1. Kai pengaruh khotbah si ipeseh bas sada kebaktin tahun 1935 man sada anak perana?

SEKALAK anak perana iperidiken bas tahun 1926, sanga umurna 18 tahun. Orang tuana eme Ajar-Ajar Pustaka, si gundari igelari Saksi-Saksi Jahwe. Lit dua turangna janah dua seninana. Kerina kalak e iajari ngelayani Dibata ras ngusih Jesus Kristus kitik-kitikna nari. Bali bagi kerina Ajar-Ajar Pustaka paksa si e, anak perana enda man roti ras minem anggur tiap tahun bas acara Peringeten Kematen Kristus. Tapi arapenna berubah kenca ibegina khotbah si erjudul “Kelompok Jelma si Enterem.” Khotbah e ipeseh turang senina J. F. Rutherford bas sada kebaktin i Washington, D.C., AS tahun 1935. Kai si ijelasken bas khotbah e?

2. Kebenaren si mbaru kai si ijelasken Turang Senina Rutherford bas khotbahna?

² Mbarenda Ajar-Ajar Pustaka erpengakap maka kelompok jelma si enterem erpengarapen guna nggeluh i surga. Tapi kelompok enda ikataken kurang setia adi ibandingken ras kalak si ipilih guna merentah i surga. Bas khotbah turang senina Rutherford ijelasken ise si termasuk “kelompok jelma si enterem,” si lit bas Ketangkasen 7:9. Melala ayat si icidahken Rutherford guna njelasken maka kelompok jelma si enterem e labo ipilih guna nggeluh i surga, tapi kalak e situhuna biri-biri si deban * jang Kristus  si selamat pagi ngelewati kiniseran si mbelin si nggeluh rasa lalap bas doni. (Ket. 7:14) Nina Jesus, “Lit denga biri-biriku si deban si la arah kandang enda. Kalak e pe arus kubaba, begikenna pagi soraku. Kalak e jadi sada rarasen pagi, sada permakanna.” (Joh. 10:16) Biri-biri enda eme Saksi-Saksi Jahwe si setia si erpengarapen nggeluh si rasa lalap bas Pardis i doni. (Mat. 25:31-33, 46) Mari sibahas uga pengangkan si mbaru kerna kebenaren Pustaka enda ngubah kegeluhen enterem umat Jahwe termasuk anak perana si umurna 18 tahun ndai.​—Ms. 97:11; Kua. 4:18.

3-4. Bas kebaktin tahun 1935, kai si isadari ribun turang seninata kerna arapenna? Janah engkai?

³ Luar biasa kel situasina sanga bagenda nina Turang Senina Rutherford, “Kerina kalak si erpengarapen nggeluh si rasa lalap i doni banci tedis.” Sekalak turang senina si reh ku kebaktin e ngataken maka lit lebih setengah arah kira-kira 20.000 kalak tedis. Kenca si e nina turang senina Rutherford, “Nenlah! Enda me perpulungen si mbelin!” Jenari ersurak kerina kalak alu ermeriah ukur. Enggo iteh kalak si tedis maka kalak e labo ipilih kesah si badia guna nggeluh ku surga. Paginna, lit 840 Saksi si mbaru iperidiken bas kebaktin e janah teremen arah kalak e termasuk biri-biri si deban.

⁴ Kenca khotbah e, anak perana si iceritaken ndai ras ribun turang senina si debanna, lanai man roti ras minem anggur bas acara Peringeten Kematen Kristus. Perasan enterem turang seninata bali bagi perasan sekalak turang seninata si meteruk ukur si ngataken, “Terakhir aku man roti ras minem anggur eme bas acara Peringeten tahun 1935. Sadar aku maka labo igunaken Jahwe kesahNa si badia guna mereken arapen nggeluh i surga man bangku. Tapi arapenku nggeluh si rasa lalap i doni janah ikut erban pardis.” (Rom. 8:16, 17; 2 Kor. 1:21, 22) Mulai paksa si e, jumlah kelompok jelma si enterem terus reh teremna janah terus idukung kalak e kalak si ipilih guna merentah i surga si nggeluh denga i doni.

