1. Perbahanen si mehuli kai si ilakoken umat Jahwe?

 MBARENDA nari, enggo inubuatken bas Pustaka maka “meriah pagi ukur” umat Jahwe ngelayani Ia ras ngikutken petunjuk arah AnakNa. (Ms. 110:3) Gundari, nubuat enda enggo terjadi. Tiap tahun, umat Jahwe nggunaken lebih sada miliar jam bas dahin erberita. Lakoken kalak e pendahin e arah ukurna nari janah la igaji. Selain si e, isampati kalak e turang seninana ncukupi keperlunna tiap wari ras mpepaguh kinitekenna man Jahwe. Umat Jahwe pe nggit mpegegehi sada ras si debanna. Pertua-pertua ras sinampati runggun nggunaken melala waktu mpersiapken bahan-bahan perpulungen ras mpermakani turang senina bas runggun. Engkai maka nggit umat Jahwe ngelakoken kerina e? Perban keleng ate kalak e Jahwe bage pe kalak si deban.​—Mat. 22:37-39.

2. Bali bagi si ikataken bas Roma 15:1-3, usihen kai si enggo ban Jesus?

² Enggo ban Jesus usihen si luar biasa bas mpelebe keperlun kalak si deban. Kita pe, siusahaken kel ngusih Jesus. (Baca Roma 15:1-3.) Adi silakoken bage, sidat me gunana. Nina Jesus, “Riahen kap mere asangken ngalo.”​—Perb. 20:35.

3. Kai kari sibahas bas artikel enda?

³ Bas artikel enda, sibahas kari piga-piga pengorbanen Jesus bas nampati kalak si deban, janah uga carata ngusih  ia. Sibahas ka kari, uga carana gelah reh nggitna kita erkorban.

4. Kai si ilakoken Jesus guna mpelebe keperlun kalak si deban?

⁴ Amin pe sangana latih akap Jesus, nggit ia nampati kalak si deban. Bas sada wari, enterem kalak njumpai Jesus bas gunung, banci saja i deher Kapernaum. Paksa si e, pasti latih kel akap Jesus perban ertoto ia sada berngin. Tapi sanga idahna jelma si enterem e, mekuah atena kalak e. Itehna maka i tengah-tengah jelma si enterem e, enterem kalak mesera ras kalak si sakit. Emaka ipepalemna kalak si sakit e. Labo e ngenca si ilakokenna, ipesehna ka sada khotbah si mpegegehi kel si igelari Khotbah i Gunung. Khotbah e erguna denga seh ngasa gundari.​—Luk. 6:12-20.

5. Uga carana kepala keluarga ngusih sipat Jesus si nggit erkorban?

⁵ Carana kepala keluarga ngusih Jesus. Cuba bayangken situasi enda: Kenca erdahin sada warin, enggo latih kel akap sekalak kepala keluarga. Tangtangna batalkenna atena Ibadah Keluarga si arusna ilakoken bas berngi e. Tapi ertoto ia mindo gegeh man Jahwe. Ijawap Jahwe totona janah banci kalak e ibadah keluarga bagi biasana. Bas berngi e, banci idah anak-anakna maka pentingen akap orang tuana kegiaten rohani asangken si debanna, janah e jadi pelajaren si penting man kalak e.

6. Uga cara Jesus nggunaken waktuna nampati kalak si deban?

⁶ Nggit Jesus nggunaken waktuna man kalak si deban. Banci nge bayangkenndu uga perasan Jesus sanga tehna maka Johanes Peridiken enggo ibunuh? Pasti sedih kel akapna. Kenca begi Jesus maka temanna e enggo mate, “lawes Jesus je nari ku ingan si melungen naik perahu guna nerapken bana.” (Mat. 14:10-13) Memang, wajar nge nerapken bana ate Jesus. Enterem arah kita pe banci saja nerapken bana ateta sanga mate kalak si keleng ateta. Tapi paksa si e, Jesus la banci nerapken bana. Sanga seh  ia bas ingan si idahina, kepeken enggo enterem kalak si nimai ia i je. Uga nge tanggapen Jesus? Perban ukurina keperlun kalak e, “mekuah atena man kalak e.” Tehna maka perlu kalak e penampat ras pengapul arah Dibata, emaka mis berekenna kai si iperluken kalak e. “Mulai ajarina kalak e janah melala si ajarkenna.”​—Mrk. 6:31-34; Luk. 9:10, 11.

7-8. Uga pertua-pertua ngusih Jesus si nggit erkorban?

