ARTIKEL PELAJAREN 4
Engkai maka Reh Kita ku Acara Peringeten
“Teruslah lakoken enda jadi peringet-ingeten man bangku.”—LUK. 22:19.
LAGU 20 Pemere si Mehergana
SI IBAHAS *
1-2. (a) Ndigan nge khususna siinget kalak si keleng ateta si enggo mate? (b) Kai si ipetandaken Jesus bas berngi sope ia mate?
LA SOAL asa kai dekahna kalak si keleng ateta enggo mate, tetap nge siinget kalak e. Khususna siinget kalak e bas tanggal kematenna.
2 Tiap tahun, pulung kita radu ras turang seninata si lit i belang-belang doni guna mperingeti kematen kalak si keleng kel ateta eme Jesus Kristus. (1 Pet. 1:8) Ras-ras kita pulung guna nginget kalak si enggo mereken geluhna jadi tebusen man banta guna nelamatken kita arah dosa ras kematen. (Mat. 20:28) Situhuna, merhat kel Jesus gelah inget pengikutna wari kematenna. Bas berngi sope ia mate, petandakenna sada acara man berngi si khusus janah perentahkenna bagenda, “Teruslah lakoken enda jadi peringet-ingeten man bangku.”—Luk. 22:19.
3. Kai kari sibahas bas artikel enda?
3 Arah kerina kalak si reh ku acara Peringeten-ingeten Kematen Kristus, sitik ngenca kalak si arapenna ku surga. Tapi jutan kalak si arapenna nggeluh i doni pe reh ku acara e. Bas artikel enda, sibahas kari engkai maka kerina kalak e semangat kel reh ku acara Peringeten tiap tahunna. Selain si e, sibahas ka kari kai gunana man banta adi reh ku acara e. Gundari, mari sipelajari lebe piga-piga alasen engkai maka kalak si ipilih ku surga reh ku acara e.
ENGKAI MAKA KALAK SI IPILIH KU SURGA REH KU ACARA PERINGETEN?
4. Engkai maka kalak si ipilih ku surga banci man roti ras minem anggur bas acara Peringeten?
4 Tiap tahun, kalak si ipilih ku surga reh ku acara Peringeten guna man roti ras minem anggur. Engkai maka banci pan kalak e roti ras inemna anggur e? Guna ndatken jawapenna, cuba ukuri kai si terjadi bas berngi terakhir Jesus nggeluh i doni. Kenca perayan Paskah, petandaken Jesus sada perayan si mbaru si dungna itandai Peringeten-ingeten Kematen Kristus. Iedarken Jesus roti ras anggur man 11 rasulna si setia janah suruhna pan kalak e roti ras inem kalak e anggur e. Peseh Jesus ka kerna dua perjanjin eme perjanjin si mbaru ras perjanjin Kerajan. * (Luk. 22:19, 20, 28-30) Duana perjanjin e mbuka dalan man rasul-rasul ras kalak si jumlahna enggo itentuken si jadi raja ras imam pagi i surga. (Ket. 5:10; 14:1) Gundari, kalak si ikut bas dua perjanjin e eme kalak si ipilih ku surga si nggeluh denga i doni. Kalak e ngenca si banci man roti ras minem anggur bas acara Peringeten.
5. Kai nge si iteh kalak si ipilih ku surga kerna arapenna?
5 Lit alasen si deban engkai maka tertima-tima kel kalak si ipilih ku surga nandangi acara Peringeten. Bas acara e, banci ukuri kalak e arapenna. Enggo bereken Jahwe arapen si luar biasa man 144.000 kalak si ipilih ku surga. Dat kalak e pagi kegeluhen i surga si la banci mate ras si la banci masap. Merentah pagi kalak e radu ras Jesus Kristus si enggo jadi Raja bage pe radu ras kalak si ipilih ku surga si enggo ipekeke. Si luar biasana ka, banci idah kalak e Dibata Jahwe! (1 Kor. 15:51-53; 1 Joh. 3:2) Teh kalak si ipilih ku surga maka kalak e iundang guna ndatken hak istimewa e i surga! Tapi gelah banci dat kalak e arapenna e, arus kalak e tetap setia seh ngasa kalak e mate. (2 Tim. 4:7, 8) Arapen e tuhu-tuhu erban meriah kel ukur kalak si ipilih ku surga. (Tit. 2:13) Uga kerna ‘biri-biri si deban’? (Joh. 10:16) Kai saja alasenna maka kalak e reh ku acara Peringeten?
