1. Engkai maka ngata bujur kita perban lit Pustaka?

 NGATA bujur kel kita man Jahwe perban lit Pustaka! Bas Pustaka, ibereNa kita nasehat-nasehat si banci nampati kita berhasil ngadapi masalahta. IbereNa ka kita arapen si luar biasa bas wari si pepagi. Si pentingna, igunaken Jahwe Pustaka guna ncidahken sipat-sipatNa. Adi siukuri sipat-sipatNa si mehuli, e banci kena ku pusuhta janah ngiahken kita reh rembakna ras Jahwe.​—Ms. 25:14.

2. Alu cara kai saja ipetandaken Jahwe diriNa man manusia?

² Ate Jahwe gelah kerina kalak nandai Ia. Mbarenda, ipetandaken Jahwe diriNa arah nipi, pengenehenen, ras malekat. (Bil. 12:6; Perb. 10:3, 4) Tapi, adi nipi, pengenehenen, ntah pe pesan arah malekat e la itulis, la banci sipelajari gundari. Emaka, isuruh Jahwe piga-piga dilaki guna nulisken kata-kataNa “bas sada buku.” (Jer. 30:2) Perban “sempurna kap dalan Dibata si benar,” banci kita tek maka cara komunikasi si bage mehuli kel janah erguna man banta.​—Ms. 18:30.

3. Kai si ilakoken Jahwe gelah Pustaka lit ngasa gundari? (Jesaya 40:8)

³ Baca Jesaya 40:8. Kata Dibata enggo negu-negu kalak si erkiniteken ribun tahun dekahna. Engkai maka Pustaka banci lit ngasa gundari? Memang, Kitap si Badia itulis bas jaman si nai janah bas bahan si nukah ceda, lanai ka lit dokumenna si asli. Tapi pastiken Jahwe gelah Kitap si Badia e isalin. Amin pe penyalinna la sempurna tapi hati-hati kel kalak e. Contohna, bagenda itulis sekalak ahli kerna Kitap-Kitap Heber, “Banci kita tek maka la lit tulisen si nai si isalin bage tepatna.” Emaka, amin pe Kata  Dibata ipeseh bas jaman si nai, itulis bas bahan si nukah ceda, janah penyalin-penyalinna la sempurna, banci kita tek maka kata-kata si banci sibaca bas Pustaka gundari sesuai denga ras kai si ate Jahwe pesehNa man banta.

4. Kai kari sibahas bas artikel enda?

⁴ Jahwe eme Sumber “kerina pemere si mehuli ras hadiah si sempurna.” (Jak. 1:17) Pustaka eme salah sada hadiah si mehulina si ibere Jahwe man banta. Sanga lit kalak si mereken hadiah man banta, arah hadiah e banci siteh uga ulina ia nandai kita janah tehna kai keperlunta. Bage ka pe, sanga sipelajari Pustaka melala si banci sipelajari kerna Jahwe. Banci siteh uga bagesna Ia nandai kita janah tehNa keperlunta. Bas artikel enda, sibahas kari uga Pustaka nuriken telu sipat Jahwe eme kepentaren, keadilen, ras kekelengen. Mari sibahas lebe uga Pustaka ncidahken kepentaren Dibata.

5. Uga Pustaka ncidahken kepentaren Dibata?

⁵ Iteh Jahwe maka perlu kita nasehatNa si pentar. Emaka, bereNa kita Pustaka si dem alu kepentarenNa. Nasehat bas Pustaka mbelin kel gunana man kalak si ndalankenca. Pustaka banci ngubah kegeluhen. Sanga itulis Musa buku-buku si pertama bas Pustaka, bagenda nina man umat Dibata eme kalak Israel, “Enda kerina labo terjeng kata-kata, tapi e kap kegeluhen kena.” (Ul. 32:47) Kalak si ngikutken kata-kata si lit bas Pustaka banci berhasil ras meriah ukurna. (Ms. 1:2, 3) Amin pe Kata Dibata enggo itulis mbarenda nari, tapi isina banci denga erban kegeluhen kalak reh ulina. Banci nenndu contohna bas jw.org, bas seri artikel “Pustaka si Badia Ngubah Kegeluhen.” I je, lit lebih 50 pengalamen si ncidahken maka Pustaka banci ‘erdahin bas diri kalak si tek.’​—1 Tes. 2:13.

