Tawa aku perban la kusangka lit kepe minat temanku e man agama. Kusungkun ia, “Kai si tehndu kerna Pustaka?” La mis jawapna. Dungna, katakenna maka mamakna sekalak Saksi Jahwe, janah arah mamakna me pelajarina piga-piga ajaren Pustaka. Perban penasaren aku, mbue penungkunenku man bana.

Ercakap-cakap kami seh ngasa tengah berngi. Ikataken temanku e maka menurut Pustaka Setan me si nguasai doni enda. (Joh. 14:30) Banci saja enggo ndekah tehndu kerna si e. Tapi, enda pemeteh si mbaru man bangku janah merhat kel aku meteh terbuen. Sedekah enda si kuteh Dibata si mehuli ras adil nge si nguasai doni enda. Tapi si e la kuakap masuk akal perban la sesuai ras kai si terjadi bas doni enda. Amin pe paksa si e umurku 26 tahun denga, enggo melala kuidah masalah si erban aku kuatir.

Mbarenda, bapakku sekalak pilot Angkatan Udara Amerika Serikat. Emaka kitik-kitik nari kuteh maka perang nuklir banci terjadi, perban bom nuklir banci itembakken katawari pe. Sanga aku kuliah i Kalifornia, enterem tentera Amerika sangana erperang i Vietnam. Ikut aku demo ras mahasiswa-mahasiswa si deban. Polisi si maba perpalu ngayak-ngayak kami, janah tembakken kalak e gas air mata. Emaka, arus kami kiam, sedak akap kami janah la jelas pengidah kami. Kacau kel paksa si e. Piga-piga peminpin politik ibunuh, janah melala demo ras kerusuhen. Tiap kalak beda pendapatna kerna kai si arus ilakoken pemerentah, kerina e erban aku bingung.

Bas tahun 1970, mulai aku erdahin bas pesisir utara Alaska, janah enggo mbue kupepulung sen. Kenca si e, naik pesawat aku ku London, kutukur kereta, janah erkereta aku ku arah selatan amin pe la lit tujunku. Piga-piga bulan kenca si e, seh aku i Afrika. Bas perdalanen, jumpa aku ras enterem kalak si ngarapken gelah banci bebas arah kerina masalahna, bali bagi aku.

Emaka, perban kuidah mbue kel masalah bas doni enda, masuk akal kuakap ajaren Pustaka  maka doni enda ikendaliken malekat si seh kel jahatna. Tapi dungna, tersungkun-sungkun aku, ‘Adi bage, kai nge dahin Dibata?’

Piga-piga bulan kenca si e, kudat jawapenna. Kenca si e, mulai kutandai enterem kalak si enggo terbukti setia ngelayani Dibata si benar amin pe lit erbage-bage tentangen si adapina janah keleng ateku kalak e.

Sanga mulih aku ku London, kuhubungi teman mamakku, janah berena aku Pustaka. Kenca si e, sanga lawes aku ku Amsterdam, Belanda, sekalak Saksi Jahwe ngidah aku sangana mbaca Pustaka i teruh lampu si lit i dalan. Ijelaskenna man bangku terbuen kerna Pustaka. Kenca si e, lawes aku ku Dublin, Irlandia, janah kudahi kantor cabang Saksi-Saksi Jahwe. Kutuktuk pintuna janah jumpa aku ras Arthur Matthews, sekalak senina si pentar janah mbue pengalamenna. Kupindo gelah erlajar Pustaka kami janah nggit ia ngajari aku.

Mulai tutus ateku erlajar janah semangat kel aku mbaca buku-buku bage pe majalah-majalah si iterbitken Saksi Jahwe. Selain si e, kubaca ka Pustaka. Meriah kel kuakap ngelakokenca. Bas perpulungen, kuidah anak-anak pe enggo tehna jawapen nandangi penungkunen-penungkunen si mesera. Contohna, ‘Engkai maka lit kejahaten? Ise kin Dibata? Kai si terjadi man kalak si enggo mate?’ Seh asa gundari, enterem kalak si meganjang pendidikenna lenga tehna jawapen nandangi penungkunen-penungkunen e. Paksa si e, kerina temanku eme Saksi Jahwe perban la lit si kutandai bas Irlandia. Perban penampat kalak e, mulai keleng ateku Jahwe janah nggit aku ngelakoken peratenNa.

Bas tahun 1972, iperidiken aku. Setahun kenca si e, mulai aku merintis janah gabung aku bas runggun si kitik i Newry, Irlandia Utara. Kusewa sada rumah si iban arah batu i teruh deleng bas ingan si terpencil. I juma deher rumahku lit i je piga-piga lembu janah rusur aku latihen khotbah i lebe-lebe lembu e. Tempa-tempa begiken lembu-lembu e khotbahku janahna nggagat. Memang la banci ibereken lembu e aku nasehat, tapi tersampati aku uga cara natap hadirin alu mehuli. Bas tahun 1974, ilantik aku jadi perintis istimewa janah temanku merintis eme Nigel Pitt, dungna erteman kami ngayak gundari.