ENGKAI MAKA BIRI-BIRI SI DEBAN REH KU ACARA PERINGETEN?
6. Engkai maka biri-biri si deban reh ku acara Peringeten tiap tahun?
6 Biri-biri si deban reh ku acara Peringeten labo guna man roti ras minem anggur, tapi tetap nge meriah ukur kalak e ikut ngenen acara e. Bas tahun 1938, i je me tangtangna kalak si arapenna nggeluh i doni iundang reh ku acara Peringeten. The Watchtower 1 Maret 1938 ngataken, “Biri-biri si deban cocok kel reh ku perpulungen si bage janah banci inen kalak e kai si sangana ilakoken. . . . Kalak e pe banci ikut ermeriah ukur.” Bali bagi tamu si meriah ukurna sanga iundang ku acara perjabun, bage ka me biri-biri si deban, meriah ukurna sanga ikut ku acara Peringeten ras ngenen acara e ilakoken.
7. Engkai maka tertima-tima biri-biri si deban nandangi khotbah Peringeten?
7 Biri-biri si deban pe ukurina kerna arapenna bas acara Peringeten e. Tertima-tima kalak e nandangi khotbah Peringeten, perban bas khotbah e melala ibahas kerna pasu-pasu si dat kalak e pagi sanga Jesus Kristus merentah selaku Raja bas Pemerentahen Seribu Tahun. Bas pemerentahen Jesus e pagi, 144.000 kalak si merentah ras ia, ikut pagi ngubah doni jadi pardis ras sampatina manusia si patuh jadi sempurna. Pasti luar biasa kel akap jutan kalak si reh ku acara Peringeten e sanga bayangkenna janji-janji Pustaka si nandangi terjadi, bagi si icatat bas Jesaya 35:5, 6; 65:21-23; ras Ketangkasen 21:3, 4. Sanga bayangken kalak e kerna masa depan, paksa nggeluh kalak e ras kalak si ikelengina bas doni si mbaru, reh paguhna me arapen kalak e janah ertekad kalak e guna terus ngelayani Jahwe.—Mat. 24:13; Gal. 6:9.
8. Kai deba nari alasenna engkai maka biri-biri si deban reh ku acara Peringeten?
8 Cuba ukuri alasen si deban engkai maka biri-biri si deban reh ku acara Peringeten. Buktiken kalak e atena kekelengenna ras dukungenna man kalak si ipilih ku surga. Enggo inubuatken bas Pustaka maka kompak kel pagi kerja sama antara kalak si ipilih ku surga ras kalak si arapenna nggeluh i doni. Uga carana? Mari sibahas piga-piga contohna.
9. Menurut nubuat bas Sakaria 8:23, uga perasan biri-biri si deban kerna kalak si ipilih ku surga?
9 Baca Sakaria 8:23. Tuhu-tuhu kena kel ku pusuh nubuat si nuriken kerna perasan biri-biri si deban nandangi turang seninana si ipilih ku surga. “Sekalak Jahudi” ras “kena” maksudna eme kalak si ipilih ku surga si nggeluh denga i doni. (Rom. 2:28, 29) “Sepuluh dilaki arah kerina bangsa ras bahasa” maksudna eme biri-biri si deban. ‘Nteguh pagi tagangi kalak e jubah’ kalak si ipilih ku surga. Enda mbuktiken maka biri-biri si deban setia man kalak si ipilih ku surga janah merhat kalak e nembah Jahwe saja radu ras kalak si ipilih ku surga. Emaka wajar nge bas berngi Peringeten, biri-biri si deban reh ku acara e radu ras kalak si ipilih ku surga.
