1. Uga perasanndu perban keleng ate Dibata kam?

NINA Rasul Johanes “Dibata e kekelengen.” (1 Joh. 4:8) Kata-kata e ngingetken kita maka Jahwe labo ngenca Sumber kegeluhen, tapi Sumber kekelengen ka. Keleng kel ate Jahwe kita. Perban keleng ateNa kita, aman siakap, meriah ukurta, janah puas.

2. Menurut Matius 22:37-40, kai dua perentah si mbelinna? Janah engkai maka mesera matuhi perentah si peduaken?

² Selaku kalak Kristen, iperentahken kita gelah engkelengi. E labo sada pilihen, tapi kewajipen. (Baca Matius 22:37-40.) Sanga reh rembakna kita ras Jahwe, menukah siakap matuhi perentah si pertama perban Jahwe e sempurna, ermediate, janah mehuli kel perbahanenNa man banta. Tapi, banci saja mesera siakap matuhi perentah si peduaken eme engkelengi kalak si deban, termasuk turang seninata. Engkai? Perban kerina turang seninata la sempurna. Mon-mon banci saja ikatakenna ras ilakokenna perbahanen si erban kitik ukurta. Iteh Jahwe maka mesera siakap matuhi perentahNa e. Emaka arah piga-piga penulis Pustaka, iajariNa kita engkai maka perlu sicidahken kekelengen janah uga carana. Salah sada penulis e eme Johanes.​—1 Joh. 3:11, 12.

3. Kai si ikataken Johanes kerna kekelengen?

³ I bas tulisenna mulih-ulih ikataken Johanes maka kalak Kristen arus engkelengi. I bas catatenna kerna kegeluhen Jesus, Johanes si rusurna nggunaken kata ‘kekelengen’ asangken telu penulis Injil si debanna. Umur Johanes kira-kira seratus tahun sanga itulisna Injil bage pe telu suratna si deban. Tulisen-tulisenna e ncidahken maka kai pe si ilakoken kalak Kristen arus erkiteken kekelengen.  (1 Joh. 4:10, 11) Tapi, ia sendiri pe labo mis isadarina maka penting kel engkelengi.

4. Menukah nge akap Johanes engkelengi?

⁴ Sanga Johanes nguda denga, labo kapna lalap menukah engkelengi. Contohna, bas sada paksa lawes Jesus ras murid-muridna ku Jerusalem ngelewati Samaria. Tapi, la ibere kalak Samaria kalak e erberngi bas kutana. Kai si ilakoken Johanes? Isuruhna gelah ipesusur Jesus api arah langit nari guna nutung kuta e. (Luk. 9:52-56) Selain si e, Johanes pe pernah mentingken bana, la iukurina rasul-rasul si deban. Ia ras seninana Jakup nuruh mamakna mindo man Jesus gelah ibereken man kalak e ingan si penting i bas Kerajan Dibata. Sanga iteh rasul-rasul si deban kerna kai si ilakoken Jakup ras Johanes, merawa kel kalak e. (Mat. 20:20, 21, 24) Aminna pe pernah ilakoken Johanes kerina kesalahen e, tetap denga keleng ate Jesus ia.​—Joh. 21:7.

5. Kai kari sibahas bas artikel enda?

⁵ Bas artikel enda sibahas kari kerna usihen si ibereken Johanes bage pe kerna kekelengen si itulisna. Sanga sibahas kari kerna si e, siteh me uga carana engkelengi turang seninata. Selain si e, sibahas ka sada cara penting si arus ilakoken kepala keluarga bukti keleng atena keluargana.

