1. Kai saja si erban kita perlu inasehati, ras engkai maka kerina kita perlu nasehat?

 KERINA kita perlu nasehat. Mon-mon, sipindo nasehat arah sekalak jelma perban sihamati ia. Banci saja lit turang seninata mere nasehat man banta perban mbiar ia ‘salah perbahanenta,’ ntah mbiar ia silakoken si banci erban kita menyesal. (Gal. 6:1) Selain si e, adi silakoken kesalahen si serius, biasana inasehati kita ntah pe ipersingeti. La soal kai alasenna kita inasehati, perlu sibegiken nasehat e. Adi bage siban, sidat me gunana janah e banci nelamatken geluhta.​—Kua. 6:23.

2. Menurut Kuan-kuanen 12:15, engkai maka perlu sibegiken nasehat?

² Bas ayat tema artikel enda inasehati kita gelah ‘sibegiken ranan kalak si pentar.’ (Kua. 22:17) Labo lit jelma si kai pe tehna. Pasti lalap lit kalak si buen pemetehna ntah pe buen pengalamenna asangken kita. (Baca Kuan-kuanen 12:15.) Adi sibegiken nasehat, e ertina kita meteruk ukur, siteh ngasa ja kengasupenta, ras siakui maka lalap kita perlu penampat kalak. Alu penegu-negu kesah si badia Jahwe, Raja Salomo si pentar nulisken kata-kata enda: “Rencana berhasil adi mbue penasehat.”​—Kua. 15:22.

3. Alu cara kai saja nasehat banci sialoken?

³ Lit dua jenis nasehat, nasehat si langsung ras nasehat si la langsung. Nasehat si langsung eme sanga inasehati pertua kita, ntah pe sanga inasehati turang seninata kita gelah siperobahi lagu langkahta. Adi inasehati kalak kita perban keleng atena kita janah nasehatna e erpalasken Pustaka, arusna nggit kita megikenca. Adi sibegiken ras sidalanken nasehatna, e buktina siergai nasehat e. Jadi, kai maksudna nasehat si la langsung? Nasehat si la langsung eme sanga sibaca Pustaka ntah pe publikasi, janah e erban tersuruh  ukurta mperobahi sipat-sipat ntah pe perbahanenta si salah.​—Heb. 4:12.

4. Menurut Pengerana 7:9, kai si la banci silakoken sanga sidat nasehat?

⁴ Sanga langsung kita inasehati kalak, banci saja mesera siakap ngalokenca ntah pe tersinggung kita. Memang kita la sempurna janah pasti erban salah. Tapi sanga kataken kalak kai salahta janah inasehatina kita, banci saja mesera siakap ngalokenca. (Baca Pengerana 7:9.) Banci saja sibela dirita ntah curiga kita engkai maka inasehatina kita. Selain si e, banci ka la kita setuju man carana mereken nasehat ntah la siakap lit hakna mereken nasehat man banta perban ia pe melala kelemahenna. Adi la kita nggit ngaloken nasehatna, banci saja la sibegiken nasehatna e ntah pe sipindo nasehat si bagi ukurta arah kalak si deban.

5. Kai kari sibahas bas artikel enda?

⁵ Bas artikel enda, sibahas kari kerna piga-piga contoh bas Pustaka si nggit ngaloken nasehat ras si la nggit ngalokenca. Sibahas ka kari kai si perlu silakoken gelah reh nukahna siakap ngaloken nasehat ras ndatken gunana.

