1. Sanga erjabu ate sekalak diberu, penungkunen kai saja nge si perlu iukurina?

KEPALA si sempurna eme Jesus Kristus. Kerina kalak Kristen kepalana eme Jesus. Tapi sanga erjabu sekalak diberu kepalana eme manusia si la sempurna. Enda banci saja erban mesera iakap sekalak ndehara patuh man perbulangenna. Emaka, sanga erjabu ate sekalak diberu perlu iukurina penungkunen enda: ‘Kai buktina maka ia banci jadi kepala keluarga si mehuli? Ngelayani Jahwe nge si pentingna bas geluhna? Adi lang, banci nge ipastikenna maka keluarga kami tetap rembak ras Jahwe kenca kami erjabu?’ Selain si e, perlu ka iukurina penungkunen enda: ‘Sipat-sipat kai nge si lit bas aku si banci erban berhasil pagi perjabunku? Sabar janah nggit nge aku mere? Rembak nge hubungenku ras Jahwe?’ (Peng. 4:9, 12) Adi mehuli keputusen si iban sekalak diberu sope lenga ia erjabu, enda banci erban perjabunna berhasil ras ermeriah ukur.

2. Kai kari sibahas bas artikel enda?

² Jutan diberu Kristen patuh man perbulangenna. Usihen si luar biasa kel kalak enda. Patut kel kalak enda ipuji. Meriah kel ukurta ngelayani Jahwe radu ras diberu si setia enda. Bas artikel enda sibahas kari jawapen arah telu penungkunen: (1) Tentangen kai saja si iadapi enterem ndehara? (2) Engkai maka ipilih ndehara patuh man perbulangenna? (3) Kai si banci ipelajari perbulangen ras ndehara Kristen arah usihen Jesus, Abigail, ras Maria ndehara Jusup?

3. Engkai maka kerina kalak si erjabu ngenanami melala kesusahen?

³ Perjabun eme sada hadiah si sempurna i bas Dibata nari. Tapi kalak si erjabu la sempurna. (1 Joh. 1:8) E me sebapna maka ikataken Pustaka kalak si erjabu ngenanami “melala kesusahen.” (1 Kor. 7:28) Perdiateken piga-piga tentangen si banci saja iadapi sekalak ndehara.

4. Engkai maka banci saja rendah iakap sekalak ndehara bana adi patuh ia man perbulangenna?

⁴ Banci saja perban latar belakang sekalak ndehara, rendah iakapna bana adi patuh man perbulangenna. Nina Marisol si tading i Amerika Serikat, “I bas inganku ipebelin, lalap ikataken man diberu maka arus kalak e seri ras dilaki i bas kai pe. Kuteh maka enggo ibereken Jahwe wewenang man perbulangen janah ndehara arus patuh man perbulangenna. Amin pe bage, ndehara pe perlu ka nge iergai. Tapi mesera kel kuakap patuh man perbulangenku perban iajarken doni enda ula patuh man perbulangen.”

5. Kai saja pendapat si salah kerna diberu?

⁵ Selain si e, sekalak diberu banci saja erjabu ras sekalak dilaki si erpengakap maka diberu lebih rendah asangken dilaki. Nina Ivon si tading i Amerika Selatan, “I bas daerah kami dilaki si leben man, kenca si e maka diberu. Anak diberu si kitik denga iarapken enggo banci erdakan janah mbersihken rumah. Tapi anak dilaki ilayani mamakna ras turangna janah ikataken man kalak e maka ia si jadi raja bas rumah.” Sekalak diberu si gelarna Yingling si tading i Asia ngataken, “Bas bahasa kami lit kuan-kuanen si ertina diberu la perlu pentar ntah pe lit keterampilenna. Tanggung jawap diberu ngelakoken pendahin rumah saja ngenca janah la banci iberena pendapat man perbulangenna.” Sekalak perbulangen si la engkelengi ndeharana janah si la ngelakoken kai si ikataken Pustaka, banci erban latih kel iakap ndeharana. Selain si e, gagal ia ngikutken Jesus janah la banna meriah ukur Jahwe.​—Ep. 5:28, 29; 1 Pet. 3:7.

