1. Kai si terjadi man keluarga Jusup perban lit cian ate?

KELENG ATE Jakup kerina anakna, tapi si kelengna atena eme Jusup, si umurna 17 tahun. Uga nge perasan senina-senina Jusup? Cian ate kalak e man Jusup, dungna segat ka atena. Situhuna labo lit kai pe salah Jusup. Aminna pe bage, idayaken kalak e Jusup jadi budak janah erbual kalak e man bapakna. Ikataken kalak e maka anak si ikelengina nggo ibunuh binatang buas. Perban lit cian ate, lanai dame keluargana janah getem kel pusuh bapakna.​—Kej. 37:3, 4, 27-34.

2. Menurut Galati 5:19-21, ngkai maka seh kel bahayana cian ate e?

² Bas Pustaka, cian ate * termasuk “perbahanen daging” si seh kel bahayana, si erban sekalak jelma la banci ngaloken Kerajan Dibata. (Baca Galati 5:19-21.) Cian ate biasana erban kalak ermusuhen, rubati, ras merawa.

3. Kai kari sibahas bas artikel enda?

³ Arah kai si ilakoken senina-senina Jusup e, teridah maka cian ate banci ncedai hubungenta ras kalak si deban janah keluarga pe lanai kompak ras dame. Amin gia labo silakoken kai si nggo ilakoken senina-senina Jusup, kerina kita la sempurna janah licik pusuhta. (Jer. 17:9) E me sebapna mon-mon cian ateta kalak si deban. Mari sibahas piga-piga contoh bas Pustaka gelah siteh ngkai maka banci turah cian ate bas pusuhta. Sibahas ka kari uga carana gelah banci silawan cian ate bas pusuhta janah uga carana gelah banci tetap dame.

4. Engkai maka cian ate kalak Pilisti man Isak?

⁴ Sanga buen erta kalak. Isak kalak bayak, emaka cian ate kalak Pilisti man bana. (Kej. 26:12-14) Ibuat kalak e taneh guna nutupi kerina sumur si igunaken Isak, gelah lanai banci iberena minem asuh-asuhenna. (Kej. 26:15, 16, 27) Gundari pe lit kalak si cian atena ngidah kalak si bayaken asangken ia. Merhat ia jang kalak, janah labo e saja. Iarapkenna ka gelah ulanai min lit kai si lit bas kalak.

5. Engkai maka cian ate peminpin agama man Jesus?

⁵ Sanga nterem kalak rate jadi man sekalak jelma. Cian ate peminpin agama Jahudi man Jesus perban jadi kel ate kalak ia. (Mat. 7:28, 29) Jesus e wakil Dibata, janah iajarkenna kai si benar. Aminna pe bage, ifitnah peminpin agama e Jesus gelah ceda gelarna. (Mrk. 15:10; Joh. 11:47, 48; 12:12, 13, 19) Pelajaren kai si banci sidat jenari? Bas runggun, banci saja lit turang seninanta si mehuli kel sipat-sipatna janah e erbanca jadi ate kalak ia. Ula min cian ateta ia. Tapi, siusahakenlah ngusih sipat-sipatna si mehuli.​—1 Kor. 11:1; 3 Joh. 11.

6. Kai buktina lit cian ate bas Diotrepes?

⁶ Sanga lit si ndatken tugas penting bas runggun. Bas abad pertama, cian ate Diotrepes man kalak si lit tanggung jawapna bas runggun Kristen. ‘Merhat ia jadi nomor sada’ bas runggun, emaka ifitnahna Rasul Johanes bage pe kalak si debanna gelah lanai kalak e iergai. (3 Joh. 9, 10) Amin gia kita la bagi Diotrepes, banci saja cian ateta turang seninanta si ndatken tugas si sedekah enda merhat kita ndatkenca, terlebih ka adi ngasup siakap kita ndalanken tugas e.

7. Kai akibatna adi lit cian ate bas pusuhta?

⁷ Cian ate bali bagi dukut si beracun. Adi rurat e bas pusuhta, mesera ngeruahsa. Sipat-sipat si la mehuli bagi cemburu, sombong, ras mentingken bana banci erban reh belinna sipat cian ate. Sipat cian ate banci erban lanai lit sipat-sipat si mehuli bas dirita, misalna kekelengen, perkuah ate, ras melias. Emaka, adi turah cian ate bas pusuhta, mislah siruah. Uga carana?

