1-2. (a) Engkai maka enterem kalak gundari mesera tek man kalak si lit kuasana? (b) Kai kari sipelajari bas artikel enda?

 ENTEREM kalak si mesera akapna tek man kalak si lit kuasana. Enggo idah kalak e maka pemerentah bage pe undang-undang rusuren ngelindungi kalak bayak ras si erkuasa, tapi ngerugiken kalak mesera. Nina Pustaka, “Manusia nguasai manusia janah dungna cilaka.” (Peng. 8:9) Selain si e, piga-piga peminpin agama pe melala kel perbahanenna si la mehuli. Akibatna, enterem kalak lanai tek man Dibata. Emaka, sanga sisampati kalak erlajar Pustaka, perlu siusahaken kel nampati ia gelah tek man Jahwe bage pe man kalak si ilantikNa.

² Situhuna, labo si erlajar Pustaka ngenca si perlu tek man Jahwe bage pe man organisasiNa. Amin pe enggo ndekah kita ngelayani Jahwe, arus tetap kita tek maka si ilakoken Jahwe lalap si mehulina. Tapi mon-mon, lit situasi si banci saja nguji kinitekenta man Jahwe. Bas artikel enda, sibahas kari telu contohna: (1) sanga sibaca kejadin bas Pustaka si lenga tuhu-tuhu siangkai, (2) sanga lit petunjuk ras keputusen arah organisasi Jahwe si mesera siakap ngalokenca, ras (3) sanga siadapi pagi situasi si sulit.

3. Engkai maka piga-piga kejadin si lit bas Pustaka banci nguji kinitekenta man Jahwe?

 ³ Sanga sibaca Pustaka, banci saja tersungkun-sungkun kita, ‘Engkai maka bage ban Jahwe? Engkai maka  bage keputusenNa?’ Contohna, bas buku Bilangen iceritaken maka ibere Jahwe hukumen mate man kalak Israel si mpepulung kayu sanga wari Sabat. Tapi ratusen tahun kenca si e, iceritaken bas buku dua Samuel maka iampuni Jahwe Raja Daud si enggo erlua-lua ras munuh. (Bil. 15:32, 35; 2 Sam. 12:9, 13) Banci saja tersungkun-sungkun kita, ‘Engkai maka iampuni Jahwe Raja Daud si dosana bage belinna, tapi bereNa hukumen mate man sekalak dilaki si labo bage belinna dosana?’ Guna njawap penungkunen e, lit telu si perlu siinget sanga sibaca Pustaka.

4. Uga Kejadin 18:20, 21 ras Ulangen 10:17 erban kita tek maka keputusen Jahwe lalap benar?

⁴ Labo lalap lit keterangen si lengkap bas Pustaka kerna sada kejadin. Contohna, siteh maka Daud tuhu-tuhu robah. (Ms. 51:2-4) Tapi uga kerna dilaki si la patuh man undang-undang wari Sabat e? Menyesal nge ia nandangi kai si lakokenna? Pernah nge ia la patuh man undang-undang Jahwe? Rusur nge la diatena persinget si ibereken man bana ntah pe itulakna persinget e? La lit ituriken kerna si e bas Pustaka. Tapi si pasti, Jahwe “labo pernah la adil.” (Ul. 32:4) Sanga iban Jahwe keputusen, iukuriNa kerina faktana. Tapi, jelma biasana keputusenna ipengaruhi ranan kalak, sipat erpilihen, ntah pe si debanna. (Baca Kejadin 18:20, 21; Ulangen 10:17.) Reh buena sipelajari kerna Jahwe ras prinsip-prinsipNa, reh bagesna me sitandai Ia ras tek kita maka keputusenNa lalap benar. Emaka, amin pe lit kejadin bas Pustaka si lenga tuhu-tuhu siangkai, banci kita tetap tek maka “lalap lakoken Jahwe kai si benar.”​—Ms. 145:17.

5. Engkai maka mon-mon salah carata erban kesimpulen? (Nen ka kotak “ Perban Kita La Sempurna Kesimpulenta Banci Salah.”)

