1-2. Pelajaren kai si dat sekalak pertua kerna mereken nasehat?

 PIGA-PIGA tahun si lewat, lit dua pertua si ndahi sekalak turang senina si diberu si enggo ndekah la reh ku perpulungen. Salah sada arah pertua e ncidahken piga-piga ayat kerna pentingna reh ku perpulungen. Akapna pasti nge erguna nasehatna e. Tapi kepeken, sope kalak e mulih, bagenda nina turang senina si diberu e, “Labo kap teh kena masalah si sangana kuadapi.” Mis bereken pertua e nasehat, tapi la sungkunna lebe kai si sangana iadapi turang senina e. Dungna, la akap turang senina e erguna nasehat e.

² Nina pertua si ngerana ndai, “Tangtangna la kuakap ergaina nasehat si bereken kami. Tapi kenca kuukur-ukuri ka, lenga kepe kuukuri keadanna janah mis kubereken ayat-ayat si cocok kuakap. Arusna kusungkuni lebe ia, ‘Kai si sangana adapindu?’ ‘Kai si banci kusampati?’” Idat pertua e pelajaren si meherga arah pengalamen e. Gundari, ia enggo jadi permakan si ermediate ras mehuli.

3. Ise saja si banci mereken persinget ntah pe nasehat bas runggun?

 ³ Selaku permakan, pertua-pertua ertanggung jawap mereken persinget si iperluken. Tapi mon-mon turang senina si deban pe perlu mereken persinget. Contohna, kerina kita, la soal dilaki ntah diberu, banci mereken persinget si erpalasken Pustaka man temanta. (Ms. 141:5; Kua. 25:12) Turang senina si diberu si enggo metua, banci “persingetina diberu si terngudan” kerna kai si ituriken  bas Titus 2:3-5. Orang tua pe arus rusur mpersingeti anak-anakna. Amin pe artikel enda khusus man pertua-pertua, kerina kita banci ndatken gunana. Emaka, mari sipelajari uga carana mereken persinget si erguna, ngiahken, ras “erban meriah ukur.”​—Kua. 27:9.

4. Kai kari sibahas bas artikel enda?

⁴ Bas artikel enda, sibahas kari empat penungkunen: (1) Arusna kai alasenta mereken nasehat? (2) Perlu nge sibereken nasehat? (3) Ise si cocokna mereken nasehat? (4) Uga carana mereken nasehat si erguna?

5. Kai gunana adi nasehat si ibereken pertua ipeseh alu perkeleng? (1 Korinti 13:4, 7)

⁵ Keleng ate pertua man kerina turang seninana. Mon-mon buktikenna kekelengenna e alu mereken nasehat man “kalak si salah perbahanenna.” (Gal. 6:1) Tapi sope mereken nasehat, perlu ukuri pertua-pertua lebe kata-kata Rasul Paulus kerna kekelengen. Nina, “Kekelengen e sabar ras mehuli. . . , ngasup nggengken kai pe, tek man kai pe, tetap erpengarapen, janah sabar bas kai pe.” (Baca 1 Korinti 13:4, 7.) Adi ukuri pertua ayat-ayat ndai, nasehatna banci ibereken alu cara si perkeleng. Adi kalak si ngaloken nasehat e nggejapken maka ermediate pertua man bana, reh nukahna kapna ngaloken nasehat e.​—Rom. 12:10.

6. Usihen kai si enggo iban Rasul Paulus man pertua-pertua?

⁶ Enggo ban Rasul Paulus usihen si mehuli selaku pertua. Contohna, ibereken Paulus persinget man turang senina i Tesalonika sanga perlu kalak e ipersingeti. Tapi tangtangna ipujikenna lebe kerja keras, kekelengen, ras kesetian kalak e. Ukurina keadan kalak e janah tehna uga beratna tentangen ras siksan si arus adapi kalak e. (1 Tes. 1:3; 2 Tes. 1:4) Katakenna ka maka kalak e enggo jadi usihen si mehuli man turang senina si deban. (1 Tes. 1:8, 9) Pasti meriah kel ukur kalak e ngaloken pujin arah Paulus! Jelas teridah maka keleng kel ate Paulus man turang seninana. Enda me si erban persinget si bereken Paulus arah surat-suratna man kalak Tesalonika banci tuhu-tuhu erguna.​—1 Tes. 4:1, 3-5, 11; 2 Tes. 3:11, 12.

7. Engkai maka lit kalak si mesera kapna ngaloken nasehat?

⁷ Adi la cocok carata mereken nasehat, kai akibatna? Bagenda nina sekalak pertua si enggo erpengalamen, “Lit piga-piga kalak si mesera kapna ngaloken nasehat labo perban lit si salah arah nasehat e. Tapi perban nasehat e la ipeseh alu cara si perkeleng.” Kai si banci sipelajari? Reh nukahna kap kalak ngaloken nasehatta adi sibereken perban keleng ateta ia, labo perban nembeh ateta.

