Orang tuaku nandai kebenaren bas tahun 1920-en ope lenga kalak e erjabu. Aku lahir bas awal tahun 1939. Kami tading i Inggris. Kitik-kitik nari, lalap aku ikut ku perpulungen ras orang tuaku janah bas pudi wari ikut aku Sekolah Pelayanen Teokratis. Kuinget denga sanga tangtangna aku dat sekolah. Paksa si e umurku enem tahun denga janah gendeken aku asangken mimbar, emaka arus kunangkihi sada kotak gelah banci kuidah kerina hadirin. Gugup kel aku perban arus aku ngerana i lebe-lebe kalak dewasa.

Mbarenda iketikken bapakku kata-kata si sederhana bas sada kartu gelah banci kugunaken bas erberita. Umurku waluh tahun denga sanga tangtangna aku erberita ku sada rumah. Meriah kel ukurku perban nggit si mpuna rumah e mbaca kartu si kubaba janah mis alokenna buku “Karena Allah Itu Benar Adanya”. Mis aku kiam ndahi bapakku janah kuceritaken kerna si e. Meriah kel kuakap erberita ras lawes ku perpulungen. Si e kerina erban aku merhat ngelayani Jahwe sepenuh waktu.

Sanga bapakku langganen Sora Ermomo, rusur iberekenna majalah e man bangku gelah kubaca. Reh kenca majalah e mis semangat aku mbacasa. Paksa si e me kebenaren mulai kena ku pusuhku. Reh kelengna ateku Jahwe janah kubaktiken diriku man baNa.

Bas tahun 1950 aku ras keluargaku reh ku Kebaktin Wilayah si erjudul Pertambahen Teokratis si iban i New York. Tema man wari Kamis 3 Agustus eme “Wari Utusen Injil.” Paksa si e Turang Senina Carey Barber si bas  pudi wari jadi anggota Badan Pinpinen mpeseh khotbah peridin. Bas pendungi khotbahna berena dua penungkunen man kalak si nandangi iperidiken, jenari cinder aku janah kujawap “Ue!” Amin pe umurku 11 tahun denga, kuteh maka keputusen enda seh kel pentingna. Sanga nandangi iperidiken ku lau, sempat aku mbiar perban aku la beluh erlangi. Tapi itemani bapak tengahku aku seh ku kolam peridin janah ipetetapna ukurku maka aman nge kari kerina. Paksa si e iangkip sekalak turang senina aku janah babana man turang senina si nandangi mperidiken aku. Kenca si e iperidiken me aku, dung e iangkip aku ndarat arah kolam nari. Meter kepeken dung janah naheku la sempat kena ku dasar kolam. Mulai wari e terus ibabai Jahwe aku bas dalan si benar.

Kenca lulus sekolah situhuna merintis ateku. Amin pe bage, perban lalap isuruh-suruh guruku kuliah, dungna kuliah aku. Tapi la ndekah kenca aku mulai kuliah, sadar me aku maka la banci bulat ukurku ngelayani Jahwe janahku kuliah. Dungna kuputusken ngadi kuliah. Kutotoken masalah e man Jahwe. Kenca si e, kutulis surat man dosen-dosenku ras kujelasken alu sopan maka ngadi ateku kuliah bas akhir tahun pertama aku kuliah. Perban bulat kel ukurku tek man Jahwe mis aku merintis.

Aku mulai merintis bas bulan Juli 1957 i kota Wellingborough. Kusungkun turang senina si lit i Betel London lit ntah lang perintis si erpengalamen si banci nampati aku. Dungna Turang Senina Bert Vaisey si nampati aku. Melala si banci kuusih arah ia nari. Ia seh kel rajinna janah sampatina aku erban jadwal erberita si mehuli. Hadirin bas runggun kami eme aku, ia, ras enem kalak turang senina si enggo metua. Perban kuban persiapen janah lit rusur tugasku bas perpulungen, melala kesempatenku mpepaguh kinitekenku man Jahwe ras nurikenca man kalak si deban.

Bas pudi wari sempat aku ipenjaraken kentisik perban la aku nggit ikut dinas militer. Kenca si e, jumpa aku ras Barbara sekalak perintis istimewa. Erjabu kami bas tahun 1959 janah ku ja pe kami nggit itugasken. Tugas pertama kami eme ku Lancashire si lit i bagin barat laut Inggris. Bas bulan Januari 1961, iundang aku ku Sekolah Pelayanen Kerajan i Betel London sada bulan dekahna. Sengget aku perban dung sekolah e itugasken aku jadi pertua keliling. I kota Birmingham, dua minggu dekahna aku ilatih sekalak pertua keliling si enggo mbue pengalamenna janah paksa si e Barbara banci ikut ras aku. Kenca si e, mulihken kami ku daerah penugasen kami i Lancashire ras Cheshire.

