1. Kai nina Jesus man murid-muridna kerna “kedungen jaman enda,” ras persinget kai si iberekenna?

 PIGA-PIGA wari sope Jesus mate, lit empat muridna si nungkun man bana, nina, “Kai nge pagi si jadi tanda . . . kedungen jaman enda?” (Mat. 24:3) Banci saja merhat murid-murid meteh kai si jadi tanda Jerusalem ras rumah pertoton nandangi ihancurken. Ikataken Jesus kai saja si terjadi sope Jerusalem ras rumah pertoton ihancurken. Si e pe jadi tanda kedungen jamanta gundari. Nina Jesus kerna kedungen jaman enda, “Kerna wari ntah pe jamna, ise pe la metehsa, malekat-malekat i surga pe lang, Anak pe lang, Bapak ngenca.” Kenca si e, ipersingetina kerina murid-muridna gelah ‘terus sadar’ ras “tetap erjaga-jaga.”​—Mrk. 13:32-37.

2. Engkai maka kalak Kristen Jahudi bas abad pertama perlu tetap erjaga-jaga?

² Kalak Kristen Jahudi bas abad pertama perlu tetap erjaga-jaga gelah banci selamat. Ikataken Jesus man pengikutna tanda si ncidahken maka Jerusalem ras rumah pertoton nandangi ihancurken. Nina, “Sanga idah kena kota Jerusalem ikepung tentera si erkemah, si e ertina Jerusalem enggo nandangi ihancurken.” Sanga si e terjadi, kalak e “arus kiam ku gunung-gunung,” bagi persinget Jesus. (Luk. 21:20, 21) Kalak si mperdiateken persinget e banci selamat sanga Jerusalem ihancurken pasuken Roma.

3. Kai kari sibahas bas artikel enda?

 ³ Kentisik nari, ihancurken me doni si jahat enda. Emaka, bagi kalak Kristen bas abad pertama, arus kita tetap sadar ras erjaga-jaga. Bas artikel enda sibahas kari uga carata gelah benar perukurenta ngenen kejadin-kejadin bas doni enda, engkai maka perlu siperdiateken dirita, ras uga kita banci make waktuta alu cara si mehulina.

4. Engkai maka tertarik kita mperdiateken kejadin-kejadin bas doni enda bage pe hubungenna ras nubuat-nubuat bas Pustaka?

⁴ Pasti tertarik kita mperdiateken uga kejadin-kejadin bas doni enda terjadi bagi si inubuatken bas Pustaka. Ikataken Jesus kai pagi si terjadi bas pendungi jaman gelah banci siteh maka kedungen doni enda enggo ndeher. (Mat. 24:3-14) Inasehati Rasul Petrus kita guna mperdiateken nubuat-nubuat Pustaka si enggo terjadi gelah kinitekenta tetap paguh. (2 Pet. 1:19-21) Buku terakhir bas Pustaka ibenaken alu kata-kata enda: “Enda ketangkasen si bereken Dibata man Jesus Kristus guna ncidahken kai pagi si pasti terjadi man budak-budak Dibata.” (Ket. 1:1) Emaka, tertarik kel kita mperdiateken kejadin-kejadin bas doni enda ras sipelajari terbuen lit ntah lang hubungenna ras nubuat Pustaka. Banci saja semangat kel kita sanga mbahas kejadin-kejadin e ras turang seninata.

5. Kai si la banci silakoken, janah kai si arus silakoken? (Nen ka gambar.)

⁵ Sanga sibahas nubuat bas Pustaka arusna la siterka-terka ntah pe siban sada kesimpulen. Engkai? Perban la ateta pendapatta erban runggun lanai ersada. Contohna, banci saja sibegi peminpin-peminpin doni enda ngataken maka kalak e enggo berhasil ndungi sada masalah janah enggo banna dame ras aman. Tapi, labo mis siban kesimpulen maka kejadin e me si inubuatken bas 1 Tesalonika 5:3. Perlu sidarami informasi si terbaru. Adi pembahasenta sesuai ras publikasi si iterbitken organisasi Jahwe, banci kita tetap ersada janah “sependapat” ras turang seninata.​—1 Kor. 1:10; 4:6.