6. Engkai maka la lit buku bagi Pustaka?

⁶ La lit buku si bali bagi Pustaka. Engkai? Perban buku e rehna arah Dibata Jahwe. Ia madakuasa, lalap lit mbarenda nari seh rasa lalap, janah ndauh pentaren asangken ise pe. Melala buku si pengarangna enggo mate janah nasehatna enggo ketadingen jaman. Tapi, nasehat si pentar bas Pustaka lalap erguna. Sanga sibaca ras siukuri kai si enggo sipelajari arah buku si Badia e, igunaken Jahwe kesah si badia nampati kita meteh uga carana ndalanken nasehat Pustaka. (Ms. 119:27; Mal. 3:16; Heb. 4:12) Payo, merhat Jahwe nampati kita, emaka bereNa kita Pustaka. E pasti ngiahken kita guna mbaca Pustaka alu ratur.

7. Uga Pustaka mpersada umat Dibata mbarenda?

⁷ Lit cara si deban Pustaka ncidahken kepentaren Dibata: Pustaka banci nampati umat Dibata ersada. Kenca kalak Israel masuk ku Negri Perjanjin, beda-beda ingan kalak e tading. Lit si jadi nelayan, lit si ngasuh asuh-asuhen, janah lit si erjuma. Perban beda-beda ingan kalak e tading, banci saja lanai ermediate kalak e man sada ras si debanna. Emaka, iperentahken Jahwe kalak e gelah pulung sanga perayan-perayan guna megiken KataNa ibacaken ras ijelasken. (Ul. 31:10-13; Neh. 8:2, 8, 18) Cuba bayangken uga perasan kalak Israel sanga seh i Jerusalem janah idahna enterem  kel turang seninana arah erbage daerah. Arah perayan-perayan e, isampati Jahwe umatNa tetap ersada. Bas pudi wari, sanga runggun Kristen ibentuk, lit i je kalak si beda bahasana, latar belakangna, bage pe status ekonomina. Tapi, perban keleng ate kalak e Kitap-Kitap si Badia, banci kalak e ersada bas nembah Dibata si benar. Kalak si mbaru denga masuk ku runggun, banci angkaina Kata Dibata adi nggit ia ngaloken penampat turang seninana janah pulung ras kalak e.​—Perb. 2:42; 8:30, 31.

8. Uga Pustaka si Badia mpersada umat Jahwe gundari?

⁸ Dibatata si pentar terus ngajari ras mpersada umatNa arah Pustaka. Kerina pangan rohani si banci sidatken rehna arah Pustaka. Banci kita pulung bas perpulungen, pertemuan wilayah, ras pertemuan regional guna megiken Pustaka ibacaken, ijelasken, ras ibahas. Jelas me, penting kel Pustaka si Badia e. Ipake Jahwe Pustaka guna nampati umatNa “gelah ersada nembah Ia.”​—Sep. 3:9.

9. Kalak si uga nge si banci ngangkai isi Pustaka? (Lukas 10:21)

⁹ Ukuri bukti si deban kerna kepentaren Jahwe. Melala bagin-bagin bas Pustaka si kalak meteruk ukur ngenca banci ngangkaisa. (Baca Lukas 10:21.) I sebelang doni, enterem kel kalak mbaca  Pustaka. Sekalak ahli ngataken, “Pustaka me buku si mbuena ibaca, janah tutusen ate kalak mbaca Pustaka asangken buku si deban.” Tapi kalak si meteruk ukur ngenca si banci tuhu-tuhu ngangkai ras ndalanken kai si ipelajarina bas Pustaka.​—2 Kor. 3:15, 16.