6. Kai si perlu ilakoken ndehara gelah terus rembak ras Jahwe?

⁶ Bagi si ijelasken bas artikel sebelumna iarapken Jahwe gelah icukupi kepala keluarga kerina keperlun keluargana janah isampatina ka kalak e ngelayani Jahwe. (1 Tim. 5:8) Amin pe bage, sekalak ndehara arus ibanna waktuna mbaca Pustaka tiap wari, ngukurisa, janah ertoto man Jahwe alu bulat ukur. Tapi banci saja mesera iakap ndehara ngelakokenca perban kalak e sibuk. Emaka banci jadi lanai lit waktu ras gegehna guna ngelakokenca. Tapi penting kel iban kalak e waktuna guna ngelakoken si e ndai kerina. Engkai? Perban iarapken Jahwe gelah kerina kita termasuk ndehara terus rembak ras Jahwe.​—Perb. 17:27.

7. Kai si banci erban reh nukahna iakap ndehara patuh man perbulangenna?

⁷ Memang sekalak ndehara arus erusaha patuh man perbulangenna si la sempurna. Uga carana gelah reh nukahna iakapna ndalanken tugas si ibereken Jahwe e? Perlu iangkaina engkai maka isuruh Pustaka ia patuh janah setuju ia kerna si e.

8. Menurut Epesus 5:22-24, engkai maka nggit sekalak ndehara patuh man perbulangenna?

⁸ Sekalak ndehara Kristen patuh man perbulangenna perban e perentah Jahwe. (Baca Epesus 5:22-24.) Tek ia man Bapakna si i surga. Itehna maka keleng ate Jahwe ia janah kerina perentah si ibereken Jahwe man bana eme guna kiniulinna.​—Ul. 6:24; 1 Joh. 5:3.

9. Kai hasilna adi patuh sekalak ndehara man perbulangenna?

 ⁹ Enterem kalak erpengakap maka diberu labo arus patuh man dilaki perban e banci erban diberu e lanai meherga. Perukuren si bage erban enterem diberu lanai ngikutken pengaturen Dibata kerna wewenang. Kalak si bage perukurenna la nandai Bapakta si perkeleng. Meherga kel iakap Jahwe diberu-diberu perban kalak e anak-anakNa. Emaka labo mungkin ibereken Jahwe perentah si erban anakNa lanai meherga. Sekalak diberu si erusaha matuhi Jahwe alu patuh man perbulangenna banci erban dame keluargana. (Ms. 119:165) Reh riahna me ukurna, ukur perbulangenna, bage pe anak-anakna.

10. Pelajaren kai si banci sidat arah kata-kata Carol?

¹⁰ Bukti sekalak ndehara engkelengi ras ngergai Jahwe eme alu patuh man perbulangenna si la sempurna. Itehna maka enggo ibereken Jahwe wewenang man perbulangen. Nina Carol si tading i Amerika Selatan, “Kuteh maka pasti iban perbulangenku kesalahen. Kuteh ka maka caraku erurusen ras ia sanga ibanna kesalahen ncidahken uga nge ergana kuakap hubungenku ras Jahwe. Emaka, kuusahaken ateku tetap patuh man bana perban meriah ateku kuban ukur Bapakku si i surga.”

11. Kai si nampati Aneese nggit ngampuni? Kai si banci sipelajari arah kata-katana e?

¹¹ Mesera iakap sekalak ndehara patuh man perbulangenna ras ngergai ia adi la ermediate perbulangenna man perasanna. Tapi cuba perdiateken kai nina turang seninata si gelarna Aneese sanga terjadi situasi si bage man bana, “Kuusahaken gelah la kitik ukurku. Kuinget maka kerina kita erban salah. Nggit aku ngampuni arah ukurku nari, bali bagi Jahwe. Sanga nggit aku ngampuni, tenang kuakap.” (Ms. 86:5) Sekalak ndehara si nggit ngampuni, reh nukahna iakapna patuh man perbulangenna.

12. Contoh kai si banci sipelajari arah Pustaka?

¹² Piga-piga kalak erpengakap maka kalak si patuh eme kalak si lemah. Tapi cara rukur si bage sitik pe labo tuhu. I bas Pustaka melala contoh kerna kalak si patuh. Aminna pe kalak  e patuh tapi kalak e labo lemah. Cuba ukuri kai si banci sipelajari arah Jesus, Abigail, ras Maria.

