1. Kai si mbuktiken maka penting kel akap Jesus Kata Dibata?

 CUBA bayangken banci langsung begindu Jesus ngajar. Rusur ikutipna piga-piga ayat janah enggo hapalna ayat e. Situhuna bas kata-katana si pertama kenca iperidiken bage pe kata-katana si terakhir sope ia mate, ikutipna piga-piga ayat. b (Ul. 8:3; Ms. 31:5; Luk. 4:4; 23:46) Bas telu setengah tahun pelayanenna, rusur ibacaken Jesus ayat-ayat, ikutipna, ras ijelaskenna man jelma si enterem.​—Mat. 5:17, 18, 21, 22, 27, 28; Luk. 4:16-20.

2. Kai si nampati Jesus tuhu-tuhu ngangkai Kata Dibata mulai kitik-kitikna nari? (Nen gambar sampul.)

² Ertahun-tahun sope imulai Jesus pelayanenna, enggo rusur bacana ras begina Kata Dibata. I rumah, pasti begina Jusup ras Maria ngutip ayat-ayat sanga kalak e ercakap-cakap. c (Ul. 6:6, 7) Jesus ras keluargana pe pasti reh ku ingan pulung kalak Jahudi tiap wari Sabat. (Luk. 4:16) Pasti tutus kel ate Jesus megiken Kata Dibata ibacaken bas ingan e. La ndekah kenca si e, erlajar Jesus guna mbaca Kata Dibata. Hasilna, tuhu-tuhu angkai Jesus isi Kata Dibata ras keleng ka atena. Perbahanenna pe sesuai ras kai si ipelajarina. Contohna, ingetndu nge kai si terjadi  bas rumah pertoton sanga umur Jesus 12 tahun denga? Guru-guru si meteh Undang-Undang Musa ‘mamang atena megiken Jesus perban pengangkanna ras jawapen-jawapenna.’​—Luk. 2:46, 47, 52.

3. Kai kari sibahas bas artikel enda?

³ Kita pe banci siangkai ras sikelengi Kata Dibata adi ratur sibaca. Uga carana gelah mbelin gunana man banta sanga sibaca Pustaka? Banci kita erlajar arah kata-kata Jesus man ahli Undang-Undang Musa, kalak Parisi, ras kalak Saduki. Peminpin-peminpin agama e rusur bacana Kata Dibata, tapi la dat kalak e manpaat arah kai si ibacana. Ikataken Jesus kai si arus ilakoken kalak e gelah datna manpaat sanga mbaca Kata Dibata. Bas artikel enda sibahas kari kata-kata Jesus man kalak e gelah kita banci (1) ngangkai kai si sangana sibaca, (2) ndatken permata rohani, ras (3) jadi kalak si reh ulina.

4. Arah Lukas 10:25-29, kai si iajarken man banta kerna mbaca Kata Dibata?

⁴ Perlu siangkai kai si sangana sibaca bas Kata Dibata gelah tuhu-tuhu sidat manpaatna. Cuba ukuri percakapen Jesus ras “sekalak ahli Undang-Undang Musa.” (Baca Lukas 10:25-29.) Isungkun dilaki e Jesus kai si arus ilakokenna gelah datna kegeluhen si rasa lalap. Guna ncidahken maka jawapenna lit bas Kata Dibata, sungkun Jesus ia, “Kai kin si tertulis bas Undang-Undang Musa? Kai si angkaindu?” Banci ibere dilaki e jawapen si tepat. Kutipna ayat-ayat kerna engkelengi Dibata ras engkelengi kalak si deban. (Im. 19:18; Ul. 6:5) Tapi kenca si e, isungkun dilaki e Jesus, “Ise dage si arus kukelengi?” Teridah maka la tuhu-tuhu angkai dilaki e kai si ibacana. Dungna, la tehna uga cara ndalanken Kata Dibata bas geluhna.

5. Engkai maka banci reh bagesna siangkai Kata Dibata adi ertoto kita ras sibaca alu manjar-anjar?

⁵ Banci reh bagesna siangkai Kata Dibata adi siusahaken mehuli kebiasanta erlajar. Cubakenlah piga-piga cara enda. Ertotolah sope mbaca Pustaka. Perlu kita penampat Jahwe guna ngangkai KataNa. Emaka, pindolah kesah si badiaNa gelah banci kam konsentrasi. Kenca si e, bacalah alu manjar-anjar gelah banci angkaindu kai si sangana ibacandu. Banci bacandu alu ersora ntah pe janahndu ngikutken rekamen audiona. Adi begikenndu pembacan arah rekamen audio janahndu ngenen si tertulis, e banci nampati kam ngangkai, nginget, ras mpelajari terbuen arah kai si bacandu bas Pustaka. (Jos. 1:8) Kenca dung mbaca Pustaka, ertotolah kam mulihi. Pesehlah pengatan bujurndu man Jahwe perban enggo berekenNa Pustaka janah pindolah gelah sampatiNa kam guna ndalanken kai si enggo bacandu.

