1. Bali bagi Raja Daud, uga perasan piga-piga umat Jahwe?

MERHAT kel kita gelah dame kegeluhenta. Ise pe la nggit kuatir. Tapi, mon-mon lit si erbanca kuatir kel kita. E me sebapna maka piga-piga umat Jahwe seri perasanna bagi Raja Daud si nungkun man Jahwe, nina, “Ngasa ndigan aku arus kuatir? Arus kin aku sedih tiap wari?”​—Ms. 13:2.

2. Kai kari sibahas bas artikel enda?

² Aminna pe la banci kita tuhu-tuhu bebas arah perasan kuatir, tapi lit si banci silakoken guna ngurangi perasan kuatirta e. Bas artikel enda, sibahas kari kai saja si banci erban kita kuatir. Kenca si e, sibahas enem cara si banci nampati kita gelah tetap tenang janah la kuatirsa sanga ngadapi masalah.

3. Masalah kai saja si erban kita kuatir janah banci nge sikendaliken masalah e?

³ Melala masalah si banci erban kita kuatir, janah lit si la banci lang arus siadapi. Misalna, la banci sikendaliken erga pangan, paken, ras ingan tading si naik tiap tahun. Selain si e, arus siadapi godan arah teman-teman guna ngelakoken perbahanen si la jujur ntah pe perbahanen seks si salah. Janah la banci sipengadi kejahaten si lit bas daerahta. Siadapi kerina enda perban teremen kalak bas  doni enda la ngikutken Kata Dibata. Selain si e, Setan, dibata doni pe ietehna maka banci kalak lanai ngelayani Jahwe adi “kuatir ia kerna kegeluhen i doni enda.” (Mat. 13:22; 1 Joh. 5:19) Emaka, la ateta mamang adi doni enda dem alu masalah si erban kita kuatir.

4. Kai akibatna adi melala masalahta?

⁴ Banci saja siadapi melala masalah si erbanca kuatir kel kita janah lanai kita ngasup ngukuri kai pe. Misalna, kuatir kita uga kari adi la bias senta guna ncukupi keperlunta. Ntah, uga kari adi kita sakit janah dungna lanai kita banci erdahin ntah pe ngadi arah inganta erdahin. Kuatir ka kita banci nge kari kita tetap setia sanga igoda gelah la patuh man undang-undang Dibata. Selain si e, kentisik nari iban Setan kalak si lit bas kuasana nyerang umat Dibata. Emaka, banci saja kuatir kita kerna kai kari si arus silakoken sanga kita iserang. Banci saja bagenda kita rukur, ‘Salah nge adi kuatir aku perban kerina situasi e?’

5. Kai maksud Jesus sanga ikatakenna, “Ula nai kena kuatir”?

⁵ Bagenda nina Jesus man pengikutna, “Ula nai kena kuatir.” (Mat. 6:25) Payo nge maksud Jesus maka lanai kita banci kuatir? Labo bage maksudna. Mbarenda pe piga-piga umat Jahwe si setia pernah kang kuatir. Aminna pe bage, meriah denga ukur Dibata ngidah kalak e. * (1 Raj. 19:4; Ms. 6:3) Situhuna ipetetap Jesus atena ukurta. La atena kita kuatirsa kerna keperlunta si banci erban lanai siban Jahwe si pentingna bas geluhta. Jadi, kai si banci silakoken gelah lanai kita kuatir?​—Nen kotak “ Cara Ngelakokenca.”

6. Menurut Pilipi 4:6, 7, kai si erban dame pusuhta?

⁶ (1) Rusurlah ertoto. Adi kuatir kam, banci kam ertoto man Jahwe mindo penampatNa. (1 Pet. 5:7) Ijawap Jahwe totondu alu mereken ‘kedamen si banci naluken perukuren kai pe.’ (Baca Pilipi 4:6, 7.) IberekenNa kedamen e arah kesahNa si badia.​—Gal. 5:22.

7. Uga ate Jahwe kita ertoto?

⁷ Sanga kam ertoto man Jahwe, turikenlah isi pusuhndu man baNa. Turiken kerina masalah si sangana iadapindu. Adi banci iakapndu masalah e idungi, pindolah kepentaren ras gegeh man Jahwe gelah banci datndu jalan keluar si mehulina. Tapi, adi akapndu masalah e la banci idungi, pindolah man Jahwe gelah isampatiNa kam lanai kuatirsa. Adi turikenndu kerina masalahndu man Jahwe, banci jelas idahndu uga Jahwe njawap totondu. Memang banci saja labo mis ijawapNa totondu. Tapi ula kam ngadi ertoto. Ate Jahwe labo ngenca gelah iturikenndu kerina masalahndu. Tapi, terus ka min ateNa itotokenndu masalahndu e.​—Luk. 11:8-10.

8. Kai ka si perlu sitotoken?

⁸ Sanga itotokenndu masalahndu man Jahwe, ula ka kam lupa mpeseh pengatan bujurndu. Aminna pe melala masalahta, perlu ka siukuri kai si mehuli si banci denga sinanami. Uga adi lanai tehndu carana nuriken perasanndu? Ingetlah maka pasti ijawap Jahwe totondu  aminna pe bagenda ngenca si banci ibelaskenndu, ‘Jahwe, sampati min aku!’​—2 Kro. 18:31; Rom. 8:26.