⁵ Perban kita la sempurna, banci salah carata erban kesimpulen. Iciptaken Dibata kita mirip ras Ia, emaka merhat kita ngidah kalak ndatken keadilen. (Kej. 1:26) Tapi perban kita la sempurna, banci salah carata erban kesimpulen amin pe siakap enggo siteh kerina faktana. Bage me si terjadi man Juna. La ia setuju  nandangi keputusen Jahwe guna ngampuni kalak Niniwe. (Jun. 3:10–4:1) Tapi, cuba ukuri kai hasilna. Perban mekuah ate Jahwe kalak e, lit lebih 120.000 kalak Niniwe si selamat perban ertobat. Jelas me, labo keputusen Jahwe si salah, tapi cara Juna erban kesimpulen nge si salah.

6. Engkai maka labo arus ijelasken Jahwe man banta kai alasenNa erban sada keputusen?

⁶ Labo arus ijelasken Jahwe man banta kai alasenNa erban sada keputusen. Memang mbarenda, sanga nandangi iban Jahwe keputusen ntah pe enggo ibanNa keputusen, lit piga-piga kali nggit Jahwe megiken perasan pelayanNa kerna keputusenNa e. (Kej. 18:25; Jun. 4:2, 3) Mon-mon ijelaskenNa kai alasenNa erban sada keputusen. (Jun. 4:10, 11) Tapi situhuna, labo arus ijelasken Jahwe man banta engkai maka ibanNa sada keputusen. Perban Ia Si Nciptaken kita, labo perlu pindoNa persetujunta sanga lit ateNa si lakokenNa.​—Jes. 40:13, 14; 55:9.

7. Kai si banci nguji kinitekenta man Jahwe, ras engkai?

⁷ Tek kita maka kerina si ilakoken Jahwe lalap benar. Tapi banci saja mesera siakap tek man kalak si ilantikNa. Banci saja tersungkun-sungkun kita, ‘Enggo nge ilakoken kalak e kerina sesuai ras petunjuk Jahwe, ntah sesuai ras perukuren kalak e saja?’ Bage me si banci saja iukuri piga-piga kalak si nggeluh bas jaman Pustaka. Cuba ukuri contoh si lit bas  paragrap 3 ndai. Banci saja kade-kade arah kalak si ngelanggar undang-undang kerna wari Sabat e tersungkun-sungkun, ‘Enggo nge icakapken Musa lebe ras Jahwe kerna si e sope lenga ia ihukum mate?’ Cuba ka ukuri kerna Uria kalak Het, si diberuna erlua-lua ras Daud. Banci saja teman-teman Uria erpengakap maka igunaken Daud kedudukenna selaku raja gelah la ia ihukum mate. Tapi arus siinget maka tek Jahwe man kalak si ilantikNa. Emaka, adi la kita tek man kalak e, e ertina la kita tek man Jahwe.

8. Kai si seri antara runggun Kristen abad pertama ras runggun Kristen si gundari? (Perbahanen Rasul-Rasul 16:4, 5)

⁸ Gundari, ipinpin Jahwe organisasiNa erkelangken “budak si setia ras pentar.” (Mat. 24:45) Budak si setia ras pentar me si ngawasi umat Jahwe i belang-belang doni ras si mereken petunjuk man pertua-pertua, bali bagi badan pinpinen bas abad pertama. (Baca Perbahanen Rasul-Rasul 16:4, 5.) Kenca si e, idalanken pertua-pertua petunjuk e bas runggun. Adi sipatuhi petunjuk arah organisasi ras pertua-pertua, e buktina tek kita man Jahwe.

9. Banci saja ndigan nge mesera siakap ndukung keputusen pertua-pertua, ras engkai?

⁹ Mon-mon la siakap nukah ndukung keputusen pertua-pertua. Contohna, piga-piga tahun enda lit perubahen bas melala runggun ras wilayah. Emaka, banci saja ipindo pertua piga-piga perberita pindah ku runggun si sitiken hadirinna. Tujunna gelah Bale Kerajan banci ipake alu cara si mehulina. Adi kita si ipindo pindah, banci saja mberat siakap ngelakokenca perban arus sitadingken teman-teman ras keluarga bas runggunta sedekah enda. Lit nge ikataken Jahwe man pertua-pertua ku runggun si apai tiap perberita ipindahken? Lang. Banci saja e si erban mesera siakap ndukung  keputusen kalak e. Tapi, tek Jahwe man pertua-pertua janah bereNa tanggung jawap man kalak e guna erban keputusen. Emaka, kita pe arusna tek man kalak e. *

10. Bagi si ikataken bas Heber 13:17, engkai maka arus sidukung pertua-pertua?

¹⁰ Engkai maka arus sidukung pertua-pertua, janah siikutken keputusen kalak e amin pe la bagi ukurta? Perban adi bage siban, ikut kita njaga persadan umat Dibata. (Ep. 4:2, 3) Runggun pe banci reh paguhna adi kerina kita nggit ndukung keputusen si iban pertua-pertua alu meteruk ukur. (Baca Heber 13:17.) Si pentingna, adi sidukung kalak si ipilih Jahwe guna ngurus kita, sibuktiken maka tek kita man Jahwe.​—Perb. 20:28.

