1-2. (a) Engkai maka la ateta mamang sederhana iban Jesus acara mperingeti kematenna? (b) Sipat Jesus si apai saja si man bahasenta?

 BANCI nge jelaskenndu kai saja si ilakoken sanga acara Peringeten Kematen Kristus tiap tahun? Pasti siinget kai saja si ilakoken bas acara e. Engkai? Perban acara e sederhana. Tapi seh kel pentingna. Mungkin tersungkun-sungkun kita, ‘Engkai maka sederhana kel acara e?’

² Sanga Jesus ngelayani i doni, cara ia ngajarken kebenaren sederhana, jelas, janah menukah ngangkaisa. (Mat. 7:28, 29) Bage ka pe guna mperingeti * kematenna, ibanna acara si sederhana tapi melala ertina. Mari sibahas terdauhen kerna acara Peringet-ingeten e bage pe kai si ikataken ras si ilakoken Jesus. Pasti lebih siangkai maka Jesus e tuhu-tuhu meteruk ukur, perpang, janah perkeleng. Sipelajari ka kari uga carana ngusih ia terulin.

3. Bagi si ikataken bas Matius 26:26-28, uga nge sederhanana acara Peringet-ingeten si ipetandaken Jesus? Kai ertina roti si la itama ragi ras anggur?

³ Ipetandaken Jesus acara Peringeten kematenna man 11 rasulna si setia. Ibuat Jesus sisa pangan arah acara Paskah jenari ibanna acara peringet-ingeten si sederhana. (Baca Matius 26:26-28.) Si ibuatna roti si la itama ragi ras anggur ngenca. Ikataken Jesus man rasul-rasulna maka roti si la itama ragi ngertiken dagingna  si sempurna janah anggur ngertiken darehna. Duana e nandangi ikorbankenna guna kalak e. Banci saja labo mamang ate rasul-rasul ngidah sederhana kel acara penting si mbaru ipetandaken e. Engkai maka bage?

4. Arah kai si ikataken Jesus man Marta, kai nge alasen Jesus erban acara Peringet-ingeten e sederhana?

⁴ Ukurilah kai si terjadi piga-piga bulan sope Jesus mate, bas tahun peteluken pelayanenna. Reh ia ku rumah temanna eme Lasarus, Marta, ras Maria. Bas suasana santai e, mulai me ia ngajar. I je nge Marta, tapi la iperdiatekenna taren nikapken melala pangan man tamu si ihormatina e. Sanga idah Jesus Marta, ipersingetina ia manjar-manjar, ikatakenna labo melala pangan si iperluken. (Luk. 10:40-42) Bas pudi wari, piga-piga jam sope Jesus mate jadi korban tebusen, ilakokenna me si ikatakenna e. Sederhana kel ibanna acara Peringet-ingeten. Kai si banci sipelajari kerna Jesus je nari?

5. Sipat Jesus si apai si banci siidah arah acara peringet-ingeten si sederhana, janah ngkai maka e cocok ras Pilipi 2:5-8?

⁵ Meteruk ukur kel Jesus bas ranan ras perbahanenna. Emaka la ateta mamang meteruk ukur kel ia bas berngi sope ia mate. (Mat. 11:29) Itehna maka lanai ndekah ikorbankenna me dirina, si jadi korban si mbelinna bas sejarah manusia. Itehna ka maka pasti ipekeke Jahwe ia guna jadi raja i surga. Amin gia bage, labo iakapna ia si pentingna, emaka la ibanna melala aturen guna mperingeti kematenna. Ipindona gelah inget murid-muridna ia alu erban acara si sederhana sekali setahun. (Joh. 13:15; 1 Kor. 11:23-25) Amin pe sederhana, acara e penting ntah pe metunggung. Jenari banci siteh maka Jesus e la sombong. Meriah kel siakap perban meteruk ukur kel Rajata si i surga. Enda salah sada sipatna si luar biasa.​—Baca Pilipi 2:5-8.

6. Uga carana gelah meteruk ukur kita bagi Jesus sanga lit tentangen?

⁶ Uga carana gelah meteruk ukur kita bagi Jesus? Alu ngutamaken kepentingen kalak si deban asangken kepentingenta. (Pil. 2:3, 4) Ingetlah kai si terjadi bas berngi sope Jesus mate. Iteh Jesus maka kentisik nari tersiksa kel ia sope mate. Tapi iperdiatekenna denga rasul-rasulna si setia, perban ceda kel ate kalak e pagi kenca ia mate. Emaka bas berngi sope Jesus mate, iajarina  kalak e, ipegegehina, janah ipetetapna ukurna. (Joh. 14:25-31) Meteruk ukur kel Jesus perban lebih iukurina kalak si deban asangken dirina sendiri. Contoh si mejile man banta!

