1. Kai saja si banci mpengaruhi cara sekalak dilaki erurusen ras ndeharana bage pe anak-anakna?

MENURUTNDU kai ertina jadi “kepala”? Piga-piga dilaki erurusen ras ndeharana bage pe anak-anakna alu cara si biasa ilakoken bas kebudayanna ntah pe bas keluargana ope lenga ia erjabu. Sekalak turang seninata si gelarna Yanita si tading bas Eropa ngataken, “Bas inganku tading, mbarenda nari diberu ianggap lebih rendah asangken dilaki janah iban bagi pembantu.” Sekalak turang senina si gelarna Luke si tading i Amerika Serikat ngataken, “Piga-piga perbapan ngajari anakna si dilaki maka diberu la perlu ibegiken perban pendapatna la penting.” Tapi sitik pe la bage si iarapken Jahwe bas perbulangen nari. (Bandingken Markus 7:13.) Adi bage, uga carana gelah sekalak dilaki banci jadi kepala keluarga si mehuli?

2. Kai si perlu iteh sekalak kepala keluarga, janah engkai?

² Gelah sekalak dilaki banci jadi kepala keluarga si mehuli, arus tehna kai si arapken Jahwe arah sekalak kepala keluarga. Arus ka tehna engkai maka iban Jahwe pengaturen kerna wewenang janah uga ia banci ngusih Jahwe ras Jesus. Engkai maka arus iteh sekalak dilaki kerna si e? Perban enggo ibereken Jahwe wewenang man kepala keluarga, janah iarapken Jahwe gelah igunaken kalak e wewenang e alu mehuli.​—Luk. 12:48b.

3. Kai si banci sipelajari kerna wewenang arah 1 Korinti 11:3?

³ Baca 1 Korinti 11:3. Ayat enda njelasken pengaturen kerna wewenang. Iban Jahwe pengaturen enda guna ngaturken keluargaNa si lit i surga ras i doni. Selaku “kepala” si meganjangna, ibereken Jahwe wewenang man piga-piga ciptanNa si lit i surga ras i doni. Tapi kerina kalak e arus ertanggung jawap man Jahwe kerna carana nggunaken wewenangna e. ( Rom. 14:10; Ep. 3:14, 15) Ibereken Jahwe wewenang man Jesus nandangi runggun Kristen. Tapi Jesus arus ertanggung jawap man Jahwe kerna carana erurusen ras kita. (1 Kor. 15:27) Ibereken Jahwe ka wewenang man perbulangen nandangi keluargana. Tapi perbulangen arus ertanggung jawap man Jahwe bage pe man Jesus kerna carana erurusen ras ndeharana bage pe ras anak-anakna.​—1 Pet. 3:7.

4. Kai wewenang Jahwe ras Jesus?

⁴ Selaku Kepala bas keluargaNa si lit i surga ras i doni, lit wewenang Jahwe erban peraturen man anak-anakNa. Lit ka hakNa nuruh kalak e matuhi kerina peraturen e. (Jes. 33:22) Selaku kepala bas runggun Kristen, Jesus pe lit hakna erban peraturen ras nuruh kita matuhi peraturen e.​—Gal. 6:2; Kol. 1:18-20.

5. Kai wewenang kepala keluarga, tapi seh ja batas wewenangna?

⁵ Bali bagi Jahwe ras Jesus, lit wewenang kepala keluarga erban peraturen man keluargana. (Rom. 7:2; Ep. 6:4) Tapi wewenangna terbatas. Misalna, kerina peraturen si ibanna arus erpalasken Kata Dibata. (Kua. 3:5, 6) La lit wewenang kepala keluarga erban peraturen man kalak si labo anggota keluargana. (Rom. 14:4) Selain si e, sanga anak-anakna enggo galang janah enggo lawes rumah nari, lanai ia jadi kepala man anak-anakna e. Amin pe bage, tetap denga iergai anak-anakna ia.​—Mat. 19:5.

6. Engkai maka iban Jahwe pengaturen kerna wewenang?

⁶ Iban Jahwe pengaturen kerna wewenang, perban keleng ateNa keluargaNa. Pengaturen enda hadiah bas Ia nari. Perban lit pengaturen e, kerina si lit i bas keluarga Jahwe banci ratur ras dame. (1 Kor. 14:33, 40) Adi la jelas iban Jahwe kerna pengaturen e, keluargaNa banci la ratur ras la ermeriah ukur. Misalna, sanga arus iban sada keputusen, la siteh ise si arus erban keputusen ntah pe ise si ndalankenca.

