1. Kai buktina sekalak Samaria si ipepalem Jesus ngata bujur?

LIT sepuluh dilaki si sakit kusta. Mekelek kel keadan kalak e, janah la akapna mungkin ia malem. Tapi bas sada wari, dauh-dauh nari idah kalak e Jesus, Guru si Hebat. Pernah ibegi kalak e ipepalem Jesus erbage-bage pinakit, janah tek kalak e maka Jesus pe banci mpepalem ia. Emaka nina kalak e alu sora megang, “O Jesus, Guru, mekuah min atendu kami!” Ipepalem Jesus me sepuluh dilaki e. Pasti ngata bujur kel kalak e kerna lias ate Jesus. Tapi lit sekalak arah kalak e si la bas pusuhna saja ngata bujur. Ibuktikenna ka maka iergaina * kai si nggo ilakoken Jesus. Kenca ipepalem, teriahken kalak Samaria e ‘muji Dibata alu sora si megang.’​—Luk. 17:12-19.

2-3. (a) Engkai maka mon-mon lupa kita ngata bujur? (b) Kai si man bahasenta bas artikel enda?

² Bagi kalak Samaria ndai, kita pe nggit ngata bujur man kalak si mehuli banta. Tapi mon-mon, banci jadi lupa kita ngata bujur arah ranan ntah pe perbahanenta.

³ Bas artikel enda, sibahas kari ngkai maka penting ngata bujur arah ranan ras perbahanenta. Banci kita erlajar arah piga-piga kalak bas Pustaka si ngata bujur ras si lang. Kenca si e, sibahas ka kai saja si banci silakoken i bas ngata bujur.

4-5. Engkai maka arus kita ngata bujur?

⁴ Dibata Jahwe jadi contoh man banta i bas ngata bujur. Salah sada carana eme ipasu-pasuNa kalak si erban meriah ukurNa. (2 Sam. 22:21; Msm. 13:6; Mat. 10:40, 41) Janah iiahken Pustaka kita, “Jadilah kalak si ngusih Dibata selaku anak-anak si ikelengi.” (Ep. 5:1) Emaka alasen si pentingna kita ngata bujur eme perban siusih ateta Jahwe.

⁵ Lit ka alasen si deban ngkai maka nggit kita ngata bujur. Sanga nggo iergai kalak siakap kita, meriah ukurta. Sanga siergai ka kalak, meriah siban ukurna. Adi ngata bujur kita man kalak si erusaha nampati kita ntah pe mereken kai si iperluken kita, itehna maka erguna kai si ilakokenna e. Dungna, reh kompakna kita ras ia.

6. I bas kai saja pengatan bujur e seri ras apel emas?

⁶ Pengatan bujurta e seh kel ergana. Nina Pustaka, “Kata si ibelasken i bas paksana bali kap ras buah emas si iamparken i bas pinggan pirak.” (Kua. 25:11) Bayangkenlah uga jilena sada buah arah emas, misalna apel emas, si itama i bas pinggan ntah pe piring pirak. Pasti seh kel ergana apel emas e! Uga nge perasanndu adi ibereken kalak hadiah si bage bandu? Pengatan bujurndu pe banci seh kel ergana bagi hadiah e. Janah ukurilah enda: Sada apel emas banci ndekah kel tahan. Bage ka pe, adi ngata bujur kita man kalak, banci ingetna janah iergaina e segedang geluhna.

7. Menurut Masmur 26:6-8, kai si ilakoken Daud ras penulis masmur si deban bukti kalak e ngata bujur?

⁷ Enterem umat Dibata mbarenda si nggit ngata bujur. Contohna eme Daud. (Baca  Masmur 26:6-8.) Meherga janah meriah akapna nembah Jahwe, janah si e teridah arah perbahanenna. Isumbangkenna melala barang si meherga guna mbangun rumah pertoton. Keturunen Asap ngataken bujur alu nulisken masmur ntah pe lagu-lagu pujin. Bas sada lagu, ngata bujur kalak e man Dibata janah ikatakenna maka hebat kel iakapna perbahanen Jahwe si luar biasa. (Msm. 75:2) Jelas me, ngata bujur kel ate Daud ras keturunen Asap man Jahwe kerna kerina pasu-pasu si nggo ialokenna. Kai saja nge si banci ilakokenndu guna ngusih kalak si nulis masmur e?

8-9. Kai si ilakoken Rasul Paulus bukti ngata bujur ia man turang seninana, janah mbelin kemungkinenna kai hasilna?

⁸ Iergai Rasul Paulus turang seninana, janah si e teridah arah pengeranana kerna kalak e. Sanga sisada ia ertoto, lalap ia ngata bujur man Dibata kerna turang seninana e. Pengatan bujurna pe teridah arah suratna man kalak e. Bas Roma 16:1-15, itulis Paulus 27 gelar turang seninana. Ikataken Paulus maka Persila ras Akuila “nggit mereken kesahna” guna ia. Ikatakenna ka maka ‘nggo nterem turang senina si isampati’ Pebe, termasuk Paulus. Keleng ate Paulus turang seninana e, janah ipujina kerja keras kalak e.

