1-2. (a) Kai si idah Jahwe sanga jutan kalak reh pulung bas acara Peringeten Kematen Kristus? (Nen gambar bas sampul majalah enda.) (b) Kai si man bahasenta bas artikel enda?

 BAYANGKEN kai si idah Jahwe sanga jutan kalak bas sebelang doni reh pulung bas acara Peringeten Kematen Kristus. Labo kelompok si nterem e saja si iperdiateken Jahwe, tapi tiap kalak si reh. Misalna, iperdiateken Jahwe kalak si terus reh tiap tahun. Banci saja piga-piga arah kalak e sangana ngadapi penganiayan. Lit ka si la ratur reh ku perpulungen, tapi penting akapna reh ku Peringet-ingeten. Iperdiateken Jahwe ka kalak si tangtangna denga reh, mungkin perban merhat ia meteh uga acara e.

² Pasti meriah kel ukur Jahwe ngidah nterem si reh ku Peringet-ingeten. (Luk. 22:19) Tapi, labo teremna si iperdiateken Jahwe kel. Si iperdiatekenNa ngkai maka kalak e reh. Enda me si pentingna akap Jahwe. Bas artikel enda, sibahas kari penungkunen si tuhu-tuhu penting enda: Selain reh ku Peringet-ingeten tiap tahun, ngkai maka penting ka reh ku perpulungen tiap minggu, si nggo isikapken Jahwe man kalak si ngkelengi Ia?

3-4. (a) Engkai maka kita reh ku perpulungen? (b) Adi reh kita ku perpulungen, sipat kai nge si lit bas kita? (c) Bagi si ikataken 1 Korinti 11:23-26, ngkai maka arus kita lalap reh ku Peringet-ingeten?

³ Alasen si pentingna kel kita reh ku perpulungen perban e sada bagin i bas nembah Dibata. Selain si e, iajari Jahwe ka kita i je. Kalak si sombong la kapna perlu ia iajari. (3 Joh. 9) Tapi kita la bage. Meriah kel siakap iajari Jahwe  bage pe organisasiNa.​—Jes. 30:20; Joh. 6:45.

⁴ Adi reh kita ku perpulungen, enda buktina kita meteruk ukur perban nggit kita iajari. Reh kita ku Peringeten kematen Jesus, labo perban penting saja siakap, tapi perban meteruk ukur kita, nggit kita patuh man perentah Jesus, “Teruslah lakoken enda jadi peringet-ingeten man bangku.” (Baca 1 Korinti 11:23-26.) Adi reh kita ku acara e, reh paguhna me arapenta kerna masa depan janah siinget maka keleng kel ate Jahwe kita. Tapi, iteh Jahwe maka labo bias sekali setahun saja kita ipegegehi ras isemangati. Emaka, ibanNa perpulungen tiap minggu, janah suruhNa kita reh. Adi meteruk ukur kita, nggit kita patuh. Sigunaken piga-piga jam tiap minggu guna erban persiapen janah reh ku perpulungen-perpulungen e.

5. Engkai maka kalak si meteruk ukur nggit ngaloken undangen Jahwe?

⁵ Iundang Jahwe kalak guna iajariNa, janah tiap tahun reh teremna kalak si meteruk ukur ngaloken undangen e. (Jes. 50:4) Meriah ukur kalak e reh ku Peringet-ingeten janah reh ka ia ku perpulungen. (Sak. 8:20-23) Meriah ukurta radu ras kalak e iajari ras itegu-tegu Jahwe, ‘Si Nampati ras Si Mulahi kita.’ (Msm. 40:18) Situhuna, lit kin si teriahen, ntah pe terpentingen, asangken ngaloken undangen guna iajari Jahwe ras Jesus, Anak si keleng kel ateNa?​—Mat. 17:5; 18:20; 28:20.

6. Engkai maka sipat meteruk ukur banci erban sekalak dilaki reh ku Peringet-ingeten?

⁶ Tiap tahun, siusahaken kel ngundang nterem jelma ku Peringeten kematen Jesus. Enterem kalak si meteruk ukur ndatken gunana perban ialokenna undangenta. Perdiateken contohna. Piga-piga tahun si nggo lewat, lit sekalak dilaki si dat undangen Peringet-ingeten si tercetak. Ikatakenna man turang seninata si mereken undangen e maka la banci ia reh. Tapi bas acara Peringet-peringeten, sengget turang seninata ndai perban idahna reh dilaki e ku Bale Kerajan. Mekacar turang seninata ngalo-ngalo ia. Kena kel ku pusuhna e, emaka mulai ia reh ku perpulungen tiap minggu. Janah bas setahun, telu kali ngenca ia la reh ku perpulungen. Sipat kai nge si erbanca maka nggit ia reh ku kerina perpulungen? Meteruk ukur ia emaka erkusur ukurna. Bas pudi wari, ikataken turang seninata si ngundang ia, “Meteruk ukur kel ia jelmana.” Pasti itarik Jahwe dilaki e guna nembah Ia, janah gundari nggo iperidiken ia.​—2 Sam. 22:28; Joh. 6:44.