8. Gelah lanai lit cian ate bas pusuhta, sipat kai nge si iperluken?

⁸ Gelah lanai lit cian ate bas pusuhta, perlu sipebelin sipat meteruk ukur bage pe puas nandangi kai si lit bas kita. Adi dem pusuhta alu sipat-sipat si mehuli e, la lit ingan cian ate bas pusuhta. Engkai? Kalak si meteruk ukur la iakapna ia si pentingna. Kalak si meteruk ukur pe la iakapna maka arus buen si idatna asangken kalak si deban. (Gal. 6:3, 4) Sekalak jelma ikataken puas adi nggo bias kapna kai si lit bas ia janah la ibandingkenna dirina ras kalak si deban. (1 Tim. 6:7, 8) Kalak si meteruk ukur janah puas pasti ikut ermeriah ukur ngidah kalak si deban ndatken kai si mehuli.

9. Menurut Galati 5:16 ras Pilipi 2:3, 4, kesah si badia nampati kita ngelakoken kai?

⁹ Perlu kita kesah si badia gelah lanai lit cian ate bas pusuhta, janah gelah banci sipebelin sipat meteruk ukur ras puas nandangi kai si lit bas kita. (Baca Galati 5:16; Pilipi 2:3, 4.) Kesah si badia banci nampati kita mereksa isi pusuh ras perukurenta. Perban isampati Jahwe kita, banci siruah cian ate bas pusuhta nari janah  siganti alu kai si mehuli. (Msm. 26:2; 51:12) Gundari mari sibahas kerna Musa ras Paulus si la cian atena kalak si deban.

10. Keadan kai si terjadi si mbuktiken maka Musa e meteruk ukur? (Nen gambar bas sampul majalah enda.)

¹⁰ Mbelin kel tanggung jawap Musa nandangi umat Dibata, tapi la iambatina kalak si deban ndatken tanggung jawap si bage. Pernah ibuat Jahwe deba kesah si badia si lit bas Musa, jenari iberekenNa man piga-piga peminpin Israel si cinder i deher kemah perjumpan. La ndekah kenca si e, ibegi Musa maka lit ka dua peminpin si ngaloken kesah si badia janah perbahanen kalak e bali bagi nabi, padahal la kalak e reh ku kemah perjumpan. Uga tanggapen Musa sanga ipindo Josua gelah ipengadina kalak e? Sitik pe la cian ate Musa ngidah duana dilaki e iperdiateken Jahwe. Tapi, perban Musa meteruk ukur, meriah kel ukurna ngidah duana dilaki e pe dat tugas si penting bas Jahwe nari. (Bil. 11:24-29) Pelajaren kai si banci sidat arah Musa?

11. Uga pertua-pertua banci ngusih Musa?

¹¹ Adi kam sekalak pertua, pernah nge kam isuruh mereken pelatihen man kalak si deban guna ngelakoken tugas si nggo meriah kapndu ngelakokenca? Misalna, kam si mabaken Pelajaren Sora Ermomo tiap minggu, janah meriah kel kapndu tugas e. Tapi isuruh kam mereken pelatihen man senina si deban gelah ia pe pagi banci ngelakoken tugas e. Adi meteruk ukur kam bagi Musa, la iakapndu ia jadi saingenndu. Tapi, meriah kel ukurndu nampatisa.

12. Kai buktina nterem turang seninanta gundari puas janah meteruk ukur?

¹² Mari sibahas situasi si deban si iadapi turang seninanta si nggo metua. Lit si nggo ertahun-tahun dekahna ngelayani jadi koordinator badan pertua. Tapi, sanga umurna 80 tahun, nggit ia mereken tugasna e man kalak si deban. Pertua keliling si umurna nggo 70 tahun pe nggit ngadi arah tugasna janah alu meteruk ukur nggit ia ngaloken tugas si deban. Janah mbaru-mbaru enda, nterem anggota keluarga Betel i sebelang doni nggit itugasken ku lapangen. Labo cian ate turang seninanta si setia enda nandangi kalak si gundari ngelakoken tugas si pernah ilakokenna.