⁹ Iteh Paulus turang seninana la sempurna. Tapi si iperdiatekenna kel eme sipat mehuli kalak e. Enda teridah bas bagin penutup suratna man turang senina i Roma. Bayangken, pasti terpegegehi kel turang senina e sanga ibegina surat Paulus ibacaken alu megang bas runggun! Hasilna, mbelin kemungkinenna reh kompakna kalak e ras Paulus. Lalap nge kam ngata bujur man turang senina i bas runggunndu kerna ranan ras perbahanenna si mehuli?

10. Kai si banci sipelajari arah cara Jesus ngata bujur man pengikutna?

¹⁰ Bas pedah Jesus man piga-piga runggun i Asia Kecil, ngata bujur ia kerna kai si nggo ilakoken pengikutna. Contohna, imulaina pedahna man runggun i Tiatira alu ngataken, “Kuteh kai si ilakokenndu, kekelengenndu, kinitekenndu, pelayanenndu, bage pe kerna kesabarenndu. Janah kerna kai si ilakokenndu gundari buen asangken si tangtangna mbarenda.” (Ket. 2:19) Labo ngenca ikataken Jesus maka nggo reh buena si ilakoken kalak e. Tapi ipujina ka sipat-sipat si mejile si ngiahken kalak e ngelakoken si mehuli. Aminna pe piga-piga kalak i Tiatira perlu inasehati Jesus, tapi tetap imulaina janah idungina pedahna alu kata-kata si mpegegehi. (Ket. 2:25-28) Ukurilah kuasa Jesus selaku kepala kerina runggun. Labo arus ia ngata bujur man banta kerna kai si nggo silakoken man bana. Aminna pe bage, tetap ia ngata bujur. Enda contoh si seh kel ulina man pertua-pertua!

11. Menurut Heber 12:16, uga nge tanggapen Esau kerna kai si badia?

¹¹ Si sedihna, lit piga-piga kalak bas Pustaka si la ngata bujur. Contohna, la iergai Esau kai si badia, amin pe orang tua si mpebelin ia ngkelengi ras nghamati Jahwe. (Baca Heber 12:16.) Kai buktina Esau bage? La iukurina lebe sanga idayakenna hakna selaku anak sintua man agina, Jakup, guna sada mangkok bubur kacang ngenca. (Kej. 25:30-34) Dungna, menyesal kel Esau perban keputusen si nggo  ibanna e. Tapi nggo jelas maka la iergaina kai si lit bas ia. Emaka situhuna la banci ia protes sanga la datna pasu-pasu selaku anak sintua.

12-13. Kai buktina kalak Israel la meteh ngata bujur, janah kai akibatna?

¹² Melala alasen kalak Israel guna ngata bujur. Enggo ibebasken kalak e arah perbudaken kenca iban Jahwe Sepuluh Tulah i Mesir. Kenca si e, iselamatken Dibata kalak e alu ngkernepken kerina pasuken Mesir bas Lawit Merah. Perban ngata bujur kel kalak Israel, iendekenna lagu pujin man Jahwe. Tapi terus nge kalak e ngata bujur?

¹³ Bas pudi wari, lit ka tantangen si iadapi kalak Israel. La ndekah kenca si e, lupa kalak e kerina si mehuli si nggo ilakoken Jahwe. Janah ilakoken kalak e kai si mbuktiken maka lanai ia ngata bujur. (Msm. 106:7) Kai si ilakokenna? “Kerina kalak e jungut-jungut man Musa ras Harun.” Situhuna, Jahwe nge si ijungut-junguti kalak e. (Kel. 16:2, 8) Kecewa kel Jahwe perban la kalak e meteh ngata bujur. Bas pudi wari, inubuatken Jahwe maka kerina kalak Israel mate bas taneh mesawang, kecuali Josua ras Kalep. (Bil. 14:22-24; 26:65) Mari sibahas uga carana gelah la siusih contoh si la mehuli janah siusih contoh si mehuli.

14-15. (a) Uga carana perbulangen ras ndehara siergan? (b) Kai si banci ilakoken orang tua guna ngajari anakna ngata bujur?

¹⁴ I bas keluarga. Adi tiap anggota keluarga nggit ngata bujur, kerina si bas keluarga e banci ndatken manpaat. Adi rusur ngata bujur perbulangen man ndeharana janah ndehara pe bage, reh deherna me kalak e. Reh nukahna ka iakap kalak e guna ngampuni. Adi iergai perbulangen ndeharana, labo ngenca iperdiatekenna ranan ras perbahanenna si mehuli, tapi ‘ipujina’ ka ia. (Kua. 31:10, 28) Janah, ikataken ndehara si pentar man perbulangenna kai saja si iergaina arah ia.

