1. Kai buktina telu Saksi Jahwe ndai tetap setia man Jahwe?

PERDIATEKEN kai si iadapi telu Saksi Jahwe enda. (1) Sekalak anak muda si diberu sangana bas sekolah. Isuruh guruna ia bage pe kerina murid i kelasna ikut bas sada perayan. Itehna perayan e la ngena ate Dibata, emaka mis itulakna alu mehamat. (2) Sekalak anak muda si dilaki si permela sangana erberita rumah ku rumah. Itehna maka sada rumah nari eme rumah teman sada sekolahna si pernah ngejek Saksi Jahwe. Tapi tetap idahina rumah e janah erberita ia ku je. (3) Sekalak kepala keluarga kerja keras cari makan man keluargana. Bas sada wari isuruh bosna ia ngelakoken kai si ngelanggar hukum ntah pe la jujur. Tapi ijelaskenna arus ia jujur janah patuh man hukum perban bage si ipindoken Dibata man umatNa, amin pe banci saja ia ipecat bas dahinna nari.​—Rom. 13:1-4; Heb. 13:18.

2. Penungkunen kai saja si man bahasenta, janah ngkai?

² Sipat kai nge si lit bas kalak ndai teluna? Banci saja nindu perpang ras jujur. Tapi lit sada sipat si pentingna kel bas kalak e eme setia. Setia kalak e man Jahwe. La kalak e nggit ngelanggar patoken Dibata. Banci ia bage perban ia setia. Pasti bangga kel Jahwe ngidah kalak e. Kita pe bangga ateta siban Bapakta si i surga. Emaka mari sibahas penungkunen enda: Kai kin setia e? Engkai maka arus kita setia? Janah kai si arus silakoken gelah reh belinna sura-surata tetap setia bas masa si susah enda?

3. (a) Kai si ilakoken umat Dibata bukti ia setia? (b) Kai contohna gelah banci siangkai erti kata “setia”?

³ Selaku umat Dibata, kai nge buktina kita setia? Arus sikelengi Jahwe alu bulat ukur janah terus patuh man baNa. Emaka banci silakoken kai si ngena ateNa. Mari sibahas uga kata “setia” igunaken i bas Pustaka. Kata bas bahasa Heber si iterjemahken jadi “setia” ertina lengkap, sehat, ntah pe la lit kurangna. Contohna, sanga ipersembahken kalak Israel korban binatang man Jahwe, menurut Undang-Undang Musa binatang e arus sehat. * (Im. 22:21, 22) La banci ipersembahken umat Dibata binatang si sakit bage pe binatang si la lit sembelah nahena, cupingna, ntah pe matana. Penting kel iakap Jahwe binatang e lengkap, sehat, ntah pe la lit kurangna. (Mal. 1:6-9) Engkai maka penting kel e iakap Jahwe? Sanga situkur ateta buah, buku, ntah pe alat-alat si deban, la kita nggit nukur si macik ntah pe si ceda. Pasti situkur si lengkap, ntah pe la lit kurangna. Jahwe pe bage. AteNa lengkap min kekelengenta ras kesetianta man baNa, ntah pe la lit kurangna.

4. (a) Engkai maka kalak si la sempurna banci setia? (b) Menurut Masmur 103:12-14, kai si iarapken Jahwe arah kita?

⁴ Arus nge kita sempurna gelah banci setia? Siteh maka melala kekurangenta, melala salahta. Lit dua alasen ngkai maka labo arus kita sempurna gelah banci setia. Si pertama, labo kekurangenta si iperdiateken Jahwe. Nina Pustaka, “Adi ateNdu ertaktak kerna dosa kami, ise banci pulah i bas ukumenNdu nari?” (Msm. 130:3) ItehNa kita la sempurna ras erdosa. Nggit ka Ia ngampuni kita. (Msm. 86:5) Si peduaken, iteh Jahwe keterbatasenta, janah la iarapkenNa lebih asa si banci silakoken. (Baca Masmur 103:12-14.) Jadi kai maksudna kita lengkap, ntah pe la lit kurangna, i lebe-lebe Jahwe?

