Aku lahir tahun 1941 bas Paris, Prancis. Keluargaku labo kalak bayak. Meriah kel kuakap erlajar. Tapi, sanga umurku sepuluh tahun sakit TBC aku. Emaka lanai banci aku sekolah. Nina dokter arus aku istrahat bas ingan medem perban lemah paru-paruku. Emaka piga-piga bulan dekahna mbaca kamus ngenca dahinku ras megiken acara pendidiken i Radio Sorbonne si isiarken Universitas Paris. Dungna, ikataken dokter maka enggo malem penakitku e janah enggo banci aku mulihi sekolah. Meriah kel ukurku. Paksa si e, luar biasa kel kuakap pendahin sekalak dokter. Emaka, mulai jenari ersura-sura aku mpepalem kalak si sakit. Asal isungkun bapakku kai cita-citaku, jawapenku lalap seri eme jadi dokter. Cita-cita e kuakap si pentingna bas geluhku.

Kami sada keluarga eragama Katolik. Tapi labo kuangkai kel kerna Dibata, janah melala penungkunenku si lenga kudat jawapna. Sanga mulai aku kuliah bas kedokteran, i je me tangtangna aku tek kegeluhen e iciptaken Dibata.

Kuinget denga sanga tangtangna kuperdiateken sel bunga tulip alu mikroskop. Luar biasa kel kuakap perban banci lindungina bana sanga kena las ntah pe sanga mbergeh. Banci ka kuidah maka sitoplasma ntah pe salah sada zat bas sel e reh kitikna sanga kena sira janah kembang sanga itama bas lau si bersih. Perban lit kengasupenna si bage, mahluk hidup si kitik banci sesuaikenna bana ras lingkungenna. Arah rancangen si luar biasa bas tiap sel e, kuteh maka kegeluhen labo lit bage-bage saja.

Bas tahun si peduaken aku kuliah, reh buena kudat buktina maka Dibata e tuhu-tuhu lit. Sanga pelajari kami kerna daging manusia, iteh  kami me maka susunen tanta mulai arah siku-siku nari ku pergelangen tan me si erban jari-jarita banci ibengkokken ras banci ka ipepinter. Luar biasa kel posisi ras cara kerja otot, urat, bage pe jaringen pengikat bas tanta. Contohna lit urat si mpersada otot mulai arah siku-siku nari seh ku tulan bas ruas si peduaken jari-jarita. Urat ndai terbagi dua bas ruas e, emaka dungna lit celahna. Kenca si e, urat si deban si lit i teruh urat ndai nyelip arah celah e ku ujung jari-jarita. Perban lit jaringen-jaringen si megegeh, urat-urat ndai banci tetap bas inganna, eme i deher tulan jari-jarita. Adi la bage si terjadi, urat-urat bas tanta pinter lalap janah kaku, la banci sibengkokken. Enda mbuktiken maka daging manusia memang tuhu-tuhu irancang Pencipta si seh kel beluhna.

Reh luar biasana kuakap ngidah Pencipta sanga kupelajari uga bayi banci erkesah kenca ia lahir. Sanga bas beltek denga bayi e, la ia banci erkesah. Datna oksigen arah mamakna erkelangken tali pusar. Perban si e, alveoli (kantong-kantong udara si kitik kel) si lit bas paru-paruna lenga terisi udara janah lenga banci kembang. Piga-piga minggu kenca lahir bayi e, cairen si igelari surfaktan ngelapisi bagin si arah bas i kantong-kantong udara e. Perban lit surfaktan e, bagin si arah bas i kantong-kantong ndai la leket janah banci kembang sanga masuk udara. Kenca lahir bayi e ras tangtangna ia erkesah, lit piga-piga si luar biasa si terjadi. Tertutup me lubang jantung bayi e, emaka mulai me masuk dareh ku paru-paru. Kenca si e, masuk udara ku bas kantong-kantong si kitik si lit bas paru-paruna. Dungna, bayi e banci erkesah sisada.