7. Menurut Epesus 5:25, 28, perbahanen si uga si iarapken Jahwe arah sekalak perbulangen man ndeharana?

⁷ Adi memang mehuli kin pengaturen si iban Dibata kerna wewenang bas keluarga, engkai maka gundari enterem ndehara si tertekan janah perbulangenna rate-ate man bana? Enda terjadi perban enterem perbulangen la ngikutken patoken Jahwe kerna uga arusna perbahanenna man keluargana. Si ikutkenna eme kai si biasa ilakoken bas daerahna. Selain si e, la mehuli perbahanenna man ndeharana perban dirina saja ngenca ukurina. Contohna, rate-ate ia man ndeharana perban pentingen akapna bana janah gelah la lemah iakap kalak ia. Banci saja akapna adi la banci ipaksana ndeharana engkelengi ia, banci ibanna ndeharana mbiar man bana. Akapna adi mbiar ndeharana man bana, banci ia rate-ate man ndeharana. * Salah kel cara rukur ras perbahanen si bage perban e la ngergai diberu. Sitik pe la cocok iakap Jahwe perukuren ras perbahanen si bage.​—Baca Epesus 5:25, 28.

8. Uga carana gelah sekalak dilaki banci jadi kepala keluarga si mehuli?

⁸ Sekalak dilaki banci jadi kepala keluarga si mehuli adi iusihna Jahwe ras Jesus bas nggunaken wewenang. Cuba ukuri dua sipat Jahwe ras Jesus janah perdiateken uga sekalak kepala keluarga banci ncidahken sipat-sipat e man ndeharana ras anak-anakna.

9. Kai buktina Jahwe meteruk ukur?

 ⁹ Meteruk ukur. Aminna pe pentaren Jahwe asangken ise pe, nggit Ia megiken pendapat umatNa. (Kej. 18:23, 24, 32) Nggit ka Ia mere kesempaten man si lit bas wewenangNa guna mereken pendapat. (1 Raj. 22:19-22) Jahwe e sempurna, tapi la iarapkenNa gelah sempurna kai silakoken manusia. Tapi, isampatiNa manusia si la sempurna si nggit ngelayani Ia gelah banci berhasil. (Ms. 113:6, 7) I bas Pustaka ikataken maka Jahwe e “si nampati.” (Ms. 27:9; Heb. 13:6) Ikataken Raja Daud maka ngasup ia ngelakoken dahin si seh kel belinna perban Jahwe meteruk ukur janah nggit nampati ia.​—2 Sam. 22:36.

10. Kai buktina Jesus meteruk ukur?

¹⁰ Cuba ukuri kerna Jesus. Aminna pe ia Tuan man murid-muridna, nggit ia nuci nahe kalak e. Engkai maka iban Jahwe gelah kai si ilakoken Jesus e itulis bas Pustaka? Pasti gelah e jadi usihen man kerina kalak termasuk man kepala keluarga. Nina Jesus, “Enggo kuban usihen man kena, gelah lakoken kena ka bagi si kuban e.” (Joh. 13:12-17) Aminna pe mbelin kel wewenang Jesus, la iarapkenna gelah ia ilayani, tapi ia si ngelayani kalak si deban.​—Mat. 20:28.

11. Kai si banci ipelajari sekalak kepala keluarga kerna sipat meteruk ukur arah Jahwe ras Jesus?

¹¹ Pelajarenna man banta. Kai saja si ilakoken kepala keluarga guna mbuktiken maka ia meteruk ukur? Contohna, la iarapkenna gelah bagi ukurna kerina si ilakoken ndeharana ras anak-anakna. Nggit ia megiken pendapat ndeharana ras anak-anakna amin pe la seri pendapat kalak e ras pendapatna. Nina Marley si tading bas Amerika Serikat, “Mon-mon beda pendapatku ras perbulangenku. Tapi kugejapken maka iergaina kuakap aku. Nggit ia mindo pendapatku janah ukurina pendapatku alu manjar-anjar sope ibanna keputusen.” Selain si e, perbulangen si meteruk ukur nggit ngelakoken pendahin i rumah aminna pe bas daerahna iakap kalak pendahin e dahin diberu. Enda banci jadi tentangen. Engkai? Sekalak turang seninata si gelarna Rachel ngataken, “Bas kutaku, adi isampati perbulangen ndeharana nuci piring ntah mbersihken rumah, iakap tetanggana ras keluargana ia labo ‘dilaki.’ Iakap kalak e la banci iaturna ndeharana.” Adi cara rukur si bage biasa bas inganndu tading, ingetlah maka Jesus pe icucina nahe murid-muridna aminna pe e ianggap kalak  dahin e dahin budak. Sekalak kepala keluarga si mehuli la iarapkenna gelah hebat iakap kalak ia. Si arapkenna gelah ndeharana ras anak-anakna ermeriah ukur. Selain meteruk ukur, sipat kai ka si perlu icidahken sekalak kepala keluarga si mehuli?