11. Uga carana gelah reh tekna kita man keputusen si iban pertua-pertua?

¹¹ Uga carana gelah reh tekna kita man keputusen si iban pertua-pertua? Perlu siinget maka sope iban kalak e keputusen bas runggun, ertoto lebe kalak e mindo kesah si badia, ukuri kalak e ka prinsip-prinsip si lit bas Pustaka, ras ikutina petunjuk arah organisasi Jahwe. Merhat kel kalak e erban meriah ukur Jahwe janah permakanina umatNa alu cara si mehulina. Setia kalak e ngelakoken si e janah teh kalak e maka ertanggung jawap ia man Dibata. (1 Pet. 5:2, 3) Selain si e, cuba ukuri enda: Umat Jahwe banci ersada janah nembah Dibata si benar amin pe doni enda la ersada perban suku, agama, ras politik. Enda banci terjadi perban ipasu-pasu Jahwe organisasiNa!

12. Kai saja si arus iukuri pertua-pertua adi lit kalak si ngelakoken dosa si serius?

¹² Tek Jahwe man pertua-pertua janah bereNa kalak e tanggung jawap si mbelin guna njaga runggun tetap bersih. Adi lit si ngelakoken dosa serius, ate Jahwe iban pertua-pertua keputusen, banci ntah lang ia tetap bas runggun. Emaka arus darami kalak e bukti-buktina maka kalak si ersalah e tuhu-tuhu ertobat ntah lang. Banci saja katakenna ia menyesal, tapi tuhu nge segat atena perbahanenna e? Tuhu nge usahakenna lanai ngulihi perbahanenna e? Adi ilakokenna kesalahen e perban pengaruh teman-temanna, nggit nge ia ngadi erteman ras kalak e? Arus ukuri pertua-pertua kerna si e bage pe fakta-fakta si debanna. Arus ka kalak e ertoto janah daramina prinsip-prinsip Pustaka si lit hubungenna ras masalah e. Kenca si e, ban kalak e me keputusen banci ntah lang kalak si ersalah ndai tetap bas runggun. Mon-mon, kalak si ersalah e arus ipedarat arah runggun.​—1 Kor. 5:11-13.

13. Banci saja kai si lit bas ukurta adi lit teman ntah pe keluargata ipedarat arah runggun?

¹³ Adi kalak si ipedarat arah runggun e labo temanta ntah pe keluargata, banci saja labo siakap mberatsa ngaloken keputusen pertua-pertua. Tapi uga adi kalak si ipedarat arah runggun e kompak ras kita? Banci saja tersungkun-sungkun kita, ‘Enggo nge ukuri pertua-pertua kerina faktana sope erban keputusen?’ Ntah banci saja la kita tek maka keputusen si iban kalak e enggo sesuai ras peraten Jahwe. Adi bage perasanta, kai si banci silakoken gelah tek kita man pertua-pertua ras sidukung keputusen kalak e?

14. Kai si perlu siinget adi lit teman ntah pe keluargata si ipedarat arah runggun?

 ¹⁴ Perlu siinget maka Jahwe kap si erban pengaturen kerna kalak si ipedarat arah runggun, janah si e erguna man runggun ras man kalak si ersalah e. Adi kalak si la nggit robah la ipedarat arah runggun, banci la mehuli pengaruhna man turang senina si deban. (Gal. 5:9) Selain si e, banci saja la ia sadar maka dosana e serius. Akibatna, banci saja la akapna perlu erban perubahen guna mpehuli hubungenna ras Jahwe. (Peng. 8:11) Teklah kita maka labo sepele akap pertua-pertua erban keputusen guna mpedarat kalak arah runggun. Iteh pertua-pertua maka kalak e bali bagi hakim bas Israel mbarenda, kalak e “ngakimi labo guna manusia tapi guna Jahwe.”​—2 Kro. 19:6, 7.

