Bas tahun 1913, iperidiken me bapakku, John Mills, i kota New York City sanga umurna 25 tahun. Si mpeseh khotbah peridinna eme turang seninata Russell. La ndekah kenca si e, lawes me Bapak ku Trinidad. I je erjabu ia ras sekalak Siswa Alkitab si semangat si gelarna Constance Farmer. Isampati Bapak temanna eme William R. Brown mutarken “Drama-Foto Penciptaan.” Terus kalak e ras-ras ngelakokenca seh ngasa keluarga Brown itugasken ku Afrika Barat tahun 1923. Bapak ras Mamak tetap tading i Trinidad. Kalak e duana erpengarapen guna nggeluh i surga.

Lit siwah anak orang tuaku. Anak sintua iban kalak e gelarna Rutherford, seri ras gelar presiden Lembaga Alkitab dan Risalah Menara Pengawal paksa si e. Aku lahir tanggal 30 Desember 1922, janah iban me gelarku sue ras gelar Clayton J. Woodworth, ia editor majalah The Golden Age (gundari Sadarlah!). Kerina kami ndatken pendidiken dasar iban orang tua, tapi khususna iahken kalak e kami gelah lit cita-cita rohani kami. Beluh kel Mamak ngajar ras mpetetap ukur kalak alu nggunaken Pustaka. Bapak meriah akapna cerita kerna kisah-kisah bas Pustaka. Rusur iperagakenna tokoh Pustaka si iceritakenna gelah kisah e reh jelasna.

La sia-sia usaha kalak e. Telu arah lima anak kalak e si dilaki ikut Sekolah Gilead. Telu turang kami nggo ertahun-tahun merintis i Trinidad ras Tobago. Arah ajaren ras usihen orang tua kami, tempa-tempa isuanna kami ‘i rumah Jahwe.’ Perban isampati kalak e kami, banci kami tetap lit i je janah “turah i bas rumah Dibatanta.”​—Msm. 92:14.

Dahin erberita iaturken arah rumah kami. Rusur perintis-perintis pulung i jenda janah cakap-cakap kalak e kerna turang seninata George Young, sekalak utusen injil Kanada si pernah reh ku Trinidad. Semangat kel orang tuaku cerita kerna temanna erberita mbarenda, eme keluarga Brown, si paksa  si e nggo i Afrika Barat. Kerina e ngiahken aku mulai erberita sanga umurku sepuluh tahun.

Sanga si e, terus terang kel majalahta. I je ijelasken kerna kai si la mehuli i bas agama palsu, perdagangen si merangap, ras politik si kotor. Akibatna, bas tahun 1936 isuruh peminpin-peminpin gereja gelah ilarang gubernur Trinidad kerina publikasi Menara Pengawal. Ibuniken kami publikasi kami tapi terus ipake kami e ngasa kerina persedian nggo keri. Erberita kami alu make plakat ras mbagiken selebaren janahna erbaris ras naik sepeda. Selain si e, radu ras piga-piga turang senina arah kota Tunapuna, erberita kami alu motor si lit pengeras sorana, janah seh kami ku daerah-daerah si ndauhna kel i Trinidad. Meriah kel akap kami! Kerina dahin rohani e erban turah sura-suraku iperidiken sanga umurku 16 tahun.

Warisen rohani arah keluarga kami bage pe pengalamen-pengalamen ndai kerina erban reh belinna sura-suraku jadi utusen injil. Sura-sura e tetap gara i bas pusuhku sanga lawes aku ku Aruba tahun 1944 janah kerja sama aku ras turang seninata Edmund W. Cummings. Meriah kel akap kami perban banci ipepulung kami sepuluh kalak ku acara Peringet-ingeten tahun 1945. Setahun kenca si e, lit me runggun si pertama bas pulau e.

La ndekah kenca si e, erberita aku alu la resmi man temanku erdahin eme Oris Williams. Ibelana kel ajaren si nggo itehna mbarenda. Tapi kenca erlajar Pustaka ia, dungna iangkaina uga situhuna ajaren Pustaka janah iperidiken ia tanggal 5 Januari 1947. Bas pudi wari, singenan kami duana janah dungna erjabu. Mulai me ia merintis bulan November 1950. Reh riahna geluhku kenca nggo jumpa ras Oris.