6. Engkai maka erguna adi siban penungkunen-penungkunen ras siban cataten sanga mbaca Pustaka? (Nen ka gambar.)

⁶ Lit dua saran nari si banci nampati kam gelah reh bagesna angkaindu Pustaka. Sanga bacandu sada cerita, cuba ukuri penungkunen-penungkunen enda: ‘Ise saja nge tokoh utamana? Ise nge si sangana ngerana? Man ise ia ngerana, ras engkai?  I ja ras ndigan kejadinna?’ Penungkunen-penungkunen si bage banci nampati kam mbayangken ceritana ras ngangkai intina. Selain si e, banlah cataten singkat sanga kam mbaca. Alu bage, kam tempa-tempa ipaksa ngukuri terbagesen kai si sangana bacandu gelah reh bagesna angkandu ras ingetndu. Banci catatndu jawapen arah penungkunen-penungkunen si datas ndai, hasil risetndu, pelajaren si datndu, ntah pe perasanndu. Adi bage banndu, banci gejapkenndu maka Kata Dibata itulis langsung man bandu.

7. Kai si perlu silakoken sanga mbaca Pustaka, ras engkai? (Matius 24:15)

⁷ Ikataken Jesus maka perlu siukuri kai si sangana sibaca bas Kata Dibata gelah banci siangkai. (Baca Matius 24:15.) E ertina perlu sipake kengasupen rukurta guna ngangkai hubungen sada gagasen ras gagasen si deban, ntah pe kai bedana sada gagasen ras gagasen si deban bage pe ngangkai kai si la jelas ertina. Bagi si ikataken Jesus, perlu sipake kengasupen rukurta guna meteh kejadin-kejadin si nggenepi nubuat-nubuat Pustaka. Perlu ka sipake kengasupen rukurta sanga sibaca bagin-bagin si deban bas Pustaka gelah banci tuhu-tuhu sidat manpaatna.

8. Uga carata nggunaken kengasupen rukurta sanga mbaca Pustaka?

⁸ Banci sampati Jahwe kita nggunaken kengasupen rukurta alu mehuli. Emaka, ertotolah mindo penampatNa. (Kua. 2:6) Uga carana gelah perbahanenndu sesuai ras totondu? Tutuslah atendu mpelajari kai si sangana bacandu janah ukurilah kai hubungenna ras kai si enggo tehndu. Guna nampati kam ngelakoken si e, pakelah buku-buku si ipake guna erlajar Pustaka, misalna, Panduan Riset untuk Saksi-Saksi Yehuwa. Buku si bage banci nampati  kam ngangkai erti sada ayat ras meteh kai pelajarenna man bandu. (Heb. 5:14) Adi gunakenndu kengasupen rukurndu sanga mbaca Pustaka, reh bagesna me angkaindu Kata Dibata.

9. Ajaren kai si la ialoken kalak Saduki?

⁹ Enggo tandai kalak Saduki lima buku pertama bas Kitap-Kitap Heber, tapi la kalak e nggit ngaloken piga-piga kebenaren si penting si lit bas buku-buku e. Contohna, la kalak e tek nandangi kekeken. Sanga isungkun kalak e kerna kekeken man Jesus, nina Jesus man kalak e, “Lenga kin pernah baca kena bas buku Musa, kerna kejadin rambah duri? Paksa si e nina Dibata man Musa, ‘Aku kap Dibata Abraham, Dibata Isak, ras Dibata Jakup.’” (Mrk. 12:18, 26) Pasti enggo rusur baca kalak Saduki kerna kejadin rambah duri. Tapi, bagi si teridah arah kata-kata Jesus, la kalak e tek man ajaren kerna kekeken eme salah sada ajaren si pentingna bas Pustaka.​—Mrk. 12:27; Luk. 20:38. d

10. Kai si perlu siukuri sanga mbaca Pustaka?

¹⁰ Kai pelajarenna man banta? Sanga sibaca sada ayat ntah pe sada cerita bas Pustaka, siukuri ateta kai saja si banci sipelajari arah ayat ntah pe cerita e. Labo ajaren dasar saja ngenca siperdiateken, perlu ka sipelajari terbagesen kebenaren ras sidarami prinsip si terbuni.

11. Sesuai ras 2 Timotius 3:16, 17, uga carana banci datndu permata rohani bas Pustaka?

¹¹ Uga kam banci ndatken permata rohani sanga mbaca Pustaka? Cuba perdiateken kai si ikataken bas 2 Timotius 3:16, 17. (Baca.) Menurut ayat e “kerina isi Kitap si Badia . . . erguna” bas (1) ngajar, (2) ncidahken kesalahen, (3) mpekena kerinana, ras (4) ngelatih kita. Banci datkenndu empat manpaat e arah buku-buku bas Pustaka si jarang bacandu. Sanga mbaca Pustaka, ukuri kai si ajarken ayat-ayat e kerna Jahwe, sura-suraNa, ras prinsip si berekenNa. Ukuri ka uga ayat-ayat e erguna bas ncidahken kesalahen. Darami ka uga ayat-ayat e banci nampati kam nandai ras nulak sura-sura ntah pe perbahanen si salah janah banci kam tetap setia man Jahwe. Perdiateken uga ayat-ayat e banci ipake mpekena perukuren si salah, contohna perukuren kalak si ijumpaindu bas pelayanen. Janah, ukurilah uga ayat-ayat e ngelatih kita guna ngusih cara rukur Jahwe. Adi ilakokenndu si e kerina, datndu  me erbage-bage permata rohani, si banci nampati kam ndatken terbuen manpaat sanga mbaca Pustaka.

