BAS jaman Pustaka mbarenda, adi iempoi sekalak dilaki atena sekalak diberu, arus bereken dilaki e ntah pe keluargana mahar man keluarga si diberu. Mahar e banci barang si merga, asuh-asuhen, ntah pe sen. Mon-mon mahar e igalari alu ndahiken dahin tertentu. E me si ilakoken Jakup. Gelah banci empoina Rahel, arus ia erdahin pitu tahun dekahna ras bapak Rahel. (Kej. 29:17, 18, 20) Kai tujunna kebiasan e?

Sekalak pakar Pustaka si gelarna Carol Meyers ngataken, “Bas keluarga si pendahinna ku juma, anak si diberu biasana ikut erdahin. Sanga erjabu ia, lanai banci sampatina keluargana. Emaka mahar banci ianggap jadi ganti rugi man keluargana.” Mahar pe banci ka erban dua keluarga e reh deherna. Banci kalak e sisampat-sampaten bas masa si susah. Selain si e, mahar pe mbuktiken maka sekalak diberu enggo tunangen janah lanai ndekah dilakina me si ertanggung jawap man bana, lanai bapakna.

Mahar labo mbuktiken maka sekalak ndehara e bagi barang si banci itukur ras idayaken. Buku Ancient Israel—Its Life and Institutions (Kegeluhen ras Adat bas Jaman Israel si Nai) ngataken, “Memang perban lit kewajipen guna mereken sen ntah pe si debanna man keluarga pihak si diberu, perjabun bas Israel tempa-tempa bagi nukur barang ntah pe ndayaken barang. Tapi mahar ianggap jadi ganti rugi man pihak si diberu labo erga guna nukur ia.”

Gundari, bas piga-piga negara lit denga adat guna nggalar mahar. Adi lit orang tua Kristen si mindo mahar, perlu kalak e “masuk akal” alu la mindo mahar si galang. (Pil. 4:5; 1 Kor. 10:32, 33) Alu bage, kalak e la “mata duiten,” ntah pe merangap. (2 Tim. 3:2) Selain si e, adi la galangsa pindo kalak e sen mahar, banci mis empoi dilaki e diberu ndai. La perlu ndekah ia mpepulung sen. Selain si e, adi dilaki e sekalak perintis, la ia perlu ngadi merintis guna mpepulung mahar.

Bas piga-piga negara, lit undang-undang kerna mahar. Adi orang tua Kristen tading bas negara si bage, arus ipatuhi kalak e undang-undang e. Engkai? Perban ikataken Pustaka maka kalak Kristen arus “patuh man pemerentah” bage pe undang-undang si lit bas negara e, adi undang-undang e la ertentangen ras undang-undang Dibata.​—Rom. 13:1; Perb. 5:29.