1. Kai si arus ilakoken kalak si atena ngerana man raja Persia?

BAYANGKEN kam tading i Persia kira-kira 2.500 tahun si lewat. Ngerana atendu man raja bas negeri e, emaka lawes kam ku kota inganna tading eme kota Susan. Tapi gelah banci kam ngerana man raja, arus lebe dat ijin bas ia nari. Adi lang, ibunuh me kam!​—Est. 4:11.

2. Uga nge arusna perasanta sanga ngerana kita man Jahwe?

² Ngata bujur kel kita perban Jahwe la seri ras raja Persia e! Ndauh kel ganjangen Jahwe asangken kerina penguasa manusia, tapi katawari pe nggit Ia megiken kita. Ate Jahwe ula min kita segan-segan ngerana man baNa. Aminna pe melala penggelaren man Jahwe si luar biasa, misalna Pencipta, Si Madakuasa, ras Si Meganjangna, tapi ateNa silebuh Ia “Bapak” gelah rembak kita ras Ia. (Mat. 6:9) Meriah kel ukurta meteh kerna si e!

3. Engkai maka cocok Jahwe e silebuh “Bapak”? Janah kai si man bahasenta?

³ Cocok kel silebuh Jahwe e “Bapak” perban Ia me Sumber kegeluhenta. (Msm. 36:10) Perban Ia Bapakta, arus kita patuh man baNa. Adi silakoken kai si ipindoNa, ipasu-pasuNa me kita. (Heb. 12:9) Misalna, iberekenNa banta kegeluhen si rasa lalap i surga ntah pe i doni. Gundari pe banci ka sidat pasu-pasuNa. Bas artikel enda, sibahas kari kai saja buktina Jahwe e Bapakta si perkeleng. Sibahas ka ngkai maka tek kita labo pernah kita itadingkenNa. Tapi si pertama, sibahas lebe ngkai maka tek kita Bapakta si i surga e keleng kel ateNa kita janah nggit Ia nampati kita.

4. Engkai maka la mungkin iakap piga-piga kalak Jahwe jadi Bapakna?

⁴ Mungkin nge iakapndu Dibata jadi Bapakndu? Menurut piga-piga kalak, labo kita penting iakap Jahwe perban Jahwe e seh kel hebatNa. La mungkin iakap kalak e Dibata Si Madakuasa nggit mperdiateken kita sekalak-sekalak. Tapi, la ate Bapakta si perkeleng bage caranta rukur. IberekenNa kegeluhen man banta janah rembak ateNa kita ras Ia. Kenca ikataken Rasul Paulus kerna si enda man kalak i Aten, ijelaskenna ka maka Jahwe “labo ndauh i bas kita nari sekalak-sekalak.” (Perb. 17:24-29) Ate Jahwe ula min kita sangsi ngerana man baNa, bali bagi sekalak anak si la sangsi ngerana man orang tuana si perkeleng.

5. Kai si banci sipelajari arah pengalamen sekalak turang seninanta?

⁵ Lit alasen si deban ngkai maka la mungkin iakap piga-piga kalak Jahwe banci jadi Bapakna. Bage perasanna perban bapakna sendiri pe la pernah ngkelengi ia janah la ermediate man bana. Perdiateken kai nina sekalak turang seninanta si diberu, “Bapakku kasar kel jelmana. Emaka, sanga tangtangna aku erlajar Pustaka, mesera kel kuakap rembak ras Bapak si i surga. Tapi kenca kutandai Jahwe, berubah kerinana.” Bage ka nge perasanndu? Adi bage, ula kitik ukurndu. Dungna, banci nge kari igejapkenndu maka Jahwe e Bapak si mehulina.

6. Menurut Matius 11:27, kai salah sada cara Jahwe nampati kita gelah sigejapken maka Ia Bapakta si perkeleng?

⁶ Isampati Jahwe kita gelah banci sigejapken maka Ia Bapakta si perkeleng. Salah sada carana eme ipastiken Jahwe gelah kata-kata ras perbahanen Jesus itulis bas Pustaka. (Baca Matius 11:27.) Iusih Jesus sipat-sipat Bapakna alu sempurna, emaka nina, “Ise si nggo ngidah aku, nggo ka idahna Bapak.” (Joh. 14:9) Sanga icakapken Jesus kerna Jahwe, rusur ikatakenna maka Jahwe e Bapak. Bas empat Injil saja pe, menam 200 kali igunaken Jesus kata “Bapak” man Jahwe. Engkai maka rusur icakapken Jesus kerna Jahwe? Salah sada alasenna eme gelah kalak tek maka Jahwe e Bapak si perkeleng.​—Joh. 17:25, 26.