⁷ Carana pertua-pertua ngusih Jesus. Siergai kel kerja keras pertua-pertua si nggit erkorban guna kita! Banci saja, teremen arah turang senina bas runggun, la tehna kai saja si ilakoken pertua-pertua. Contohna, anggota arah Panitia Penghubung Rumah Sakit lalap nggit nampati sanga lit situasi darurat. Situasi si bage rusur terjadi sanga tengah berngi, tapi pertua-pertua e nggit nampati turang senina si sangana susah perban keleng atena kalak e. Pertua-pertua e ras keluargana nggit mpelebe keperlun turang seninana.

⁸ Pertua-pertua pe ikut bas proyek penanggulangen bencana ras pembangunen Bale Kerajan bage pe pembangunen si deban jang organisasi. Bas runggun, mbue ka kel waktu si ipake kalak e guna ngajar ras mpegegehi kita. Pertua-pertua ras keluargana tuhu-tuhu patut ipuji. Pasti ipasu-pasu Jahwe kalak e perban nggit erkorban. Memang pertua-pertua arus seimbang bali bagi kita kerina. Ula min mbuesa waktu kalak e guna ngurus runggun seh ngasa lanai banci sikapkenna keperlun keluargana.

9. Menurut Pilipi 2:4, 5, sipat si uga nge si arus lit bas kerina kalak Kristen?

⁹ Baca Pilipi 2:4, 5. Memang teremen arah kita labo pertua, tapi kerina kita banci ngusih Jesus si nggit erkorban. Ikataken bas Pustaka kerna Jesus maka “tadingkenna kerina si lit bas ia, banna ia bagi budak.” (Pil. 2:7) Cuba ukuri kai ertina e. Sekalak budak ntah pe pelayan, lalap daramina uga carana erban meriah ukur tuanna. Banci ikataken, kerina kita budak man Jahwe ras pelayan man turang seninata. Emaka pasti nggit kita ngelakoken terbuen man Jahwe bage pe man turang seninata. Guna ngelakoken si e, mari siperdiateken piga-piga saran enda.

10. Penungkunen kai saja si perlu siukuri?

¹⁰ Pereksalah uga kin kam situhuna. Cuba ukuri penungkunen-penungkunen enda: ‘Lalap nge aku nggit nggunaken waktu ras gegehku nampati kalak si deban? Contohna, nggit nge aku adi isuruh ndahi turang senina si enggo metua si sekalak ngenca ia tading bas rumahna, ntah pe ngelegi ras naruhken sekalak turang senina ku perpulungen? Nggit nge aku nampati adi iperluken relawan guna mbersihken ingan pertemuan regional ntah pe Bale Kerajan?’ Sanga sibaktiken dirita man Jahwe, enggo erjanji kita mereken kerina si lit bas kita guna ngelayani Ia. Ate Jahwe sigunaken min waktuta, gegehta, ras ertata guna nampati kalak si deban. Emaka pasti meriah ukur Jahwe adi kerina e silakoken arah ukurta nari. Kenca ngukuri penungkunen-penungkunen ndai, kai si banci silakoken adi lit denga si perlu sipekena?

11. Uga toto banci nampati kita mpebelin sipat nggit erkorban?

¹¹ Tutuslah atendu ertoto man Jahwe. Banci saja tehndu nge maka perlu pebelinndu sipat nggit erkorban, tapi lenga lit sura-surandu ngelakokenca. Adi bage si terjadi, tutuslah atendu ertoto man Jahwe, turiken kerina isi pusuhndu man baNa, janah pindolah gelah bereNa kam “sura-sura ras gegeh guna ngelakokenca.”​—Pil. 2:13.

12. Engkai maka dilaki-dilaki si nguda denga si enggo iperidiken, iperluken kel bas organisasi Jahwe?

¹² Kena dilaki-dilaki si nguda denga si enggo iperidiken, pindolah man Jahwe gelah bereNa kena sura-sura guna ngelakoken terbuen bas nampati turang senina i runggun. Bas piga-piga negri, buen pertua asangken sinampati runggun, janah buen arah sinampati runggun e lanai nguda. Selain si e, organisasita terus reh belinna, emaka iperluken dilaki-dilaki si nguda denga guna nampati pertua-pertua ngelayani turang senina bas runggun. Adi nggit kena ngelayani bas ingan si merluken penampat, pasti meriah ukur kena. Engkai? Perban enggo ban kena meriah ukur Jahwe, idah turang senina maka nggit kena erkorban, janah puas akap kena perban banci nampati kalak si deban.

