1-3. (a) Engkai maka keleng kel ate Jahwe Salomo, janah kai saja pasu-pasu si ialoken Salomo? (b) Penungkunen kai si man bahasenta bas artikel enda?

 SALOMO jadi raja Israel sanga ia nguda denga. La ndekah kenca ia jadi raja, isungkun Jahwe ia arah nipi, nina, “Kai atendu Kubereken man bandu?” Ngaloi Salomo, ‘Aku nguda denga kel janah la kueteh uga ndalanken dahin raja.  . . Emaka berekenlah man bangku kepentaren [“pusuh si patuh,” NW] guna ngerajai bangsaNdu.’ (1 Raj. 3:5-10) Ipindo Salomo “pusuh si patuh.” Meteruk ukur kel ia! Emaka keleng kel ate Jahwe ia. (2 Sam. 12:24) Meriah kel ukur Dibata megi jawapenna, emaka ibereNa Salomo “kepentaren ras pengertin.”​—1 Raj. 3:12.

² Sanga setia Salomo, melala datna pasu-pasu. Datna tugas si istimewa guna mbangun rumah pertoton ‘guna ingan ersembah man Jahwe, Dibata Israel.’ (1 Raj. 8:20) Terkenal ka ia perban ibere Dibata kepentaren. Janah kata-katana si arah Dibata itulisken bas telu buku i bas Pustaka, salah sada eme Kuan-kuanen.

³ Bas buku Kuan-kuanen Pustaka Terjemahan Dunia Baru, lit ratusen kali kata pusuh itulisken. Contohna, bas Kuan-kuanen 4:23, nina, “Lebih asa kerina si arus ijagandu, jagalah pusuhndu.” Kai maksudna kata ‘pusuh’ bas ayat e? Sibahas kari jawapenna. Selain si e, sibahas ka: Uga cara Setan mpengaruhi ntah pe ncedai pusuhta? Janah kai si perlu silakoken guna njaga pusuhta? Arus siteh jawapen penungkunen-penungkunen e gelah banci kita tetap setia man Dibata.

4-5. (a) Kai maksudna kata ‘pusuh’ bas Masmur 51:8? (b) Kai persamanna njaga kesehaten ras njaga pusuhta?

⁴ Bas Kuan-kuanen 4:23, kata ‘pusuh’ maksudna “ukur.” (Baca Masmur 51:8.) Emaka, ‘pusuh’ maksudna perukurenta, perasanta, sura-surata, bage pe kai si ngiahken kita. Enda maksudna uga kin kita situhuna, labo si teridah saja darat nari.

⁵ Pusuhta perlu ijaga. Gelah siteh uga pentingna e, banci sibandingken ras kesehatenta. Si pertama, gelah banci kita sehat, arus sijaga perpanta janah ratur olahraga. Bage ka pe, gelah tetap sehat secara rohani, arus ratur sibaca Pustaka ras baca-bacanta janah terus tek man Jahwe. Bukti tek kita man Jahwe sidalanken kai si nggo sipelajari janah siberitaken. (Rom. 10:8-10; Jak. 2:26) Si peduaken, banci saja sehat siakap kita darat nari, tapi kepeken lit pinakit bas dagingta. Bage ka pe, banci saja paguh siakap kinitekenta perban sibuk kita ngelayani Dibata, tapi banci jadi lit sura-sura si salah turah bas pusuhta. (1 Kor. 10:12; Jak. 1:14, 15) Arus siinget maka ipengaruhi Setan atena kita gelah seri carata rukur ras ia. Uga saja banna carana? Kai si arus silakoken gelah ula kita terpengaruh?

6. Kai tujun Setan, janah kai cara si ipakena?

⁶ Perban egois Setan, mberontak ia ngelawan undang-undang Jahwe. Atena seri min perukuren ras perbahanenta bagi ia. Tapi, labo banci ipaksana kita. Emaka ibanna cara si deban. Misalna, ipengaruhina kalak si lit bas sekelilingta. (1 Joh. 5:19) Atena lalap min kita ras kalak e, padahal nggo siteh pergaulen si la mehuli “ncedai” perukuren ras perbahanenta. (1 Kor. 15:33) Cara Setan e berhasil mpengaruhi Raja Salomo. Iempoi Salomo melala diberu si nembah dibata palsu, dungna  ipengaruhi kalak e ia si ‘erbahanca ia nilah i bas Jahwe nari.’​—1 Raj. 11:3.

