorbankenna anakna alu kejam. Adi lanai iperdiateken kalak Israel Jahwe janah ipilihna nembah berhala, kalak e pe nggo ipermelakenna dirina janah isakitina keluargana. (2 Kro. 28:1-4) Kalak Israel si lit tanggung jawapna la ikutina patoken Jahwe kerna keadilen. Isalahgunakenna kekuasanna janah isiksana kalak si lemah. (Esek. 34:1-4) Ipersingeti Jahwe kalak Israel maka  pasti iukumNa kalak si la mehuli man diberu si mbalu ras anak melumang. (Ul. 10:17, 18; 27:19) Tapi ipasu-pasu Jahwe umatNa si setia ras adil.​—1 Raj. 10:4-9.

15. Kai saja si nggo sipelajari kerna Jahwe?

¹⁵ Pelajarenna: Sanga lit kalak si ngaku ngelayani Jahwe tapi la ikutkenna patokenNa janah isakitina umatNa, labo Jahwe si salah. Tapi, keleng ate Jahwe kita janah itehNa sanga la adil kalak man banta. Banci igejapken Jahwe uga sedihna siakap, lebihen asa sekalak pernanden si nggejapken uga suina akap bayina. (Jes. 49:15) Banci saja la mis idungi Jahwe masalahta. Tapi i bas paksana, pasti ihakimiNa kerina kalak jahat si la ertobat arah perbahanenna.

16-18. Aturen kai saja si lit bas Undang-Undang Musa, janah kai pelajarenna?

¹⁶ I bas Undang-Undang Musa, lit aturen kerna erbage keadan bas kegeluhen kalak Israel tep-tep wari. Emaka, peminpin-peminpin si nggo ilantik arus ihakimina umat Jahwe alu adil ras benar. Tanggung jawap kalak e labo saja ngurus hal-hal rohani, tapi iurusna ka perjengilen ras kasus kejahaten. Mari siperdiateken contoh-contoh enda.

¹⁷ Adi ibunuh sekalak Israel kalak si deban, labo ia mis iukum mate. Ipereksa peminpin-peminpin kotana lebe kasus e sope iputusken kalak e arus ia iukum mate ntah lang. (Ul. 19:2-7, 11-13) Melala ka si arus iurus kalak e tiap wari. Isampati kalak e ndungi erbage masalah, misalna perjengilen kerna erta ras masalah perjabun. (Kel. 21:35; Ul. 22:13-19) Adi adil peminpin-peminpin e janah ipatuhi bangsa Israel Undang-Undang Musa, erguna kel e man kalak e kerina janah imuliaken me gelar Jahwe.​—Im. 20:7, 8; Jes. 48:17, 18.

¹⁸ Pelajarenna: Penting iakap Jahwe kerina perbahanenta. Perkeleng min ateNa kita janah adil man kalak. Sanga i rumah pe kita, iperdiatekenNa ranan ras perbahanenta.​—Heb. 4:13.

19-21. (a) Uga arusna perbahanen peminpin-peminpin ras hakim Israel man umat Dibata? (b) Uga Undang-Undang Musa ngelindungi umat Dibata, janah kai pelajarenna?

¹⁹ Ate Jahwe ula min umatNa terpengaruh bangsa-bangsa i sekelilingna. Emaka isuruhNa peminpin-peminpin ras hakim bas Israel ndalanken Undang-Undang alu la erpilihen. Tapi la banci kalak e kasar ntah pe keras sanga nghakimi umat Jahwe. Arus tetap kalak e adil janah perkeleng.​—Ul. 1:13-17; 16:18-20.

