Aku lahir bas Quebec City, provinsi Quebec, Kanada. Daerah e nggunaken bahasa Prancis. Orang tuaku gelarna Louis ras Zélia, keleng kel atena aku janah iperdiatekenna aku. Bapakku permela kalakna janah meriah akapna mbaca. Aku meriah kuakap nulis janah jadi wartawan ateku.

Sanga umurku kira-kira 12 tahun, reh teman sada dahin bapakku ku rumah kami, gelarna Rodolphe Soucy, janah babana temanna. Kalak e Saksi Jahwe. Labo kel kuteh kerna Saksi Jahwe, janah la aku tertarik man agama e. Tapi, luar biasa kuakap kalak e perban banci ijawapna penungkunen-penungkunen kami alu cara si mehuli ras masuk akal, janah ijawapna kerina alu nggunaken Pustaka. Bapak ras Mamak pe luar biasa akapna, emaka dungna nggit kami erlajar Pustaka.

Paksa si e, aku sekolah bas sekolah Katolik. Mon-mon, kuceritaken man teman-teman i kelasku kerna kai si kupelajari ras Saksi Jahwe. Dungna, guru-guru kami eme pastor, itehna kerna si e. Sekalak arah kalak e ngataken aku pemberontak, janah ikatakenna e i lebe-lebe kelas. Tapi la igunakenna Pustaka guna mbuktiken kai si kukataken e salah. Aminna pe kejadin e erban aku tertekan, tapi situhuna lit gunana bangku. Dungna kuteh maka ajaren agama bas sekolah la cocok ras kai si iajarken Pustaka. Kuteh me maka arus aku ndarat je nari. Dungna ipindahken orang tuaku aku arah sekolah e.

Terus aku erlajar Pustaka, tapi ndekah kel aku maju perban mbiar aku erberita arah rumah ku rumah. Paksa si e, mbelin kel pengaruh Gereja Katolik janah itentangna pendahin erberita. Maurice Duplessis, peminpin politik i Quebec, kompak kel ras Gereja. Erkiteken  si e, rusur Saksi ihina janah iserang jelma si nterem si idukung Duplessis. Emaka, arus pang kel Saksi Jahwe erberita.

Turang senina John Rae, lulusen Sekolah Gilead kelas si pesiwahken, nampati aku gelah la mbiar. Melala kel pengalamenna. Ia lembut, meteruk ukur, janah menukah ideheri. Jarang inasehatina aku secara langsung, tapi erlajar aku arah kai si ilakokenna. Kurang beluhna John ngerana bas bahasa Prancis, emaka rusur kutemani ia erberita janah kusampati ia. Perban rusur aku erteman ras John, dungna kuputusken jadi Saksi Jahwe. Aku iperidiken tanggal 26 Mei 1951, sepuluh tahun kenca jumpa aku ras Saksi Jahwe.

Bas runggun kami si kitik i Quebec City, turang senina si lit i je teremen perintis. Perban kuidah kalak e semangat, aku pe ikut merintis. Paksa si e, la gunaken kami baca-bacanta sanga erberita arah rumah ku rumah. Si igunaken kami Pustaka ngenca. Emaka arus kami beluh nggunaken Pustaka. Kuusahaken nginget ayat-ayat Pustaka gelah banci kubela kebenaren alu nggunaken Pustaka. Tapi nterem kalak la nggit mbaca Pustaka adi Pustaka e la iakui Gereja Katolik.

Bas tahun 1952, erjabu aku ras Simone Patry, sekalak turang senina si setia si sada runggun ras aku i Quebec City. Pindah kami ku Montreal, janah setahun kenca si e lahir me anak kami, Lise. Aminna pe ngadi aku merintis la ndekah kenca kami erjabu, kuusahaken ras Simone tetap nggeluh sederhana gelah banci melala si ilakoken keluarga kami bas runggun.

Sepuluh tahun kenca ngadi merintis, dungna kuukuri gelah merintis ka mulihi. Bas tahun 1962, ikut aku Sekolah Pelayanen Kerajan man pertua-pertua si iban i Betel Kanada sebulan dekahna. I je, sada kamar aku ras senina Camille Ouellette. Luar biasa kel kuakap ia perban semangat kel ia bas pelayanen aminna pe lit piga-piga anakna. Paksa si e bas Quebec, menam la lit turang seninanta si merintis janahna ngurus anak, tapi iusahaken Camille ngelakokenca. Iahkenna aku gelah kuukuri banci ntah lang aku merintis. Kenca piga-piga bulan, kuteh maka banci ka aku merintis mulihi. Piga-piga kalak ngatakenca kurang cocok keputusenku e, tapi tetap aku merintis. Tek aku maka pasti ipasu-pasu Jahwe aku perban kubereken terbuen bas pelayanen.