7. Engkai maka kerina si ipelajari kita bas perpulungen bage pe si ibaca kita bas Pustaka banci erban kita meteruk ukur?

⁷ Kerina si ipelajari kita bas perpulungen bage pe si ibaca kita bas Pustaka banci erban kita meteruk ukur. Bas minggu-minggu sope Peringet-ingeten, rusur ibahas bas perpulungenta kerna Jesus ras sipatna si meteruk ukur sanga iberekenna geluhna jadi tebusen. Bas wari-wari sope Peringet-ingeten, iiahken kita mbaca cataten Pustaka kerna erbage peristiwa si terjadi sope bage pe kenca kematen ras kekeken Jesus. Kerina si ipelajari kita bas perpulungen bage pe si ibaca kita bas cataten Pustaka e, erban lebih siergai pengorbanen Jesus. Teriahken ka kita ngusih sipat Jesus si meteruk ukur bage pe ngelakoken sura-sura Jahwe amin pe mon-mon mesera siakap.​—Luk. 22:41, 42.

8. Kai buktina Jesus perpang?

⁸ Siusahaken ka ngusih sipat Jesus si perpang. Ukurilah sipat Jesus si perpang bas wari-wari sope ia mate. Tehna kentisik nari reh me musuh-musuhna nghina ia, mekpeki, ras munuh ia. (Mat. 20:17-19) Tapi, tetap ia nggit mate. Sanga nggo seh waktuna, ikatakenna man rasul-rasulna si setia si radu ras ia i Getsemane, nina, “Tediskenlah, ota kita lawes. Nen! Si nghianati aku nggo ndeher.” (Mat. 26:36, 46) Sanga reh sekelompok kalak maba senjata guna nangkap ia, maju me ia janah ikatakenna maka ia Jesus. Ipindona gelah ipediat kalak e rasul-rasulna lawes. (Joh. 18:3-8) Tuhu-tuhu perpang kel Jesus! Gundari, kalak Kristen si ipilih guna ku surga bage pe biri-biri si deban erusaha ngusih sipat Jesus si perpang. Uga carana?

9. (a) Engkai maka banci saja arus kita pang gelah ratur reh ku perpulungen? (b) Adi terus kita pang reh ku perpulungen, kai pengaruhna man turang seninata si ipenjaraken perban kinitekenna?

⁹ Gelah banci ratur kita reh ku perpulungen, banci saja arus kita pang ngadapi keadan si mesera. Piga-piga turang seninata tetap reh ku perpulungen amin pe sangana ia erceda ate, kitik ukurna, ntah pe lit masalah kesehatenna. Si debanna tetap pang reh ku perpulungen amin pe merawa kel keluargana ntah pe itentang pejabat pemerentah. Ukurilah, pasti lit pengaruhna man turang seninata si ipenjaraken perban kinitekenna adi terus kita pang reh ku perpulungen. (Heb. 13:3) Sanga ibegi kalak e tetap kita ngelayani Jahwe amin gia melala tantangen, kalak e pe terpegegehi janah dungna tetap erkiniteken, perpang, ras setia. Rasul Paulus pe lit bage pengalamenna. Sanga ia bas penjara i Roma, meriah ukurna tiap begina kenca turang seninana setia ngelayani Dibata. (Pil. 1:3-5, 12-14) La ndekah sope ibebasken ntah pe sanga mbaru denga ia bebas, itulis Paulus surat man kalak Heber. Bas suratna e, ipindona gelah kalak Kristen si setia ‘terus mbuktiken kekelengen man turang senina’ janah ula pernah nadingken perpulungen.​—Heb. 10:24, 25; 13:1.

10-11. (a) Ise saja si banci siundang ku Peringet-ingeten? (b) Menurut Epesus 1:7, ngkai maka siundang kalak ku Peringet-ingeten?

¹⁰ Perlu ka kita pang sanga ngundang keluarga, temanta erdahin, bage pe tetanggata ku Peringet-ingeten. Engkai maka siundang kalak e? Perban ngata bujur kel kita nandangi kai si nggo ilakoken Jahwe ras Jesus. Emaka, merhat kel kita ngundang kalak si deban ku Peringet-ingeten. Ateta kalak e pe erlajar gelah tehna maka ia pe banci ndatken gunana arah ‘lias ate Jahwe si seh kel belinna’ eme tebusen.​—Baca Epesus 1:7; Ket. 22:17.