6. Kai si banci sipelajari arah 2 Petrus 3:11-13?

⁶ Baca 2 Petrus 3:11-13. Nasehat Rasul Petrus nampati kita gelah benar cara rukurta sanga mpelajari nubuat bas Pustaka. Inasehatina kita gelah ‘tetap siinget wari kerehen Jahwe.’ Engkai? Labo perban ateta meteh ndigan “wari ras jamna” Harmagedon terjadi, tapi perban merhat kita nggunaken waktuta gelah ‘bersih lagu langkahta janah sibuktiken arah perbahanenta maka kita kalak si nembah Dibata.’ (Mat. 24:36; Luk. 12:40) E ertina perlu sijaga perbahanenta janah sipastiken maka silayani Jahwe perban keleng ateta Ia. Guna ngelakoken si e, arus siperdiateken dirita.

7. Uga kita banci ngikutken nasehat Jesus bas Lukas 21:34?

⁷ Ikataken Jesus man murid-muridna gelah iperdiateken kalak e dirina labo saja kejadin-kejadin bas doni enda. E jelas teridah arah persingetna si icatat bas Lukas 21:34. (Baca.) Bas ayat e, nina Jesus, “perdiatekenlah diri kena.” Kalak  si mperdiateken dirina hati-hati ia nandangi bahaya kai pe si banci ncedai hubungenna ras Jahwe, janah usahakenna kel gelah la ceda pertemanenna ras Jahwe. Alu bage, ‘tetap ia bas kekelengen Dibata.’​—Jud. 20, 21; Kua. 22:3.

8. Nasehat kai si ibereken Rasul Paulus man Kalak Kristen?

⁸ Inasehati Rasul Paulus kalak Kristen guna mperdiateken dirina. Contohna ikatakenna man kalak Kristen i Epesus: “Perdiatekenlah cara kena nggeluh, gelah kena nggeluh selaku kalak pentar, labo selaku kalak si la pentar.” (Ep. 5:15, 16) Usahaken Setan ncedai hubungenta ras Jahwe. Emaka inasehati Pustaka kita gelah ‘terus siperdiateken peraten Jahwe.’ Alu bage, banci silindungi dirita arah kerina serangen Setan.​—Ep. 5:17.

9. Uga kita banci ngangkai peraten Jahwe?

⁹ Labo ikataken Pustaka kerina bahaya si banci ncedai hubungenta ras Jahwe. Emaka, arus rusur siban keputusen kerna kai si la ituriken bas Pustaka. Gelah banci siban keputusen si pentar, perlu siusahaken ngangkai “kai peraten Jahwe.” Uga carana? Perlu ratur sipelajari ras siukuri Kata Dibata. Adi reh bagesna siangkai peraten Jahwe janah sipebelin “perukuren Kristus,” reh pentarna kita erban keputusen, amin pe la lit aturen si jelas arah Pustaka. (1 Kor. 2:14-16) Lit piga-piga bahaya si menukah metehsa, tapi lit ka si mesera siakap metehsa.

10. Kai saja bahaya si arus sipedauh?

¹⁰ Piga-piga bahaya si arus sipedauh eme nggoda kalak si deban, minem-minem, merangap, nggunaken kata-kata si nakiti, nonton pornografi, hiburen si lit kekerasenna, bage pe si mirip ras si e. (Ms. 101:3) Musuhta si Iblis lalap ndarami kesempaten guna ncedai hubungenta ras Jahwe. (1 Pet. 5:8) Adi la kita hati-hati, pusuh ras perukurenta banci ipengaruhi Setan. Dungna, mulai kita jadi kalak si percian, la jujur, merangap, segat ateta kalak si deban, sombong, ras pendendam. (Gal. 5:19-21) Tangtangna, banci saja la siakap bahaya sipat-sipat e, tapi adi la mis siambekken, banci reh belinna bali bagi sinuan-sinuan si lit racunna janah erban kita ngelakoken dosa.​—Jak. 1:14, 15.