Bas tahun 1955, sada kehamaten kel iakap kami perban iundang kami ikut Sekolah Gilead. Gelah banci ikut sekolah e, ngadi kami erdahin, dayaken kami rumah ras barang-barang kami, janah tadingken kami Aruba. Bas 29 Juli 1956, lulus kami arah kelas Gilead si pe-27-ken janah itugasken ku Nigeria.

Iinget Oris mulihi, “Alu kesah si badia, banci isampati Jahwe sekalak jelma gelah ngasup ia ndalani pagit ras tebuna kegeluhen utusen injil. La bagi perbulangenku, la pernah lit sura-suraku jadi utusen injil. Pangen kuakap i rumah saja janah ngurus anak-anak. Tapi dungna berubah pikiren aku kenca kuangkai penting kel mberitaken berita si meriah e. Sanga lulus kami Sekolah Gilead, lanai aku sabar erberita selaku utusen injil. Sanga masuk kami ku kapal Queen Mary, reh me Worth Thornton, si erdahin ras turang seninata Knorr guna ngataken ‘Manjar-anjar kena!’ Ikatakenna maka bas Betel me kari kami ngelayani. Megi si e, kecewa aku sitik. Tapi, banci aku mis cocok i Betel janah meriah kuakap i je. Erbage-bage tugasku sanga i je. Si meriahna kel kuakap eme jadi resepsionis. Meriah kuakap jumpa ras kalak, janah tugas enda erban aku banci jumpa ras nterem turang seninata i Nigeria. Enterem si reh e nggo kena abu, nggo latih, muas janah melihe. Meriah kuakap nikapken pangan man kalak e janah kuusahaken gelah nyaman iakap kalak e. Kerina e pelayanen si badia man Jahwe, janah e me si erbanca puas janah meriah ukurku.” Jelas me, tep-tep tugas nampati kami gelah maju secara rohani.

Bas tahun 1961, sanga lit acara pulung keluarga i Trinidad, iceritaken turang seninata Brown pengalamenna i Afrika si la tanggung riahna. Kuceritaken ka kerna pertumbuhen i Nigeria. Idakep senina Brown aku janah ikatakenna man Bapakku, “Johnny, kam lenga seh ku Afrika, tapi anakndu Woodworth enggo!” Nina bapak man bangku, “Mantap nakku! Teruskenlah!” Dukungen arah kalak e si nggo ndekah ngelayani Jahwe alu semangat erban reh belinna sura-suraku ngelayani alu tutus.

Bas tahun 1962, sada kehamaten man bangku banci ngikuti pelatihen tambahen i Gilead kelas si pe-37-ken sepuluh bulan dekahna. Kenca si e, turang seninata Wilfred Gooch, si paksa si e ngelayani jadi pengawas cabang i Nigeria, ikut kelas si  pe-38-ken janah itugasken ia ku Inggris. Perban si e, aku si nggantiken ia jadi pengawas cabang i Nigeria. Bagi turang seninata Brown, rusur aku ngkelilingi Nigeria emaka banci kutandai turang seninata i je janah keleng ateku kalak e. Labo melala barang-barang kalak e bagi kalak bas negara maju, tapi tetap meriah ukur kalak e janah puas iakapna. Enda bukti maka labo sen ntah pe barang-barang si erban lit tujun geluhta. Amin gia bage keadan kalak e, tapi tetap kalak e bersih, rapi, janah metunggung sanga reh ku perpulungen. Luar biasa kel e kuakap. Sanga reh kalak e ku kebaktin, nterem si reh naik truk ras bolekaja * (motor i daerah e si la lit dindingna). Bas motor e biasana lit kuan-kuan si menarik. Misalna, “Sentaktak-sentaktak lau dungna jadi lawit si mbelang.”