7. La ndekah kenca ipetandaken Jesus acara Peringet-ingeten, kai si terjadi si mbuktiken maka perpang kel ia?

⁷ La ndekah kenca ipetandaken Jesus acara Peringet-ingeten, lit si terjadi si mbuktiken maka perpang kel ia. Kai kin si terjadi? Nggit ia ndalanken peraten Bapakna, amin pe itehna maka arus ia iukum mate perban ituduh ngelakoken kejahaten si erban mela eme nghina Dibata. (Mat. 26:65, 66; Luk. 22:41, 42) Tetap Jesus setia gelah gelar Jahwe ipebadiaken, idukungna hak Dibata selaku penguasa, janah ibukana dalan gelah kalak si ertobat banci nggeluh rasa lalap. Isikapkenna ka pengikutna gelah banci ngadapi kai si nandangi terjadi.

8. (a) Kai si ikataken Jesus man rasul-rasulna si setia? (b) Ertahun-tahun kenca Jesus mate, kai buktina murid-muridna pang bagi ia?

⁸ Teridah ka Jesus perpang perban la kebiarenna saja iukurina. Tapi iukurina ka keperlun rasul-rasulna si setia. Acara sederhana si ipetandaken Jesus, ibanna kenca isuruhna Judas lawes. Acara enda ngingetken pengikut Jesus si ipilih ku surga kerna kai gunana dareh Jesus bage pe gunana ikut bas perjanjin si mbaru. (1 Kor. 10:16, 17) Gelah banci pengikutna e tetap setia janah dungna nggeluh ras Jesus i surga, ikataken Jesus kai si ipindona bage pe Bapakna arah kalak e. (Joh. 15:12-15) Ikataken Jesus ka tentangen kai si iadapi kalak e pagi. Kenca si e, iahkenna kalak e ngusih ia janah  nina man kalak e, “Ula kena mbiar!” (Joh. 16:1-4a, 33) Ertahun-tahun kenca Jesus mate, murid-muridna terus denga nggit erkorban janah pang bagi Jesus. Amin gia susah iakap kalak e perban melala tentangen, tetap kalak e siiah-iahen.​—Heb. 10:33, 34.

9. Kai si banci silakoken i bas ngusih sipat Jesus si perpang?

⁹ Gundari pe, siusih ateta sipat Jesus si perpang. Misalna, arus kita pang nampati turang seninata si ianiaya perban kinitekenna. Mon-mon, turang seninata ipenjaraken alu alasen si la adil. Adi terjadi si bage, arus sisampati kalak e asa bancita, misalna sibela kalak e. (Pil. 1:14; Heb. 13:19) Cara si deban mbuktiken maka kita pang, terus kita erberita alu ‘la mbiar.’ (Perb. 14:3) Bagi Jesus, siusahaken kel mberitaken berita Kerajan, amin pe kita itentang ras ianiaya kalak. Tapi mon-mon banci saja kita mbiar. Kai si banci silakoken?

10. Kai si arus silakoken bas minggu-minggu sope acara Peringet-ingeten, janah ngkai?

¹⁰ Banci kita reh pangna adi mbages siukuri arapen si banci sidat arah korban tebusen Kristus. (Joh. 3:16; Ep. 1:7) Bas minggu-minggu sope acara Peringet-ingeten, lit kesempatenta guna lebih ngergai tebusen. Ukuri alu mbages erbage peristiwa la ndekah sope bage pe kenca kematen Jesus. Janah, lit pembacan Pustaka khusus i bas minggu-minggu Peringet-ingeten. Sibacalah e. Alu bage, sanga reh kita ku Peringeten Kematen Kristus, banci lebih siangkai uga pentingna lambang-lambang bas Peringeten e bage pe korban istimewa si igambarken lambang-lambang e. Adi siangkai kai saja si nggo ilakoken Jesus ras Jahwe janah siangkai ka gunana e man banta bage pe  man kalak si keleng ateta, erpaguhna me arapenta. Teriahken ka kita gelah terus pang janah megenggeng seh ku kedungenna.​—Heb. 12:3.

11-12. Kai saja si nggo sibahas?

¹¹ Enggo sibahas maka Peringeten Kematen Kristus labo saja ngingetken kita kerna tebusen si meherga, tapi ngingetken kita ka kerna sipat Jesus si luar biasa eme meteruk ukur ras perpang. Ngata bujur kel kita perban Jesus, Imam si Mbelin si erban pemindon man banta, terus meteruk ukur ras perpang! (Heb. 7:24, 25) Bukti maka siergai kel tebusen, arus terus siperingeti kematen Jesus, bagi si nggo iperentahkenna. (Luk. 22:19, 20) Silakoken e bas wari si pas kel ras 14 Nisan, enda me tanggal si pentingna bas tiap tahun.

¹² Arah acara Peringeten Kematen Kristus si sederhana, banci ka sipelajari sipat Jesus si deban si erban nggit ia mate man banta. Sanga i doni, teridah kel sipatna e. Sipat kai kin e?

