1-2. Menurut Matius 5:11, uga nge arusna perukurenta sanga siadapi percuban?

ERJANJI Jesus maka pasti igejapken murid-muridna keriahen ukur situhu-tuhu. Ikatakenna ka maka kalak si engkelengi ia pasti ngadapi percuban. (Mat. 10:22, 23; Luk. 6:20-23) Meriah ukurta banci jadi murid Kristus. Tapi uga nge perasanta adi ilarang keluargata kita ngelayani Jahwe, ianiaya pemerentah kita, ras ipaksa temanta erdahin ntah pe teman sekolahta kita ngelakoken kai si salah? Sanga siukuri si e, banci jadi kuatir kita.

² Enterem kalak si erpengakap maka labo mungkin kalak ermeriah ukur adi ianiaya. Tapi ikataken Pustaka maka kalak si ianiaya banci ermeriah ukur. Contohna, itulis Jakup maka ula min bene arapenta sanga siadapi percuban. Arus kita ermeriah ukur. (Jak. 1:2, 12) Ikataken Jesus ka maka arus kita ermeriah ukur sanga ianiaya. (Baca Matius 5:11.) Uga carana gelah tetap kita ermeriah ukur amin pe ngadapi percuban? Melala si banci sipelajari alu ngukuri surat si ikirim Jakup man kalak Kristen bas abad pertama. Gundari, mari sibahas lebe percuban kai saja si adapi kalak e.

3. Kai si terjadi la ndekah kenca Jakup jadi murid Jesus?

³ La ndekah kenca Jakup senina tiri Jesus jadi murid Jesus, kalak Kristen i Jerusalem ianiaya. (Perb. 1:14; 5:17, 18) Sanga Stepanus ibunuh, enterem kalak Kristen kiam arah kota Jerusalem janah “merap ku belang-belang Judea ras Samaria,” seh  ku Siprus ras Antiokia. (Perb. 7:58–8:1; 11:19) Melala kel percuban si iadapi murid-murid paksa si e. Tapi tetap kalak e semangat erberita si meriah ku japa pe kalak e lawes, janah alu penampat kalak e lit me runggun-runggun bas melala ingan. (1 Pet. 1:1) Tapi kenca si e, melala denga percuban si arus iadapi kalak e.

4. Percuban kai ka si iadapi kalak Kristen bas abad pertama?

⁴ Melala kel percuban si iadapi kalak Kristen bas abad pertama. Contohna, kira-kira tahun 50 Masehi, Kaisar Roma Klaudius nuruh kerina kalak Jahudi lawes nadingken Roma. Emaka kalak Jahudi si enggo jadi kalak Kristen terpaksa nadingken rumahna janah pindah ku ingan si deban. (Perb. 18:1-3) Kira-kira tahun 61 Masehi, itulis Rasul Paulus maka lit turang seninana si ihina i lebe-lebe jelma si enterem, itamaken ku penjara, janah lit ka si itangko kalak ertana. (Heb. 10:32-34) Bali bagi kalak si deban, piga-piga kalak Kristen pe mesera pergeluhna janah lit ka si sakit.​—Rom. 15:26; Pil. 2:25-27.

5. Penungkunen kai saja nge si nandangi sijawap?

⁵ Sanga itulis Jakup suratna sope lenga tahun 62 Masehi, itehna maka pasti iadapi turang seninana percuban. Itegu-tegu Jahwe Jakup guna nulisken pedah-pedah si erguna man kalak Kristen gelah banci kalak e tetap ermeriah ukur sanga ngadapi percuban. Mari sibahas surat si itulis Jakup e ras sijawap penungkunen enda: Keriahen ukur si uga nge si imaksud Jakup bas suratna? Kai nge si banci erban kalak Kristen lanai ermeriah ukur? Janah uga kepentaren, kiniteken, ras sipat si perpang banci nampati kita tetap ermeriah ukur la soal percuban kai pe si sangana siadapi?

6. Menurut Lukas 6:22, 23, engkai maka kalak Kristen banci ermeriah ukur sanga ngadapi percuban?

⁶ Melala kalak si erpengakap maka banci ia tuhu-tuhu ermeriah ukur adi mbue senna, adi sehat ia, janah ermeriah ukur keluargana. Tapi, keriahen ukur si imaksud Jakup eme keriahen ukur si ihasilken kesah si badia, janah la soal uga pe situasita banci sigejapken keriahen ukur si bage. (Gal. 5:22) Kalak Kristen banci tuhu-tuhu ermeriah ukur adi tehna maka enggo meriah banna ukur Jahwe janah usihna Jesus. (Baca Lukas 6:22, 23; Kol. 1:10, 11) Keriahen ukurta banci ipeseri ras api si lit bas tendang. Api e banci tetap gara amin pe kena angin ntah pe udan perban api e ilindungi kaca tendang. Kita pe banci tetap ermeriah ukur, la soal kai si terjadi bas geluhta. Labo urak keriahen ukurta sanga sakit kita ntah pe mesera siakap ndarami sen. Tetap ka meriah ukurta amin pe ianiaya kalak kita ntah pe itentang keluargata kita. Tiap lit si erusaha erban kita lanai ermeriah ukur, banci reh belinna keriahen ukurta. Sanga siadapi percuban perban mbela kinitekenta, sibuktiken me maka kita murid Kristus. (Mat. 10:22; 24:9; Joh. 15:20) Enda me sebapna maka itulis Jakup, “O turang seninaku, ermeriah ukurlah kena sanga ngadapi erbage-bage percuban.”​—Jak. 1:2.