13-14. Kai saja si banci silakoken guna nampati turang seninata? (Nen gambar sampul.)

¹³ Perdiatekenlah keperlun kalak si deban. Inasehati Rasul Paulus kalak Kristen i Judea, nina, “Ula lupa ngelakoken kai si mehuli janah kai si lit bas kita nggit kita kongsi, perban ngena ate Dibata korban-korban si bage.” (Heb. 13:16) Tepat waktu kel nasehat e. La  ndekah kenca aloken kalak e surat arah Paulus, arus tadingken kalak e rumahna, pendahinna, bage pe keluargana si la sada kiniteken. Kenca si e, arus kalak e “kiam ku gunung-gunung.” (Mat. 24:16) Paksa si e, pasti perlu kel kalak e sisampat-sampaten. Adi gel-gel nari enggo ikutkenna nasehat Paulus guna sisampat-sampaten, pasti reh nukahna kap kalak e tading bas ingan si mbaru.

¹⁴ Banci saja labo lalap ikataken turang seninata man banta kai si iperlukenna. Contohna, lit sekalak turang senina si sangana erceda ate perban mbaru denga mate diberuna. Banci saja perlu ia penampat guna nikapken pangan ntah pe ngelakoken dahin i rumah. Selain si e, mungkin perlu ia ilegi guna itaruhken ku sada ingan. Tapi banci saja labo lit katakenna kai pe man banta perban mbiar ia ngganggu kita. Amin pe bage, pasti ngata bujur kel ia adi sisampati ia sope lenga ipindona. Ula min kita rukur bagenda, ‘Pasti enggo lit si nampati ia.’ Ntah ‘Adi perlu ia penampat me ngata nge ia.’ Pangen siukuri bagenda, ‘Bicara aku arah ia, penampat kai nge si kuperluken?’

15. Guna ngusih Jesus, kita arus jadi kalak si uga?

¹⁵ Usahakenlah gelah nukah akap kalak mindo penampatta. Bas runggunta, pasti lit turang senina si lalap nggit nampati kalak si deban. Tek kita maka kalak e pasti nampati kita sanga susah siakap janah la pernah teridah maka terganggu kapna. Pasti nggit kita jadi kalak si bage. Alan sekalak pertua si umurna 40-en, atena nukah min akap kalak mindo penampatna. Bagenda nina, “Amin pe Jesus seh kel sibukna, meriah akap kalak  ndeher ras ia, la soal si enggo metua ntah pe si nguda denga. La ka kalak segan mindo penampatna. Iteh kalak e maka ermediate kel Jesus man kalak e. Merhat kel aku itandai kalak min aku kalak si mekacar, ermediate, ras nggit nampati bali bagi Jesus.”

16. Adi siikutken nasehat bas Masmur 119:59, 60, engkai maka sipat-sipatta banci reh miripna ras Jesus?

¹⁶ Ula kitik ukurta amin pe la banci siusih Jesus alu sempurna. (Jak. 3:2) Kalak si erlajar mahat, labo banci seri hasil pahatenna ras hasil pahaten guruna si enggo ahli mahat. Tapi adi terus ia erlajar arah kesalahenna janah usahakenna kel ngusih guruna, hasil pahatenna pasti reh ulina. Bage ka me, adi sidalanken kai si enggo sipelajari arah Pustaka janah terus siban perubahen, sipat-sipatta banci reh miripna ras Jesus.​—Baca Masmur 119:59, 60.

17-18. Kai saja gunana adi siusih sipat Jesus si nggit erkorban?

¹⁷ Sipat nggit erkorban banci menular. Sekalak pertua si gelarna Tim ngataken, “Lit piga-piga dilaki si nguda denga kel enggo jadi sinampati runggun. Salah sada alasenna perban idah kalak e usihen kalak si deban si semangat bas ngelayani, emaka kalak e pe semangat. Dilaki-dilaki si nguda denga e, mbelin kel penampatna bas runggun bage pe man pertua-pertua.”

¹⁸ Teremen jelma bas doni enda gundari egois ras mentingken bana. Tapi umat Jahwe beda kel. Kena kel ku pusuhta sipat Jesus si nggit erkorban janah siusahaken kel ngusih ia. Memang la banci siusih ia alu sempurna, tapi banci ‘siikutken dalan-dalanna alu megermet.’ (1 Pet. 2:21) Adi siusahaken asa ngasupta ngusih Jesus, pasti meriah ukurta perban banci siban meriah ukur Jahwe.