15. Engkai maka gundari nari arus kita tek maka petunjuk Jahwe lalap benar?

¹⁵ Mulai gundari nari arus kita tek maka petunjuk Jahwe lalap benar. Engkai maka e seh kel pentingna? Perban kedungen doni enda enggo reh deherna. Bas kiniseran si mbelin pagi, banci saja sialoken petunjuk si aneh siakap, la siakap masuk akal ntah pe mesera siakap ndalankenca. Paksa si e pagi, Jahwe labo langsung ngerana man banta. Banci saja bereNa petunjuk arah kalak si enggo ilantikNa. Bas masa-masa si sulit e pagi, seh kel bahayana adi ragu kita man petunjuk si ipeseh kalak si ilantik Jahwe, ntah pe adi tersungkun-sungkun kita, ‘Arah Jahwe nge petunjuk e ntah arah perukuren kalak e?’ Paksa si e, tek nge kam man Jahwe ras organisasiNa? Jawapenna teridah arah kai si lakokenndu gundari nari. Adi enggo biasa kam patuh man petunjuk gundari nari, reh nukahna me akapndu patuh man petunjuk si ibereken bas kiniseran si mbelin pagi.​—Luk. 16:10.

16. Kai si banci saja nguji kinitekenta bas Harmagedon?

¹⁶ Lit deba nari si perlu siukuri. Perlu siukuri uga nge perasanta nandangi keputusen Jahwe pagi bas kedungen doni enda. Gundari ngarap denga kita gelah kalak si lenga ngelayani Jahwe nggit ngelayani Jahwe ope lenga reh kedungen e, termasuk anggota keluargata si la sada kiniteken. Tapi bas Harmagedon, Jahwe me si nentukenca banci ntah lang kalak e iselamatken erkelangken Jesus. (Mat. 25:31-33; 2 Tes. 1:7-9) Labo kita si nentukenca ise saja si cocok ngaloken perkuah ate Jahwe. (Mat. 25:34, 41, 46)  Tek nge kita maka keputusen Jahwe e benar, ntah ngadi kita ngelayani Ia perban la kita setuju man keputusenNa? Jelas me, mulai gundari nari perlu kita tek man Jahwe, gelah pagi pe banci kita tuhu-tuhu tek man baNa.

17. Perban keputusen si iban Jahwe, kai saja hasil si mehuli bas doni si mbaru?

¹⁷ Keputusen si iban Jahwe erban melala hasil si mehuli bas doni si mbaru. Paksa si e, lanai lit agama palsu, bisnis si merangap, ras pemerentahen manusia si sedekah enda erban kalak susah. Lanai pagi kita sakit, metua, ntah pe erceda ate perban mate kalak si keleng ateta. Setan ras malekat-malekat jahat pe ikurung pagi 1.000 tahun dekahna. Kerina si la mehuli perban pemberontaken kalak e lanai pagi lit. (Ket. 20:2, 3) Cuba bayangkenndu uga perasanta paksa si e. Pasti ngata bujur kita perban sedekah enda lalap kita tek man Jahwe!

18. Arah Bilangen 11:4-6 ras 21:5, kai si banci sipelajari arah kalak Israel?

¹⁸ Bas doni si mbaru pagi, lit denga nge si banci nguji kinitekenta man Jahwe? Banci saja lit. Mbarenda, la ndekah kenca kalak Israel ibebasken arah perbudaken i Mesir, mulai kalak e jungut-jungut perban merhat ia pangan si lit i Mesir. Bosan kalak e nandangi manna si isikapken Jahwe janah katakenna manna e roti si erban ciga ate. Adi kita uga? (Baca Bilangen 11:4-6; 21:5.) Banci nge turah sipat si bage bas kita kenca dung pagi kiniseran si mbelin? Paksa si e, banci saja melala si arus silakoken guna mbersihken doni enda ras erban doni jadi pardis. Tangtangna banci saja la entabeh geluhta. Tapi jungut-jungut nge kita man Jahwe bagi kalak Israel mbarenda? Adi mulai gundari nari si ergai kai si enggo sikapken Jahwe, pagi pe reh nukahna siakap ngergai kerina si isikapken Jahwe.

19. Kai si banci sipelajari arah artikel enda?

¹⁹ Arus kita tek maka Jahwe lalap nge benar. Arus ka kita tek man kalak si ilantikNa, perban Jahwe pe tek man kalak e bas ndalanken petunjukNa. Tetaplah siinget kata-kata Jahwe si ipesehNa arah Nabi Jesaya, “Adi tetap kena tek janah la kena mbiar, megegeh pagi kena.”​—Jes. 30:15.