8. Kai si perlu ukuri pertua-pertua sope mereken nasehat?

⁸ Pertua-pertua ula min buru-buru mereken nasehat. Sope mere nasehat, perlu ukuri kalak e lebe penungkunen enda, ‘Perlu nge ia inasehati? Salah kin si lakokenna e? Kurang cocok saja nge kuakap perbahanenna ntah memang lit prinsip Pustaka si ilanggarna?’ Pertua-pertua perlu hati-hati gelah ula sempat “la ukurina kai si katakenna.” (Kua. 29:20) Adi ragu sekalak pertua perlu ntah lang  nasehatina sekalak jelma, banci pindona pendapat pertua si deban.​—2 Tim. 3:16, 17.

9. Kai si banci sipelajari arah Paulus bas mereken nasehat kerna peruis ras penampilen? (1 Timotius 2:9, 10)

⁹ Mari siperdiateken sada contoh. Katakenlah lit sekalak pertua si la kapna cocok kerna pilihen peruis ras penampilen sekalak turang seninana. Adi bage, perlu ukurina lebe cocok denga ntah lang pilihen turang senina e ras prinsip Pustaka. Perban la ate pertua e mpeseh pendapatna saja, banci sungkunina lebe pertua si deban ntah perberita si paguh kinitekenna kerna si e. Kenca si e, ras-ras kalak e mereksa nasehat Paulus kerna peruis ras penampilen. (Baca 1 Timotius 2:9, 10.) Labo lit bereken Paulus aturen kerna kai si banci ipake ras si la banci ipake. Tapi berekenna prinsip maka peruis kalak Kristen arus sopan ras la lebihsa. Itehna maka turang senina me si nentuken uga atena peruisna, si penting cocok ras prinsip Pustaka. Emaka sope lenga mere nasehat, perlu iukuri pertua-pertua lebe cocok denga ntah lang peruis ras penampilen sekalak jelma ras prinsip si ibereken Paulus e.

10. Engkai maka la cocok sipaksaken pendapatta man kalak si deban?

¹⁰ Perlu siinget maka dua kalak Kristen si paguh kinitekenna banci beda pilihenna, amin pe bage labo lit si salah. Ula min sipaksaken pendapatta kerna kai si benar ras si salah man turang seninata.​—Rom. 14:10.

11-12. Adi memang perlu ibereken nasehat, penungkunen kai si arus ukuri pertua, janah engkai?

¹¹ Adi enggo jelas buktina maka perlu ibereken nasehat, penungkunen si perlu iukuri pertua eme: Ise si mereken nasehat e? Adi si perlu inasehati e sekalak ndehara ntah pe anak-anak, perlu icakapken pertua lebe ras kepala keluargana. Banci saja pangen akap kepala keluarga e ia si mpeseh nasehat e. * Ntah, ikut atena sanga inasehati pertua e anggota keluargana. Mon-mon, bagi si ibahas bas  paragrap 3 ndai, ulin diberu si tertuan mereken nasehat man diberu si terngudan.

¹² Lit penungkunen si deban si perlu ukuri pertua-pertua: ‘Aku nge si cocokna mereken nasehat e, ntah ulin nge kalak si deban si mpesehsa?’ Contohna, adi lit kalak si la kapna merga bana, banci saja ulin adi si mpeseh nasehat e eme pertua si pernah adapina masalah si bage. Banci saja pertua e sepenggejapen  ras turang senina ndai. Dungna, kai si ipesehna banci reh nukahna ialoken turang senina ndai. Tapi, kerina pertua ertanggung jawap mpegegehi ras nampati turang seninana erban perubahen si sesuai ras Pustaka. Emaka, la soal pertua si mpeseh nasehat e pernah adapina masalah si seri ntah lang, si pentingna turang senina e ndatken nasehat si iperlukenna.

13-14. Engkai maka sekalak pertua perlu megiken sope ngerana?

¹³ Nggitlah megiken. Sanga sekalak pertua erban persiapen guna mereken nasehat, perlu ukurina penungkunen enda: ‘Uga nge keadan turang seninaku e? Kai nge si sangana adapina? Lit nge masalahna si la kuteh? Penampat kai nge situhu-tuhu perlukenna gundari?’