Bas tahun 1964, itugasken aku ras Simone ngelayani jadi perintis istimewa i Quebec City, kuta kemulihen kami. Lit piga-piga tahun kami ngelayani i je. Paksa si e nggo kurang tentangen i bas erberita, tapi lit denga nge si nentang kami.

Bas wari Sabtu ciger, itangkap aku i Sainte-Marie, kota si kitik si la ndauh arah Quebec City. Ibaba sekalak petugas aku ku kantor polisi, jenari ipenjarakenna aku perban la lit surat ijinku erberita arah rumah ku rumah. Kenca si e, ibaba aku ndahi sekalak hakim si gelarna Baillargeon, nterem kalak mbiar ngidah ia. Isungkunna aku ise nge kari si jadi pengacaraku. Sanga kukataken gelar Glen How, * sekalak pengacara Saksi si terkenal, mis ia mbiar janah nina, “Iah, ia ka!” Paksa si e, mantap kel senina Glen How i bas mbela Saksi Jahwe. La ndekah kenca si e, ikataken pengadilen maka nggo icabut kerina tuduhen si iban man bangku.

Perban nterem kalak nentang dahin erberita i Quebec, mesera iakap kami nyewa ingan perpulungen. Emaka runggun kami si kitik pulung bas sada garasi si nggo ndekah la ipake janah la lit alat pemanasna. Bas musim si seh kel bergehna, igunaken turang senina pemanas si bahan bakarna minak gelah ula bergehen. Sope imulai perpulungen, biasana cudu kami piga-piga jam dekahna janahna nceritaken pengalamen si mpegegehi.

Meriah kel ukurku ngidah dahin erberita si reh majuna sedekah puluhen tahun. Bas tahun 1960-en, piga-piga runggun si kitik ngenca si lit i daerah Quebec City, i wilayah Côte-Nord, bage pe i Semenanjung Gaspé. Tapi gundari lit lebih dua wilayah bas daerah-daerah e, janah turang seninanta banci pulung bas Bale Kerajan si mejile.

Bas tahun 1970, iundang aku jadi pertua keliling janah Simone, ndeharaku, ikut ras aku. Bas tahun 1973, itugasken aku ngelayani jadi pengawas distrik. Bas tahun-tahun e, melala aku erlajar arah senina-senina si beluh bagi Laurier Saumur * ras David Splane. * Paksa si e, kalak e pe ngelayani jadi pertua keliling. Tiap dung kebaktin, aku ras David rusur ncakapken kerna cara kami erkhotbah. Pernah kuinget ikataken David man bangku bagenda, “Léonce, mantap kel kuakap khotbahndu si terakhir ndai. Tapi bahan khotbahndu e banci kuakap ikembangkenndu jadi telu khotbah me.” Memang rusur melalasa keterangen si kuban bas khotbahku. Emaka perlu kupelajari erban khotbah si lebih sederhana.

Sekalak pengawas distrik ertanggung jawap mpegegehi pertua keliling. Tapi perban nterem perberita i Quebec nandai aku, nterem si atena erberita ras aku sanga reh aku ndahi wilayah  kalak e. Meriah kuakap erberita ras kalak e, tapi enda erban nggo kurang waktuku ras pertua keliling. Pernah iingetken pertua keliling aku alu mehuli, nina, “Mejile kel adi nggit kam nggunaken waktundu ras turang senina. Tapi ula kam lupa Senina, minggu enda kam reh guna ndahi aku. Aku pe perlu ka nge ipegegehi!” Persinget si mehuli e nampati aku gelah lebih seimbang.

Bas tahun 1976, la kusangka-sangka, ndehara si kukelengi, Simone, mekelek kel pinakitna janah dungna mate. Ia ndehara si luar biasa perban nggit ia erkorban janah keleng kel atena Jahwe. Ceda kel ateku, tapi banci aku megegeh perban tetap aku sibuk bas pelayanen. Ngata bujur kel aku man Jahwe perban terus aku isampatiNa bas masa-masa si sulit e. Bas pudi wari, erjabu ka aku ras Carolyn Elliott. Ia sekalak perintis si nggunaken bahasa Inggris si reh ku Quebec guna ngelayani bas ingan si merluken terbuen perberita. Ia mekacar jelmana janah ermediate kel man kalak si deban, khususna man kalak si permela ntah pe si melungen iakapna. Rusur kel isampatina aku sanga kami ngelayani bas pendahin keliling.