¹⁵ Orang tua, kai si banci ilakokenndu guna ngajari anakndu ngata bujur? Ingetlah, ranan ras perbahanenndu pasti iusih anak-anakndu. Emaka jadi contohlah kam. Katakenndulah bujur man anakndu sanga lakokenna si mehuli bandu. Selain si e, ajarilah anakndu ngata bujur sanga lit si mehuli man bana. Ajarilah anakndu gelah  itehna maka arus pusuhna nari ia ngata bujur, janah gelah itehna ka maka melala kel gunana ngata bujur. Misalna, sekalak diberu si gelarna Clary ngataken, “Sanga umur mamak 32 tahun, rempet arus sisada ia mpebelin kami telu anakna. Janah sanga umurku 32 tahun, kuukuri ka uga serana iakap mamak mbarenda. Emaka, kukataken man mamak maka kuergai kel kerina pengorbanenna mpebelin kami teluna. Mbaru-mbaru enda ikataken mamak maka kena kel ku pusuhna kai si kukataken e. Ikatakenna ka maka rusur iukurina e, si erbanca reh riahna akapna ndalani geluhna tiap wari.”

16. Ceritaken sada contoh uga ngata bujur banci mpegegehi kalak si deban.

¹⁶ I bas runggun. Adi ngata bujur kita man turang seninata, terpegegehi kalak e. Contohna Jorge, sekalak pertua si umurna 28 tahun si mekelek pinakitna. Enggo sebulan ia la banci reh ku perpulungen. Kenca nggo banci pe ia reh, lenga banci ipesehna baginna. Nina Jorge, “La kuakap merga bangku perban lit keterbatasenku janah la ku ngasup ngelakoken tanggung jawapku bas runggun. Tapi bas sada wari, kenca dung perpulungen, ikataken sekalak senina bangku, ‘Bujur melala ya, nggo jadi contoh kam man keluargaku. Meriah kel akap kami megi khotbah-khotbahndu piga-piga tahun enda. Terpegegehi kel kiniteken kami.’ Megogo kel ateku janah naktak iluhku. Terpegegehi kel aku.”

17. Menurut Kolose 3:15, uga carana kita ngata bujur man Jahwe kerna pemereNa?

¹⁷ Man Dibata si nggit mere. Enggo bereken Jahwe melala kel pangan rohani banta. Misalna, sidat petunjuk si erguna arah perpulungen, majalah, bage pe situs webta. Sanga ibegindu sada khotbah, bacandu sada artikel, ntah pe tontonndu JW Broadcasting, pernah nge cocok kel e iakapndu man bandu? Uga carana ngata bujur man Jahwe? (Baca Kolose 3:15.) Salah sada carana alu lalap sikataken bujur man baNa bas pertotonta kerna kerina pemereNa si mehuli e.​—Jak. 1:17.

18. Kai buktina siergai Bale Kerajanta?

¹⁸ Ngata bujur ka kita man Jahwe adi sijaga ingan perpulungenta tetap bersih ras rapi. Perlu ratur sibersihken ras siurus Bale Kerajanta. Selain si e, kalak si nggunaken perlengkapen tata sora ras video perlu  hati-hati gelah ula ceda. Adi mehuli siurus Bale Kerajanta, ndekah Bale e tahan janah la perlu melala si man pesikapen. Alu bage, melala dana si banci ipake guna mbangun ras mpesikap Bale Kerajan i sebelang doni.

19. Kai si banci ipelajarindu arah pengalamen pengawas wilayah ras ndeharana ndai?

¹⁹ Man kalak si kerja keras banta. Adi ngata bujur kita, banci saja berubah perukuren kalak kerna tantangen si iadapina. Perdiatekenlah pengalamen sekalak pengawas wilayah ras ndeharana. Sanga mulih ku inganna erberngi, latih kel iakap kalak e perban nggo sada wari ben kalak e erberita bas musim dingin. Seh kel bergehna paksa si e, emaka erjeket ndeharana e medem. Paginna, ikatakenna man perbulangenna maka lanai ia ngasup ngelayani bas dahin keliling. Kenca e, bas pagi-pagi e ka, reh me surat kantor cabang nari man bana. Bas surat e, ipuji ia perban megenggeng ia ngelayani. Ikataken ka i je pasti mesera kel pindah-pindah tiap minggu. Nina perbulangenna, “Kena kel ku pusuh ndeharaku pujin e, emaka lanai pernah ikatakenna ngadi atena arah dahin e. Gundari ia ka rusur si mpegegehi aku gelah tetap ngelayani sanga ngadi ateku.” Enggo menam 40 tahun kalak e tetap ngelayani bas dahin keliling.

20. Kai si perlu siusahaken tiap wari, janah ngkai?

²⁰ Mbera siusahaken ngata bujur arah ranan ras perbahanenta tiap wari. Adi bas pusuhta nari silakoken e, banci saja terpegegehi kalak si deban sanga ngadapi masalah bas doni si la meteh ngata bujur enda. Janah adi ngata bujur kita, banci lit temanta seh rasa lalap. Si pentingna, siusih me Jahwe Bapakta, si nggit mere ras ngergai.