5. Bas umat Jahwe, ngkai maka kekelengen me kunci gelah banci setia?

⁵ Bas umat Jahwe, kekelengen me kunci gelah banci setia. Kekelengenta ras kesetianta man Dibata eme Bapakta si i surga arus terus lengkap, ntah pe la lit kurangna. Adi sanga iuji pe kita tetap bage kekelengenta, e buktina kita setia. (1 Kro. 28:9; Mat. 22:37) Mari siperdiateken mulihi telu kalak Saksi si nggo sibahas bas awal artikel enda. Engkai maka bage ilakoken kalak e? La nge ate anak muda si diberu e meriah-riah bas sekolahna? Ntah, meriah nge akap anak muda si dilaki e iejek sanga erberita? Ntah, ipecat nge ate kepala keluarga ndai bas dahinna nari? Pasti lang. Iteh kalak e maka benar patoken Jahwe, janah si pentingna bas kalak e erban meriah ukur Bapakna si i surga. Perban keleng ate kalak e Jahwe, iukurina lalap Ia sope erban keputusen. Alu bage, ibuktikenna maka ia setia.

6. (a) Engkai maka perlu kita setia? (b) Uga maka banci Adam ras Hawa lanai setia?

⁶ Engkai maka kita kerina perlu setia? Perlu kita setia perban nggo itantang Setan Jahwe, janah kita sekalak-sekalak pe itantangna. Mbarenda bas Taman Eden, malekat si mberontak e njadiken dirina Setan, ntah pe “Si Nentang.” Ipitnahna Jahwe, tempa-tempa ikatakenna maka Jahwe e  Penguasa si jahat, mentingken bana, ras la jujur. Si sedihna, Adam ras Hawa pe ikut mberontak ras Setan ngelawan Jahwe. (Kej. 3:1-6) Adi la min ndai kalak e mberontak, melala kel kesempaten kalak e bas Taman Eden mpebelin kekelengenna man Jahwe. Tapi sanga itantang Setan Dibata, kekelengen kalak e la lengkap, ntah pe lit kurangna. Bas pudi wari, arah situasi Jop, turah ka penungkunen: Lit nge manusia si tetap setia man Dibata Jahwe perban keleng atena Ia? Ntah pe, banci nge manusia setia?

7. Bagi si ikataken bas Jop 1:8-11, uga perasan Jahwe ngidah kesetian Jop? Tapi uga perasan Setan?

⁷ Jop nggeluh sanga kalak Israel i Mesir. Bas masa e, la lit kalak si bagi Jop setiana. Bali bagi kita, Jop pe la sempurna. Pernah kang ia erban salah. Tapi keleng ate Jahwe Jop perban setia ia. Banci saja nggo itantang Setan Jahwe kerna kesetian manusia. Emaka isuruh Jahwe Setan mperdiateken Jop. Kai si ilakoken Jop bas geluhna mbuktiken Setan e perbual! Emaka, ipindo Setan gelah kesetian Jop iuji. Tek Jahwe man temanNa Jop, emaka ipediatNa Setan ncubai ia.​—Baca Jop 1:8-11.

8. Kai saja si iban Setan man Jop?

⁸ Setan e kejam, janah pemunuh kap ia. Ibuatna kerina si lit bas Jop, ibuatna ertana, ibunuhna suruh-suruhenna, janah mejin banna gelar Jop. Iserangna ka keluarga Jop janah ibunuhna sepuluh anakna. Kenca si e, banna Jop sakit. Ibanna Jop kena bisul si parah mulai tapak-tapak nahena nari terus ku takalna. Putus asa ndehara  Jop janah ceda kel atena emaka isuruhna Jop nyerah saja, janah isuruhna ka isumpahi Jop Dibata jenari mate. Mate saja nge ate Jop, tapi tetap ia setia. Kenca si e iban Setan ka cara si deban. Igunakenna telu teman Jop. Idahi kalak e Jop piga-piga wari dekahna, tapi labo iapuli kalak e ia. Malahen irawa-rawaina Jop janah isalahken kalak e ka ia. Ikataken kalak e maka Dibata me si erban ia susah janah labo diate Dibata kesetianna. Ikataken kalak e ka maka Jop kalak jahat emaka patut datna kerina si la mehuli e!​—Jop 1:13-22; 2:7-11; 15:4, 5; 22:3-6; 25:4-6.