Pas kel kuan-kuan e! Kerina si ilakoken tiap turang seninata i Nigeria lit gunana, aminna pe e kitik, termasuk kai si kulakoken ras Oris. Bas tahun 1974, Nigeria jadi negeri si pertama selain Amerika Serikat si lit 100.000 perberitana. Luar biasa kel pertumbuhen i je!

Sanga pertumbuhen e, terjadi perang saudara i Nigeria bas tahun 1967 seh ngasa 1970. Erbulan-bulan dekahna, turang seninata i daerah Biafra i sebrang Lau Niger la banci komunikasi ras kantor cabang. Arus ibaba kami pangan rohani man kalak e. Bagi si nggo kuceritaken tangtangna ndai, banci isebrangi kami lau e piga-piga kali perban ertoto janah tek kami man Jahwe.

Jelas denga kel kuinget uga bahayana perdalanen kami sanga nyebrangi Lau Niger. Banci saja mate kami perban kena tembak tentera si asal nembaki saja, pinakit, ntah pe bahaya si deban. Ngelewati tentera pemerentah saja pe nggo seh kel serana janah bahaya, apai ka adi nggo bas daerah pemberontak i sebrang lau e. Bas sada berngi, kusebrangi Lau Niger si deras alu perahu kitik arah kota Asaba ku kota Onitsha. Kenca si e lawes aku ku kota Enugu guna mpegegehi pengawas-pengawas i je. Bas kesempaten si deban, lawes aku ku kota Aba guna mpegegehi pertua-pertua i je. Paksa si e, kerina lampu arus imateken sanga berngi gelah la banci idah musuh. I kota Port Harcourt, mis idungi kami perpulungen alu ertoto sanga iserang pasuken pemerentah pertahanen Biafra i darat kota.

Seh kel pentingna perpulungen-perpulungen e guna mpetetap ukur turang seninata maka ermediate Jahwe man kalak e. Selain si e bas perpulungen pe, banci ibegi kalak e nasehat si perlu kel paksa si e, eme gelah tetap kalak e netral janah ersada. Berhasil turang seninata i Nigeria ngelewati perang si ngeri e. Kekelengen kalak e nggo naluken perasan segat ate nandangi suku, janah tetap kalak e ersada selaku kalak Kristen. Luar biasa kel kuakap banci radu ras kalak e bas masa si susah e!

Bas tahun 1969, turang seninata Milton G. Henschel jadi ketua Kebaktin Internasional “Kedamen i Doni” bas Yankee Stadium, New York. Selaku asistenna, melala si kupelajari arah ia. Tepat waktu kel pelatihen e perban bas tahun 1970, iban kami Kebaktin Internasional “Kalak si Ngena Ate Dibata” i Lagos, Nigeria. Pasu-pasu Jahwe nge si erban berhasil acara e, perban acara e iban la ndekah kenca nggo ngadi perang saudara. Luar biasa kel acara e perban lit 17 bahasa i je, janah 121.128 kalak si reh. Reh ka turang seninata Knorr, turang seninata Henschel, ras tamu si debanna alu pesawat si isewa arah Amerika Serikat ras Inggris. Isaksiken kalak e 3.775 kalak iperidiken jadi murid! Kebaktin e me salah sada kebaktin si mbuena kel kalak iperidiken kenca Pentakosta. Perban ikut aku ngaturken acara e, kuakap i je me aku si sibukna bas geluhku. Jumlah perberita labo saja reh tambahna, tapi rempet ka kel nterem!

Sedekah 30 tahun lebih i Nigeria, mon-mon aku ngelayani jadi pertua keliling ras pengawas zona i Afrika Barat. Ngata bujur kel utusen-utusen injil si i je perban iperdiateken janah ipegegehi kalak e sekalak-sekalak! Meriah kel kuakap perban banci kupetetap ukur kalak e gelah itehna maka labo ia ilupaken! Arah tugas enda, kuteh maka ermediate man kalak si deban me kunci guna nampati kalak e maju secara  rohani janah erban organisasi Jahwe tetap paguh ras ersada.