6. Kai si banci sipelajari arah Raja Rehabeam sanga ia inasehati?

⁶ Cuba ukuri contoh kerna Rehabeam. Sanga ia jadi raja Israel, ijumpai rakyatna ia janah ipindo kalak e gelah urakina min baban kalak e si ibereken bapakna Salomo. Tangtangna pentar perbahanen Rehabeam. Sungkunna man tua-tua Israel kai si arus ikatakenna man rakyatna e. Ikataken tua-tua e adi ikutkenna sura-sura rakyatna, pasti lalap idukung kalak e ia. (1 Raj. 12:3-7) Tapi la cocok akap Rehabeam nasehat kalak e. Emaka pindona nasehat arah teman-temanna sebaya. Banci saja umur teman-temanna e kira-kira 40-en, pasti enggo lit pengalamen kalak e. (2 Kro. 12:13) Tapi la mehuli nasehat si ibere kalak e man Rehabeam. Isuruh kalak e gelah itambahi Rehabeam baban rakyatna. (1 Raj. 12:8-11) Situhuna, kenca begi Rehabeam duana nasehat e banci ia ertoto man Jahwe janah sungkunna nasehat si apai si arus begikenna. Tapi la bage banna. Mis ikutkenna nasehat si cocok akapna eme nasehat teman-temanna ndai. Akibat keputusenna e la mehuli man bana bage pe man kalak Israel. Kai pelajarenna man banta? Mon-mon la siakap cocok nasehat si ibereken man banta. Tapi adi nasehat e erpalasken Pustaka, arusna nggit kita ngalokenca.

7. Kai si banci sipelajari arah Raja Ussia?

⁷ Raja Ussia la nggit ngaloken nasehat. Bas sada wari masuk ia ku rumah pertoton Jahwe guna nutung kemenyan, padahal imam-imam ngenca si banci ngelakoken si e. Emaka bagenda nina imam-imam, “O Ussia, labo kam cocok nutung kemenyan man Jahwe! Imam-imam ngenca si banci nutung kemenyan.” Uga tanggapen Ussia? ‘Merawa ia.’ Bicara meteruk ukur min ndai Ussia, janah nggit ia ngaloken nasehat e, jenari mis tadingkenna rumah pertoton, banci saja iampuni Jahwe ia. Tapi la lakokenna bage. Engkai maka la begikenna nasehat imam-imam e? Banci saja perban ia raja, akapna banci lakokenna kai pe atena. Tapi perbahanenna e la cocok akap Jahwe. Perban melebesa Ussia, kena kusta me ia, janah ‘sakit kusta ia seh ngasa mate.’ (2 Kro. 26:16-21) Kai si banci sipelajari? La soal ise pe kita, adi la kita nggit  ngaloken nasehat si erpalasken Pustaka, la meriah ukur Jahwe ngidah kita.

8. Uga tanggapen Jop sanga ia inasehati?

⁸ Lit iceritaken bas Pustaka kerna kalak si nggit ngaloken nasehat ras ndatken pasu-pasu. Beda kel perbahanen kalak e ras contoh-contoh si ibahas ndai. Contohna eme Jop. Keleng kel ate Jop man Dibata janah banna atena meriah ukur Dibata. Tapi Jop la sempurna. Sanga mberat kel masalahna, pernah salah perukurenna. Perban si e, datna nasehat si terus terang arah Elihu bage pe arah Jahwe. Uga tanggapen Jop? Perban meteruk ukur ia, nggit ia ngalokenca. Bagenda nina, ‘Aku ngerana kerna si la kuangka. Nyesal aku perban kai si enggo kubelasken, eme sebapna kundul aku i datas abu dapur ras abu taneh.’ Perban meteruk ukur Jop, ipasu-pasu Jahwe ia.​—Jop 42:3-6, 12-17.

9. Usihen kai si iban Musa sanga ia inasehati?

⁹ Contoh si deban si banci siusih eme Musa. Ia pe contoh si mehuli bas ngaloken nasehat. Pernah ia emosi janah la begikenna Jahwe. Akibatna, la pediat Jahwe ia masuk ku Negri Perjanjin. (Bil. 20:1-13) Sanga pindoken Musa man Jahwe gelah ubahNa keputusenNa, bagenda nina Jahwe man bana, “Ula nai singetken kerna si e!” (Ul. 3:23-27) Amin pe bage, labo nembeh ate Musa. Nggit Musa ngaloken keputusen Jahwe, emaka tetap igunaken Jahwe ia minpin bangsa Israel. (Ul. 4:1) Adi inasehati kita, perlu siusih Jop ras Musa. Jop nggit ngubah carana rukur janah la usahakenna mbela dirina. Musa tetap setia man Jahwe amin pe la seh sura-surana masuk ku Negri Perjanjin.