9. Amin pe melala masalahna, kai si la ilakoken Jop?

⁹ Uga tanggapen Jop ngadapi kerina masalah e? Perban ia la sempurna, merawa ia, ipersingetina temanna si palsu e, janah ikatakenna kai si dungna isesalina. Belinen sura-surana mbuktiken ia benar asangken mbuktiken Dibata benar. (Jop 6:3; 13:4, 5; 32:2; 34:5) Tapi, aminna pe susah kel keadan Jop, labo ia nggit ngelawan Dibata Jahwe. Ia pe la tek man bual temanna si palsu e. Nina, “Ndigan pe la aku nggit ngatakenca maka kena benar! Ngayak mate pe aku tetap aku setia man Dibata!” (Jop 27:5, NW) Kata-kata e mbuktiken maka tetap ate Jop setia, la soal kai pe si terjadi. La ia nggit nyerah. Kita pe banci bage.

10. Ja nari siteh maka kita pe ikut bas tuduhen Setan man Jop?

¹⁰ Engkai maka tuduhen Setan man Jop lit ka pengaruhna man banta? Perban situhuna, ituduh Setan maka labo tuhu-tuhu keleng ateta Dibata Jahwe, pasti lanai silayani Jahwe guna nelamatken dirita, janah ikatakenna maka labo mungkin kita banci setia! (Jop 2:4, 5; Ket. 12:10) Uga perasanndu megisa? Pasti sakit kel akapndu! Tapi, cuba ukuri enda: Ipediat Jahwe Setan nguji kesetianndu. Perban tek Jahwe man bandu, ibereNa kam kesempaten si luar biasa guna mbuktiken kam setia janah mbuktiken Setan perbual. Tek Jahwe pasti banci kam setia, janah erjanji Ia nampati kam ngelakokenca. (Heb. 13:6) Sada kehamaten man banta perban Penguasa si meganjangna bas alam semesta enda tek banta! Enggo nge itehndu ngkai maka penting kel setia? Adi setia kita, banci sibuktiken maka kerina si ikataken Setan e la tuhu. Selain si e, banci ka simuliaken gelar Bapakta si i surga janah siakui maka cara Dibata merentah me si mehulina. Kai si arus silakoken gelah banci tetap setia?

11. Kai si banci sipelajari arah Jop?

¹¹ Bas “wari-wari pendungi” enda, reh buena serangen Setan man umat Dibata. (2 Tim. 3:1) Bas masa si sulit e, kai si arus silakoken gelah reh belinna sura-surata tetap setia? Lit ka si banci sipelajari arah Jop. Ndekah sope ia iuji, nggo ibuktikenna maka tetap ia setia man Jahwe. Lit telu si banci sipelajari arah Jop kerna kai si arus silakoken gelah reh belinna sura-surata tetap setia. Mari sibahas.

12. (a) Bagi si ikataken bas Jop 26:7, 8, 14, kai si erbanca maka luar biasa iakap Jop Jahwe janah iergaina kel Ia? (b) Kai si arus silakoken gelah reh bagesna pengerganta man Jahwe?