10. Kai deba nari si mbuktiken maka Pustaka ncidahken kepentaren Jahwe?

¹⁰ Kai ka deba nari si mbuktiken kepentaren Jahwe? Igunaken Jahwe Pustaka labo saja guna ngajari umatNa selaku sada kelompok, tapi guna ngajari ras mpegegehi kita sekalak-sekalak. Sanga sibaca Pustaka, banci sigejapken maka ermediate kel Jahwe man banta sekalak-sekalak. (Jes. 30:21) Sanga adapindu masalah janah bacandu Pustaka, rusur nge gejapkenndu maka ayat-ayat e tempa-tempa itulisken man bandu? Pustaka itulis man jutan kalak, tapi engkai maka isina banci sesuai ras kai si sangana iperlukenndu? Si e pasti perban Pustaka rehna arah Jahwe si kepentarenNa la tertandingi.​—2 Tim. 3:16, 17.

11. Engkai maka bahasa-bahasa si ipake guna nulis Pustaka ncidahken maka Dibata la erpilihen?

¹¹ Salah sada sipat Jahwe eme adil. (Ul. 32:4) Kalak si adil biasana la erpilihen, janah bage me Jahwe. (Perb. 10:34, 35; Rom. 2:11) Kai buktina? Telu puluh siwah buku si pertama bas Pustaka, buen itulis bas bahasa Heber, bahasa si menukah iangkai umat Dibata paksa si e. Tapi, bas abad pertama M, bahasa Junani me si mbuena ipake. Emaka, 27 buku si deban si itulis bas Pustaka, itulis alu nggunaken bahasa e. Labo lit itetapken Jahwe maka KataNa arus itulis bas sada bahasa ngenca. Gundari, lit menam waluh miliar kalak bas doni enda janah erbage-bage bahasana. Amin pe bage, enterem kalak si banci erlajar kerna Jahwe. Uga carana?

12. Uga Daniel 12:4 terjadi bas wari-wari pendungi?

¹² Arah Nabi Daniel, erjanji Jahwe maka bas wari-wari pendungi, “mbue kel pagi pemeteh si benar” arah Pustaka. Enterem pagi kalak si ngangkai kebenaren e. (Baca Daniel 12:4.) Salah sada cara si nampati enterem kalak ngangkai Pustaka eme perban Pustaka ras publikasi si erpalasken Pustaka enggo iterjemahken, iterbitken, ras ibagiken man enterem kalak. Pustaka me buku si mbuena iterjemahken ras ibagiken i belang-belang doni. Terjemahen Pustaka si iban perusahan biasana merga kel. Umat Jahwe enggo nerjemahken Kata Dibata si lengkap ntah pe lenga lengkap ku bas lebih 240 bahasa janah kerina kalak banci ndatken Pustaka e alu la nggalar. Hasilna, kalak arah kerina bangsa banci mpelajari “berita si meriah kerna Kerajan” sope lenga reh kedungen e. (Mat. 24:14) Merhat kel Dibata gelah kerina kalak ndatken kesempaten guna nandai Ia alu mbaca Pustaka. Enda mbuktiken maka Jahwe e adil janah keleng kel ateNa kita.

13. Uga Pustaka ncidahken kekelengen Jahwe? (Johanes 21:25)

¹³ Pustaka pe ncidahken sipat si mbelinna arah Jahwe eme kekelengen. (1 Joh. 4:8) Cuba ukuri kai si itamaken  Jahwe bas Pustaka ras si la itamakenNa. Bas Pustaka, ikatakenNa man banta kai si iperluken gelah banci kita rembak ras Ia, meriah ukurta gundari, ras sidatken kegeluhen si rasa lalap. Tapi, perban keleng ateNa kita, la mbuesa informasi si bereNa man banta gelah ula mberatsa siakap.​—Baca Johanes 21:25.