²⁰ Mekuah ate Jahwe umatNa, emaka ibanNa undang-undang gelah ula lit si la adil. Contohna, i bas Undang-Undang Musa lit aturen maka sekalak jelma la banci asal ituduh. Misalna, kalak si ituduh e lit hakna meteh ise si nuduh ia. (Ul. 19:16-19; 25:1) Janah sope ikataken ia ersalah, arus lit keterangen silang-langna arah dua saksi. (Ul. 17:6; 19:15) Uga  adi lit kalak Israel si ngelakoken kejahaten, tapi sekalak ngenca si ngidahsa? Ula iakapna labo kari ia iukum perban kesalahenna. Idah Jahwe kai si nggo ilakokenna. I bas keluarga, perbapan lit kuasana, tapi e lit batasna. Misalna, lit piga-piga masalah keluarga si arus ieteh peminpin-peminpin kota, janah kalak e me si erban keputusen terakhir.​—Ul. 21:18-21.

²¹ Pelajarenna: Jahwe me contoh si sempurna. Kerina perbahanenNa adil. (Msm. 89:15) Ipasu-pasuNa kalak si patuh man patokenNa, tapi iukumNa kalak si nalahgunaken kuasana. (2 Sam. 22:21-23; Esek. 9:9, 10) Piga-piga kalak jahat banci saja tempa-tempa la iukum. Tapi, pasti ihakimi Jahwe kalak e i bas waktu si itentukenNa. (Kua. 28:13) Adi la kalak e ertobat, itehna me maka “seh kel ngerina adi ndabuh ku bas tan Dibata si nggeluh.”​—Heb. 10:30, 31.

22-24. (a) Ise si terutama ilindungi Undang-Undang Musa, janah kai si banci sipelajari kerna Jahwe? (b) Persinget kai si lit bas Keluaren 22:22-24?

²² Si terutama ilindungi Undang-Undang Musa eme kalak si la banci ngelindungi dirina sendiri, misalna anak si lanai lit orang tuana, diberu si mbalu, bage pe kalak pertandang. Enggo ikataken man hakim-hakim i Israel, “Ola rampas hak-hak kalak pertandang ras hak anak-anak melumang; bage pe ola buat uis diberu balu-balu jadi jaminen pinjamenna.” (Ul. 24:17) Iperdiateken Jahwe kerina kalak si lemah bas masyarakat janah  keleng ateNa kalak e. Janah iukumNa kerina si la mehuli perbahanenna man kalak e.​—Baca Keluaren 22:22-24.

²³ Guna ngelindungi anggota keluarga arah kejahaten seksual, bas Undang-Undang Musa pe lit larangen ngelakoken kerina jenis inses, eme hubungen seksual ras anggota keluarga sendiri. (Im. 18:6-30) Perbahanen e ipediat janah iijinken bangsa-bangsa i sekeliling Israel. Tapi umat Jahwe la bage. Bali bagi Jahwe, ciga kel iakap kalak e kejahaten si bage rupana.

²⁴ Pelajarenna: Ate Jahwe kalak si ibereNa tanggung jawap arus ngkelengi ras mperdiateken kerina kalak si iawasina. Segat ate Jahwe kejahaten seksual. Janah, ipastikenNa gelah kerina kalak ilindungi janah ndatken keadilen, terutama kalak si lemah.

25-26. (a) Engkai maka kekelengen ras keadilen e bali bagi kesah ras kegeluhen? (b) Kai nge si ibahas bas artikel si peduaken arah empat artikel enda?

²⁵

Kekelengen ras keadilen e bali bagi kesah ras kegeluhen si la kel terpesirang. Adi tek kita adil perbahanen Jahwe man banta, reh kelengna ateta Ia. Janah, adi keleng ateta Dibata ras patokenNa si benar, teriahken me kita ngkelengi kalak si deban janah adil man kalak e.

²⁶ Perjanjin Undang-Undang Musa erban kalak Israel reh deherna ras Jahwe. Tapi kenca ikorbanken Jesus dirina jadi tebusen, Undang-Undang Musa lanai berlaku, emaka lanai perlu umat Dibata ndalankenca. Iganti me undang-undang e alu undang-undang si terulin. (Rom. 10:4) Nina Rasul Paulus, Undang-Undang Musa e “bayangen ngenca kerna kai si mehuli si nandangi reh.” (Heb. 10:1) Bas artikel si peduaken arah empat artikel enda, sibahas kari kai saja si mehuli e bage pe ngkai maka kekelengen ras keadilen penting bas runggun Kristen.