9. Kai si banci erban tuhu-tuhu aman siakap?

⁹ (2) Pindolah penampat Jahwe janah ula andalken dirindu. Bas jaman Nabi Jesaya, mbiar kalak Juda man bangsa Assur. Perban la nggit kalak Juda ikuasai bangsa e, ipindona penampat kalak Mesir. (Jes. 30:1, 2) Ipersingeti Jahwe kalak e maka keputusenna e banci la mehuli akibatna. (Jes. 30:7, 12, 13) Arah Jesaya, ikataken Jahwe uga carana gelah banci tuhu-tuhu aman iakap kalak e. Nina, “Adi tetap kena tek [man Jahwe] janah la kena mbiar, megegeh pagi kena.”​—Jes. 30:15b.

10. I bas situasi kai saja sibuktiken maka tek kita man Jahwe?

¹⁰ I bas situasi kai saja banci sibuktiken maka tek kita man Jahwe? Perdiateken piga-piga contoh enda. Itawarken man bandu pendahin si galangen gajina asangken gajindu si gundari. Tapi e erbanca arus kam rusur lembur janah kurang waktundu ngelayani Jahwe. Ntah, lit si rate ngena man bandu tapi labo ia Saksi Jahwe. Selain e, bayangken lit anggota keluargandu si nuruh kam milih Jahwe ntah ia. I bas situasi-situasi e pasti mesera iakapndu erban keputusen. Tapi, pasti ibereken Jahwe man bandu petunjuk si iperlukenndu. (Mat. 6:33; 10:37; 1 Kor. 7:39) Tek nge kam man Jahwe janah ikutkenndu petunjuk si iberekenNa?

11. Kejadin si lit bas Pustaka si apai si banci sipelajari gelah banci kita tetap tenang sanga ngadapi tentangen?

¹¹ (3) Erlajar arah contoh si mehuli bage pe contoh si la mehuli si lit bas Pustaka. Bas Pustaka, lit melala kejadin si mbuktiken maka seh kel pentingna tetap tenang janah tek man Jahwe. Sanga ipelajarindu kerna si e, cuba ukuri engkai maka umat Jahwe e banci tetap tenang aminna pe ngadapi tentangen. Misalna, sanga iperentahken pengadilen tinggi Jahudi rasul-rasul gelah ngadi erberita, la kalak e mbiar. Tapi alu pang ikataken kalak e, “Arus kami patuhen man Dibata selaku penguasa asangken man manusia.” (Perb. 5:29) Paksa si e, sempat rasul-rasul iligasi tapi la kalak e mbiar. Engkai? Perban tek kalak e maka Jahwe ras kalak e janah meriah ukur Jahwe ngidah kalak e. Emaka, kalak e banci terus erberita. (Perb. 5:40-42) Ukuri ka kerna Stepanus. Sanga nandangi iukum mate, tenang ia janah dame kel iakapna. Emaka, ayona teridah “bagi ayo malekat.” (Perb. 6:12-15) Engkai maka banci tenang kel iakap Stepanus? Perban tek ia maka enggo meriah ibanna ukur Jahwe.

12. Menurut 1 Petrus 3:14 ras 4:14, engkai maka meriah ukurta sanga ianiaya?

¹² Mbarenda, ibereken Jahwe man rasul-rasul kengasupen guna erban mukjizat. E erban kalak e tek maka Jahwe ras kalak e. (Perb. 5:12-16; 6:8) Gundari lanai ibereken kengasupen si bage man banta. Tapi arah Pustaka, ipetetap Jahwe ukurta maka aminna pe kita ianiaya perban ngelakoken kai si benar, tetap Jahwe ras kita janah isampatiNa kita arah kesahNa si badia. (Baca 1 Petrus 3:14; 4:14.) Emaka, la kita perlu kuatir kerna kai si arus silakoken sanga ianiaya kita pagi. Sebalikna, perlu siusahaken asa ngasupta guna mpepaguh kinitekenta maka banci kita idukung ras  iselamatken Jahwe. Bali bagi murid-murid Jesus bas abad pertama, banci kita tek man janji Jesus enda: “Kubereken pagi man kena kata-kata ras kepentaren gelah amin pe ersada kerina si nentang kena, la kalak e ngasup ngelawan ntah pe nimbak kena.” Selain si e, ijanjiken Jesus ka: “Adi megenggeng kena pasti kena tetap nggeluh.” (Luk. 21:12-19) Janah ula kita lupa maka inget Jahwe kerina ciri-ciri kerna umatNa si setia. Emaka, bicara mate kalak e, pasti ipekekeNa.