11. Kai salah sada bahaya si mesera metehsa, janah engkai maka arus sipedauh?

¹¹ Salah sada bahaya si mesera metehsa eme pergaulen si la mehuli. Katakenlah kam erdahin ras kalak si labo Saksi Jahwe. Atendu mehuli min perukuren temanndu kerna Saksi Jahwe. Emaka, mehuli kam man bana janah nggit nampati ia. Tangtangna, banci saja ras kena man ciger, tapi reh dekahna reh rusurna kena ras man. Mon-mon cakap kotor ia, tangtangna labo diatendu. Tapi reh dekahna, enggo terbiasa kam janah lanai kam terganggu. Bas sada wari, ajakna kam minem kopi kenca mulih erdahin, janah nggit kam. Dungna, mulai mirip perukurenndu ras perukuren temanndu e. Perbahanenndu pe pasti kang nge terpengaruh. Kai pelajarenna? Memang perlu mehamat ras mehuli kita man kerina kalak, tapi arus siinget maka temanta ergaul mbelin pengaruhna man banta. (1 Kor. 15:33) Pasti nggit kita ngikutken nasehat Jesus guna mperdiateken dirita. Emaka, la kita nggit ergaul ras kalak si  la ngikutken patoken Jahwe. (2 Kor. 6:15) Sipedauh ateta si e perban siteh e bahaya.

12. Kai si arus ilakoken murid-murid Jesus janahna nimai Jerusalem ras rumah pertoton ihancurken?

¹² Ate Jesus sibuk min murid-muridna janahna nimai Jerusalem ras rumah pertoton ihancurken. Emaka itugaskenna kalak e guna erberita si meriah “i Jerusalem, i belang-belang Judea ras Samaria, seh ku ujung doni.” (Perb. 1:6-8) Mbelin kel pendahin e! Alu ngelakoken tugas e asa ngasupna, igunaken kalak e waktuna alu cara si mehulina.

13. Engkai maka perlu sigunaken waktuta alu cara si mehulina? (Kolose 4:5)

¹³ Baca Kolose 4:5. Perlu tuhu-tuhu siperdiateken uga carata nggunaken waktuta. Engkai? Perban “kejadin si la isangka-sangka” banci terjadi man kita kerina. (Peng. 9:11) Katawari pe banci kita mate.

14-15. Uga carata nggunaken waktuta alu cara si mehulina? (Heber 6:11, 12) (Nen ka gambar.)

¹⁴ Banci sigunaken waktuta alu cara si mehulina alu ngelakoken peraten Jahwe janah sipepaguh pertemanenta ras  Ia. (Joh. 14:21) Perlu ‘kita paguh, ula ragu-ragu, terus sibuk bas ndahiken dahin Tuhan.’ (1 Kor. 15:58) Alu bage, sanga reh kedungen e, la soal kedungen geluhta ntah pe kedungen doni si jahat enda, la kita menyesal.​—Mat. 24:13; Rom. 14:8.

¹⁵ Gundari, terus iarak-arak Jesus murid-muridna guna erberita kerna Kerajan Dibata i belang-belang doni. Arah organisasi Jahwe, ilatih Jesus kita guna erberita, janah isikapkenna alat-alat si iperluken guna erberita. (Mat. 28:18-20) Enggo ilakoken Jesus baginna, emaka silakoken ka ateta baginta. Perlu kita rajin erberita ras ngajar. Perlu ka kita terus erjaga-jaga janahta nimai Jahwe engkernepken doni si jahat enda. Alu ndalanken nasehat si lit bas Heber 6:11, 12, banci sicikep alu paguh arapenta “seh ku kedungenna.”​—Baca.

16. Kai tekadta?

¹⁶ Enggo tetapken Jahwe ndigan kernepkenNa doni Setan si jahat enda. Sanga si e terjadi, iban Jahwe terjadi kerina nubuat si lit bas Pustaka. Banci saja kerehen wari Jahwe la meter reh bagi si enggo siarapken. Tapi, wari Jahwe “labo terlambat!” (Hab. 2:3) Emaka, ertekadlah kita guna ‘terus nimai Jahwe’ janah sibuktiken maka ‘sabar kita nimai Dibata si nelamatken kita.’​—Mi. 7:7.