Tehndu nge?
Engkai maka undang-undang kerna perik ndukur ras merpati erguna man kalak Israel?
MENURUT Undang-Undang Musa, perik ndukur ras merpati banci iban jadi persembahen man Jahwe. Duana perik enda rusur radu ibelasken bas undang-undang e, janah banci ipilih kalak Israel perik si apai atena si persembahkenna. (Im. 1:14; 12:8; 14:30) Engkai maka undang-undang enda erguna? Salah sada alasenna eme perban perik ndukur labo lalap lit i sekeliling kalak e. Engkai?
Perik ndukur
Bas Israel perik ndukur lit sanga cuacana melas. Tapi tiap bulan Oktober, cuaca bas Israel mulai mbergeh. Emaka pindah perik-perik e ku negara-negara si melas i sebelah selatan. Bas musim semi ka maka mulihken perik-perik e ku Israel. (Ende. 2:11, 12; Jer. 8:7) Emaka adi kalak Israel si nai isuruh mpersembahken perik ndukur bas musim mbergeh, pasti mesera kap kalak e ndatken perik e.
Perik merpati (merpati batu ntah pe merpati karang)
Merpati la seri ras perik ndukur si rusur pindah-pindah. Emaka, merpati lalap lit bas Israel. Selain si e, merpati rusur iban jadi asuh-asuhen. (Bandingken Johanes 2:14, 16.) Menurut buku Bible Plants and Animals (Sinuan-Sinuan ras Binatang bas Pustaka), “bas kerina kota ras kuta i Palestina merpati banna jadi asuh-asuhen. Bas tiap rumah lit lubang bas dingding, si jadi asar merpati e.”—Bandingken Jesaya 60:8.
Merpati si sangana bas asarna
Perik si ipindo Jahwe jadi persembahen nukah ndatkenca katawari pe. Enda buktina Jahwe tuhu-tuhu Dibata si perkeleng ras masuk akal.