Penampat Jahwe me si erban kami banci ngelewati masalah-masalah si terjadi perban perang saudara ras pinakit. Jelas kel teridah pasu-pasu Jahwe. Nina Oris:

“Piga-piga kali kena malaria kami duana. Bas sada waktu, pingsan Worth janah arus ia ibaba ku rumah sakit i Lagos. Lit si ngataken man bangku mungkin la banci ia selamat, tapi untungna selamat ia! Sadar kenca ia, iceritakenna kerna Kerajan Dibata man perawat si njaga ia. Bas pudi wari, idahi kami perawat e, eme Pak Nwambiwe, gelah reh bagesna minatna man Pustaka. Alokenna kebenaren janah dungna jadi pertua ia i Aba. Aku pe berhasil nampati nterem kalak jadi umat Jahwe, termasuk kalak si sebelumna Muslim si patuh. Meriah kel iakap kami banci nandai ras ngkelengi kalak Nigeria, budayana, kebiasanna, bage pe bahasana.”

Pelajaren si deban eme: Gelah banci kita maju bas tugas i luar negeri, arus siusahaken ngkelengi turang seninata aminna pe beda kel budayana ras budayata.

Kenca ngelayani i Betel Nigeria, bas tahun 1987 dat kami tugas si mbaru. Ngelayani kami jadi utusen injil lapangen i St. Lucia, sada pulau si mejile i Kepulauan Karibia. Meriah kel iakap kami tugas enda, tapi lit ka tantangen si mbaru man kami. I Afrika, biasana sekalak dilaki melala diberuna. Tapi i St. Lucia, masalahna eme dilaki ras diberu ras-ras tading ope lenga sah erjabu. Kata Dibata si dem alu kuasa ngiahken melala kalak si erlajar Pustaka ras kami guna erban perubahen.

Kenca reh tuana kami, gegeh kami pe reh kurangna. Emaka bas tahun 2005, alu perkeleng ipindahken Badan Pinpinen kami ku kantor pusat i Brooklyn, New York, AS. Tiap wari, ngata bujur aku man Jahwe perban iberekenNa ndehara si luar biasa man bangku eme Oris. Bas tahun 2015, talu ia iban musuh, eme kematen. La kel terturiken aku uga cedana pusuhku. Ia me temanku si mehulina janah ndehara si perkeleng si melala sipatna si mehuli. Sedekah 68 tahun kami ras, keleng kel ateku ia. Erlajar kami maka gelah banci kita ermeriah ukur i bas perjabun bage pe bas runggun, arus siergai kalak si lit tanggung jawapna, nggit kita ngampuni, tetap meteruk ukur, janah sicidahken sipat-sipat si ihasilken kesah si badia.

Sanga kecewa janah kitik ukur kami, tek kami man Jahwe maka pasti isampatiNa kami guna tetap ngelayani Ia. Enggo iadapi kami erbage perubahen, janah idah kami maka lalap nge reh ulina kerinana. Bas masa depan pe pasti lit perubahen si seh kel ulina!​—Jes. 60:17; 2 Kor. 13:11.

I Trinidad ras Tobago, ipasu-pasu Jahwe pelayanen orang tuaku ras turang seninata si deban. Hasilna, arah laporen mbaru-mbaru enda, lit 9.892 kalak si nembah Jahwe. I Aruba, melala si kerja keras guna mpegegehi runggunku mbarenda. Gundari, bas pulau e lit 14 runggun si terus reh majuna. Adi i Nigeria, jumlah perberita nggo seh kel buena, eme 381.398 kalak. Janah i Pulau St. Lucia, lit 783 kalak si ndukung Kerajan Dibata Jahwe.

Gundari, umurku nggo 90-en. Nina Masmur 92:15 kerna kalak si isuan i rumah Jahwe, “Lalap ia meratah dingen paguh, aminna pe enggo metua, tetap erbuah.” Ngata bujur kel aku perban banci kulayani Jahwe segedang geluhku. Warisen rohani si meherga erban aku banci ngelayani Jahwe alu tutus. Perban kekelengen Jahwe si setia, banci aku “turah i bas rumah Dibata[ku].”​—Msm. 92:14.