13. Engkai maka patuh Jesus man Jahwe? Jelasken.

¹³ Patuh Jesus man Jahwe labo erkiteken kurang ia beluhna ntah pe kurang keterampilenna. Pengajaren Jesus si sederhana mbuktiken maka seh kel ia pentarna. (Joh. 7:45, 46) Ieteh Jahwe maka Jesus e seh kel beluhna. Emaka, Jahwe ras Jesus ras-ras nciptaken kai pe si lit i doni bage pe si lit i surga. (Kua. 8:30; Heb. 1:2-4) Kenca Jesus ipekeke Jahwe, iberekenNa “kerina kuasa i surga ras i doni” man Jesus. (Mat. 28:18) Aminna pe melala kel kengasupen Jesus, tetap denga ipindona penampat Jahwe. Engkai? Perban keleng atena Bapakna.​—Joh. 14:31.

14. Kai si banci ipelajari perbulangen arah (a) cara Jahwe ngergai diberu? (b) kai si icatat bas Kuan-kuanen 31?

¹⁴ Si banci ipelajari perbulangen. Isuruh Jahwe ndehara patuh man perbulangenna labo perban ianggapNa diberu e lebih rendah asangken dilaki. Kai buktina? Ipilih Jahwe diberu ras dilaki guna merentah radu ras Jesus. (Gal. 3:26-29) Jahwe pe tek man Jesus. Kai buktina? IberekenNa piga-piga wewenang man anakNa e. Sekalak perbulangen si pentar pe bage man ndeharana. Iberekenna ka piga-piga wewenang man ndeharana. Ikataken Pustaka kai saja si banci ilakoken sekalak ndehara si pentar. Misalna, banci iawasina pendahin si ilakoken i rumahna, itukurna taneh ras iurusna, janah banci ka ia erbisnis. (Baca Kuan-kuanen 31:15, 16, 18.) Sekalak ndehara labo budak si la lit hakna mereken pendapat. Sebalikna, tek perbulangenna man bana janah ibegikenna pendapatna. (Baca Kuan-kuanen 31:11, 26, 27.) Adi iergai sekalak perbulangen ndeharana, meriah me ukur ndeharana patuh man bana.

15. Kai si banci ipelajari ndehara arah contoh Jesus?

¹⁵ Si banci ipelajari ndehara. Aminna pe melala si luar biasa si ilakoken Jesus, labo rendah iakapna bana adi patuh ia man Jahwe. (1 Kor. 15:28; Pil. 2:5, 6) Sekalak ndehara banci saja mbue keterampilenna. Tapi, adi usihna Jesus labo iakapna rendah bana adi patuh ia man perbulangenna. Idukungna perbulangenna labo saja perban keleng atena perbulangenna tapi si pentingna perban keleng atena Jahwe janah iergaina Ia.

16. Menurut 1 Samuel 25:3, 23-28, tentangen kai si iadapi Abigail? (Nen gambar sampul.)

¹⁶ Perbulangen Abigail gelarna Nabal. Ia mentingken bana, sombong, janah la nggit ngata bujur. Aminna pe bage la iusahaken Abigail gelah sirang ras perbulangenna. Adi sirang kin ate Abigail, banci saja ipediatna ibunuh Daud ras prajuritna perbulangenna e. Tapi la bage banna. Sebalikna, idaramina cara guna ngelindungi Nabal ras kerina anggota keluargana. Bayangken uga perpangna Abigail e. Ideherina 400 prajurit janah alu mehamat icakapkenna man Daud kai si terjadi. Mindo maaf ia erkiteken kai si enggo ilakoken perbulangenna. (Baca 1 Samuel 25:3, 23-28.) Iteh Daud me maka enggo igunaken Jahwe diberu si perpang e guna mereken nasehat man bana gelah la ilakokenna kesalahen si serius.

17. Kai si banci ipelajari perbulangen arah Daud ras Abigail?

¹⁷ Si banci ipelajari perbulangen. Abigail eme sekalak diberu si pentar. Perban begiken Daud nasehatna, la surung ibunuhna kalak si la ersalah. Sekalak perbulangen si pentar pe iukurina pendapat ndeharana sope ibanna keputusen si penting. Banci saja pendapat ndeharana e nampati ia erban keputusen si mehuli.