10. Bagi nubuat si icatat bas Esekiel 37:15-19, 24, 25, kai nge si ilakoken Jahwe?
10 Baca Esekiel 37:15-19, 24, 25. Guna erban nubuat enda terjadi, iban Jahwe kalak si ipilih ku surga ras biri-biri si deban kerja sama alu kompak. Bas nubuat e, lit ikataken dua tongkat. Kalak si arapenna ku surga bali bagi tongkat “man Juda” (arah suku e me ipilih raja-raja Israel), janah kalak si arapenna nggeluh i doni bali bagi “tongkat Eperaim.” * Ipersada Jahwe duana kelompok e jadi sada tongkat. Enda ertina ersada kalak e ngelayani Rajana eme Jesus Kristus. Tiap tahun, kalak si ipilih ku surga ras biri-biri si deban reh ku acara Peringeten. Labo kalak e ibagi jadi dua kelompok, tapi jadi “sada rarasen” ras ‘sada permakan.’—Joh. 10:16.
11. Kai si ilakoken “biri-biri” si icatat bas Matius 25:31-36, 40 khususna bas ndukung senina-senina Kristus?
11 Baca Matius 25:31-36, 40. Bas ayat-ayat e, “biri-biri” maksudna kalak benar si nggeluh bas wari-wari pendungi si arapenna nggeluh i doni. Kalak e me si igelari biri-biri si deban. Terus kalak e setia ndukung senina-senina Kristus si tading denga i doni, khususna alu nampati kalak e ndalanken tanggung jawap si seh kel belinna eme erberita ras njadiken murid i sebelang doni.—Mat. 24:14; 28:19, 20.
12-13. Kai deba nari si ilakoken biri-biri si deban bas ndukung senina-senina Kristus?
12 Tiap tahun, piga-piga minggu sope acara Peringeten, idukung biri-biri si deban senina-senina Kristus alu ikut bas mbagiken undangen acara Peringeten i sebelang doni. (Nen kotak “ Enggo nge Kam Ersikap guna Acara Peringeten Tahun Enda?”) Iban kalak e ka pengaturen gelah acara Peringeten banci iban bas kerina runggun i sebelang doni, amin pe buen arah runggun-runggun e labo lit i je kalak si ipilih ku surga. Meriah kel ukur biri-biri si deban ndukung senina-senina Kristus alu cara-cara e ndai. Teh kalak e maka adi bage banna, kai si ilakoken kalak e ianggap Jesus guna ia.—Mat. 25:37-40.
13 La soal kai pe arapenta, lit denga alasen si deban engkai maka reh kita ku acara Peringeten. Mari sibahas.
ENGKAI MAKA KITA KERINA REH KU ACARA PERINGETEN?
14. Uga cara Jahwe ras Jesus mbuktiken kekelengenna si mbelin man banta?
14 Ngata bujur kita perban enggo buktiken Jahwe ras Jesus kekelengenna man banta. Enggo buktiken Jahwe kekelengenNa man banta alu erbage-bage cara. Tapi si mbelinna eme suruhNa anakNa ku doni ngenanami kiniseran ras mate guna kita. (Joh. 3:16) Jesus pe mbelin kel kekelengenna man banta perban nggit ia mereken geluhna. (Joh. 15:13) Labo ndigan pe banci sibalas kekelengen Jahwe ras Jesus man banta. Tapi banci sibuktiken pengatan bujurta arah carata ndalani geluhta tiap wari. (Kol. 3:15) Adi reh kita ku acara Peringeten, banci siinget mulihi kekelengen Jahwe ras Jesus man banta, janah sibuktiken kekelengenta man Jahwe ras Jesus.
15. Engkai maka kalak si ipilih ku surga ras biri-biri si deban tuhu-tuhu ngergai tebusen?
15 Siergai kel tebusen. (Mat. 20:28) Kalak si ipilih ku surga, ergaina kel tebusen. Perban tebusen me si erban kalak e banci ndatken arapen si luar biasa. Perban tek kalak e man korban tebusen Jesus, ianggap Jahwe kalak e kalak si benar janah iangkatNa kalak e jadi anakNa. (Rom. 5:1; 8:15-17, 23) Biri-biri si deban pe ngata bujur kel perban lit tebusen. Perban tek kalak e man korban tebusen Jesus, kalak e ianggap benar i lebe-lebe Dibata, banci ka ilakoken kalak e pelayanen si badia, ras lit arapen kalak e “selamat ngelewati kiniseran si mbelin.” (Ket. 7:13-15) Salah sada cara kalak si ipilih ku surga ras biri-biri si deban mbuktiken pengatan bujurna man tebusen eme alu reh ku acara Peringeten tiap tahun.