7-8. Kai hasilna adi ertahan kita ngadapi percuban?

⁷ Ikataken Jakup alasen si deban engkai maka kalak Kristen nggit ngadapi percuban, aminna pe mberat. Nina, ‘Adi kiniteken kena teruji, kena jadi kalak si paguh.’ (Jak. 1:3) Percuban banci ipeseri ras proses guna erban pedang. Kenca pedang ipelas ras ipebergeh reh paguhna me pedang e. Bage ka pe sanga setia kita ngadapi percuban, reh paguhna kinitekenta. E me sebapna maka itulis Jakup bagenda, “Teruslah kena ertahan seh ku tujunna, alu bage banci kena sempurna janah lengkap bas kerinana.” (Jak. 1:4) Adi sigejapken maka reh paguhna kinitekenta sanga ngadapi percuban, e banci erban kita tetap ermeriah ukur.

⁸ I bas suratna, itulis Jakup ka percuban si deban si banci erban kita lanai ermeriah ukur. Kai saja percuban e, janah uga carata ngatasisa?

9. Engkai maka perlu kita kepentaren?

⁹ Tentangenna: La siteh kai si arus silakoken. Sanga siadapi masalah, sipindo penampat man Jahwe gelah banci siban keputusen si erban meriah ukurNa, si erguna man turang seninata, ras si banci nampati kita tetap setia man Jahwe. (Jer. 10:23) Perlu kita kepentaren  guna meteh kai si perlu silakoken ras kai si arus sikataken man kalak si nentang kita. Adi la siteh kai si arus silakoken banci jadi kitik ukurta janah banci mis bene keriahen ukurta.

10. Menurut Jakup 1:5, kai nge si arus silakoken guna ndatken kepentaren?

¹⁰ Cara ngatasisa: Pindolah kepentaren man Jahwe. Adi tetap ateta ermeriah ukur sanga ngadapi percuban, arus mis kita ertoto man Jahwe mindo kepentaren gelah banci siban keputusen si mehuli. (Baca Jakup 1:5.) Kai nge si arus silakoken adi la mis ijawap Jahwe totota? Nina Jakup, arus kita ‘terus mindo’ man Dibata. Labo merawa Jahwe adi lalap sipindo kepentaren man baNa. Tapi, meriah ukur Bapakta si i surga “mere” kepentaren man banta gelah ngasup kita ngadapi percuban. (Ms. 25:12, 13) ItehNa percuban si sangana siadapi. Sedih Jahwe sanga idahNa kita susah janah merhat kel Ia nampati kita. Pasti meriah ukurta meteh si e. Tapi, uga nge cara Jahwe mereken kepentaren man banta?

11. Kai deba nari si arus silakoken guna ndatken kepentaren?

¹¹ Ibereken Jahwe kepentaren man banta arah Pustaka si Badia. (Kua. 2:6) Guna ndatken kepentaren e arus sipelajari Kata Dibata ras ogen-ogenta si erpalasken Pustaka. Tapi labo bias terjeng mpelajari Kata Dibata. Arus sidalanken kai si enggo sipelajari e. Nina Jakup, “Lakokenlah kai si kataken Dibata, labo megi-megi saja.” (Jak. 1:22) Sanga sidalanken nasehat Dibata, siusahaken me lalap erban dame, jadi kalak si masuk akal, ras perkuah. (Jak. 3:17) Sipat-sipat e ndai banci nampati kita tetap ermeriah ukur sanga ngadapi percuban.

12. Engkai maka penting kel siangkai isi Pustaka?

¹² Kata Dibata bali bagi cermin si banci nampati kita meteh kai si arus silakoken ras uga  cara ngelakokenca. (Jak. 1:23-25) Contohna, kenca sipelajari Pustaka banci sikendaliken dirita gelah ula merawa-rawa. Alu penampat Jahwe, siteh uga carana tetap tenang sanga lit kalak merawa-rawa ntah pe sanga lit masalahta. Perban kita tenang reh ulina me carata ngadapi masalah, reh ulina carata rukur, janah reh ulina keputusenta. (Jak. 3:13) Emaka, penting kel tuhu-tuhu siangkai isi Pustaka.

13. Engkai maka perlu sipelajari usihen si lit bas Pustaka?

¹³ Mon-mon, kenca siban kesalahen maka siteh kai si arusna la silakoken. Aminna pe bage, mesera denga siakap lanai ngulihi kesalahen e. Banci ka kita reh pentarna adi erlajar kita arah kai si mehuli ras si la mehuli si ilakoken kalak. E me sebapna iahken Jakup kita mpelajari usihen si lit bas Pustaka, bagi Abraham, Rahap, Jop, ras Elia. (Jak. 2:21-26; 5:10, 11, 17, 18) Kerina kalak si setia enda banci tetap ermeriah ukur aminna pe ngadapi percuban. Arah usihen kalak enda, siteh me maka alu penampat Jahwe banci kita tetap ermeriah ukur sanga ngadapi percuban.

