ARTIKEL PELAJAREN 5
“Gunakenlah Waktu Kena alu Mehuli”
“Perdiatekenlah cara kena nggeluh, gelah kena nggeluh selaku kalak pentar, labo selaku kalak si la pentar. Gunakenlah waktu kena alu mehuli.”—EP. 5:15, 16.
LAGU 8 Jahwe si Njaga Kita
SI IBAHAS *
1. Uga carata nggunaken waktuta ras Jahwe?
MERIAH siakap nggunaken waktuta ras kalak si keleng ateta. Kalak si enggo erjabu, meriah kel kapna nggunaken waktuna ras teman geluhna. Anak muda, meriah kapna nggunaken waktuna ras teman-teman kompakna. Selain si e, meriah siakap nggunaken waktuta ras turang seninata bas runggun. Tapi si pentingna, meriah siakap nggunaken waktuta ras Dibatata. Banci silakoken si e alu ertoto man baNa, mbaca kataNa bas Pustaka, ras ngukuri sura-suraNa bage pe sipat-sipatNa si luar biasa. Pasti meherga kel siakap nggunaken waktuta ras Jahwe!—Ms. 139:17.
2. Engkai maka mon-mon mesera siakap ndarami waktu ngelakoken kegiaten rohani?
2 Amin pe meriah siakap nggunaken waktuta ras Jahwe, tapi lit tentangenna. Perban sibuk kel kita, banci saja mesera siakap ndarami waktu guna ngelakoken kegiaten rohani. Perban melala kel waktuta guna erdahin, ndalanken tanggung jawap man keluarga, ras kegiaten si debanna, banci saja lanai siakap lit waktuta guna ertoto, erlajar, ntah pe ngukuri kai si enggo sipelajari.
3. Kai deba nari si banci erban keri waktuta?
3 Lit deba nari si banci erban keri waktuta. Adi la kita hati-hati, banci saja silakoken kegiaten si labo salah tapi mbue kel keri banna waktuta. Contohna gawah-gawah ras hiburen. Memang perlu kita waktu guna santai-santai. Amin pe gawah-gawah ras hiburen e banci erguna, tapi e banci erban lanai lit waktuta ngelakoken kegiaten rohani. Emaka, perlu sitentuken asa buena waktuta guna hiburen ntah pe gawah-gawah.—Kua. 25:27; 1 Tim. 4:8.
4. Kai nge si nandangi sibahas?
4 Bas artikel enda, sibahas kari engkai maka perlu sitetapken kai si pentingna bas geluhta. Sibahas ka kari uga carana nggunaken waktuta ras Jahwe alu cara si mehuli ras kai gunana man banta.
BANLAH PILIHEN SI MEHULINA
5. Uga Epesus 5:15-17 banci nampati anak muda erban keputusen si mehulina bas geluhna?
5 Pilihlah si mehulina bas geluhndu. Kena anak muda, pasti merhat kena erban pilihen si mehulina bas geluh kena. Guru-guru ntah anggota keluarga kena si la Saksi banci saja ngiahken kena kuliah gelah dat kena dahin si mejile. Tapi seh kel buena waktu si iperluken adi kuliah kena. Lit ka orang tua ras teman-teman bas runggun si banci saja ngiahken kena gelah fokus ngelayani Jahwe. Emaka, selaku anak muda si engkelengi Jahwe, uga cara kena erban keputusen si mehulina? Cuba baca kena Epesus 5:15-17, janah ukuri ayat-ayat e. (Baca.) Kenca baca kena ayat-ayat e, banci ukuri kena penungkunen-penungkunen enda: ‘Kai kin “peraten Jahwe”? Kai kin keputusen si erban meriah ukurNa? Keputusen si apai nge si banci nampati aku nggunaken waktu alu mehuli?’ Ingetlah, “wari-wari enda jahat,” janah doni si ikuasai Setan enda kentisik nari ihancurken. Seh kel ulina adi gunaken kena geluh kena ngelakoken kai si erban meriah ukur Jahwe.
