I BAS wari Rabu erpagi-pagi, 24 Januari 2018, meriah ukur keluarga Betel Amerika Serikat ras Kanada megi sada pengumumen khusus: Turang seninata Kenneth Cook, Jr., nggo jadi salah sada anggota Badan Pinpinen Saksi-Saksi Jahwe.

Turang seninata Cook lahir janah mbelin-mbelin i Pennsylvania, Amerika Serikat. Sanga nandangi tamat SMA, erlajar Pustaka ia ras teman sada kelasna janah iperidiken ia tanggal 7 Juni 1980. Mulai me ia masuk dinas sepenuh waktu jadi perintis biasa tanggal 1 September 1982. Kenca dua tahun ia merintis, iundang ia ku Betel. Mulai ia ngelayani i Wallkill, New York, tanggal 12 Oktober 1984.

Bas 25 tahun kenca e, erbage-bage tugas Turang seninata Cook bas bagin Percetaken ras Kantor Betel. Tahun 1996, erjabu ia ras Turang seninata Jamie. Mulai je nari, Turang seninata Jamie ikut ngelayani i Wallkill. Bas bulan Desember 2009, Turang seninata Cook ras ndeharana ipindahken ku Pusat Pendidiken Menara Pengawal i Patterson, New York. I je, Turang seninata Cook itugasken bas Departemen Korespondensi. Kenca si e, ipindahken kalak e kentisik ku Wallkill. Bas bulan April 2016, ipindahken kalak e ku Brooklyn, New York. Lima bulan kenca si e, ipindahken kalak e ku kantor pusat i Warwick, New York. Bas Januari 2017, Turang seninata Cook ilantik jadi asisten Panitia Penulisen Badan Pinpinen.