18. Kai si banci ipelajari ndehara arah Abigail?

 ¹⁸ Si banci ipelajari ndehara. Sekalak ndehara si engkelengi ras ngergai Jahwe banci mereken pengaruh si mehuli man keluargana aminna pe perbulangenna la ngelayani Jahwe ntah pe la patuh man perentah Dibata. La idaramina cara si la erpalasken Pustaka gelah banci sirang ras perbulangenna. Sebalikna, iusahakenna lalap mehamat ras patuh man perbulangenna gelah tersuruh ukur perbulangenna erlajar kerna Jahwe. (1 Pet. 3:1, 2) Bicara la pe nggit perbulangenna ngelayani Jahwe, enggo meriah ibanna ukur Jahwe perban patuh janah setia ia man perbulangenna.

19. I bas situasi kai sekalak ndehara la banci patuh man perbulangenna?

¹⁹ Tapi sekalak ndehara si patuh la ia nggit ngikutken kai nina perbulangenna adi isuruhna ia ngelanggar undang-undang Dibata. Contohna, banci jadi sekalak ndehara isuruh perbulangenna si la sada kiniteken ngelakoken kai si segat ate Jahwe bagi erbual ras nangko. Adi sekalak ndehara isuruh ngelanggar undang-undang Dibata, arus itulakna janah ijelaskenna alu tegas engkai maka la ia nggit ngelakokenca, tapi alu cara si mehuli. Kerina kalak Kristen termasuk si enggo erjabu arus lebih patuh man Dibata Jahwe asangken man ise pe.​—Perb. 5:29.

20. Kai buktina maka rembak kel Maria ras Jahwe?

²⁰ Rembak kel Maria ras Jahwe. Melala kel itehna kerna Kitap-Kitap si Badia. Sanga ngerana ia ras Elisabet mamak Johanes Peridiken, lit lebih 20 kali ikutip Maria ayat-ayat arah Kitap Heber. (Luk. 1:46-55) Cuba ukuri kerna si enda: Aminna pe Maria enggo ertunangen ras Jusup, labo Jusup si pertama ijumpai malekat Jahwe. Si pertama ijumpaina eme Maria janah ikatakenna man bana maka ilahirkenna me pagi Anak Dibata. (Luk. 1:26-33) Itandai Jahwe kel Maria e, janah tek Ia maka keleng pagi atena anakNa e ras iurusna alu mehuli. Tek kita maka Maria tetap rembak ras Jahwe kenca Jesus mate ras ipekeke ku surga.​—Perb. 1:14.

21. Kai si banci ipelajari perbulangen arah kai si ikataken Pustaka kerna Maria?

²¹ Si banci ipelajari perbulangen. Meriah iakap  sekalak perbulangen si pentar adi melala pemeteh ndeharana kerna Pustaka. Labo kitik ukurna kerna si e ntah pe labo iakapna maka jadi kepala keluarga ate ndeharana. Itehna maka adi melala pemeteh ndeharana kerna Pustaka banci kari isampatina keluargana e. Aminna pe ganjangen sekolah ndehara asangken perbulangenna, tetap perbulangen si ertanggung jawap guna nampati keluargana i bas ngelayani Jahwe. Misalna, i bas ngaturken ibadah keluarga.​—Ep. 6:4.

22. Kai si banci ipelajari ndehara arah Maria?

²² Si banci ipelajari ndehara. Aminna pe sekalak ndehara arus patuh man perbulangenna, lit denga tanggung jawapna secara rohani, arus ijagana kinitekenna tetap paguh. (Gal. 6:5) Emaka, perlu ibanna waktuna pelajaren pribadi janah ngukuri kai si ipelajarina. Kai hasilna? Banci tetap keleng atena Jahwe janah iergaina Jahwe. Selain si e, banci ia tetap ermeriah ukur i bas matuhi perbulangenna.

23. Adi patuh ndehara man perbulangenna, kai manpaatna?

²³ Ndehara si tetap patuh man perbulangenna perban keleng atena Jahwe pasti riahen ukurna asangken ndehara si la ngikutken pengaturen Jahwe kerna patuh man perbulangen. Selain si e, kalak e banci jadi usihen si mehuli man dilaki ras diberu si nguda denga. Banci ka banna keluargana bage pe runggun jadi dame. (Tit. 2:3-5) Gundari, teremen umat Jahwe diberu janah setia kalak e ngelayani Jahwe. (Ms. 68:11) Tapi, kerina kita la soal dilaki ntah pe diberu banci ikut erban runggun ermeriah ukur. Bas artikel seterusna sibahas kari kerna si e.