14. Uga kekelengen Jahwe teridah arah caraNa ngerana man banta erkelangken Pustaka?

¹⁴ Kekelengen Jahwe pe teridah arah caraNa ngerana man banta erkelangken Pustaka. Perban ergaiNa kita, la bereNa daftar si gedang guna ngatur kegeluhenta seh ku si kitikna. Tapi, igunakenNa pengalamen geluh, nubuat-nubuat si menarik, ras nasehat si erguna bas nampati kita erban keputusen si mehuli. Alu bage, banci keleng ateta Dibata janah patuh kita man baNa arah pusuhta nari, labo perban terpaksa.

15. (a) Kai si ncidahken maka ermediate Jahwe man kalak si mbaca Pustaka? (b) Tokoh-tokoh Pustaka si apai nge si iukuri anak diberu si kitik denga, anak perana, ras turang seninata si enggo metua e? (Nen gambar)

¹⁵ Kata Dibata ncidahken maka ermediate kel Jahwe man banta. Kai buktina? Bas Pustaka, mbue pengalamen arah tokoh-tokoh Pustaka si “seri perasanna ras kita.” Alu bage, banci kita erlajar arah pengalamen kalak e. (Jak. 5:17) Si pentingna, alu ngukuri uga cara Jahwe erurusen ras kalak si seri situasina bagi kita, reh jelasna siangkai maka “lembut kel kekelengen Jahwe ras mbelin perkuah ateNa.”​—Jak. 5:11.

16. Kai si banci sipelajari kerna Jahwe sanga sibaca pengalamen tokoh-tokoh Pustaka si ngelakoken kesalahen? (Jesaya 55:7)

 ¹⁶ Pustaka ncidahken kekelengen Jahwe man banta alu cara si deban. Pustaka mpetetap ukurta maka labo tadingken Dibatata kita sanga silakoken kesalahen. Mbarenda, kalak Israel mulih-ulih erdosa man Jahwe. Tapi sanga robah kalak e, iampuni Jahwe kalak e. (Baca Jesaya 55:7.) Kalak Kristen abad pertama pe tehna maka keleng kel ate Jahwe kalak e. Alu penegu-negu kesah si badia, iahken Rasul Paulus temanna sada kiniteken guna ‘ngampuni ras ngapuli’ sekalak dilaki si enggo ngelakoken kesalahen si serius tapi dungna robah. (2 Kor. 2:6, 7; 1 Kor. 5:1-5) Labo mis tulak Jahwe umatNa perban ngelakoken kesalahen. Tapi, alu perkeleng sampatiNa kalak e, ipersingetiNa, ras iundangNa mulihi jadi temanNa. Erjanji Jahwe maka ilakokenNa si e man kerina umatNa si robah. Jahwe tuhu-tuhu Dibata si perkeleng.​—Jak. 4:8-10.

17. Engkai maka Pustaka e pemere si luar biasa?

¹⁷ Enggo ibere Jahwe kita sada pemere si mehuli. Kai si erban Pustaka e luar biasa? Bagi si enggo sipelajari, Pustaka ncidahken kepentaren Dibata, keadilenNa, ras kekelengenNa. Buku e mbuktiken maka ate Jahwe sitandai min Ia, ateNa jadi temanNa min kita.

18. Uga carata mbuktiken maka siergai “pemere si mehuli” arah Jahwe?

¹⁸ Terus min siinget maka Pustaka e “pemere si mehuli” arah Jahwe. (Jak. 1:17) Teruslah sicidahken pengerganta nandangi Pustaka. Silakoken si e alu mbaca ras ngukuri Pustaka. Alu bage, banci kita tek maka ipasu-pasu Jahwe kita, janah sidatken me ‘pemeteh kerna Dibata.’​—Kua. 2:5.