7. Kai si banci sipelajari kerna Jahwe arah perbahanenNa man AnakNa?

⁷ Perdiateken kai si banci sipelajari kerna Jahwe arah perbahanenNa man Jesus, AnakNa. Lalap ibegiken ras ijawap Jahwe pertoton Jesus. (Joh. 11:41, 42) La soal kai pe si iadapi Jesus, terus igejapkenna kekelengen bage pe penampat arah Bapakna.​—Luk. 22:42, 43.

8. Keperlun kai saja si ibereken Jahwe man Jesus?

⁸ Pernah ikataken Jesus, “Aku pe nggeluh perban Bapak.” (Joh. 6:57) Jadi, iteh Jesus maka Jahwe me si mere kegeluhen man bana ras si mereken keperlunna. Tek kel Jesus man Bapakna, janah ibereken Jahwe keperlun geluhna. Si pentingna, isampati Jahwe ia gelah tetap setia man baNa.​—Mat. 4:4.

9. Kai buktina maka keleng kel ate Jahwe man Jesus selaku Bapakna?

⁹ Perban Jahwe Bapak si perkeleng, lalap ipastikenNa gelah iteh Jesus maka isampatiNa ia. (Mat. 26:53; Joh. 8:16) Memang la ilindungi Jahwe AnakNa e arah bahaya, tapi tetap isampati Jahwe ia gelah terus megenggeng. Iteh Jesus maka masalah kai pe si iadapina kentisik  nge ngenca. (Heb. 12:2) Ibuktiken Jahwe maka keleng ateNa Jesus. Nggit Jahwe megiken ia, iberekenNa keperlunna, iajariNa ia, janah isampatiNa. (Joh. 5:20; 8:28) Gundari, mari sibahas kai si ilakoken Bapakta si i surga guna nampati kita bali bagi Ia nampati Jesus.

10. Menurut Masmur 66:19, 20, kai buktina keleng ate Jahwe kita?

¹⁰ Ibegiken Jahwe pertotonta. (Baca Masmur 66:19, 20.) Ate Jahwe ula min sekali-sekali ngenca kita ertoto man baNa. IahkenNa kita gelah rusur ertoto. (1 Tes. 5:17) Ndigan pe ras i ja pe kita banci kita ertoto. La pernah Jahwe sibuksa guna megiken pertotonta. Janah lalap iperdiatekenNa isi totonta e. Sanga siteh ibegiken Jahwe pertotonta, reh kelengna ateta Ia. Nina sekalak penulis masmur, “Keleng ateku man [Jahwe], sabap idengkehkenNa aku.”​—Msm. 116:1.

11. Uga cara Jahwe njawap pertotonta?

¹¹ Labo ngenca ibegiken Bapakta pertotonta tapi ijawapNa ka. Nina Rasul Johanes, “Kai pe sipindo man [Dibata] adi sue ras peratenNa, ibegikenNa kap kita.” (1 Joh. 5:14, 15) Memang, banci saja la bagi si iarapken kita cara Jahwe njawap pertotonta. Perban itehNa kai si mehulina banta, mon-mon la iberekenNa kai si nggo sipindo ntah pe ndekah maka ijawapNa gelah sabar kita nimaisa.​—2 Kor. 12:7-9.

12-13. Uga carana ibereken Jahwe keperlunta?

¹² Perban Jahwe e Bapakta, iberekenNa keperlunta. Bage ka me si iarapkenNa gelah ilakoken kerina perbapan. (1 Tim. 5:8) Icukupi Jahwe keperlun anak-anakNa. La ateNa kita kuatir kerna panganta, pakenta, ntah pe inganta tading. (Mat. 6:32, 33; 7:11) Janah, perban Jahwe e Bapak si perkeleng, nggo ka isikapkenNa kerina keperlunta bas wari si pepagi.

¹³ Si pentingna, ibereken Jahwe kai si iperluken kita gelah banci rembak ras Ia. I bas Pustaka, ipebetehkenNa man banta kerna diriNa, kai peratenNa, ngkai kita iciptaken, bage pe kerna masa depan. Sanga tangtangna kita erlajar Pustaka, nggo iperdiateken Jahwe kita. IgunakenNa orang tuanta ntah pe turang seninanta si deban guna ngajari kita kerna Ia. Igunaken Jahwe ka pertua si perkeleng bage pe turang seninanta si paguh kinitekenna guna nampati kita gelah terus rembak ras Ia. Selain si e, iajari Jahwe kita bas perpulungen, janah erlajar kita i je radu ras turang seninanta. Alu cara-cara e bage pe cara si debanna, ibuktiken Jahwe maka ermediate kel Ia banta.​—Msm. 32:8.