13. Kai si ikataken Johanes 15:9 ras 1 Johanes 4:8-10 kerna kekelengen Jahwe ras Jesus man banta, janah man ise saja kekelengen Jahwe ras Jesus e erguna?

¹³ Keleng kel ate Jahwe kita. Iusih Jesus kekelengen Jahwe e alu sempurna i bas kerina perbahanenna. (Baca Johanes 15:9; 1 Johanes 4:8-10.) Si pentingna, pusuhna nari Jesus mereken kegeluhenna man banta. La soal kita ipilih ku surga ntah pe ‘biri-biri si deban,’ banci erguna banta kekelengen Jahwe ras AnakNa si teridah arah korban tebusen. (Joh. 10:16; 1 Joh. 2:2) Ukuri ka kerna lambang-lambang si igunaken bas acara Peringet-ingeten. Si e mbuktiken maka keleng ate Jesus murid-muridna janah ermediate ia man kalak e. Engkai maka bage?

14. Kai si ilakoken Jesus si mbuktiken keleng atena murid-muridna?

¹⁴ Keleng ate Jesus murid-muridna si ipilih ku surga, emaka ibanna acara Peringet-ingeten si sederhana, labo si melala aturenna. Mbarenda nari, arus terus iban murid-murid si ipilih ku surga acara Peringet-ingeten tiap tahun uga pe keadanna, termasuk sanga ipenjaraken. (Ket. 2:10) Banci nge kalak e patuh man Jesus? Banci!

15-16. Kai si ilakoken piga-piga turang seninata gelah banci mperingeti kematen Kristus mesera pe keadanna?

¹⁵ Mulai abad pertama seh asa gundari, iusahaken kalak Kristen situhu-tuhu mperingeti kematen Jesus. Ikuti kalak e kerina si arus ilakoken bas Peringeten Kematen Kristus, amin pe mesera keadanna. Contohna, Turang seninata Harold King. Sanga sisada ia bas penjara i Cina, arus daramina cara gelah banci tetap erban Peringet-ingeten. Sinik-sinik ia nikapken lambang-lambang Peringet-ingeten, igunakenna kai si lit bas ia. Megermet ka ia ngkira tanggal Peringet-ingeten. Sanga nggo seh waktuna, rende ia, ertoto, janah ipesehna khotbah arah Pustaka. Sisada ia ngelakokenca kerina.

¹⁶ Lit ka contoh si deban. Sanga Perang Doni II, piga-piga turang seninata si diberu ipenjaraken bas kamp konsentrasi. La kalak e mbiar mate guna mperingeti kematen Kristus. Tapi perban sederhana kel acarana, banci kalak e sinik-sinik ngelakokenca. Nina kalak e, “Cinder kami ngkelilingi kursi si iban kami jadi meja si itutupi kain mbentar, janah lit anggur  ras roti i je. Ipake kami lilin gelah terang, perban adi pake kami lampu listrik banci kari tereteh. . . . Iulihi kami janji kami man Bapak kami eme mereken kerina gegeh kami mbela gelarNa si badia.” Luar biasa kel kiniteken kalak e! Kekelengen Jesus pe seh kel luar biasana perban banci siban Peringet-ingeten aminna pe mesera keadanna!

17. Penungkunen kai saja si perlu siukuri?

¹⁷ Lanai ndekah siperingeti me kematen Jesus. Emaka arus siukuri penungkunen-penungkunen enda: ‘Kai si arus kulakoken bas ngusih Jesus gelah reh belinna kekelengenku? Siapai nge si lebih kuukuri, keperlun temanku sada kiniteken ntah keperlunku saja? Lebih nge si kuarapken arah turang senina asa si ngasup ilakokenna, ntah kuangkai nge keterbatasen kalak e?’ Mbera terus siusih Jesus janah terus kita “sepenggejapen.”​—1 Pet. 3:8.

18-19. (a) Amin gia lanai pagi lit Peringet-ingeten, banci kita tek kerna kai? (b) Kai si arus iusahakenndu?

¹⁸ Kentisik nari, lanai siperingeti kematen Kristus. Sanga “reh” Jesus bas kiniseran si mbelin, ipepulungna pagi ‘kalak si nggo ipilihna’ ku surga. Kenca si e, lanai lit acara Peringet-ingeten.​—1 Kor. 11:26; Mat. 24:31.

¹⁹ Amin gia lanai pe pagi lit Peringet-ingeten, tek kita maka pasti iinget umat Jahwe acara si sederhana e. Acara enda jadi bukti maka pernah lit manusia si tuhu-tuhu meteruk ukur, perpang, janah perkeleng. I je pagi, kalak si pernah reh ku acara si luar biasa enda pasti iceritakenna man kalak si deban si nggeluh i je, gelah banci ka erguna man kalak e. Tapi gelah erguna acara e man banta gundari, siusahakenlah ngusih Jesus si meteruk ukur, perpang, ras perkeleng. Adi silakoken e, tek kita maka pasti iupahi Jahwe kita.​—2 Pet. 1:10, 11.