Merhat aku nandai Pencipta si ngerancang kerina si luar biasa e, emaka tutus ateku mbaca Pustaka. Luar biasa kel kuakap ngidah undang-undang kerna kebersihen ras kesehaten si bereken Dibata man bangsa Israel lebih 3.000 tahun si lewat. Contohna, iperentahken Dibata gelah itanem kalak e kotorenna kenca kalak e buang air besar. IperentahkenNa ka kalak e gelah rajin cuci tan ras ridi. Selain si e, ikatakenNa ka maka adi lit gejala penakit si menular bas sekalak jelma, arus ia ikarantina. Mbarenda nari, enggo jelasken Pustaka uga carana penakit banci menular. Tapi kira-kira 150 tahun si lewat denga maka teh ilmuwan-ilmuwan kerna si e. (Im. 13:50; 15:11; Ul. 23:13) Selain undang-undang kerna kebersihen ras kesehaten, undang-undang kerna hubungen seks bas buku Imamat pe nampati kalak Israel gelah tetap sehat. (Im. 12:1-6; 15:16-24) Dungna, kudat kesimpulen maka ibereken Pencipta undang-undang e man kalak Israel guna kiniulin kalak e, janah ipasu-pasuNa kalak si patuh man perentahNa. Tek aku maka Pustaka tuhu-tuhu arah Dibata nari, amin pe paksa si e lenga kuteh ise gelar Dibata.

Sanga aku kuliah kedokteran, jumpa aku ras Lydie, dungna ngena teku ia. Erjabu kami tahun 1965. Paksa si e lenga aku tamat kuliah. Bas tahun 1971, lit telu anak kami, dungna lahir ka telu nari anak kami. Tutus kel ate Lydie ndahiken tugas-tugasna selaku ndehara janah dukungna ka pendahinku selaku dokter.

 Kenca erdahin aku telu tahun bas rumah sakit, dungna kubuka klinikku. La ndekah kenca si e, reh sekalak dilaki ras diberuna ertambar. Kalak e duana eme pasienku si mbaru, si tangtangna kuceritaken ndai. Sanga kutulis teku resep tambar man dilakina, nina diberuna, “Dokter, ula berendu tambar si lit kandungen darehna ya.” Sengget aku, ningku, “Tuhu? Engkai maka bage?” Nina, “Kami Saksi-Saksi Jahwe.” Sanga si e, lenga pernah kubegi kerna Saksi-Saksi Jahwe bage pe ajaren kalak e kerna dareh. Buatna Pustakana ras bukana ayat-ayat si njelasken engkai maka la kalak e nggit ngaloken dareh. (Perb. 15:28, 29) Kenca si e, jelasken kalak e man bangku kerna kai pagi si ilakoken Kerajan Dibata. Imasapken Kerajan e pagi kerina kesusahen, penakit, ras kematen. (Ket. 21:3, 4) Semangat kel aku janah ningku, “Situhuna, si icakapken kena e eme sura-suraku kitik-kitik nari. Nggit aku jadi dokter perban kusampati ateku kalak si sakit.” Meriah kel ukurku megiken kai si kataken kalak e janah lit sada setengah jam dekahna kami ngerana. Kenca ngerana ras kalak e, lanai aku nggit jadi kalak Katolik janah i je me tangtangna kuteh maka Pencipta si luar biasa kuakap sedekah enda lit kepe gelarNa eme Jahwe!

Duana Saksi ndai lit telu kali reh ku klinikku. Tiap reh kalak e, lit lebih sada jam kami ngerana. Kuundang kalak e reh ku rumahku gelah banci reh buena waktu kami mbahas kerna Pustaka. Lydie pe ikut mbahas kerna Pustaka ras kami, tapi la ia nggit ngakuisa maka lit piga-piga ajaren Katolik si salah. Emaka kuundang sekalak pastor reh ku rumah kami. Erdebat kami kerna ajaren gereja seh ngasa tengah berngi janah Pustaka ngenca pake kami. Dung pembahasen e, enggo tek Lydie maka kai si ajarken Saksi-Saksi Jahwe memang kebenaren. Mulai paksa si e, reh belinna me kekelengen kami man Jahwe, janah iperidiken kami bas tahun 1974.

Kenca pelajari kami kerna peraten Dibata man manusia, tujun utama kami enggo berubah. Gundari ngelayani Jahwe akap kami si pentingna. Sada arih kami guna mpebelin anak-anak kami menurut patoken Pustaka. Ajari kami kalak e gelah keleng atena Dibata ras kalak si deban, janah keluarga kami pe reh kompakna.​—Mat. 22:37-39.