5. Uga nge menurut Jahwe kerna kalak si lanai man roti ras minem anggur bas acara Peringeten?

⁵ Uga nge menurut Jahwe kerna kalak si lanai man roti ras minem anggur bas acara Peringeten kenca tahun 1935? Janah uga kerna Saksi Jahwe si enggo man roti ras minem anggur gundari tapi dungna isadarina maka situhuna labo ia ipilih guna nggeluh ku surga? (1 Kor. 11:28) Piga-piga arah kalak e man roti ras minem anggur perban kurang jelasna pengangkanna kerna arapenna. Tapi adi nggit kalak e ngakui kesalahenna, lanai man roti ras minem anggur, janah terus setia ngelayani Jahwe, pasti ialoken Jahwe kalak e jadi bagin biri-biri si deban. Aminna pe lanai kalak e man roti ras minem anggur, tetap denga kalak e reh ku acara Peringeten perban iergaina kai si enggo ilakoken Jahwe ras Jesus man bana.

6. Perentah kai si ibereken Jesus man malekat-malekat?

⁶ Perban kentisik nari kel terjadi kiniseran si mbelin, terpegegehi kel kita mbahas kai si ikataken Ketangkasen pasal 7 kerna kalak Kristen si ipilih ku surga  bage pe kerna kelompok jelma si enterem arah biri-biri si deban. Iperentahken Jesus malekat-malekat gelah terus nagangi empat angin si banci ngkernepken. La banci ilepasken kalak e angin e guna rembus ku doni seh asa kerina kalak si ipilih ku surga imeteraiken ntah pe seh ngasa kalak e terbukti setia. (Ket. 7:1-4) Perban senina-senina Kristus enda terus setia, iban Jahwe kalak e jadi raja ras imam radu ras Kristus i surga. (Ket. 20:6) Meriah kel ukur Jahwe, Jesus, ras malekat-malekat ngidah kalak si ipilih si jumlahna 144.000 ngaloken upahna i surga.

7. Bas Ketangkasen 7:9, 10, ise si idah Johanes bas sada pengenehenen? Janah kai si ilakoken kalak e? (Nen gambar sampul.)

⁷ Kenca ibahas Johanes kerna raja-raja ras imam-imam si jumlahna 144.000, idahna ka sada pengenehenen si luar biasa eme sada “kelompok jelma si enterem” si selamat arah Harmagedon. Kelompok enda ndauh kel teremen asangken si 144.000, janah la siteh asa kai jumlahna. (Baca Ketangkasen 7:9, 10.) Kerina kalak e ‘make jubah mbentar.’ Enda ncidahken maka kalak e ‘la icedai’ doni Setan enda janah terus setia man Dibata bage pe man Kristus. (Jak. 1:27) Serko kalak e ban riahna perban kalak e enggo iselamatken Jahwe ras Kristus, Anak Biri-Biri Dibata. Ijemak kalak e ka bulung batang kurma si ertina meriah kel ukur kalak e ngakui Jesus selaku raja si ipilih Jahwe.​—Bandingken Johanes 12:12, 13.

8. Menurut Ketangkasen 7:11, 12, uga tanggapen keluarga Jahwe si lit i surga sanga ngidah kelompok jelma si enterem?

⁸ Baca Ketangkasen 7:11, 12. Uga tanggapen keluarga Jahwe si lit i surga sanga ngidah kelompok jelma si enterem? Ikataken Johanes maka kerina si lit i surga ermeriah ukur janah muji Jahwe. Pengenehenen e terjadi sanga kelompok jelma si enterem selamat ngelewati kiniseran si mbelin. Paksa si e, meriah kel ukur kerina anggota keluarga Jahwe si lit i surga.

9. Menurut Ketangkasen 7:13-15, kai si ilakoken kelompok jelma si enterem gundari?

⁹ Baca Ketangkasen 7:13-15. Ikataken Johanes maka ‘icuci kelompok jelma si enterem jubahna janah ibanna mbentar alu dareh Anak Biri-Biri.’ Enda ertina bersih pusuh peraten kalak e janah enggo meriah banna ukur Jahwe. (Jes. 1:18) Kalak enda eme kalak Kristen si enggo iperidiken si erkiniteken kel man korban tebusen Jesus janah rembak ras Jahwe. (Joh. 3:36; 1 Pet. 3:21) Erkiteken si e me maka meriah ukur Dibata ngidah kalak e janah banci kalak e mereken “pelayanen si badia man baNa suari ras berngi” i doni. Gundari pe semangat kel kalak e, iusahakenna asa ngasupna erberita ras erban murid. Si pentingna iakap kalak e eme mpelebe Kerajan Dibata.​—Mat. 6:33; 24:14; 28:19, 20.

