YOMARA ras dua turangna eme Marcelo ras Hiver, tading i kuta si kitik i Guatemala. Yomara mulai erlajar Pustaka ras Saksi-Saksi Jahwe, janah kenca si e dua turangna pe ikut erlajar. Tapi masalahna, kalak e teluna la erpengidah, janah la kalak e beluh mbaca hurup Braille. Emaka, si ngajari kalak e Pustaka arus mbacaken bahan pelajaren e bage pe ayat-ayatna man kalak e.

Reh ku perpulungen pe jadi tentangen man kalak e. Jarak ku Bale Kerajan si ndeherna eme 40 menit perdalanen. Perban kalak e la erpengidah, arus isampati turang senina kalak e gelah banci reh ku kerina acara perpulungen. Sanga mulai dat kalak e tugas sekolah bas perpulungen tengah pekan, isampati turang senina kalak e gelah banci ihapalna kai si arus ipesehna.

Bas bulan Mei 2019, mulai me lit perpulungen i kuta kalak e. Sanga si e, lit sepasang perintis biasa si pindah ku kuta e. Iajari kalak e atena Yomara ras dua turangna mbaca ras nulis hurup Braille, tapi la teh kalak e uga carana. Emaka, lawes kalak e ku perpustakan guna erlajar kerna hurup Braille ras cara ngajarkenca.

Bas piga-piga bulan saja, Yomara, Marcelo, ras Hiver, enggo banci mbaca hurup Braille. Emaka reh majuna kalak e secara rohani. a Gundari, kalak e teluna ngelayani jadi perintis biasa, janah Marcelo pe jadi sinampati runggun. Semangat kel kalak e ngelakoken kegiaten rohani tiap minggu janah jadi usihen man turang senina si deban.

Ngata bujur kel kalak e teluna nandangi kekelengen bage pe penampat si ibereken turang senina. Nina Yomara, “Sanga tangtangna kami jumpa ras Saksi Jahwe, enggo cidahken kalak e kekelengen situhu-tuhu man kami.” Ikataken Marcelo ka, “Bas runggun lit teman kami si mehuli kel man kami, janah kami eme bagin arah keluarga i sebelang doni si ipersada alu kekelengen.” Tertima-tima kel Yomara ras dua turangna ngidah uga Jahwe ngubah doni enda jadi pardis.​—Ms. 37:10, 11; Jes. 35:5.