1. Kai salah sada alasen si erban keluarga Jahwe banci ersada?

MERIAH ukurta jadi bagin keluarga Jahwe perban keluarga e dame janah ersada. Engkai maka banci bage? Salah sada alasenna perban siusahaken asa ngasupta ngergai wewenang si iban Jahwe bas runggun. Situhuna, adi reh bagesna siangkai pengaturen kerna wewenang e, reh ulina me persadanta.

2. Penungkunen kai saja kari sijawap bas artikel enda?

² Bas artikel enda sibahas kari ise si lit wewenangna bas runggun. Selain si e, sibahas ka kari penungkunen-penungkunen enda: Kai tugas diberu-diberu bas runggun? Payo nge tiap dilaki jadi kepala man tiap diberu bas runggun? Bali nge wewenang pertua-pertua man turang senina ras wewenangna selaku kepala keluarga man ndeharana ras anakna? Mari sibahas lebe uga arusna perukurenta man diberu-diberu si lit bas runggun.

3. Uga carana gelah reh bagesna pengerganta man kai si ilakoken diberu-diberu bas runggun?

³ Siergai diberu-diberu si kerja keras guna ngurus keluargana, guna mberitaken berita si meriah, ras nampati kalak bas runggun. Banci reh bagesna pengerganta man kalak e adi siukuri uga perukuren Jahwe ras Jesus kerna kalak e. Sibahas ka kari uga arusna perbahanenta man diberu-diberu alu mpelajari uga perbahanen Rasul Paulus man kalak e.

4. Kai saja bukti bas Pustaka maka iergai Jahwe diberu bali bagi Ia ngergai dilaki?

 ⁴ I bas Pustaka ikataken maka iergai Jahwe diberu ras dilaki. Contohna, bas jaman rasul-rasul ibereken Jahwe kesah si badia man diberu ras dilaki guna ngelakoken perbahanen si luar biasa. Misalna, ngerana i bas erbage-bage bahasa. (Perb. 2:1-4, 15-18) Selain si e, kalak e pe ipilih kesah si badia gelah banci merentah ras Kristus. (Gal. 3:26-29) Diberu pe banci pagi ngaloken kegeluhen si rasa lalap i doni bali bagi dilaki. (Ket. 7:9, 10, 13-15) Man diberu pe ibereken ka tugas erberita ras ngajar. (Mat. 28:19, 20) Contohna, bas buku Perbahanen Rasul-Rasul itulisken kerna sekalak diberu si gelarna Persila. Persila ras perbulangenna Akuila njelasken terbagesen kerna kebenaren man Apolos si melala pemetehna kerna Kitap si Badia.​—Perb. 18:24-26.

5. Menurut Lukas 10:38, 39, 42, kai buktina iergai Jesus diberu-diberu?

⁵ Iergai Jesus diberu-diberu. La ia nggit ngikutken kebiasan kalak Parisi si erpengakap maka diberu-diberu labo penting. Kalak Parisi la nggit ngerana man diberu i lebe-lebe jelma si enterem janah la ka kalak e nggit ncakapken kerna Pustaka ras diberu-diberu. Tapi Jesus la bage, icakapkenna kerna Pustaka man diberu-diberu labo man dilaki saja. * (Baca Lukas 10:38, 39, 42.) Ipediatna ka diberu-diberu ikut ras ia sanga ia erberita. (Luk. 8:1-3) Selain si e, ibere Jesus hak istimewa man diberu-diberu guna ngataken man rasul-rasul maka ia enggo ipekeke.​—Joh. 20:16-18.

6. Kai buktina iergai Paulus diberu-diberu?

⁶ Ikataken Paulus man Timotius gelah iergaina diberu-diberu. Iiahken Paulus ia gelah ianggapna ‘diberu si tertuan bagi mamakna’ janah ‘diberu si terngudan bagi turangna.’ (1 Tim. 5:1, 2) Aminna pe melala si ilakoken Paulus guna mpegegehi kiniteken Timotius, tapi akuina maka si tangtangna ngajarken “Kitap si Badia” man Timotius eme mamakna ras ninina. (2 Tim. 1:5; 3:14, 15) Selain si e, itulis Paulus ka gelar diberu-diberu bas suratna si ikirimna man kalak Roma. Iperdiateken Paulus kai si enggo ilakoken diberu-diberu janah icidahkenna pengerganna man kai si enggo ilakoken kalak e.​—Rom. 16:1-4, 6, 12; Pil. 4:3.