¹¹ Adi reh kita ku perpulungen, sibuktiken maka kita pang. Janah enda pe bukti  maka lit bas kita sipat si meherga si debanna, si lit ka bas Dibata bage pe AnakNa si ibuktiken alu cara si luar biasa.

12. (a) Engkai maka adi reh kita ku perpulungen bage pe ku Peringet-ingeten banci reh belinna kekelengenta man Jahwe ras Jesus? (b) Menurut 2 Korinti 5:14, 15, kai si perlu silakoken guna ngusih Jesus?

¹² Alasen si deban kita reh ku perpulungen perban keleng ateta Jahwe ras Jesus. Janah kai si ipelajari kita bas perpulungen erban reh kelengna ateta Jahwe ras AnakNa. Bas perpulungen, iingetken kita rusur kerna kai si nggo ilakoken Jahwe ras Jesus man banta. (Rom. 5:8) Acara Peringet-ingeten pe ngingetken kita kerna uga belinna kekelengen Jahwe ras Jesus, termasuk man kalak si lenga meteh uga pentingna tebusen. Ngata bujur kel kita, emaka siusahaken kel ngusih Jesus bas kegeluhenta tiap wari. (Baca 2 Korinti 5:14, 15.) Selain si e, teriahken kita muji Jahwe bas pusuh nari perban nggo berekenNa tebusen. Salah sada carana alu mere komentar pusuhta nari.

13. Kai buktina keleng kel ateta Jahwe ras AnakNa? Jelasken.

¹³ Sibuktiken ka keleng kel ateta Jahwe ras AnakNa adi nggit kita ngorbanken kai pe. Biasana, arus siban pengorbanen gelah banci reh ku perpulungen. Melala runggun erban salah sada perpulungenna bas karaben, sanga nggo latih siakap sada wari e erdahin. Janah perpulungen si debanna iban bas akhir pekan, sanga nterem kalak istirahat. Iperdiateken Jahwe nge adi reh kita ku perpulungen amin pe nggo latih siakap? Ue, pasti! Idah Jahwe janah iergaiNa kel kerina usahata gelah banci reh ku perpulungen.​—Mrk. 12:41-44.

14. Engkai maka Jesus jadi contoh i bas mbuktiken kekelengen alu nggit erkorban?

¹⁴ Jesus jadi contoh man banta i bas mbuktiken kekelengen alu nggit erkorban. Nggit ia mate guna murid-muridna. Tiap wari, ibuktikenna ka maka pentingen iakapna kalak e asangken dirina. Misalna, banna denga waktuna ras pengikutna amin pe sangana latih akapna ntah pe getem kel pusuhna. (Luk. 22:39-46) Janah si iukurina kel eme kai si banci  iberekenna man kalak si deban, labo kai si banci idatna arah kalak e. (Mat. 20:28) Adi bage belinna kekelengenta man Jahwe bage pe man turang seninata, siusahaken kel asa bancita reh ku Peringeten Kematen Kristus bage pe ku kerina perpulungen.

15. Ise si pentingna si ateta sisampati?

¹⁵ Kita termasuk i bas bagin perkade-kaden sebelang doni, janah meriah kel siakap nggunaken melala waktuta ngundang kalak gelah gabung ras kita. Tapi si pentingna, sisampati ateta “turang seninata si sada kiniteken” si la aktif eme si lanai erberita ntah pe reh pulung. (Gal. 6:10) Bukti keleng ateta kalak e, siiahken ia reh ku perpulungen, khususna ku Peringet-ingeten. Bagi Jahwe ras Jesus, meriah kel ukurta sanga kalak si la aktif mulihken ku Jahwe, eme Bapakta ras Permakanta si perkeleng.​—Mat. 18:14.

16. (a) Uga carana gelah banci kita siiah-iahen, janah kai gunana reh ku perpulungen? (b) Engkai maka gundari waktu si cocok nginget kata-kata Jesus bas Johanes 3:16?

¹⁶ I bas minggu-minggu si reh, undanglah nterem jelma ku Peringet-ingeten bas wari Jumat karaben, 19 April 2019. (Nen kotak “ Undanglah Kalak si Deban.”) Mbera terus kita siiah-iahen alu ratur reh ku kerina perpulungen si isikapken Jahwe man banta. Lanai ndekah kernep me doni enda, emaka rehlah kita ku perpulungen gelah banci kita tetap meteruk ukur, perpang, ras perkeleng. (1 Tes. 5:8-11) Alu bulat ukur, sibuktikenlah maka siergai Jahwe ras AnakNa si keleng kel ateNa kita!​—Baca Johanes 3:16.