MON-MON, penulis-penulis Pustaka mulih-ulih nulisken kalimat ntah pe kata-kata si seri. Engkai maka bage ilakoken kalak e? Banci saja perban telu alasen enda:

Ndigan kata-kata e itulis. Bas Israel mbarenda, buen kalak si la lit bas ia salinen Undang-Undang Musa. Biasana begi kalak e Undang-Undang Musa ibacaken sanga bangsa e pulung ras-ras i kemah ingan ersembah ntah pe bas rumah pertoton. (Ul. 31:​10-12) Paksa si e, arus kalak e cinder erjam-jam dekahna radu ras jelma si enterem, emaka pasti mbue si erban kalak e la fokus. (Neh. 8:​2, 3, 7) Emaka, adi kata-kata si penting iulih-ulihi, reh nukahna akap kalak nginget ras ndalanken kai si begina. Kata-kata si iulih-ulihi pe banci mbelin kel gunana man kalak e guna nginget erbage aturen si jelas kerna undang-undang si bere Jahwe.—Im. 18:​4-22; Ul. 5:1.

Jenis tulisenna. Lit kira-kira 10 persen isi Pustaka eme ende-enden, termasuk buku Masmur, Ende-enden Salomo, ras Perngandungen. Piga-piga lagu lit refreinna ntah pe bagin si iulih-ulihi guna nekanken tema lagu e ras nampati kalak si megi ngapal kata-katana. Contohna, cuba perdiateken isi Masmur 115:​9-11: “O Israel, teklah man Jahwe, Ia kap si nampati kena ras perisai kena. O keturunen Harun, teklah man Jahwe, Ia kap si nampati kena ras perisai kena. O kena si mbiar man Jahwe, teklah man Jahwe, Ia kap si nampati kena ras perisai kena.” Perban lit kata-kata si iulih-ulihi, kebenaren si meherga bas kata-kata e pasti reh bagesna rurat bas pusuh ras perukuren kalak si ngendekenca.

Tujun tulisen e. Mon-mon, penulis-penulis Pustaka ulih-ulihina nulisken kalimat-kalimat si penting. Contohna, sanga iperentahken Jahwe kalak Israel gelah ula man dareh. IsuruhNa gelah itulisken Musa mulih-ulih kai alasenna. Ate Dibata itekankenNa maka kegeluhen e lit bas dareh, dareh kap kegeluhen. (Im. 17:​11, 14) Bas pudi wari, sanga rasul-rasul ras pertua-pertua bas Jerusalem erban daftar kerna kai si banci erban Dibata la senang ras kai si arus sipedauh, mulihi ka itekanken kalak e kerna uga pentingna mpedauh diri arah dareh.—Perb. 15:​20, 29.

Amin pe lit kalimat-kalimat si iulih-ulihi bas Pustaka, e labo ertina ate Jahwe siulih-ulihi ka min kalimat-kalimat si lit bas Pustaka jadi sada kebiasan. Nina Jesus, “Sanga ertoto, ula ulih-ulihi kata-kata si seri.” (Mat. 6:7) Kenca si e, iturikenna piga-piga topik si banci sitotoken si sesuai ras peraten Dibata. (Mat. 6:​9-13) Emaka, amin pe la siulih-ulihi kata-kata si seri sanga kita ertoto, banci nge mulih-ulih sitotoken topik si seri.—Mat. 7:​7-11.

Jelas me, lit tujun Dibata erban kata-kata tertentu iulih-ulihi bas Pustaka. Enda me salah sada cara Guruta Si Mulia guna ngajarken kai si erguna man banta.—Jes. 48:​17, 18.