6. Kai buktina keleng ate Jahwe kita?

⁶ Engkelengi kalak si deban banci saja enggo bias siakap adi enggo mehuli ukurta ntah pe sikataken kata-kata si mehuli. Tapi, adi tuhu-tuhu keleng ateta kalak si deban, arus sicidahken arah perbahanenta si mehuli. (Bandingken Jakup 2:17, 26.) Contohna keleng ate Jahwe kita. (1 Joh. 4:19) Janah rusur ikatakenNa keleng ateNa kita arah kata-kataNa si mehuli si lit bas Pustaka. (Ms. 25:10; Rom. 8:38, 39) Tek kita keleng ate Dibata kita labo arah kata-kataNa saja, tapi arah kai si ilakokenNa. Nina Johanes, “Bagenda cara Dibata mbuktiken kekelengenNa man banta: SuruhNa AnakNa si tonggal ku doni enda, gelah banci sidat kegeluhen arah ia.” (1 Joh. 4:9) Ibereken Jahwe anakNa ngenanami kiniseran bage pe mate guna kita. (Joh. 3:16) Sangsi denga nge kita keleng ate Jahwe kita?

7. Kai buktina keleng ate Jesus kita?

⁷ Ikataken Jesus maka keleng atena murid-muridna. (Joh. 13:1; 15:15) Ibuktikenna maka keleng atena murid-muridna labo ngenca arah rananna tapi arah  perbahanenna ka. Nina Jesus, “Labo lit kekelengen si belinen asangken kalak si nggit mereken geluhna man teman-temanna.” (Joh. 15:13) Sanga siukuri kerna kai si enggo ilakoken Jahwe ras Jesus man banta, uga arusna pengaruhna man banta?

8. Kai si arus silakoken menurut 1 Johanes 3:18?

⁸ Bukti keleng ateta Jahwe ras Jesus eme alu matuhi perentahna. (Joh. 14:15; 1 Joh. 5:3) Iperentahken Jesus kita gelah sikeleng-kelengen. (Joh. 13:34, 35) Arus sikataken man turang seninata maka keleng ateta kalak e janah sibuktiken ka kekelengenta e arah perbahanenta. (Baca 1 Johanes 3:18.) Kai saja si banci silakoken guna mbuktiken maka keleng ateta kalak e?

9. Kekelengen ngiahken Johanes ngelakoken kai?

⁹ Situhuna, banci saja ipilih Johanes tading ras bapakna janah erdahin bas usaha keluargana eme nangkap ikan. Alu bage banci melala sen si ipepulungna. Tapi ipilihna nggunaken kegeluhenna guna ngajari kalak si deban kebenaren kerna Jahwe ras Jesus. Erkiteken si e, melala masalah si iadapi Johanes. Perban erberita, piga-piga kali ia ianiaya. Iasingken ka ia bas akhir abad pertama. Paksa si e, ia enggo metua. (Perb. 3:1; 4:1-3; 5:18; Ket. 1:9) Sanga ipenjaraken Johanes erkiteken mberitaken kerna Jesus, tetap denga ibuktikenna maka keleng atena kalak si deban. Contohna, sanga ia i Pulau Patmos, icatatna buku Ketangkasen janah ikirimna ku runggun-runggun gelah ieteh kalak e ‘kai pagi si terjadi.’ (Ket. 1:1) Banci saja kenca ibebasken arah Pulau Patmos, itulisna Injil si isina kerna kegeluhen Jesus bage pe pelayanenna. Itulisna ka telu surat guna mpegegehi turang seninana. Uga kam banci ngusih sipat Johanes si nggit erkorban?

10. Kai buktina keleng atendu kalak si deban?

¹⁰ Ibuktikenndu keleng atendu kalak si deban arah kai si ilakokenndu bas kegeluhenndu. Ate doni Setan enda, igunakenndu min waktu ras gegehndu guna dirindu sendiri. Contohna, guna ndarami sen ntah pe guna jadi kalak terkenal. Tapi kalak Kristen i belang-belang doni nggunaken melala waktuna bas erberita janah nampati kalak rembak ras Jahwe. Piga-piga arah kalak e mereken kerina geluhna guna ngelakoken si e.