7. Penungkunen-penungkunen kai nge si nandangi sibahas?

⁷ Bagi si ijelasken bas paragrap sebelumna, la lit ituriken bas Pustaka maka dilaki pentingen asangken diberu. Diberu-diberu si perkeleng ras si nggit mere enggo mereken melala penampat man runggun. Selain si e, ngarap kel pertua-pertua gelah ijaga kalak e runggun tetap dame ras ersada. Tapi lit piga-piga penungkunen si perlu ijawap. Contohna: Engkai maka isuruh Jahwe ipake diberu penutup takal i bas piga-piga situasi? Perban dilaki-dilaki ngenca si ilantik jadi pertua ras sinampati runggun, payo nge e ertina tiap dilaki jadi kepala man kerina diberu bas runggun?

8. Menurut Epesus 5:23, payo nge tiap dilaki kepala man kerina diberu? Jelasken.

⁸ Payo nge tiap dilaki kepala man kerina diberu? Jawapenna lang. Sekalak dilaki labo kepala man kerina diberu si lit bas runggun. (Baca Epesus 5:23.) Bas keluarga lit wewenang perbulangen man ndeharana. Sekalak anak dilaki si enggo iperidiken labo  jadi kepala man mamakna. (Ep. 6:1, 2) Bas runggun lit wewenang pertua-pertua man turang senina, tapi lit batasna. (1 Tes. 5:12; Heb. 13:17) Uga kerna diberu si lenga erjabu si lanai tading ras orang tuana? Lalap nge ergaina orang tuana tapi lanai bapakna si jadi kepalana. Iergaina pertua-pertua tapi selaku turang senina saja ngenca, perban kepalana eme Jesus.

9. Engkai maka mon-mon perlu ipake diberu-diberu penutup takal?

⁹ Ate Jahwe kerina si lit bas runggun banci erdalan alu ratur. Emaka, ilantikna Jesus jadi kepala man dilaki-dilaki. Itetapken Jahwe ka maka dilaki me si minpin dahin erberita bage pe nembah Dibata bas runggun. Wewenang si bage la ibere Dibata man diberu. (1 Tim. 2:12) Perban piga-piga situasi, banci jadi arus ilakoken sekalak diberu tugas si biasana ilakoken sekalak dilaki janah isuruh Jahwe kalak e make penutup takal sanga ngelakoken tugas e. * (1 Kor. 11:4-7) Suruh Jahwe ipake diberu penutup takal labo perban rendah iakap Jahwe kalak e, tapi gelah banci icidahken kalak e pengerganna man kalak si enggo ibereken Jahwe wewenang. Janahta ngukuri si e, mari sijawap penungkunen enda: Seh ja nge wewenang kepala keluarga ras pertua-pertua?

10. Engkai maka banci saja mon-mon iban pertua atena peraturen bas runggun?

¹⁰ Keleng ate pertua-pertua man Kristus janah keleng ka ate kalak e ‘biri-biri’ si enggo ibere Jahwe ras Jesus guna iurus kalak e. (Joh. 21:15-17) Perban pertua si ngurus runggun, banci saja iakapna ia bagi sekalak  bapak man turang senina. Bali bagi sekalak bapak ntah pe kepala keluarga lit hakna erban peraturen guna ngelindungi keluargana, sekalak pertua pe banci ka akapna maka lit hakna erban peraturen guna ngelindungi biri-biri Dibata. Banci jadi lit turang senina si mindo pertua si erban keputusen man bana. Tapi, seri nge wewenang pertua-pertua bas runggun ras wewenangna selaku kepala keluarga?

11. Bas kai saja wewenang kepala keluarga seri ras wewenang pertua?

¹¹ Ikataken Rasul Paulus maka lit si seri arah wewenang sekalak kepala keluarga ras wewenang sekalak pertua. (1 Tim. 3:4, 5) Contohna, iarapken Jahwe gelah kerina anggota keluarga patuh man kepala keluargana. (Kol. 3:20) IarapkenNa ka gelah kerina kalak bas runggun patuh man pertua-pertua. Selain si e, iarapken Jahwe gelah kerina kepala keluarga ras pertua-pertua nampati kalak si lit bas tanggung jawapna guna engkelengi Jahwe. Usahaken kalak e ka gelah kalak si lit bas tanggung jawapna nggejapken maka ia ikelengi. Bali bagi kepala keluarga si mehuli, usahaken pertua-pertua nampati turang senina si sangana ngadapi masalah. (Jak. 2:15-17) Selain si e, arapken Jahwe gelah kerina pertua ras kepala keluarga nampati kalak patuh man perentah Jahwe janah  persingetiNa kalak e gelah la ngelakoken ‘kai pe si lebihen asangken si tertulis’ bas Pustaka.​—1 Kor. 4:6.