¹² Perban luar biasa kel iakap Jop kerina perbahanen Jahwe, reh kelengna atena Ia. Iban Jop waktuna guna ngukuri ciptan Jahwe si luar biasa. (Baca Jop 26:7, 8, 14.) Luar biasa kel akapna sanga iukurina kerna doni, langit, awan, bage pe  lenggur. Sadar ia maka sitik kel ngenca si itehna kerna kerina ciptan Jahwe. Iergai Jop ka kata-kata Jahwe, nina, “Meherga kel kuakap kata-kataNa.” (Jop 23:12, NW) Luar biasa kel iakapna Jahwe janah iergaina kel Ia. Keleng kel atena Ia janah meriah atena ibanna ukur Bapakna e. Dungna, reh belinna sura-surana tetap setia. Kita pe arus bagi Jop. Buen siteh kerna ciptan si luar biasa asangken kalak bas jaman Jop. Janah Pustaka si bas kita nggo lengkap emaka banci siteh uga kin situhuna Jahwe e. Luar biasa kel siakap sanga sipelajari kerina e. Dungna, siergai Jahwe janah luar biasa siakap Ia. Enda me si ngiahken kita ngkelengi Ia ras patuh man baNa janah reh belinna sura-surata tetap setia.​—Jop 28:28.

13-14. (a) Menurut Jop 31:1, kai buktina Jop patuh man Dibata? (b) Uga carata ngusih Jop?

¹³ Banci Jop tetap setia perban patuh ia i bas kai pe. Iteh Jop maka gelah banci setia, arus ia patuh man Jahwe. Situhuna adi nggo biasa kita patuh, reh belinna sura-surata tetap setia. Terus iusahaken Jop patuh man Dibata tiap wari. Contohna, ijagana kel perbahanenna sanga erurusen ras diberu. (Baca Jop 31:1.) Perban ia nggo erjabu, itehna maka la cocok adi perhatian kel ia man diberu si deban selain ndeharana. Gundari melala kel godan ngelakoken perbahanen seks si salah. Bali bagi Jop, la kita nggit mereken perhatian si la cocok man kalak si la teman geluhta. La ka kita nggit ngenen gambar-gambar porno si i japa pe lit gundari. (Mat. 5:28) Adi tiap wari sikuasai dirita, reh belinna sura-surata tetap setia.

¹⁴ Patuh ka Jop man Jahwe bas carana rukur kerna erta. Iteh Jop maka adi erta akapna si pentingna, nggo mbelin kel dosana janah arus ia iukum. (Jop 31:24, 25, 28) Gundari melala kalak si ngayaki erta. Adi  siusahaken gelah benar perukurenta kerna sen ras erta, bagi pedah Pustaka, banci reh belinna sura-surata tetap setia.​—Kua. 30:8, 9; Mat. 6:19-21.

15. (a) Upah kai si iukuri Jop si erbanca banci ia tetap setia? (b) Kai gunana adi siinget upah si nandangi ibereken Jahwe?

¹⁵ Tetap Jop setia perban terus iingetna upah si pasti ibereken Dibata man bana. Tek ia maka pasti iergai Dibata kesetianna. (Jop 31:6, NW) Amin gia mberat kel masalahna, tek Jop pasti iupahi Jahwe ia pagi. Enda me si erbanca maka banci ia tetap setia. Meriah kel ukur Jahwe ngidah Jop setia, emaka melala kel iberekenNa pasu-pasu amin pe ia lenga sempurna! (Jop 42:12-17; Jak. 5:11) Janah lit denga pasu-pasu si terbelinen man Jop pagi. Tuhu-tuhu nge kam tek maka ipasu-pasu Jahwe kam adi setia? Dibata lenga berubah. (Mal. 3:6) Adi siinget iergai Jahwe kesetianta, siusahaken kel tetap setia janah tek kita banci sidat masa depan si luar biasa.​—1 Tes. 5:8, 9.

16. Kai si arus siusahaken?

¹⁶ Emaka, usahakenlah tetap setia! Mon-mon guna tetap setia, sisada siakap banta. Tapi labo kam pernah sisada. Kam termasuk bas jutan kalak si tetap setia i sebelang doni. Termasuk ka kam bas nterem dilaki ras diberu si erkiniteken, si tetap setia bas jaman si mbarenda amin pe arus mate. (Heb. 11:36-38; 12:1) Mbera terus siusahaken tetap setia bagi Jop, si ngataken, “Ngayak mate pe aku tetap aku setia man Dibata!” Mbera kesetianta erban Jahwe imuliaken seh rasa lalap!