12. Perban keleng ate Jahwe ras Jesus kita, kai si lakoken Jahwe ras Jesus?

¹² Kekelengen. Kerina si ilakoken Jahwe perban kekelengen. (1 Joh. 4:7, 8) Perban keleng ateNa kita, nggit Ia jadi temanta. Gelah banci kita jadi temanNa, iberekenNa man banta Pustaka ras organisasiNa. Arah Pustaka, katakenNa ka maka keleng ateNa kita. Alu bage reh tetapna ukurta maka keleng ate Jahwe kita. Uga kerna keperlunta tiap wari? Nina Pustaka, ‘IsikapkenNa kerinana guna kesenangenta, janah mbue kel si isikapkenNa.’ (1 Tim. 6:17) Sanga siban kesalahen, ipersingetiNa kita janah tetap nge keleng ateNa kita. Perban keleng ateNa kita, iberekenNa korban tebusen man banta. Jesus pe keleng kel atena kita, nggit ia mereken kegeluhenna man banta. (Joh. 3:16; 15:13) La lit kai pe si banci erban Jahwe ras Jesus lanai engkelengi kalak si terus setia.​—Joh. 13:1; Rom. 8:35, 38, 39.

13. Engkai maka penting kel ibuktiken kepala keluarga kekelengenna man keluargana? (Nen ka kotak “ Uga Carana gelah Sekalak Dilaki si Mbaru Denga Erjabu Iergai Ndeharana?”)

¹³ Pelajarenna man banta. Kerina si lakoken kepala keluarga arus perban kekelengen. Engkai maka e seh kel pentingna? Nina Rasul Johanes, “Kalak si la engkelengi turang seninana [ntah keluargana] si banci idahna, labo tuhu banci kelengina Dibata si la pernah idahna.” (1 Joh. 4:11, 20) Kai buktina maka keleng ate kepala keluarga man keluargana janah iusihna atena Jahwe ras Jesus? IusahakenNa gelah rembak keluargana ras Jahwe, iusahakenna gelah ermediate iakap keluargana ia, janah icukupina keperlun keluargana tiap wari. (1 Tim. 5:8) Iajarina anak-anakna janah idisiplinna ka adi salah. Terus ka iusahakenna erban keputusen si mereken kemulian man Jahwe ras si erguna man keluargana.  Mari sibahas kerna si e janah sinen kari uga sekalak kepala keluarga banci ngusih Jahwe ras Jesus.

14. Kai si arus ilakoken kepala keluarga gelah keluargana tetap rembak ras Jahwe?

¹⁴ Arus iusahakenna gelah keluargana rembak ras Jahwe. Perban iusih Jesus Bapakna, isampatina pengikut-pengikutna gelah tetap paguh kiniteken kalak e. (Mat. 5:3, 6; Mrk. 6:34) Sekalak kepala keluarga pe arus bage. Si pentingna akapna eme nampati keluargana rembak ras Jahwe. (Ul. 6:6-9) Ipastikenna gelah ia ras keluargana rajin mbaca Pustaka ras mpelajarisa, reh ku perpulungen, erberita, janah tetap jadi teman Jahwe.

15. Kai saja si lakoken sekalak kepala keluarga gelah igejapken keluargana maka ermediate ia man keluargana?

¹⁵ Arus iusahakenna gelah igejapken keluargana maka ermediate ia man keluargana. Ikataken Jahwe man Jesus maka keleng ateNa ia i lebe-lebe kalak si deban. (Mat. 3:17) Jesus pe ibuktikenna ka keleng atena murid-muridna arah ranan ras perbahanenna. Murid-murid Jesus pe ikatakenna maka keleng atena Jesus. (Joh. 15:9, 12, 13; 21:16) Kepala keluarga pe arus ka bage. Bukti keleng atena ndeharana ras anak-anakna teridah arah kai si ilakokenna. Misalna, ras-ras kalak e erlajar Pustaka. Selain si e, arus ka ikatakenna man kalak e maka keleng atena kalak e. Ikatakenna ka maka iergaina kel kalak e janah adi cocok ipujina kalak e i lebe-lebe kalak si deban.​—Kua. 31:28, 29.