12-13. Menurut Roma 7:2, kai bedana wewenang kepala keluarga ras wewenang pertua?

¹² Lit si beda kel antara wewenang sekalak pertua ras sekalak kepala keluarga. Labo kepala keluarga si ipilih Jahwe jadi hakim, tapi pertua nge si ipilihNa. BereNa tanggung jawap man kalak e guna mpedarat kalak si la nggit ertobat arah runggun nari.​—1 Kor. 5:11-13.

¹³ Tapi bere Jahwe piga-piga wewenang man kepala keluarga si la ibereNa man pertua-pertua. Contohna, lit wewenang kepala keluarga erban peraturen bas keluargana janah pastikenna kerina keluargana patuh man peraturen e. (Baca Roma 7:2.) Misalna, lit hak kepala keluarga nentuken jam piga si melawenna anakna mulih ku rumah. Lit ka hakna mere disiplin man anakna adi la ia patuh man peraturen e. (Ep. 6:1) Sekalak kepala keluarga si perkeleng, icakapkenna lebe ras ndeharana ope lenga ibanna peraturen bas rumah, perban kalak e duana enggo “jadi sada.” *—Mat. 19:6.

14. (a) Menurut Markus 10:45, engkai maka cocok Jesus si ipilih Jahwe jadi kepala runggun? (b) Kai nge tanggung jawap Badan Pinpinen? (Nen kotak “ Tanggung Jawap Badan Pinpinen.”)

¹⁴ Alu korban tebusen enggo tukur Jahwe kegeluhen kerina kalak si lit bas runggun. (Baca Markus 10:45; Perb. 20:28; 1 Kor. 15:21, 22) Perban enggo korbanken Jesus geluhna guna nebus kita, emaka cocok ia ilantik  Jahwe jadi kepala runggun. Selaku kepala runggun lit hak Jesus nentuken kai si arus ilakoken tiap kalak, tiap keluarga, ras tiap runggun janah lit ka hakna guna mastiken maka sipatuhi peraturen e. (Gal. 6:2) Tapi Jesus labo terjeng erban peraturen. Ermediate ka ia man banta janah keleng atena kita.​—Ep. 5:29.

15-16. Kai si banci pelajarindu arah kai si kataken Marley ras Benjamin?

¹⁵ Bukti diberu-diberu ngergai Kristus eme alu patuh man dilaki-dilaki si enggo ilantik Jesus guna ngurus kalak e. Nina sekalak turang seninata si gelarna Marley, si tading i Amerika Serikat, “Kuergai kel tanggung jawapku selaku ndehara ras selaku diberu bas runggun. Kuusahaken kel ngergai wewenang sibere Jahwe man perbulangenku ras pertua-pertua. Reh nukahna kuakap ngergai perbulangenku ras pertua-pertua bas runggun perban ergai kalak e kel kai si enggo kulakoken.” Enterem diberu-diberu setuju ras kai nina turang seninata Marley ndai.

¹⁶ Adi dilaki-dilaki bas runggun ngergai diberu-diberu, e buktina iangkai kalak e pengaturen Jahwe kerna wewenang. Nina Benjamin, sekalak turang senina si tading bas Inggris, “Melala kel si kupelajari arah komentar diberu bas runggun, pendapat si ibereken kalak e, uga carana erlajar, bage pe kerna uga carana gelah reh beluhna bas erberita ras ngajar. Erguna kel kuakap kerina si lakoken kalak e.”

17. Engkai maka arus siergai wewenang si ibereken Jahwe?

¹⁷ Adi kerina kalak bas runggun, la soal dilaki, diberu, kepala keluarga, ras pertua-pertua ngergai wewenang si ibereken Jahwe, dame me runggun. Si pentingna, terpuji me Bapakta Jahwe si perkeleng.​—Ms. 150:6.