12. Engkai nina Jesus man kalak Parisi, “Lenga kin pernah baca kena?”

¹² Guna ncidahken maka kalak Parisi la tuhu-tuhu ngangkai Kata Dibata, isungkun Jesus ka kalak e, “Lenga kin pernah baca kena?” (Mat. 12:1-7) e Paksa si e, ituduh kalak Parisi murid-murid Jesus la ndalanken Sabat. Guna njawapsa, ikataken Jesus dua contoh arah Pustaka ras kutipna sada ayat arah buku Hosea guna mbuktiken maka la angkai kalak Parisi prinsip arah hukum Sabat janah gagal kalak e ncidahken perkuah ate. Amin pe rusur baca kalak Parisi Kata Dibata, e la erban kalak e jadi kalak si reh ulina. Engkai? Perban sanga mbaca, tujun kalak e mbanggaken dirina ras ndarami kesalahen kalak si deban. Dungna, la tuhu-tuhu angkai kalak e kai si ibacana.​—Mat. 23:23; Joh. 5:39, 40.

13. Uga nge arusna perukurenta sanga mbaca Pustaka, ras engkai?

¹³ Enggo sipelajari arah kata-kata Jesus maka perlu perukuren si benar sanga mbaca Pustaka. Arus kita meteruk ukur ras nggit erlajar, ula bagi kalak Parisi si mbaca Pustaka alu tujun mbanggaken dirina ras ndarami kesalahen kalak si deban. Tapi, arus ‘sialoken alu meteruk ukur kata si isuan Dibata.’ (Jak. 1:21) Adi meteruk ukur kita janah nggit iajari, Kata Dibata banci erban kita jadi kalak si reh ulina. Kita pe jadi kalak si perkuah, mehuli, ras perkeleng.

14. Kai buktina maka Pustaka enggo erban kita jadi kalak si reh ulina? (Nen ka gambar.)

 ¹⁴ Kalak Parisi la jadi kalak si reh ulina amin pe bacana Kata Dibata. Si e teridah arah perbahanen kalak e perban ‘hakimi kalak e kalak si la ersalah.’ (Mat. 12:7) Kita uga? Reh ulina nge kita perban Kata Dibata? Si e banci teridah arah carata ngukuri kalak si deban bage pe arah perbahanenta. Contohna, rusur nge sicakapken si mehuli arah kalak si deban ntah rusuren sicakapken kelemahenna? Perkuah nge kita janah nggit ngampuni ntah nggit kita mandangi ras dendam? Adi sipereksa dirita alu cara si bage, banci siteh enggo sipediat ntah lenga Kata Dibata mpengaruhi perukurenta, perasanta, ras perbahanenta.​—1 Tim. 4:12, 15; Heb. 4:12.

15. Uga perasan Jesus kerna Kata Dibata?

¹⁵ Keleng ate Jesus Kata Dibata janah perasanna enggo inubuatken bas Masmur 40:8, i je ikataken, “O Dibataku, meriah kuakap ngelakoken peratenNdu, undang-undangNdu lit bas pusuhku.” Hasilna, banci ia terus ngelayani Jahwe janah ermeriah ukur. Kita pe banci tetap setia ras ermeriah ukur adi terus sibaca janah sikelengi Kata Dibata.​—Ms. 1:1-3.

16. Kai si banci lakokenndu guna ndatken terbuen manpaat sanga mbaca Pustaka? (Nen kotak “ Kata-Kata Jesus Banci Nampati Kam Ngangkai Kai si Bacandu.”)

¹⁶ Bagi kata-kata ras usihen Jesus, siusahakenlah ndatken terbuen manpaat sanga mbaca Pustaka. Banci reh bagesna siangkai isi Pustaka alu ertoto, mbaca alu manjar-anjar, ngukuri penungkunen-penungkunen ras erban cataten singkat. Banci sipake kengasupen rukurta alu mpelajari kai si enggo sibaca janah sigunaken publikasita si erpalasken Pustaka. Banci reh buena sidat manpaat arah Pustaka, termasuk arah ayat-ayat si jarang sibaca, alu ndarami permata rohani bas ayat-ayat e. Selain si e, banci kita jadi kalak si reh ulina adi sibaca Pustaka alu perukuren si benar. Alu ngelakoken si e kerina, banci tuhu-tuhu sidat manpaat sanga mbaca Pustaka janah reh deherna kita ras Jahwe.​—Ms. 119:17, 18; Jak. 4:8.