10. (a) Menurut Kuan-kuanen 4:10-13, kai saja gunana man banta adi sibegiken nasehat? (b) Uga tanggapen piga-piga turang senina sanga kalak e inasehati?

¹⁰ Pasti mbue kel gunana man banta adi nggit kita ngusih kalak si setia bagi Jop ras Musa. (Baca Kuan-kuanen 4:10-13.) Enterem turang seninata enggo nggejapken gunana perban nggit ngaloken nasehat. Contohna Emmanuel, sekalak turang seninata si tading bas Kongo. * Pernah datna nasehat si tegas arah turang senina si paguh kinitekenna. Bagenda nina, “Idah kalak e enggo nandangi ceda hubungenku ras Jahwe, emaka sampatina aku. Kubegiken nasehat kalak e, emaka banci kuelakken masalah.” Megan, sekalak perintis bas Kanada ngataken, “Mon-mon, labo kuakap meriah sanga inasehati. Tapi situhuna perlu kel aku nasehat e.” Marko, arah Kroasia ngataken, “Sempat bene tanggung jawapku bas runggun. Tapi adi kuinget-inget ka mulihi nasehat si kudat paksa si e, situhuna e nampati aku gelah rembak mulihi ras Jahwe.”

11. Kai si ikataken Turang Senina Karl Klein kerna ngaloken nasehat?

¹¹ Turang senina si deban si enggo nggejapken kai gunana ngaloken nasehat eme Karl Klein. Ia pernah jadi anggota Badan Pinpinen. Bas pengalamen geluhna, iceritakenna maka pernah idatna nasehat si tegas arah teman kompakna eme Joseph F. Rutherford. Tangtangna kitik nge ukur Karl Klein megisa. Nina Karl Klein, “Sanga jumpa ka aku ras Rutherford, nina bangku, ‘Mejuah-juah Karl!’ Tapi perban sakit hati denga aku, la teku tutus ngaloisa. Nina ka bangku, ‘Hati-hati Karl, ula kari tangkap Iblis kam!’” Perban mela  Klein, ikatakenna maka labo lit masalahna ras Rutherford. Tapi teh Rutherford maka kitik denga ukur Klein. Emaka nina, “O bage ari. Hati-hati sajalah kam gelah ula kari kam tangkap Iblis.” Payo kel akap Klein si ikataken Rutherford e. Selain si e nina Klein, “Adi lalap ateta nembeh turang seninata, apai ka adi lit hakna mpeseh kai si katakenna e . . . , sipediat me kita isidingi Iblis.” * (Ep. 4:25-27) Perban nggit Karl Klein ngaloken nasehat arah Rutherford banci kalak e tetap kompak.

12. Engkai maka perlu kita meteruk ukur sanga ipersingeti? (Masmur 141:5)

¹² Gelah nukah siakap ngaloken persinget perlu kita meteruk ukur. Perlu siinget maka kita labo sempurna janah mon-mon motu perbahanenta. Bali bagi si enggo sibahas ndai, Jop pe pernah salah perukurenna. Tapi dungna iubahna carana rukur, emaka ipasu-pasu Jahwe ia. Engkai maka nggit ia robah? Perban Jop meteruk ukur. Nggit ia ngaloken persinget arah Elihu amin pe Elihu ndauh ngudan asangken ia. (Jop 32:6, 7) Sipat meteruk ukur pe nampati kita ndalanken persinget si la siakap cocok, ntah pe adi persinget e ibereken kalak si terngudan asangken kita. Sekalak pertua i Kanada ngataken, “Labo kita banci jadi kalak si reh ulina adi la lit si mereken persinget man banta.” Kerina kita perlu mpebelin sipat-sipat si ihasilken kesah si badia janah reh beluhna bas pelayanen selaku kalak Kristen.​—Baca Masmur 141:5.