Paksa si e, terjadi “Konflik Irlandia Utara.” Piga-piga kalak ngataken maka Irlandia eme “negri si dem alu bom ras peluru.” Melala  pertempuren bas dalan, enterem kalak si itembak, ras mbue motor si ibom. Mberat kel masalahna perban politik ras agama terlibat bas konflik e. Tapi, iteh kalak si eragama Protestan ras Katolik maka Saksi Jahwe la terlibat bas politik. Emaka, banci kami bebas erberita janah aman. Biasana iteh si mada jabu ndigan ras i ja terjadi kerusuhen, janah ipersingeti kalak e kami gelah ula kami kena bahaya.

Amin pe bage, pernah ka nge adapi kami situasi si berbahaya. Bas sada wari, aku ras perintis si deban eme Denis Carrigan erberita bas sada kota. Bas kota e la lit Saksi Jahwe janah e peduakaliken kami ku je. Bas sada kafe, lit sekalak diberu si nuduh kami tentera Inggris si sangana nyamar. Banci jadi perban duana kami labo ngerana nggunaken logat Irlandia. Mbiar kel kami. Paksa si e, adi mekacar kita man tentera banci kita ibunuh ntah pe banci itembak tiwenta. Tedis kami i darat kafe guna nimai bus. Mbergeh kel sanga si e, janah la lit ise pe i je. Rempet-rempet lit sada motor si ngadi i lebe-lebe kafe e, ndarat diberu si ndai janah ngerana ia man dua dilaki si lit bas motor e janah ituduh-tuduhna kami. Ideheri motor e kami janah isungkun dua dilaki e kami kerna jadwal bus. Sanga bus si itimai kami dungna reh, ngerana kalak e man supirna, tapi la banci begi kami kai si ikataken kalak e. Bas bus e la lit penumpang si deban, jadi tek kami maka irencanaken kalak e guna ncilakai kami sanga kami enggo seh bas luar kota. Tapi kepeken la lit kai pe si terjadi. Sanga nusur arah bus, kusungkun supir e, “Kai si isungkun dua dilaki ndai kerna kami?” Ijawap supir e, “Tenang saja kena, enggo nge kena aman. Kuteh nge ise kena, janah enggo kukataken man kalak e.”

Bas tahun 1976 bas kebaktin distrik a i Dublin, jumpa aku ras Pauline Lomax, sekalak perintis istimewa arah Inggris. Ia jelmana mekacar, rohani, ras meteruk ukur. Ia ras turangna, Ray, kitik-kitikna nari enggo erlajar Pustaka. Setahun kenca si e, erjabu aku ras Pauline janah terus kami ngelayani jadi perintis istimewa i Ballymena, Irlandia Utara.

Sempat kami ikut bas pendahin keliling guna ngelayani turang senina i Belfast, Londonderry, bage pe bas daerah-daerah si berbahaya si debanna. Teriahken kel kami perban kiniteken turang senina si lit i je. Itadingken kalak e kinitekenna si sedekah enda janah iambekkenna perasan negatip bage pe segat ate gelah banci ngelayani Jahwe. Tuhu-tuhu ipasu-pasu ras ilindungi Jahwe kalak e!

Lit sepuluh tahun aku tading i Irlandia. Dung e, bas tahun 1981 iundang kami ngikuti sekolah Gilead kelas pe-72-ken. Kenca wisuda, itugasken kami ku Sierra Leone, Afrika Barat.

Tading kami bas rumah utusen injil radu ras 11 turang senina si deban. Bas rumah e lit sada dapur, telu kamar mandi, dua ingan ridi, sada telepon, sada mesin cuci, ras sada mesin pengering. I je, rusur rempet mate lampu. Bas loteng melala menci, janah mon-mon lit nipe kobra bas ruangen si lit i teruh taneh.

Amin pe labo sikap kel ingan kami tading, meriah kel kap kami erberita. Kalakna i je ngergai Pustaka janah nggit megiken. Enterem si nggit erlajar Pustaka janah dungna jadi Saksi Jahwe.  Kalak i je ngelebuh aku “Bapak Robert” janah ilebuhna Pauline “Ibu Robert.” Tapi bas pudi wari, perban buen waktuku erdahin bas kantor cabang janah enggo kurang waktuku bas erberita, ilebuh kalak e Pauline “Ibu Pauline.” Janah aku ilebuh “Bapak Pauline.” Meriah kel akap Pauline.

I je enterem turang senina si mesera kel pergeluhna, tapi lalap bere Jahwe keperlunna, mon-mon alu cara si luar biasa. (Mat. 6:33) Kuinget lit sekalak turang si mereken kerina senna man sekalak senina si la lit senna nukur tambar malaria. Padahal sen turang e bias guna nukur pangan man bana ras anakna ngenca. Bas wari e, la isangkana reh sekalak diberu ndahi ia janah pindona ia mpejile bukna. Aloken turang e me sen arah diberu e. Lit melala kejadin si bage bas Sierra Leone.