13. Cian nge ate Paulus man 12 rasul Jesus? Jelasken.

¹³ Contoh si deban kerna kalak si puas janah meteruk ukur eme Rasul Paulus. Aminna pe kerja keras ia bas pelayanenna, tetap ia meteruk ukur. Nina, “Aku si meterukna i bas rasul-rasul, janah la aku cocok igelari rasul.” (1 Kor. 15:9, 10) Paulus memang ipilih jadi “rasul si isuruh ku bangsa si deban,” tapi la pernah datna kesempaten istimewa jadi salah sada arah 12 rasul Jesus. (Rom. 11:13) Rasul-rasul Jesus e ikut ras Jesus sanga ia ngelayani i doni. Tapi, Paulus jadi kalak Kristen kenca Jesus mate ras ipekeke. (Perb. 1:21-26) Amin gia bage, la cian ate Paulus man 12 rasul e perban banci kalak e rembak ras Jesus. Tetap Paulus puas nandangi kai si lit bas ia janah la ipediatna turah cian ate bas pusuhna.

14. Kai buktina adi kita puas janah meteruk ukur?

¹⁴ Adi kita puas janah meteruk ukur, banci kita bagi Paulus. Siergai kalak si ibere Jahwe tanggung jawap. (Perb. 21:20-26) Enggo iban Jahwe pengaturen gelah lit pertua-pertua si minpin  runggun. Amin gia kalak e la sempurna, ibereken Jahwe kalak e jadi “pemere” man banta. (Ep. 4:8, 11) Adi siergai pertua-pertua janah siikutken petunjukna alu meteruk ukur, banci kita tetap rembak ras Jahwe janah dame kita ras turang seninanta.

15. Kai si arus silakoken?

¹⁵ Adi kita sician-cianen, pasti la lit dame. Emaka, arus siruah cian ate bas pusuhta nari janah ula ka sisuan bas pusuh kalak. Alu bage, banci sipatuhi perentah Jahwe guna ‘ngelakoken kai pe si erban kita nggeluh alu dame ras si deban janah mpegegehi sada ras si debanna.’ (Rom. 14:19) Kai saja si banci silakoken guna nampati kalak gelah ula lit cian ate bas pusuhna? Janah kai si arus silakoken gelah banci tetap dame?

16. Uga carana nampati kalak gelah ula lit cian ate bas pusuhna?

¹⁶ Mbelin kel pengaruh perukuren ras perbahanenta man kalak si deban. Ate doni enda gelah ‘sicidahken ertata.’ (1 Joh. 2:16) Tapi enda erban cian ate kalak. Uga carana gelah ula turah cian ate bas pusuh kalak si deban? Si pertama, ula rusur sicakapken kerna barang-barangta ntah pe kerna kai saja si ateta situkur. Si peduaken, adi lit tanggung jawapta bas runggun, tetaplah kita meteruk ukur. Adi rusur sicakapken kerna si e, menukah turah cian ate bas pusuh  kalak. Tapi, adi tuhu-tuhu ermediate kita man kalak si deban janah sipujiken kai si mehuli si nggo ilakokenna, banci sisampati ia gelah puas iakapna janah siban runggunta tetap dame ras ersada.

17. Uga dungna keadan keluarga Jusup? Janah ngkai?

¹⁷ Pasti banci siruah cian ate bas pusuhta nari! Mari sibahas mulihi kerna senina-senina Jusup. Ertahun-tahun kenca idayaken kalak e Jusup, jumpa kalak e ras ia i Mesir. Sope lenga ikataken Jusup ise ia situhuna man senina-seninana, iujina lebe kalak e guna meteh nggo nge robah ntah lang. Sanga iundang Jusup kalak e man, buen berena pangan man Benyamin. (Kej. 43:33, 34) Tapi la cian ate senina-seninana e. Ermediate kel kalak e man Benyamin bage pe man bapakna, Jakup. (Kej. 44:30-34) Perban lanai lit cian ate bas senina-senina Jusup, banci dungna dame keluarga kalak e. (Kej. 45:4, 15) Kita pe adi siruah cian ate bas pusuhta, banci siban dame keluargata bage pe runggunta.

18. Menurut Jakup 3:17, 18, kai hasilna adi siusahaken erban dame?

¹⁸ Ate Jahwe siruah min cian ate bas pusuhta nari janah siusahaken gelah terus erdame. Arus tuhu-tuhu siusahaken ngelakokenca. Bagi si nggo sibahas, menukah kel turah cian ate bas pusuhta. (Jak. 4:5) Janah kalak bas sekelilingta pe nterem si percian. Tapi, adi terus siusahaken meteruk ukur, puas nandangi kai si lit bas kita, janah ngata bujur, la lit ingan cian ate bas pusuhta. Banci dame kita ras kalak si deban janah reh nukahna siakap mpebelin sipat-sipat si mehuli.​—Baca Jakup 3:17, 18.