13. Engkai maka perlu sipelajari kerna kalak si la tetap tenang janah la ngandalken Jahwe?

¹³ Bas Pustaka, lit ka contoh kalak si la tetap tenang janah la ngandalken Jahwe. Perlu kita erlajar arah contoh-contoh si la mehuli e gelah la silakoken kesalahen si seri. Salah sada contohna eme Raja Asa. Sanga tangtangna ia jadi raja Juda, lit pasuken si mbelin reh nyerang negrina. Paksa si e, pindona penampat Jahwe, janah italuken Jahwe me pasuken e. (2 Kro. 14:9-12) Bas pudi wari, Juda iserang Raja Baasa arah Israel janah pasukenna labo enteremsa. Tapi sanga si e, la ipindona penampat Jahwe. Igalarina raja Siria guna nampati ia. (2 Kro. 16:1-3) Janah, sanga mekelek pe pinakitna ras menam ia mate, e pe labo ipindona penampat Jahwe.​—2 Kro. 16:12.

14. Kai si banci sipelajari arah kesalahen Asa?

¹⁴ Sanga tangtangna Asa merentah, iandalkenna Jahwe paksa lit masalah. Tapi bas pudi wari, lanai pindona penampat Jahwe. Sebalikna, iusahakenna sendiri ndungi masalahna. Sanga iserang Israel kalak Juda, ipindo Asa penampat kalak Siria. Tangtangna tempa-tempa berhasil rencanana e. Kepeken, la ndekah kalak e berhasil. Arah sekalak nabi, bagenda nina Jahwe man Asa, “Perban labo Jahwe Dibatandu si andalkenndu tapi raja Siria si andalkenndu, emaka bene kesempatenndu naluken raja Siria.” (2 Kro. 16:7) Kai pelajarenna? Arus kita hati-hati gelah la siakap banci sidungi masalahta sendiri, tapi sidaramilah petunjuk Jahwe si lit bas Pustaka. Aminna pe arus meter siban keputusen, arus kita tenang janah siandalken Jahwe. Pasti isampatiNa kita erban keputusen si tepat.

15. Kai si banci silakoken sanga sibaca Pustaka?

¹⁵ (4) Hapal ayat-ayat Pustaka. Sanga idatndu ayat-ayat bas Pustaka si ncidahken pentingna tetap tenang janah tek man Jahwe, hapallah ayat-ayat e. Gelah banci reh nukahna kapndu ngelakokenca, ersoralah kam mbaca ayat-ayat e. Ntah, banci tulisndu ayat-ayat e janah mulih-ulihlah baca. Iperentahken Jahwe Josua ratur mbaca Undang-Undang Musa ras ngukurisa gelah banci ia jadi kalak si pentar. Kai si ibacana bas undang-undang e, banci ka nampati ia gelah la mbiar sanga arus minpin umat Dibata. (Jos. 1:8, 9) Melala ayat Pustaka si banci nampati kam tetap tenang sanga ngadapi situasi-situasi si erban kam kuatir ntah pe mbiar.​—Ms. 27:1-3; Kua. 3:25, 26.

16. Uga Jahwe nggunaken turang seninata guna nampati kita tetap tenang janah tek man baNa?

¹⁶ (5) Sibanlah rusur waktuta ras umat Dibata. Igunaken Jahwe turang seninata guna nampati kita tetap tenang janah tek man baNa. Bas perpulungen banci sidat manpaat arah khotbah si ipeseh,  arah komentar, bage pe sanga ngerana-ngerana ras turang seninata. (Heb. 10:24, 25) Banci ka kita terpegegehi sanga situriken isi pusuhta man teman-teman si rembak ras kita bas runggun. “Ranan si mehuli” arah sekalak teman banci erban kita lanai kuatirsa.​—Kua. 12:25.

17. Menurut Heber 6:19, uga arapen banci nampati kita tetap tenang sanga ngadapi masalah?

¹⁷ (6) Pegegehi kinitekenndu nandangi arapen bas wari si pepagi. Arapen si ibereken Jahwe “bagi jangkar bas geluhta.” Maksudna, e banci nampati kita gelah tetap tenang aminna pe ngadapi masalah ntah pe sanga kita kuatir. (Baca Heber 6:19.) Ukurilah kerna wari si pepagi si ijanjiken Jahwe. Paksa si e, lanai lit si erbanca kam kuatir. (Jes. 65:17) Bayangken dirindu tading bas doni si mbaru si dem alu kedamen janah lanai lit si erbanca kam mbiar. (Mi. 4:4) Banci ka ipepaguhndu kinitekenndu nandangi arapen i bas wari si pepagi adi iceritakenndu arapenndu man kalak si deban. Emaka, usahakenlah asa ngasupndu erberita ras erban murid. Adi bage banndu, ‘la kam sangsi nandangi arapenndu seh ku kedungenna.’​—Heb. 6:11.

18. Kai si nandangi siadapi, janah kai si nampati kita tetap tenang?

¹⁸ Perban doni enda nandangi ikernepken, banci saja siadapi melala masalah si erban kita kuatir. Ayat tahunen 2021 banci nampati kita tetap tenang sanga ngadapi masalah-masalah e perban siandalken Jahwe labo dirita sendiri. Bas tahun 2021, mari sibuktiken arah perbahanenta maka erkiniteken kita man janji Jahwe enda: “Adi tetap kena tek janah la kena mbiar, megegeh pagi kena.”​—Jes. 30:15.