Banci idah anak-anak kami maka ersada rusur arihku ras Lydie selaku orang tua. Iteh kalak e maka peraturen bas keluarga kami bali bagi kai  si ikataken Jesus, “‘Ue,’ arus ertina ue, janah adi ‘Lang,’ ertina lang.” (Mat. 5:37) Contohna, mbarenda salah sada anak kami si diberu si umurna 17 tahun, lawes atena ras teman-temanna. Tapi la bereken Lydie ia lawes. Salah sada temanna ngataken man anak kami e, “Adi la bereken mamakndu kam lawes, cuba sungkun bapakndu!” Tapi nina anak kami, “Labo lit gunana, pasti seri kari jawapenna.” Rusur aku tawa ras Lydie sanga inget kami pengalamen-pengalamen si bage. Enemna anak kami banci idahna maka ersada lalap arih kami bas ndalanken patoken-patoken Pustaka. Ngata bujur kel kami perban gundari enterem si ngelayani Jahwe bas keluarga kami.

Amin pe lanai mpepalem kalak sakit si pentingna bas geluhku, kupake denga teku pemetehku e guna nampati umat Dibata. Emaka nggit aku ngelayani jadi dokter bas fasilitas Betel i Paris janah bas pudi wari bas fasilitas Betel i Louviers. Lit kira-kira 50 tahun dekahna aku jadi relawan paruh waktu. Paksa si e, banci aku kompak ras enterem anggota Betel janah piga-piga arah kalak e enggo lit 90-en gundari umurna. Pernah ka lit pengalamen si erban meriah ukurku sanga jumpa aku ras sekalak anggota Betel si mbaru. Kepeken, 20 tahun sope kami jumpa e, aku si nampati mamakna ngelahirken ia!

Reh bagesna kekelengenku man Jahwe sanga kuidah uga Ia ngarak-ngarak ras ngelindungi umatNa arah organisasiNa. Bas awal tahun 1980-en, iban Badan Pinpinen sada program i Amerika Serikat gelah dokter-dokter ras tenaga kesehaten banci reh bagesna angkaina keputusen Saksi Jahwe kerna dareh.

Kenca si e, bas tahun 1988, ibentuk Badan Pinpinen sada departemen si mbaru i Betel si igelari Layanan Informasi Rumah Sakit. Departemen e me si ngawasi Panitia Penghubung Rumah Sakit (PPRS). Tangtangna bas Amerika Serikat ngenca ibentuk PPRS guna nampati pasien Saksi ndatken pertambar si la nggunaken dareh. Sanga pengaturen e iban ka ate i belang-belang doni, ibentuk ka me PPRS i Prancis. Luar biasa kel kuakap ngidah uga organisasi Jahwe alu perkeleng ndukung turang senina si sangana sakit ras merluken penampat!

Mbarenda erdahin jadi dokter me kuakap si pentingna bas geluhku perban banci kupepalem kalak sakit. Tapi dungna kuteh maka pentingen nge mpepalem kalak secara rohani eme nampati kalak nandai Dibata Jahwe ras ngelayani Ia selaku Sumber kegeluhen. Kenca pensiun aku, jadi perintis biasa aku ras Lydie. Tiap bulan mbue waktu si pake kami guna erberita si meriah kerna Kerajan Dibata. Gundari, usahaken kami asa ngasup kami gelah banci ikut bas dahin si nelamatken kegeluhen enda.

Seh asa gundari kuusahaken denga nampati kalak si sakit. Tapi kuteh maka dokter si hebatna pe labo ngasup mpepalem kerina penakit ras erban kalak la mate. Emaka tertima-tima kel aku sanga lanai pagi lit penakit ras kematen. Bas doni si mbaru si nandangi reh, mbue kel pagi waktuku guna mpelajari terbuen kerna ciptan Dibata termasuk kerna rancangen daging manusia si luar biasa. Memang gundari, sura-suraku sanga kitik denga lenga kerina terjadi. Tapi tek aku kai si nandangi terjadi, ndauh ulin asangken si kuarapken!