10. Kai si iteki kelompok jelma si enterem? Janah janji kai si enggo ndekah kel itimai kalak e?

¹⁰ Kelompok jelma si enterem si selamat ngelewati kiniseran si mbelin tek kel maka terus pagi kalak e ijaga Jahwe. Engkai? Perban nina Pustaka, “Ia si kundul i tahta e kimbangkenNa kemahNa guna ngelindungi kalak e.” Nina Pustaka ka, “Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda enggo lanai lit.” Enggo ndekah kel itimai biri-biri si deban janji Jahwe enda.​—Ket. 21:3, 4.

11-12. (a) Menurut Ketangkasen 7:16, 17, pasu-pasu kai si ialoken kelompok jelma si enterem? (b) Kai si banci ilakoken biri-biri si deban bas acara Peringeten, janah engkai maka bage ilakokenna?

 ¹¹ Baca Ketangkasen 7:16, 17. Gundari, lit umat Jahwe si ngenanami kelihen perban la bias senna guna ncukupi keperlunna ntah pe perban terjadi perang bas negarana. Si debanna ka ipenjaraken perban kinitekenna. Aminna pe bage, kerina kalak e tetap ermeriah ukur. Iteh kalak e maka kenca selamat kari kalak e sanga ikernepken Dibata doni si jahat enda, pasti melala pagi lalap pangan kalak e. Selain si e, isikapken Jahwe ka melala pangan rohani. Janah sanga ikernepken Jahwe pagi doni Setan si jahat enda alu rawaNa si bali bagi las si erban meseng, ipastikenNa gelah kelompok jelma si enterem tetap ilindungi. Kenca dung kiniseran si mbelin, ibabai Jesus kalak e ku “sumber lau kegeluhen [si rasa lalap].” Cuba ukurindu enda: Arah miliaren kalak si pernah nggeluh, kelompok jelma si enterem ngenca si banci saja la pernah ngenanami kematen. Enda tuhu-tuhu arapen si luar biasa.​—Joh. 11:26.

¹² Ngata bujur kel biri-biri si deban man Jahwe bage pe man Jesus perban ibereken man kalak e arapen si luar biasa. Aminna pe kalak e la ipilih guna nggeluh i surga, labo beda kekelengen si icidahken Jahwe man kalak e bage pe man kalak si ipilih ku surga. Salah sada cara kelompok e duana muji Jahwe ras Kristus eme alu reh ku acara Peringeten Kematen Kristus.

13-14. Engkai maka arus kita reh ku acara Peringeten Kematen Kristus?

¹³ Biasana jarang kel lit si man roti ras minem anggur bas acara Peringeten. Misalna, arah 1.000 kalak si reh, banci saja sada pe la man roti ras minem anggur. E ertina teremen kalak bas runggun i belang-belang doni la man roti ras minem anggur. Emaka, teremen kalak si reh ku acara e erpengarapen guna nggeluh i doni. Adi bage, engkai kalak e reh ku acara Peringeten? Enda banci ipeseri ras kalak si reh ku acara perjabun temanna. Reh kalak e ku acara e  perban icidahkenna atena kekelengenna ras dukungenna man temanna si erjabu. Biri-biri si deban pe bage ka, reh kalak e ku acara Peringeten perban icidahkenna atena kekelengenna ras dukungenna man Kristus bage pe man kalak si ipilih ku surga. Selain si e, reh kalak e guna ncidahken pengatan bujurna erkiteken pengorbanen Jesus. Erkiteken pengorbanenna e banci kalak e nggeluh si rasa lalap i doni.

¹⁴ Alasen penting si deban eme perban ipatuhi kalak e atena perentah Jesus. Sanga iban Jesus acara Peringeten ras rasul-rasulna si setia, nina man kalak e, “Teruslah lakoken enda jadi peringet-ingeten man bangku.” (1 Kor. 11:23-26) Erkiteken si e me maka terus kalak e reh ku acara Peringeten sedekah kalak si ipilih ku surga nggeluh denga i doni. Selain si e, biri-biri si deban pe ngundang kalak si deban gelah reh ku acara e. 