Lit siwah tahun dekahna kami tading i Sierra Leone. Kenca si e, itugasken kami ku Betel i Nigeria. Kantor cabang i je galang kel. Tugasku i je bali denga bagi si kulakoken bas Sierra Leone. Tapi, mbelin kel perubahen si iadapi Pauline. Sebelumna, ia erberita 130 jam tiap bulan, janah piga-piga kalak si erlajar Pustaka ras ia enggo erban kemajun. Gundari dahinna njait janah tiap wari ipekenana baju-baju si ceda. Ndekah maka banci ia erban penyesuaien. Tapi, dungna tehna maka iergai kalak kerja kerasna, janah pakena tiap kesempaten guna mpegegehi temanna erdahin bas Betel.

Paksa si e, sitik denga ngenca si teh kami kerna budaya Nigeria. Bas sada wari, reh sekalak senina ku kantorku guna mpetandaken sekalak turang si mbaru ilantik guna ngelayani i Betel. Sanga kusalami ateku ia, mungkuk ia ku naheku, sengget kel aku. Mis kuinget Perbahanen Rasul-Rasul 10:25, 26 bage pe Ketangkasen 19:10. Tersungkun-sungkun aku, ‘Perlu nge kukataken gelah ula lakokenna bage?’ Tapi kuteh maka ia enggo ilantik ngelayani bas Betel, pasti tehna ajaren Pustaka.

Mela janah lanai kuakap entabeh bas percakapen e. Kenca si e, kuban piga-piga riset. Dungna kuteh, si ilakoken turang e biasa denga ilakoken bas piga-piga daerah i Nigeria. Dilaki pe arus mungkuk alu cara si bage guna ncidahken pengergan. Perbahanen e labo guna nembah, janah lit ka contoh-contoh si bage bas Pustaka. (1 Sam. 24:8) Untung lenga sempat kupersingeti turang e, si banci erban ia mela.

 I Nigeria jumpa kami ras enterem turang senina si erkiniteken. Salah sadana eme Isaiah Adagbona. b Ia erlajar kebenaren sanga nguda denga, tapi dungna sakit kusta ia. Ikirim ia ku ingan kalak si sakit kusta. Ia ngenca Saksi Jahwe i je. Amin pe mbue tentangen, banci sampatina lebih 30 kalak si sakit kusta ngaloken kebenaren janah ikut ia mbentuk sada runggun bas ingan e.

Bas tahun 1996, kami itugasken ku kantor cabang Kenya. Enda peduakaliken aku reh ku negri e. Pertama aku reh ku Kenya eme bagi si kuceritaken tangtangna ndai. Bas daerah Betel mbue kera vervet. Mon-mon, itangko kera-kera e buah si ibaba turang-turang si lit i je. Bas sada wari, lit sekalak turang i Betel si la tutupna jendela kamarna. Sanga mulih ia, idapetina sada kelompok kera si sangana man pangan bas kamarna. Serko ia janah kiam ku darat. Kera-kera e pe serko janah lompaten arah jendela.

Aku ras Pauline gabung ku runggun si make bahasa Swahili. La ndekah kenca si e, itugasken aku guna mandu Pelajaren Pustaka Runggun. Tapi paksa si e lenga aku beluhsa make bahasa Swahili. Sope perpulungen, enggo kupelajari bahanna, alu bage banci kubaca penungkunen-penungkunenna. Tapi, adi lit komentar hadirin si beda sitiklah gia arah kai si tertulis, lanai kuangkai ertina. Situhuna labo kuakap entabeh. Tapi, luar biasa kel kuakap perban turang senina sabar ras meteruk ukur bas ngikutken pengaturen e.

La seh setahun kami tading i Kenya. Bas tahun 1997, iundang kami ku Betel i Brooklyn, New York. I je kalakna bayak, tapi e banci erban turah masalah si deban. (Kua. 30:8, 9) Amin pe bage, paguh kel kiniteken turang senina si lit i je. Ipake turang senina e waktu ras ertana guna ndukung pendahin organisasi Jahwe, labo guna ngayaki kebayaken.

Sedekah enda, enggo idah kami kiniteken turang senina amin pe ngadapi erbage-bage tentangen. Bas Irlandia, tetap kalak e erkiniteken amin pe kacau negri kalak e janah dem kekerasen. Bas Afrika, kalak e tetap erkiniteken amin pe mesera pergeluhna janah tading bas daerah si terpencil. Bas Amerika Serikat, kalak e tetap erkiniteken amin pe teremen kalak i je ngayaki kebayaken. Pasti meriah kel kap Jahwe sanga ngidah umatNa engkelengi Ia amin pe erbage-bage tentangen si iadapi kalak e.

Tahun-tahun si kudalani “meter kel lewat.” (Jop 7:6) Gundari, kami erdahin bas kantor pusat i Warwick, New York. Meriah kel kap kami perban banci ngelayani ras turang senina si engkelengi sada ras si debanna. Meriah ras puas kel kap kami perban banci ndukung Rajata, Jesus Kristus, si ntisik nari mereken pasu-pasu si luar biasa man jutan rakyatna si erkiniteken.​—Mat. 25:34.