11. Kai si ilakoken melala perberita guna mbuktiken keleng atena Jahwe bage pe turang senina?

¹¹ Enterem kalak Kristen arus erdahin sada wari ben guna mbiayai dirina bage pe keluargana. Tapi tetap idukung kalak e organisasi Dibata alu cara si banci ilakokenna. Misalna, piga-piga nampati bas daerah si terjadi bencana alam, si debanna ikut mbangun bas proyek organisasi, janah kerina kita ikut mereken sumbangen guna pendahin i sebelang doni. Ilakoken kalak e kerina enda perban keleng atena Dibata bage pe kalak si deban. Selain si e, sibuktiken keleng ateta turang seninata alu ratur reh ku perpulungen janah ikut mereken komentar. Aminna pe latih siakap, siusahaken tetap reh ku perpulungen. Aminna pe jantungen kita mere komentar, siusahaken ka tetap mere komentar. Janah aminna pe kerina kita ngadapi masalah, siusahaken mpegegehi sada ras si debanna sope ras kenca dung perpulungen. (Heb. 10:24, 25) Tuhu-tuhu ngata bujur kel kita  perban kai si enggo ilakoken turang seninata e!

12. Cara si deban kai si ilakoken Johanes guna mbuktiken keleng atena turang seninana?

¹² Ibuktiken Johanes keleng atena turang seninana labo ngenca alu muji kalak e, tapi alu mereken nasehat. Misalna bas suratna, ipuji Johanes turang seninana perban kiniteken kalak e bage pe perbahanen si mehuli si ilakokenna. Tapi iberekenna ka nasehat si terus terang kerna dosa. (1 Joh. 1:8–2:1, 13, 14) Kita pe perlu siukuri turang seninata erkiteken perbahanen si mehuli si enggo ilakokenna. Tapi, adi lit si ngelakoken perbahanen si la mehuli ntah pe perbahanen si banci ncedai hubungenna ras Jahwe, sibuktiken keleng ateta ia alu mereken nasehat si iperlukenna. Memang perlu sipat si perpang guna mereken nasehat man sekalak teman. Tapi nina Pustaka, teman situhu-tuhu nggit mereken nasehat man temanna.​—Kua. 27:17.

13. Perban keleng ateta turang seninata, kai si la silakoken?

¹³ Mon-mon sibuktiken keleng ateta turang seninata arah kai si la silakoken. Misalna, la menukah kitik ukurta erkiteken kai si ikatakenna. Cuba ukuri kai si terjadi paksa Jesus i doni. Ikataken Jesus man murid-muridna maka arus ipan kalak e daging bage pe minem darehna guna ndatken kegeluhen. (Joh. 6:53-57) Kata-kata Jesus e erban melala murid-muridna sengget janah melala ka si nadingken ia. Tapi temanna si setia, termasuk Johanes terus ngikutken ia. Terus kalak e setia man Jesus. Memang la iangkai kalak e kai si ikataken Jesus janah sengget kalak e megisa. Tapi teman-teman Jesus si setia enda la erpengakap maka kai si ikataken Jesus e salah, janah la kitik ukur kalak e megi ranan Jesus. Sebalikna tek kalak e man Jesus perban itehna kai si ikataken Jesus e kebenaren. (Joh. 6:60, 66-69) Seh kel pentingna la menukah kitik ukurta erkiteken kai si ikataken temanta. Tapi, siberekenlah kesempaten man kalak e guna njelasken kai maksud rananna.​—Kua. 18:13; Peng. 7:9.

14. Engkai maka ula pernah segat ateta turang seninata?

¹⁴ Iiahken Johanes ka kita gelah ula segat ateta turang seninata. Adi la sipatuhi nasehat e, banci kita ipengaruhi  Setan. (1 Joh. 2:11; 3:15) Enda pernah terjadi bas akhir abad pertama Masehi. Paksa si e iusahaken Setan gelah umat Dibata rate segat man sada ras si debanna janah lanai ersada. Sanga itulis Johanes surat-suratna, piga-piga kalak si perbahanenna bali bagi Setan enggo masuk ku bas runggun. Misalna Diotrepes, iusahakenna kel gelah runggun lanai ersada. (3 Joh. 9, 10) Sitik pe la iergaina pertua-pertua si ikirim badan pinpinen. Segat atena kalak si nggit ngalo-ngalo pertua-pertua e. Emaka, iusahakenna mpedarat kalak e arah runggun. Seh kel sombongna Diotrepes e. Gundari pe iusahaken Setan denga gelah umat Dibata lanai ersada. Mbera la pernah segat ateta turang seninata janah teruslah sidukung kalak e.