13. Sanga ipersingeti kita, e mbuktiken kai?

¹³ Sianggaplah persinget e bukti kekelengen Dibata. Ate Jahwe si mehulina min si terjadi man banta. (Kua. 4:20-22) Sanga sidat persinget arah Pustaka, arah publikasi si erpalasken Pustaka, ntah pe arah turang senina si paguh kinitekenna, e buktina keleng ate Dibata kita. Enda cocok ras kata-kata bas Heber 12:9, 10, nina, “Persingeti Dibata kita guna kepentingenta.”

14. Kai arusna siukuri sanga kita ipersingeti?

¹⁴ Ukurilah kai isi persinget e, labo cara persinget e ibereken. Mon-mon, banci saja la siakap pas cara persinget e ibereken man banta. Memang, kalak si mereken persinget perlu usahakenna gelah persinget e menukah ialoken. * (Gal. 6:1) Tapi adi sangana kita ipersingeti, fokus min kita nandangi isi persinget e, amin pe kurang cocok siakap carana mpesehsa.  Banci siukuri penungkunen enda, ‘Kai nge manpaat si banci kudat arah persinget e? Banci nge aku fokus nandangi isi persinget e, labo man kalak si merekenca?’ Adi siusahaken ndatken manpaat arah persinget si ibereken man banta, jadi kalak si pentar me kita.​—Kua. 15:31.

15. Engkai maka arus sipindo nasehat arah kalak si deban?

¹⁵ Iahken Pustaka kita gelah mindo nasehat kalak si deban. Kuan-kuanen 13:10 ngataken, “Kepentaren jang kalak si mindo nasehat kap.” Kalak si nggit mindo nasehat janah la timaina kalak si mereken nasehat man bana, biasana beluhen ia erban keputusen asangken kalak si la nggit mindo nasehat. Emaka pindolah nasehat arah kalak si deban.

16. Katawari nge kita perlu mindo nasehat?

¹⁶ Katawari nge perlu sipindo nasehat arah turang seninata? Cuba ukuri piga-piga situasi enda. (1) Sekalak turang senina mindo man perberita si erpengalamen gelah ikut ras ia mandu pelajaren Pustaka. Kenca si e, pindona nasehat uga gelah reh ulina carana ngajar. (2) Sekalak turang senina nukur baju atena. Emaka sungkunna pendapat arah sekalak turang senina si paguh kinitekenna kerna piga-piga pilihen. (3) Sekalak turang senina ndatken penugasen si pertama guna mpeseh khotbah man jelma si enterem. Ipindokenna man turang senina si enggo rusur mpeseh khotbah, gelah megiken ia khotbah ras mereken saran man bana. Turang senina si enggo rusur mpeseh khotbah pe, banci pindona saran arah turang senina si enggo mbue pengalamenna bas mpeseh khotbah. Kenca si e, dalankenna nasehat si enggo alokenna e.

17. Uga carana gelah nasehat banci erguna man banta?

¹⁷ Kerina kita pasti ndatken nasehat, nasehat si langsung ntah pe si la langsung. Sanga sialoken nasehat e, siingetlah pelajaren si enggo sibahas ndai. Tetaplah meteruk ukur. Ukurilah isi nasehat si enggo ibereken, labo kerna uga carana nasehat e ibereken. Dalankenlah nasehat si alokenndu. Labo lit sada pe arah kita mulai kin lahir nari enggo pentar. Tapi adi ‘sibegiken nasehat janah sialoken pengajaren,’ lit janji bas Pustaka maka jadi kalak si “pentar” me kita.​—Kua. 19:20.