16. Kai ka si arus ilakoken kepala keluarga? Janah kai ka si la banci ilakokenna?

¹⁶ Arus icukupina keperlun keluargana tiap wari. Ipastiken Jahwe gelah bias keperlun kalak Israel. Sanga iukumNa pe kalak e perban la patuh, tetap iberekenNa keperlun kalak e. (Ul. 2:7; 29:5) Gundari pe iberekenNa keperlunta. (Mat. 6:31-33; 7:11) Jesus pe bage si lakokenna, iberekenna pengikut-pengikutna man. (Mat. 14:17-20) Selain si e, ipepalemna ka pinakit kalak e. (Mat. 4:24) Gelah banci meriah iban kepala keluarga ukur Jahwe, arus ka icukupina keperlun keluargana. Tapi, la banci sibuksa ia erdahin. Adi sibuksa ia erdahin, lanai kari lit waktuna man keluargana. Lanai banci isampatina keluargana rembak ras Jahwe janah lanai iakap keluargana ia ermediate.

17. Uga Jahwe ras Jesus ngajari kita ras ndisiplin kita?

¹⁷ Arus iajarina keluargana alu cara si perkeleng. Iajari Jahwe ras idisiplinNa kita guna kiniulinta. (Heb. 12:7-9) Bagi Bapakna, Jesus pe iajarina kalak si lit bas wewenangna alu cara si perkeleng. (Joh. 15:14, 15) Sanga berena nasehat, ia tegas tapi mehuli. (Mat. 20:24-28) Iangkaina maka kalak e la sempurna janah rusur erban salah.​—Mat. 26:41.

18. Kai si arus lalap iinget kepala keluarga si mehuli?

¹⁸ Adi iusih sekalak kepala keluarga atena Jahwe ras Jesus, arus lalap ingetna maka ndeharana ras anak-anakna la sempurna. Sanga  iban kalak e kesalahen, la banci ia “kasar” man kalak e. (Kol. 3:19) Tapi bagi nasehat si lit bas Galati 6:1, arus inasehatina kalak e alu “manjar-anjar,” janah arus ka ingetna maka ia pe la sempurna. Bagi Jesus, itehna maka cara si mehulina i bas mereken pengajaren eme alu mereken usihen.​—1 Pet. 2:21.

19-20. Sanga erban keputusen, uga sekalak kepala keluarga ngusih Jahwe ras Jesus?

¹⁹ Erban keputusen si erguna man keluargana. Keputusen si iban Jahwe lalap erguna man banta. Contohna, iputuskenNa nciptaken kegeluhen labo guna kepentingenNa tapi gelah sigejapken keriahen ukur bagi si igejapkenNa. Selain si e, labo lit si maksa Ia mereken AnakNa gelah mate guna kita. IbanNa keputusen si bage perban isampatiNa ateNa kita. Jesus pe lalap erban keputusen si erguna man kalak si deban. (Rom. 15:3) Contohna, sanga latih kel pe akapna, labo ia istirahat, tapi ibanna keputusen guna ngajari kalak si deban.​—Mrk. 6:31-34.

²⁰ Sekalak kepala keluarga si mehuli, itehna maka salah sada tanggung jawap si mberatna eme erban keputusen si mehuli man keluargana. Penting iakapna tanggung jawapna e. Iusahakenna la erban keputusen si la jelas alasenna ntah pe si menurut perasanna saja. Tapi ikutkenna petunjuk Jahwe si lit bas Pustaka gelah banci erban keputusen si mehuli. * (Kua. 2:6, 7) E buktina iukurina kepentingen kalak si deban labo dirina saja.​—Pil. 2:4.

21. Kai pagi sibahas bas artikel seterusna?

²¹ Enggo ibereken Jahwe tanggung jawap si mbelin man kepala keluarga janah ateNa idalanken kalak e tanggung jawap e alu cara si mehuli. Adi iusahaken sekalak kepala keluarga ngusih Jahwe ras Jesus, pasti ia jadi kepala keluarga si mehuli. Adi ndeharana pe ndalanken tanggung jawapna alu mehuli, pasti ermeriah ukur perjabun kalak e. Uga arusna perukuren sekalak ndehara nandangi tanggung jawap perbulangenna selaku kepala keluarga? Tentangen kai saja si iadapina? Sibahas pagi jawapenna bas artikel seterusna.