15. Kai si arus iinget kepala keluarga?

¹⁵ Salah sada cara si penting si banci ilakoken kepala keluarga guna mbuktiken keleng atena keluargana eme alu ncukupi keperlun keluargana e. (1 Tim. 5:8) Tapi arus ingetna maka ndauh pentingen nampati keluargana gelah rembak ras Jahwe. (Mat. 5:3) Perdiateken usihen si ibereken Jesus man kepala keluarga. Menurut Injil Johanes, sanga Jesus nandangi mate i bas tiang siksan, iukurina denga keluargana. Paksa si e, Johanes ras Maria mamak Jesus cinder i deher tiang siksan Jesus. Amin pe seh kel suina iakap Jesus paksa si e, isuruhna gelah iurus Johanes Maria. (Joh. 19:26, 27) Memang lit nge agi-agi Jesus si banci ncukupi keperlun Maria, tapi paksa si e banci jadi lenga lit kalak e si jadi murid Jesus. Emaka ipastiken Jesus atena gelah lit si ngurus mamakna bage pe mpegegehisa gelah tetap ngelayani Jahwe.

16. Kai saja tanggung jawap Johanes?

¹⁶ Melala tanggung jawap Johanes. Perban ia sekalak rasul, pasti arus ia semangat erberita. Banci saja ia pe enggo erjabu, emaka arus icukupina keperlun keluargana bage pe isampatina keluargana e gelah rembak ras Jahwe. (1 Kor. 9:5) Kai pelajarenna man kepala keluarga si lit gundari?

17. Engkai maka penting kel iperdiateken kepala keluarga keperlun rohani keluargana?

¹⁷ Sekalak kepala keluarga banci saja melala tanggung jawapna si penting. Misalna arus ia rajin erdahin gelah Jahwe  imuliaken bas inganna erdahin. (Ep. 6:5, 6; Tit. 2:9, 10) Janah banci saja lit ka tanggung jawapna bas runggun, bagi mpegegehi turang senina janah semangat erberita. Selain si e, arus ka ia ratur ngajari anak-anakna bage pe ndeharana kerna Kata Dibata. Pasti ngata bujur kel ndeharana bage pe anak-anakna kerna kerina si enggo ilakokenna gelah kalak e banci tetap sehat, ermeriah ukur, janah tetap rembak ras Jahwe.​—Ep. 5:28, 29; 6:4.

18. Kai si iteki Johanes?

¹⁸ Gedang kel umur Johanes janah melala pengalamen si luar biasa si iadapina. Iadapina ka melala tentangen si banci erban lemah kinitekenna. Tapi lalap ilakokenna asa ngasupna guna matuhi perentah Jesus, termasuk perentah guna engkelengi turang seninana. Erkiteken si e, tek kel Johanes maka keleng ate Jahwe ras Jesus man bana. Janah tek ka ia maka ibereken Jahwe gegeh guna ngadapi tentangen. (Joh. 14:15-17; 15:10; 1 Joh. 4:16) Setan ras doni enda la banci mpengadi Johanes engkelengi turang seninana alu ranan bage pe perbahanenna.

19. Menurut 1 Johanes 4:7, kita iiahken ngelakoken kai janah engkai?

¹⁹ Bagi Johanes, kita nggeluh bas doni si ikuasai Setan janah sitik pe la lit kekelengen bas ia. (1 Joh. 3:1, 10) Ersura-sura ia gelah lanai sikelengi turang seninata. Tapi, adi la kita nggit ipengaruhina, la ia banci berhasil. Mbera siusahaken asa ngasupta engkelengi turang seninata arah ranan bage pe perbahanenta. Adi bage silakoken, puas me siakap perban banci jadi bagin keluarga Jahwe, janah kegeluhenta pe tuhu-tuhu ermeriah ukur.​—Baca 1 Johanes 4:7.