15. Uga kita sekalak-sekalak banci muji Jahwe ras Kristus bas acara Peringeten?

¹⁵ Bas acara Peringeten e lit kesempatenta muji Dibata ras Kristus alu rende ras ertoto. Khotbah si ipeseh bas tahun enda erjudul “Ergailah Kai si Nggo Ilakoken Dibata ras Kristus man Bandu!” Khotbah e banci mpebages pengerganta man Dibata bage pe man Kristus. Sanga roti ras anggur iedarken, banci siukuri kerna kai ertina lambang-lambang e. E ertina daging ras dareh Jesus. Siukuri ka uga kelengna ate Jahwe kita, nggit Ia mereken anakNa gelah banci kita nggeluh si rasa lalap. (Mat. 20:28) Kerina kalak si keleng atena Bapakta si i surga, nggit reh ku acara e.

16. I bas kai saja kalak si ipilih ku surga seri ras biri-biri si deban?

¹⁶ Labo kelengen ate Dibata kalak si ipilih ku surga asangken biri-biri si deban. Aminna pe la seri arapen kalak e, seri ergana kalak e iakap Dibata. Duana kelompok enda itukur alu erga si seri eme alu kegeluhen anak si ikelengiNa. Si pentingna, duana kelompok enda tetap setia man Dibata bage pe man Kristus. (Ms. 31:23) Janah ingetlah, ibereken Dibata kesahNa si badia man tiap kalak menurut keperlun kalak e, la soal ia ipilih ku surga ntah pe biri-biri si deban.

17. Kai si itimai kalak si ipilih ku surga si lit denga i doni?

¹⁷ Sanga kalak Kristen si ipilih guna nggeluh i surga lahir, arapenna labo mis ku surga, tapi arapenna e Dibata si merekenca. Erkiteken si e, rusur iukuri kalak e arapenna, itotokenna, janah semangat kalak e nimai upahna guna nggeluh i  surga. (Pil. 3:20, 21; 1 Joh. 3:2) Aminna pe la iteh kalak e uga pagi keadanna i surga, tapi itima-timai kalak e kel gelah banci jumpa ras Jahwe, Jesus, ras malekat-malekat. Merhat ka kalak e jumpa ras kalak si ipilih ku surga si debanna janah ras-ras ndalanken tugasna bas Kerajan surga.

18. Kai si iarapken biri-biri si deban?

¹⁸ Iarapken biri-biri si deban kel banci nggeluh si rasa lalap i doni. Situhuna, tangtangna manusia lahir pe enda me si iarapkenna. (Peng. 3:11) Iarapken kalak e banci ngubah planet enda jadi pardis. Merhat kel kalak e banci mbangun rumahna sendiri, nuan-nuan, janah nggeluh sempurna ras anak-anakna. (Jes. 65:21-23) Selain si e, itima-timai kalak e gelah banci gawah-gawah ku melala ingan, ngenen gunung-gunung, kerangen, samudra, ras mpelajari ciptan Jahwe. Tapi si pentingna si erban kalak e ermeriah ukur eme banci reh rembakna ras Jahwe.

19. Kai nge silakoken bas acara Peringeten, janah ndigan acara e iban bas tahun enda?

¹⁹ Ibereken Jahwe arapen si luar biasa man kerina umatNa si setia. (Jer. 29:11) Acara Peringet-ingeten Kematen Jesus eme sada kesempaten si istimewa man kita sekalak-sekalak guna muji Dibata ras Kristus. Erkiteken kai si enggo ilakoken Dibata ras Kristus, banci kita nggeluh si rasa lalap. Acara Peringeten e eme acara si pentingna kel si ilakoken kalak Kristen tiap tahun. Tahun enda acara e iban bas wari Sabtu tanggal 27 Maret 2021 kenca matawari terbenam. Melala kalak si bebas ngelakoken acara e, tapi lit ka si la bebas ngelakokenca perban lit pelarangen, janah lit ka si ngelakokenca bas penjara. Mbera kerina kita, la soal si gabung bas runggun, bas kelompok, ntah pe sisada, teruslah sirayaken acara si luar biasa enda perban Jahwe, Jesus, ras kerina anggota keluargana mperdiateken surga nari.