16. Kai deba nari alasenta reh ku acara Peringeten?
16 Alasen si debanna engkai maka reh kita ku acara Peringeten eme perban sipatuhi ateta Jesus. La soal ku ja arapenta, sipatuhi ateta perentah si bereken Jesus bas berngi sanga petandakenna acara Peringeten, nina, “Teruslah lakoken enda jadi peringet-ingeten man bangku.”—1 Kor. 11:23, 24.
KAI GUNANA REH KU ACARA PERINGETEN?
17. Engkai maka banci reh rembakna kita ras Jahwe adi reh kita ku acara Peringeten?
17 Reh rembakna kita ras Jahwe. (Jak. 4:8) Bagi si enggo sipelajari, acara Peringeten mereken kesempaten man banta guna ngukuri arapen si enggo bere Jahwe man banta ras ngukuri kekelengenNa si seh kel belinna man banta. (Jer. 29:11; 1 Joh. 4:8-10) Adi siukuri si e kerina, reh bagesna me kekelengenta man Jahwe ras reh rembakna kita ras Ia.—Rom. 8:38, 39.
18. Adi siukuri usihen arah Jesus, teriahken kita ngelakoken kai?
18 Reh belinna me sura-surata ngusih Jesus. (1 Pet. 2:21) Piga-piga wari sope acara Peringeten, sibaca ateta ayat-ayat Pustaka kerna minggu terakhir kegeluhen Jesus i doni, kerna kematenna, ras kekekenna. Kenca si e, bas berngi Peringeten, sibegiken me khotbah kerna kekelengen Jesus man banta. (Ep. 5:2; 1 Joh. 3:16) Sanga sibaca kerna pengorbanen Jesus ras siukuri alu mbages, tersuruh me ukurta ‘ngikutken dalan geluhna.’—1 Joh. 2:6.
19. Uga carana gelah tetap kita bas kekelengen Dibata?
19 Reh belinna sura-surata gelah tetap bas kekelengen Dibata. (Jud. 20, 21) Banci kita tetap bas kekelengen Dibata adi silakoken asa ngasupta matuhi Ia, mpebadia gelarNa, ras erban meriah ukurNa. (Kua. 27:11; Mat. 6:9; 1 Joh. 5:3) Acara Peringeten mpebelin sura-surata guna mbuktiken arah kegeluhenta tiap wari maka tetap ateta bas kekelengen Jahwe seh rasa lalap.
20. Kai saja alasenna reh kita ku acara Peringeten?
20 La soal arapenta nggeluh rasa lalap i surga ntah pe i doni, lit alasen si penting guna reh ku acara Peringeten. Tiap tahun, sanga pulung kita ras-ras bas tanggal e, siinget kematen kalak si keleng ateta eme Jesus Kristus. Si pentingna, siinget kekelengen si mbelinna si buktiken Jahwe man banta alu mereken AnakNa jadi tebusen. Tahun enda acara Peringeten iban bas wari Jumat, 15 April 2022. Keleng ateta Jahwe ras AnakNa. Emaka bas tanggal kematen Jesus, la lit siakap si pentingen asangken reh ku acara Peringeten.
LAGU 16 Puji Jahwe ras Jesus, AnakNa
^ La soal arapenta nggeluh i surga ntah pe bas pardis i doni, merhat kita reh ku acara Peringeten tiap tahun. Engkai maka kita reh ku acara e ras uga carana gelah acara e erguna man banta? Bas artikel enda, sibahas kari jawapenna arah Pustaka.
^ Guna meteh terbuen kerna perjanjin si mbaru ras perjanjin Kerajan, nen artikel Menara Pengawal 15 Oktober 2014, hal. 15-17, si erjudul “Kamu Akan Menjadi ‘Kerajaan Imam.’”
^ Guna meteh terbuen kerna nubuat dua tongkat si icatat bas Esekiel pasal 37, nen buku Dungna Kerina Kalak Nembah Jahwe Saja!, hal. 130-135, par. 3-17.