14-15. Kai bahayana adi ragu kita?

¹⁴ Tentangenna: Sanga ragu kita nandangi kinitekenta. Banci jadi bas sada paksa mesera siakap ngangkai piga-piga isi Pustaka ntah pe la ijawap Jahwe totota bagi siarapken. Enda banci erban kita ragu. Adi lalap kita ragu banci lemah kinitekenta janah ncedai hubungenta ras Jahwe. (Jak. 1:7, 8) Dungna enda banci erban bene arapenta.

¹⁵ Ipeseri Rasul Paulus arapenta bagi jangkar. (Heb. 6:19) Jangkar banci nahan kapal gelah la ibabaken badai ras ngentam batu karang. Tapi, jangkar banci erguna adi rante jangkar si leket ku kapal e la ceda. Rante jangkar banci ceda adi karaten. Kinitekenta pe banci lemah adi ragu kita. Sanga siadapi masalah banci jadi lanai kita tek maka janji-janji Jahwe pasti terjadi. Adi bene kinitekenta, bene ka me arapenta. Bagi si kataken Jakup maka kalak si ragu “seri ras gelombang laut si embus angin ku jah ku je.” (Jak. 1:6) Kalak si ragu banci saja la pernah gejapkenna keriahen ukur.

16. Kai si arus silakoken adi ragu kita?

¹⁶ Cara ngatasisa: Ula nai ragu, pegegehi kinitekenndu. Ula kam ragu. Sanga jaman Nabi Elia, umat Jahwe pe pernah ragu. Nina Elia man kalak e, “Ngasa ndigan kena lalap ragu? Adi Jahwe kin Dibata si benar, ikutken Ia. Tapi adi Baal kin, ikutken ia!” (1 Raj. 18:21) Gundari pe, adi enggo mulai kita ragu, mislah siban tindaken. Perlu siban riset guna ndarami bukti-bukti maka Jahwe kap Dibata, Pustaka kap kataNa, janah Saksi-Saksi Jahwe kap umatNa. (1 Tes. 5:21) Adi silakoken si e ndai kerina, lanai kita ragu janah reh paguhna kinitekenta. Tapi adi ragu denga kita janah perlu kita penampat, banci sipindo penampat pertua-pertua. Arus mis silakoken si enda kerina adi tetap ateta ermeriah ukur bas ngelayani Jahwe.

17. Kai akibatna adi bene semangatta?

¹⁷ Tentangenna: Lanai semangat. Nina Kata Dibata, “Adi bene semangatndu sanga lit masalahndu, gegehndu pe reh kurangna.” (Kua. 24:10) Bas bahasa Heber ‘bene semangat’ banci ertina “lanai semangat.” Adi lanai kam semangat keriahen ukurndu pe banci mis bene.

18. Kai ertina ertahan?

¹⁸ Cara ngatasisa: Pindolah sipat si perpang man Jahwe gelah ngasup kam ertahan. Perlu kita sipat si perpang gelah ngasup kita ertahan ngadapi percuban. (Jak. 5:11) Kata “ertahan” si pake Jakup bas ayat enda banci ka ngertiken sekalak jelma si tetap cinder bas  inganna. Banci jadi sibayangken sekalak prajurit si perpang si tetap cinder bas inganna janah la miser sitik pe la soal uga serangen si iban musuh.

19. Kai si banci sipelajari arah usihen Rasul Paulus?

¹⁹ Ibereken Rasul Paulus usihen si luar biasa kerna sipat si perpang ras ngasup ertahan. Mon-mon lemah kapna bana, tapi ngasup ia ertahan perban pindona gegeh man Jahwe. (2 Kor. 12:8-10; Pil. 4:13) Kita pe banci megegeh ras perpang adi siakui alu meteruk ukur maka perlu kita penampat Jahwe.​—Jak. 4:10.

20-21. Kita banci tek kerna kai?

²⁰ Sanga siadapi percuban siteh maka e labo arah Jahwe nari. Nina Jakup, “Adi lit kalak si ngadapi percuban, ula min nina, ‘Aku sangana icubai Dibata.’ Perban Dibata la banci icubai, janah ise pe labo cubaiNa alu si jahat.” (Jak. 1:13) Adi tek kita kerna si e, banci kita reh rembakna ras Bapakta si perkeleng si lit i surga.​—Jak. 4:8.

²¹ Jahwe ‘la pernah berubah.’ (Jak. 1:17) Bas abad pertama rusur sampati Jahwe kalak Kristen bas ngadapi percuban janah gundari pe pasti sampatiNa kita sekalak-sekalak. Tutuslah atendu ertoto man Jahwe. Pindolah kepentaren, kiniteken, ras sipat si perpang man baNa. Pasti ijawapNa totondu. Alu bage, tek me kam maka pasti sampatiNa kam tetap ermeriah ukur amin pe ngadapi percuban.