Bas bulan Agustus 1962 sanga kami cuti, aloken kami surat arah kantor cabang, si isina formulir guna ngikuti Sekolah Gilead. Itotoken kami kerna si e jenari isi kami formulir e. Kenca  si e, mis kirimken kami mulihi formulir e ku kantor cabang bagi petunjuk bas surat e. Lima bulan kenca si e, berkat kami ku Brooklyn, New York guna ngikuti Sekolah Gilead kelas pe-38-ken. Sepuluh bulan dekahna kami i je janah melala kel pelajari kami kerna Pustaka.

Bas sekolah e kami iajari kerna Kata Dibata, organisasiNa, ras pengalamen turang senina i sebelang doni. Paksa si e, umur kami 20-en denga. Melala si banci usih kami arah siswa-siswa si deban si lit bas kelas kami. Meriah kel ukurku perban tiap wari banci aku kerja sama ras Turang Senina Fred Rusk, salah sada instruktur kami. Lit pelajaren si mehuli si ingetkenna man bangku eme kerna uga pentingna mere nasehat alu cara si benar. Arus lalap sipastiken maka nasehatta cocok ras kai nina Pustaka. Selain instruktur, lit ka turang senina si erpengalamen si reh ku kelas guna ngajari kami bagi Nathan Knorr, Frederick Franz, ras Karl Klein. Melala ka si banci pelajari kami arah turang senina A. H. Macmillan si meteruk ukur. Arah khotbahna, banci teh kami uga Jahwe nampati umatNa sanga iuji mulai tahun 1914 seh awal tahun 1919.

Ope lenga dung sekolah, ikataken turang senina Knorr man bangku ras Barbara maka itugasken kami ku Burundi i Afrika. Mis kami lawes ku perpustakan Betel janah darami kami Buku Tahunan guna ngenen asa buena perberita si ngelayani i Burundi. Sengget kami perban la lit laporen kerna jumlah perberita i Burundi. Kepeken kami itugasken ku daerah si lenga pernah reh perberita ku je. Sitik ka ngenca si teh kami kerna Benua Afrika. Mbiar kel kami, tapi kenca ertoto reh tenangna kap kami.

Bas daerah kami si mbaru beda kel situasina ras kuta kami, mulai arah cuacana, budayana, ras bahasana. Gundari arus ipelajari kami bahasa Prancis. Selain si e, la ka teh kami i ja kami banci tading. Dua wari kenca kami seh, reh Turang Senina Harry Arnott ndahi kami sanga nandangi mulih atena ku daerah tugasna i Zambia. Alu penampatna, banci dat kami sada apartemen si jadi rumah utusen injil kami si pertama. Tapi la ndekah kenca si e, dat kami tentangen arah pemerentah. La pernah begi kalak e kerna Saksi-Saksi Jahwe. Sanga mulai akap kami meriah erberita i je, ilarang  pemerentah kami tading i je perban la lit surat ijin kami erdahin. Emaka arus kami pindah janah mulihi ban kami penyesuaien bas ingan si mbaru eme Uganda.

Situhuna mbiar nge kami lawes ku Uganda perban la lit visa kami, tapi tek kami man Jahwe. Lit turang senina arah Kanada nari si nampati kami, ia pe ngelayani i Uganda. Jelaskenna situasi kami man petugas imigrasi. Dungna bere petugas man kami waktu piga-piga bulan guna ngurus surat ijin gelah banci kami tading i je. Enda erban reh tekna kami maka tuhu-tuhu sampati Jahwe kami.

Situasi bas Uganda beda kel ras situasi i Burundi. Dahin erberita enggo lit i Uganda amin pe perberita paksa si e 28 kalak denga ngenca. Bas daerah kami, melala si banci ngerana bas bahasa Inggris. Tapi teh kami maka arus pelajari kami silang-langna sada bahasa daerah gelah banci sampati kami kalak nandai Jahwe. Kami mulai erberita i daerah Kampala janah bahasa si biasa ipake i je eme bahasa Luganda, emaka pelajari kami bahasa e. Ertahun-tahun dekahna maka banci kami lancar make bahasa Luganda. Tapi si e labo sia-sia perban enggo reh beluhna kami erberita. Banci teh kami kai si iperluken kalak si erlajar Pustaka ras kami. Kalak e pe terus terang man kami janah nggit ia nuriken perasanna man kami sanga erlajar.

Meriah kel ukur kami banci nampati kalak mpelajari kebenaren. Reh tambahna keriahen ukur kami sanga itugasken aku jadi pertua keliling. Perban lit petunjuk arah kantor cabang Kenya, mulai me darami kami daerah si merluken perintis istimewa. Luar biasa kel tanggapen kalak sanga kami erberita, padahal kalak e lenga pernah jumpa ras Saksi Jahwe. Mon-mon sikapken kalak e ka pangan man kami.