14. Engkai maka iajari Jahwe kita? Janah uga carana?

¹⁴ Iajari Jahwe kita. La bagi Jesus, kita kerina la sempurna. Emaka sanga iajari Jahwe kita, mon-mon idisiplinNa kita. Nina Pustaka, “Idisiplin Jahwe kerina kalak si ikelengiNa.” (Heb. 12:6, 7) Idisiplin Jahwe kita alu erbage cara. Misalna, sanga sibaca Pustaka ntah pe sanga kita reh ku perpulungen, banci saja lit si erban kita sadar maka perlu kita berubah. Ntah pe, igunaken Jahwe pertua guna nampati kita. La soal uga pe cara si igunaken Jahwe, idisiplinNa kita perban keleng ateNa kita.​—Jer. 30:11.

15. Kai saja cara Jahwe nampati kita?

¹⁵ Isampati Jahwe kita sanga lit masalahta. Sekalak bapak si perkeleng lalap  nampati anakna sanga lit masalahna. Bapakta si i surga pe lalap nggit nampati kita sanga lit masalahta. IberekenNa kesah si badia gelah tetap kita setia. (Luk. 11:13) Isampati Jahwe ka kita sanga kitik ukurta. Misalna, iberekenNa arapen si luar biasa. Arapen e erban kita ngasup megenggeng. Ukurilah enda: Uga pe beratna masalahta gundari, pasti imasapken Jahwe nge pagi kerina. Masalah kai pe si iadapi kita gundari kentisik nge ngenca, tapi pasu-pasu Jahwe lit rasa lalap.​—2 Kor. 4:16-18.

16. Kai si terjadi sanga la patuh Adam man Bapakna si perkeleng?

¹⁶ Banci siidah bukti kekelengen Jahwe arah kai si ilakokenNa sanga Adam la patuh man baNa. Perban Adam la patuh, ia ras keturunenna lanai jadi bagin keluarga Jahwe. (Rom. 5:12; 7:14) Tapi, labo ipediat Jahwe bage saja. Lit si ilakokenNa guna nampati keturunen Adam.

17. Perban Adam la patuh, kai si ilakoken Jahwe?

¹⁷ Adam iukum Jahwe, tapi keturunenna ibereken Jahwe arapen. IjanjikenNa maka kerina manusia si patuh banci dungna jadi bagin keluargaNa. (Kej. 3:15; Rom. 8:20, 21) Enda banci terjadi erkiteken Jahwe nggo mereken Jesus jadi korban tebusen. Perban nggo ibereken Jahwe Anak si ikelengiNa e, ibuktikenNa maka keleng kel ateNa kita.​—Joh. 3:16.

18. Aminna pe pernah sitadingken Jahwe, ngkai maka kita tek nggit Ia ngalo-ngalo kita?

¹⁸ Amin gia kita la sempurna, ate Jahwe kita jadi bagin keluargaNa. Labo pernah iakapNa kita bagi baban si mberat. Aminna pe mon-mon kecewa Jahwe siban ntah pe pernah sitadingken Ia, tapi lalap iarapkenNa kita mulih man baNa.  Iceritaken Jesus perumpaman kerna anak si bene guna mbuktiken maka keleng kel ate Jahwe anak-anakNa. (Luk. 15:11-32) Bapak bas perumpaman e terus iarapkenna gelah mulih anakna e. Emaka sanga mulih anakna e, meriah kel ukurna janah mis ialo-alona. Adi pernah sitadingken Jahwe tapi dungna robah kita, teklah kita maka Bapakta si perkeleng pasti nggit ngalo-ngalo kita.

19. Kai si ilakoken Jahwe guna mpesikap kerina si nggo ceda iban Adam?

¹⁹ Ipesikap Jahwe pagi kerina si nggo ceda iban Adam. Kenca Adam la patuh, iban Jahwe keputusen guna milih 144.000 kalak bas doni nari. Kalak enda pagi jadi raja ras imam i surga radu ras AnakNa. Isampati kalak enda me pagi manusia si patuh gelah jadi sempurna bas doni si mbaru. Kenca ujin si terakhir, ibereken Dibata kegeluhen si rasa lalap man kalak si terus setia. Pasti meriah kel iakap Bapakta si i surga sanga idahNa pagi doni enda dem alu anak-anakNa si sempurna. Luar biasa kel e!

20. Kai saja buktina maka keleng kel ate Jahwe kita? Janah kai si man bahasenta bas artikel seterusna?

²⁰ Enggo ibuktiken Jahwe maka keleng kel ateNa kita. Ia me Bapak si mehulina. IbegikenNa pertotonta, icukupiNa keperlunta, janah isampatiNa kita gelah terus rembak ras Ia. IajariNa ka kita ras isampatiNa sanga lit masalahta. Janah, iberekenNa pagi pasu-pasu si luar biasa banta. Meriah kel ukurta perban keleng kel ate Bapakta kita janah iperdiatekenNa kap kita! Perban kita anak-anakNa, pasti siergai ateta kekelengenNa e. Bas artikel seterusna, sibahas kari uga carata mbuktiken maka keleng kel ateta Jahwe.