7. Kai ka si igunaken Setan guna mbarken carana rukur? Engkai maka arus kita hati-hati?

⁷ Igunaken Setan cerita-cerita bas film ras acara TV pembarken carana rukur. Itehna maka meriah siakap megi cerita. Tapi labo e saja, itehna ka maka cerita banci mpengaruhi perukuren, perasan, ras perbahanenta. Jesus ngajar alu cerita. Contohna, iceritakenna perumpaman kerna kalak Samaria si mehuli bage pe kerna anak si bene. (Mat. 13:34; Luk. 10:29-37; 15:11-32) Tapi lit ka cerita si banci ncedai perukurenta adi cerita e arah kalak si nggo ipengaruhi Setan. Emaka arus kita seimbang. Labo kerina film ras acara TV ncedai perukurenta. Banci ka sidat pemeteh je nari janah banci banna meriah ukurta. Tapi arus kita hati-hati. Sanga milih hiburen, sungkunilah banta, ‘Adi kutonton film ntah pe acara TV enda, reh nukahna nge kuakap ngelawan sura-sura dagingku?’ (Gal. 5:19-21; Ep. 2:1-3) Kai nge si ilakokenndu adi itehndu bas tontonen e lit perukuren Setan? Pedauhlah e bagi kam mpedauh pinakit si menular!

8. Kai nge si arus ilakoken orang tua gelah ula ipengaruhi Setan pusuh anakna?

⁸ Orang tua ertanggung jawap njaga anakna gelah ula ipengaruhi Setan pusuh kalak e. Pasti usahakenndu kel gelah la sakit anakndu. Bersihkenndu rumahndu, ambekkenndu kerina si banci erban kam ras anakndu sakit. Bage ka pe, arus ilindungindu anakndu gelah la ipengaruhi perukuren Setan arah film, acara TV, Internet, bage pe game elektronik. Nggo ibere Jahwe kam tanggung jawap gelah anakndu banci jadi  temanNa. (Kua. 1:8; Ep. 6:1, 4) Emaka ula kam ragu erban peraturen i rumah si sue ras Pustaka si Badia. Kataken man anakndu si kitik denga kai si banci ras si la banci itontonna, janah sampati kalak e gelah itehna ngkai peraturen e iban. (Mat. 5:37) Kenca reh belinna anakndu e, sampatilah ia gelah banci ibedakenna kai si benar ras si salah menurut patoken Jahwe. (Heb. 5:14) Janah ingetlah, kam pe arus jadi contoh man anakndu bas ranan bage pe perbahanen.​—Ul. 6:6, 7; Rom. 2:21.

9. Kai salah sada cara Setan guna mpengaruhi pusuhta? Engkai maka e bahaya?

⁹ Iusahaken Setan ka mpengaruhi pusuhta alu erban kita tek man ajaren manusia, labo perukuren Jahwe. (Kol. 2:8) Salah sadana: Ngayaki kebayaken me si pentingna bas kegeluhen. Kalak si bage carana rukur, banci saja dungna jadi bayak, tapi lit ka si lang. Uga pe keadanna, bahaya adi bage carana rukur. Engkai? Perban adi ndarami sen atena lalap lanai perdiatekenna kesehatenna, keluargana, bage pe hubungenna ras Dibata. (1 Tim. 6:10) Ngata bujur kel kita perban nggo iajari Jahwe uga arusna perukurenta kerna sen.​—Peng. 7:12; Luk. 12:15.

10-11. (a) Kai si arus silakoken gelah banci silindungi dirita? (b) Kai nge si ilakoken penjaga mbarenda, janah uga pusuh peratenta njaga kita?

¹⁰ Gelah banci sijaga pusuhta, arus siteh lebe kai saja bahaya si banci terjadi janah mislah silindungi dirita. Kata si iterjemahken jadi ‘njaga’ bas Kuan-kuanen 4:23 lit hubungenna ras dahin sekalak penjaga. I bas jaman Raja Salomo, lit penjaga si erjaga i datas tembok kota janah iberena peringaten sanga lit bahaya. Arah contoh enda banci siteh uga carana gelah la icedai Setan perukurenta.

¹¹ Mbarenda, penjaga si i datas tembok ras-ras erdahin ras penjaga gerbang kota. (2 Sam. 18:24-26) Ras-ras kalak e njaga kota. Sanga reh musuh, minter tutup kalak e gerbang. (Neh. 7:1-3) Pusuh peratenta si nggo ilatih Pustaka * bali bagi penjaga si mpersingeti kita sanga iserang Setan atena pusuhta, eme perukurenta, perasanta, sura-surata, ntah pe kai si ngiahken kita. Adi ipersingeti pusuh peratenta kita, siikutkenlah e janah usahakenlah mpedauh bahaya.

12-13. Tantangen kai si banci saja siadapi, janah kai si arus silakoken?

¹² Mari sibahas sada contoh uga carana ngelindungi dirita arah pengaruh perukuren Setan. Enggo iajarken Jahwe banta gelah ‘ula sempat sibelasken kerna perbahanen seks si salah ras kerina si najis.’ (Ep. 5:3) Kai nge si arus silakoken adi temanta erdahin ntah pe teman sekolahta mulai ncakapken perbahanen seks si salah? Arus ‘situlak si la ngena ate Dibata bage pe sura-sura doni.’ (Tit. 2:12) Bagi penjaga ndai, pusuh peratenta banci  mpersingeti kita. (Rom. 2:15) Siikutken nge e? Banci saja sibegiken ateta temanta ndai, ntah pe sinen ateta gambar-gambar si ikirimkenna. Tapi mislah situlak bahaya e. Ganti mis topikna ntah pe lawes saja kita.

