BAS Museum Bible Lands i Jerusalem lit sada tulisen si itulis kira-kira tahun 700-600 Sope Masehi. Tulisen e idat bas sada gua si igunaken jadi kuburen. Gua e la ndauh arah Hebron i Israel. Bas tulisen e ikataken, “Isumpahi Yahweh Sabaot lah Hagaf anak Hagaw.” Uga tulisen e mbuktiken maka benar kai si ikataken Pustaka? Tulisen e ncidahken maka gelar Dibata eme Jahwe ntah pe YHWH bas huruf Heber si nai, rusur igunaken tiap wari bas jaman Pustaka. Selain si e, bas dinding gua-gua si deban lit ka gelar Jahwe bage pe gelar-gelar kalak si arah gelarna e tereteh maka igunakenna gelar Dibata. Tulisen e iban kalak si jumpa bas gua bage pe si cebuni i je.

Nina Dr. Rachel Nabulsi arah University of Georgia kerna tulisen-tulisen e, “Gelar Jahwe mulih-ulih itulisken i bas tulisen e. E sada bukti si penting. . . . Tulisen-tulisen e mbuktiken maka penting kel gelar YHWH man kalak Israel bage pe man kalak Juda.” Enda jadi bukti maka lit ribun kali gelar Dibata ntah pe YHWH itulis i bas Pustaka bahasa Heber. I bas erti gelar-gelar kalak pe rusur nggunaken gelar Jahwe.

“Yahweh Sabaot” si lit bas tulisen-tulisen ndai ertina “Jahwe penguasa malekat.” Banci saja bas jaman Pustaka rusur igunaken kalak gelar Dibata ras kata-kata “Jahwe penguasa malekat.” Kata-kata enda pe ndukung kata-kata si lit bas Kitap-Kitap Heber eme “Jahwe penguasa malekat.” Kata-kata enda lit 283 kali itulis bas kitap-kitap e. Kata-kata enda buen itulis bas buku Jesaya, Jeremia, ras Sakaria.