Terusken kami ka perdalanen kami arah Kampala janah naik kereta kami dua wari dekahna ku pelabuhen Mombasa Kenya. Je nari naik kapal laut kami ku Seychelles sada kepulauan i Samudra Hindia. Bas pudi wari, arah tahun 1965 seh 1972 rusur idahi kami kepulauan e. Tangtangna, dua kalak ngenca perberita i je tapi dungna kelompok si lit i je enggo jadi runggun. Lawes ka aku ku Eritrea, Etiopia, ras Sudan guna ndahi turang senina si lit i je.

Sanga pihak militer si merentah bas Uganda, berubah me situasi politik bas negri e. Ertahun-tahun dekahna, mesera kel situasina i je. Sanga si e, kudat pelajaren maka penting kel matuhi perentah Pustaka guna ‘mereken man Kaisar kai si jadi bagin Kaisar.’ (Mrk. 12:17) Bas sada wari, kerina kalak asing isuruh ndaftarken diri ku kantor polisi si ndeherna. Mis patuhi kami. Piga-piga wari kenca si e sanga aku ras utusen injil si deban lewat arah Kampala, ideheri polisi motor kami, jantungen kel kami. Ituduh kalak e kami mata-mata janah babana kami ku kantor polisi. I je, kataken kami maka kami utusen injil janah enggo ndaftarken diri. Tapi la kalak e tek, emaka ibaba me kami ku kantor polisi si ndeherna ras rumah kami. Awasi kalak e kel kami sanga bas dalan. Untungna, petugas si lit i je tandaina denga kami janah ingetna maka pernah kami ndaftarken diri ku je. Emaka suruhna gelah kami ibebasken. Meriah kel ukur kami.

 Paksa si e, rusur kel kami jantungen sanga ipengadi motor kami bas pos-pos jaga militer, terlebih adi tentera si erjaga i je sangana minem-minem. Adi lit situasi si bage, lalap kami ertoto. Hasilna reh tenangna akap kami janah ibere kami lewat. Tapi sayang kel, bas tahun 1973 kerina utusen injil si labo kalak Uganda iperentahken lawes arah Uganda nari.

Emaka berubah ka me tugas kami. Itugasken kami ku Pantai Gading, Afrika Barat. Arus ka pelajari kami bahasa si mbaru. Mulai ka kami ngerana bas bahasa Prancis. Ban kami ka penyesuaien ras utusen injil si deban si la seri latar belakangna ras kami. Sanga idah kami kalak si meteruk ukur ras bujur si lit i je nggit ngaloken berita si meriah, igejapken kami mulihi maka Jahwe terus nampati kami. Sampati Jahwe kami gelah berhasil bas tugas kami perban tek kami man baNa.

Bas sada wari, ikataken dokter maka Barbara sakit kanker. Sempat kami mulih-ulih ku Eropa gelah irawat ia alu mehuli. Tapi bas tahun 1983, teh kami maka lanai banci terusken kami tugas kami i Afrika, sedih kel kami.

Sanga kami ngelayani i Betel London, pinakit Barbara terus reh kelekna janah dungna mate ia. Kugejapken penampat si luar biasa arah keluarga Betel khususna arah sada pasangen si nampati aku erban penyesuaien ras terus ngandalken Jahwe. Bas pudi wari, jumpa aku ras Ann si ngelayani jadi komuter bas Betel. Pernah ia jadi perintis istimewa janah keleng kel atena Jahwe. Tahun 1989, erjabu kami. Seh asa gundari ngelayani kami i Betel London.

Arah tahun 1995 seh tahun 2018, meriah kuakap ngelakoken tugasku selaku wakil kantor pusat (si mbarenda igelari pengawas zona.) Bas tahun-tahun e, lit menam 60 negri si dahi kami. Bas tiap negri si kudahi, banci kuidah maka lalap ipasu-pasu Jahwe umatNa la soal uga pe keadan kalak e.

Bas tahun 2017, kudahi mulihi Afrika. Meriah ukurku sanga tangtangna kubaba Ann ku Burundi. Luar biasa kap kami ngidah uga teremna kalak si ngaloken kebenaren i je. Enggo ka lit Betel i je janah e lit bas dalan si pernah kudalani sanga erberita tahun 1964. Gundari lit lebih 15.500 perberita i je.

Meriah ukurku sanga kualoken jadwal perdalanenku bas tahun 2018. Bas jadwal e, lit negri Pantai Gading. Kerehenku ku Abidjan eme ibu kota Pantai Gading bali kuakap bagi mulih ku kuta. Sanga kunen daftar nomor telpon turang senina si tading i Betel, kepeken si tading i sebelah kamarku eme Turang Senina Sossou. Tangtangna, kuakap ia si pernah ngelayani jadi pengawas kota sanga aku i Abidjan. Tapi salah aku, anak Sossou kepe ia.

Itepati Jahwe lalap janjiNa. Arah kiniseran si kuadapi lit sada pelajaren si kudat. Adi tek kita man Jahwe pasti ibanNa kita berhasil. Berhasil ateku lalap bas geluhku seh ku doni si mbaru.​—Kua. 4:18.