Bas bulan Januari 1978, isuruh aku jadi pengajar bas Sekolah Dinas Perintis kelas si pertama. Kuatir kel aku perban lenga pernah aku ikut bas sekolah e janah bukuna pe lenga pernah kuidah. Emaka, kerinana mbaru man bangku bage pe man siswana. Tapi untungna, nterem siswa bas kelas e eme perintis si nggo erpengalamen. Aminna pe aku si jadi pengajar, melala si kupelajari arah kalak e!

Bas tahun 1978, Kebaktin Internasional “Iman yang Berkemenangan” iban i Stadion Olimpiade Montreal. E kebaktin si mbelinna si pernah iban i Quebec. Jumlah si reh lebih 80.000 kalak. Itugasken aku nampati bas Departemen Layanen Berita, emaka lit kesempatenku ngerana man melala wartawan. Meriah kel ukurku perban  itulis kalak e melala berita si mejile kerna kebaktin e. Iwawancaraina kami bas acara TV ras radio, janah total siarenna lebih 20 jam dekahna. Iterbitkenna ka ratusen artikel kerna kebaktin e. Hasilna, nterem kalak si banci meteh kerna Jahwe ras umatNa!

Mulai aku iperidiken, ngelayani aku i wilayah si nggunaken bahasa Prancis i Quebec. Tapi bas tahun 1996, lit perubahen si mbelin. Isuruh aku ngelayani jadi pengawas distrik i runggun-runggun si nggunaken bahasa Inggris i daerah Toronto. La kuakap aku ncukupi syarat guna ndalanken tugas e. Erkhotbah pe mbiar aku perban la beluhsa aku bahasa Inggris. Arus reh rusurna aku ertoto janah mindo penampat Jahwe.

Aminna pe kuatir kel aku paksa si e, tapi meriah kel kuakap ngelayani sedekah dua tahun i Toronto. Sabar kel Carolyn nampati aku gelah reh pangna aku ngerana nggunaken bahasa Inggris, janah turang senina pe terus nampati ras mere semangat man bangku. Mis melala teman kami i je.

Sanga lit kebaktin wilayah, sibuk aku nikapken kebaktin e. Amin gia bage, bas wari Jumat karaben, biasana erberita aku arah rumah ku rumah sada jam dekahna. Banci saja lit si tersungkun-sungkun, ‘Engkai maka arus erberita adi pagi pe sibuk ka nge kebaktin?’ Tapi terpegegehi kel aku adi jumpa ras kalak si berminat sanga erberita. Seh asa gundari lalap kuakap meriah adi mulih kenca erberita.

Bas tahun 1998, aku ras Carolyn itugasken jadi perintis istimewa ku Montreal. Sedekah ertahun-tahun rusur aku itugasken ngaturken dahin erberita si khusus janah kerja sama ras media massa guna ngelurusken berita si la tuhu kerna Saksi Jahwe. Meriah ukurku ras Carolyn perban banci erberita man kalak si pindah ku Kanada, si biasana merhat meteh kerna Pustaka.

Adi kuinget mulihi pelayanenku man Jahwe si dekahna 68 tahun kenca aku iperidiken, ngata bujur kel aku. Meriah kel ukurku perban banci dungna lanai aku mbiar erberita janah nampati kalak meteh kerna Pustaka. Kenca nggo galang anak Lise, ia ras perbulangenna dungna ngelayani jadi perintis biasa. Meriah kel ukurku perban anakku Lise terus semangat bas pelayanen. Ngata bujur ka kel aku perban nterem turang senina si nggo mereken usihen ras persinget si mehuli man bangku. Kerina e erban aku reh rembakna ras Jahwe janah banci ngelayani Ia bas erbage-bage pelayanen. Enggo kugejapken maka penting kel mindo penampat kesah si badia si luar biasa. Kesah si badia ngenca si banci nampati kita terus ndalanken tugas bas Jahwe nari. (Msm. 51:13) Terus aku ngata bujur man Jahwe perban nggo ibereNa aku kehormaten guna muji gelarNa!​—Msm. 54:8.