¹³ Adi ipaksa temanta kita ngukuri ntah pe ngelakoken si salah, arus kita pang nulaksa. Teklah kita pasti idah Jahwe usahata, janah bereNa kita gegeh ras kepentaren guna nulak perukuren Setan. (2 Kro. 16:9; Jes. 40:29; Jak. 1:5) Kai ka si banci silakoken guna njaga pusuhta?

14-15. (a) Nandangi kai arus sibuka pusuhta, janah uga carana? (b) Arah Kuan-kuanen 4:20-22, kai si arus silakoken gelah melala sidat gunana mbaca Pustaka? (Nen ka kotak “ Cara Ngukuri alu Mbages.”)

¹⁴ Guna njaga pusuhta, la bias nulak pengaruh si la mehuli, tapi arus ka sialoken pengaruh si mehuli. Inget ka mulihi contoh kerna tembok kota. Itutup penjaga gerbang me gerbang kota gelah musuh la banci masuk. Tapi ibukana gerbang e gelah pangan ras keperlun si debanna banci masuk. Adi la pernah gerbang ibuka, kerina kalak si tading i je banci kelihen. Bage ka pe, arus sibuka pusuhta gelah perukuren Dibata banci mpengaruhi kita.

¹⁵ Perukuren Jahwe lit bas Pustaka. Emaka, tiap sibaca Pustaka, ertina nggit kita perukuren, perasan, ras perbahanenta ipengaruhi perukuren Jahwe. Kai si arus silakoken gelah melala sidat gunana mbaca Pustaka? Arus kita ertoto. Nina sekalak turang seninata si diberu, “Sope kubaca Pustaka, ertoto aku lebe man Jahwe. Kupindo gelah sampatiNa aku ‘ngidah kebenaren si luar biasa’ si lit bas Pustaka.” (Msm. 119:18) Arus ka siukuri alu mbages kai si nggo sibaca. Adi ertoto kita, sibaca Pustaka, janah siukuri alu mbages, Kata Dibata e banci seh ku ‘pusuhta,’ janah meriah ukurta ngikutken perukuren Jahwe.​—Baca Kuan-kuanen 4:20-22; Msm. 119:97.

16. Kai gunana JW Broadcasting man banta? Bereken contohna.

¹⁶ Cara si deban gelah perukuren Dibata mpengaruhi kita eme nonton video-video si lit bas JW Broadcasting^®. Nina sekalak perbulangen ras ndeharana, “Acara JW Broadcasting^® tiap bulan tuhu-tuhu bukti jawapen toto kami! Teriahken janah terpegegehi kel kami sanga sedih ras melungen akap kami. Janah rusur ka begiken kami lagu-laguna i rumah, sanga erdakan, mbersihi rumah, bage pe sanga kundul-kundul.” Acara e nampati kita njaga pusuhta. Dungna banci seri carata rukur ras Jahwe janah banci ka situlak perukuren Setan.

17-18. (a) Bagi si ikataken 1 Raja-Raja 8:61, kai hasilna adi sidalanken si nggo sipelajari arah Jahwe? (b) Kai si banci sipelajari arah Raja Hiskia? (c) Kai si banci sitotoken bagi pertoton Daud bas Masmur 139:23, 24?

¹⁷ Sanga sigejapken kai gunana ngelakoken si benar, reh paguhna me kinitekenta. (Jak. 1:2, 3) Meriah kel siakap perban bangga Jahwe ngelebuh kita anakNa, janah reh belinna me sura-suranta erban meriah ukurNa. (Kua. 27:11) Sanga siadapi masalah, sibanlah e jadi kesempaten guna mbuktiken maka labo la bulat ukurta  ngelayani Jahwe, Bapakta si perkeleng. (Msm. 119:113) Tapi sibuktiken maka bulat ukurta ngkelengi Jahwe, ertina tuhu-tuhu bas ukurta nari patuh man perentahNa ras ngelakoken peratenNa.​—Baca 1 Raja-Raja 8:61.

¹⁸ Kita kerina pasti erban salah, sebap kita la sempurna. Adi erban salah kita, siingetlah Raja Hiskia. Pernah ia erban salah. Tapi ertobat ia janah terus ilayanina Jahwe “alu tutus.” (Jes. 38:3-6; 2 Kro. 29:1, 2; 32:25, 26) Emaka, situlaklah kerina usaha Setan guna mpengaruhi perukurenta. Ertotolah kita gelah banci lit bas kita “pusuh si patuh.” (1 Raj. 3:9, NW; baca Masmur 139:23, 24.) Banci kita tetap setia man Jahwe adi terus sijaga pusuhta lebih asa kerinana.