¹⁴ Prinsip si icatat bas Jakup 1:19 cocok kel idalanken kalak si mereken nasehat. Bagenda nina bas ayat e, “Tiap kalak arus meter megiken, ula mis ngerana, janah ula mis merawa.” Sekalak pertua banci saja erpengakap maka enggo tehna kerina fakta-fakta kerna kalak si atena inasehatina. Tapi, banci saja lenga tentu tehna kerina. Kuan-kuanen 18:13 ngingetken kita, “Adi sekalak jelma njawap sope lenga begina uga situhuna, bodoh kap janah pemela-melaken.” Ulin nge adi ipastiken pertua-pertua lebe fakta-faktana langsung arah kalakna. Emaka sekalak pertua arus nggit megiken lebe sope lenga ngerana. Ingetlah pengalamen pertua si ituriken bas awal artikel enda. Itehna maka sope lenga pesehna bahan si enggo persiapkenna arusna sungkunna lebe turang senina e. Banci sungkunna bagenda: “Kai kin si sangana adapindu?” “Kai si banci kusampati?” Adi darami pertua-pertua lebe fakta-faktana, reh ulina me carana nampati ras mpegegehi turang seninana.

15. Uga pertua-pertua banci ndalanken prinsip si lit bas Kuan-kuanen 27:23?

¹⁵ Usahakenlah reh rembakna ras turang senina. Bagi si ituriken ndai, mereken nasehat si erguna labo terjeng mbacaken piga-piga ayat arah Pustaka ntah pe mereken piga-piga nasehat. Perlu igejapken turang seninata maka ermediate kita man bana, siangkai perasanna, janah merhat kita nampati ia. (Baca Kuan-kuanen 27:23.) Emaka, usahaken pertua-pertua min gelah banci ia reh rembakna ras turang seninana.

16. Uga carana gelah nasehat pertua-pertua reh nukahna ialoken turang senina?

¹⁶ Ate pertua-pertua ula min iakap turang senina maka kalak e ngerana guna mpeseh nasehat saja. Emaka, rusur min pertua-pertua ngerana-ngerana ras turang seninana guna mbuktiken maka  ermediate kalak e man turang seninana si sangana ngadapi masalah. Nina sekalak pertua si enggo erpengalamen, “Adi bage siban, rembak me kita ras kalak e. Sanga perlu sibere nasehat, reh nukahna siakap ngelakokenca.” Selain si e, kalak si inasehati pe reh nukahna kapna ngaloken nasehat e.

17. Khususna ndigan nge pertua perlu sabar ras lembut?

¹⁷ Perlu sabar ras lembut. Sekalak pertua perlu sabar ras lembut khususna sanga kalak si inasehati la nggit ndalanken kai nina Pustaka. Pertua arusna la merawa adi lit turang senina si la mis ngaloken nasehat si ibereken man bana ntah pe la mis dalankenna. Pertua perlu ngusih Jesus. Bagenda nina Pustaka kerna Jesus, “Buluh si enggo bengkok la penggelkenna, sumbu lampu si milep-ilep labo matekenna.” (Mat. 12:20) Emaka sope ibereken pertua nasehat, banci ia ertoto lebe sisada. Totokenna gelah sampati Jahwe kari kalak si nandangi inasehati e ngangkai kai alasenna nasehat e ibereken ras gelah banci idalankenna nasehat e. Banci saja turang senina si inasehati perlu waktu ngukuri nasehat si alokenna. Adi pertua sabar ras lembut, kalak si isampatina banci fokus man isi nasehat si alokenna, labo man carana nasehat e ibereken. Tapi, nasehat si ibereken arusna lalap min erpalasken Kata Dibata.

18. (a) Sanga mereken nasehat, kai si perlu siinget? (b) Bagi si teridah bas gambar, kai si perlu ibahas orang tua sope nasehatina anakna?

¹⁸ Erlajar arah kesalahenta. Perban kita la sempurna labo banci sidalanken saran-saran bas artikel enda alu sempurna, pasti nge silakoken kesalahen. (Jak. 3:2) Amin pe bage banci kita erlajar arah kesalahenta. Adi igejapken turang seninata maka keleng ateta ia, reh nukahna me akapna ngampuni kita sanga siban kitik ukurna.​—Nen ka kotak “ Si Perlu Inget Orang Tua.”

19. Uga carana gelah nasehatta erban meriah ukur turang seninata?

¹⁹ Bagi si enggo sipelajari ndai, labo nukah mereken nasehat si erguna. Kalak si mereken nasehat ras si ngaloken nasehat la sempurna. Emaka perlu siinget prinsip-prinsip si enggo sibahas bas artikel enda. Pastikenlah maka nasehat e ibereken alu cara si perkeleng. Pastiken ka maka nasehat e tuhu-tuhu perlu ibereken janah kita me kalak si cocok guna mpesehsa. Sope lenga mereken nasehat, sungkuni lebe kai masalah si iadapina janah begiken alu tutus. Usahakenlah ngangkai perasanna. Lembutlah kita man turang seninata janah reh rembaknalah kita ras kalak e. Siingetlah maka tujunta labo saja mereken nasehat si erguna tapi “erban meriah ukur” turang seninata.​—Kua. 27:9.