6. Pilihen kai si iban Maria, janah engkai maka pilihenna e mehuli?
6 Pilihlah kai si lebih penting. Sanga sigunaken ateta waktuta alu mehuli, banci saja lit dua pilihenta janah si apai pe sipilih situhuna labo salah. Banci kita erlajar kerna si e arah kai si terjadi sanga idahi Jesus Maria ras Marta. Meriah kel ukur Marta ngalo-ngalo Jesus, emaka melala kel sikapkenna pangan man bana. Tapi seninana Maria kundul i deher Jesus guna megiken kai si ajarkenna. Labo salah si ilakoken Marta e, mehuli nge si ilakokenna e, tapi ikataken Jesus enggo “pilih Maria bagin si mehulina.” (Luk. 10:38-42) Banci saja lupa nge dungna Maria kai si ipan kalak e paksa si e, tapi tek kita labo pernah ia lupa kai si enggo ajarken Jesus. Ergai Maria waktuna ras Jesus, kita pe siergai waktuta guna mpepaguh hubungenta ras Jahwe. Uga carana?
SIGUNAKENLAH WAKTUTA RAS JAHWE ALU MEHULI
7. Engkai maka penting kel ertoto, erlajar, ras ngukuri kai si ipelajari?
7 Arus siinget maka ertoto, erlajar Pustaka, ras ngukuri kai si ipelajari eme bagin arah carata nembah Dibata. Sanga ertoto kita, ercakap-cakap kita ras Bapakta si i surga si keleng kel ateNa kita. (Ms. 5:7) Sanga sipelajari Pustaka, sidat me “pemeteh kerna Dibata,” Sumber kerina kepentaren. (Kua. 2:1-5) Sanga siukuri alu mbages kai si enggo sipelajari kerna Jahwe, siukuri me sipat-sipatNa si luar biasa janah siinget uga luar biasana sura-suraNa man banta ras man kerina jelma. Enda me cara si mehulina bas nggunaken waktuta. Tapi waktuta terbatas ngelakoken si e. Emaka, kai si banci silakoken gelah banci sigunaken waktuta alu mehuli?
Banci nge daramindu ingan si tenang guna erlajar pribadi? (Nen paragrap 8-9)
8. Kai si banci sipelajari arah Jesus?
8 Adi banci, daramilah ingan si tenang. Cuba ukuri contoh si iban Jesus. Sope ibenakenna pelayanenna i doni, lit 40 wari dekahna ia i taneh mesawang. (Luk. 4:1, 2) Bas ingan si tenang e, banci Jesus ertoto man Jahwe janah ukurina peraten Bapakna man bana. Enda pasti nampati Jesus guna ersikap ngadapi tentangen si nandangi terjadi. Uga carandu ngusih Jesus? Adi enterem anggota keluargandu, banci saja labo lalap menukah ndarami ingan si tenang i rumah. Adi bage si terjadi, banci saja arus daramindu ingan si tenang i darat rumah. E me si ilakoken Julie sanga ertoto atena man Jahwe. Ia ras perbulangenna tading bas sada apartemen si kitik i Prancis, janah i je mesera kel ndarami ingan si tenang, si la lit ngganggusa. Bagenda nina Julie, “Tiap wari lawes aku ku taman. I je banci aku ertoto alu tenang janah kuturiken kerina isi pusuhku man Jahwe.”
9. Kai buktina maka ergai Jesus kel hubungenna ras Jahwe?
9 Jesus seh kel sibukna. Bas pelayanenna i doni enterem kalak si ngikutken ia arah sada ingan ku ingan si deban, kerina kalak e merhat ndeher ras ia. Bas sada kesempaten, “kerina penduduk kota pulung pas i lebe-lebe pintu” guna ngenen ia. Amin pe bage, pastiken Jesus maka lalap lit waktuna guna ertoto man Jahwe. Sope lenga terbit matawari, daramina “ingan si melungen” janah i je banna waktuna ras Bapakna.—Mrk. 1:32-35.
10-11. Bagi si ikataken bas Matius 26:40, 41, kai nasehat si penting si bereken Jesus man murid-muridna i Taman Getsemane, tapi kai si terjadi?
10 Bas berngi terakhir kegeluhen Jesus i doni, sanga nandangi dung pelayanenna, mulihi ka darami Jesus ingan si tenang gelah banci ia rukur ras ertoto i je. Datna ingan si tenang e bas Taman Getsemane. (Mat. 26:36) Bas ingan e, bereken Jesus nasehat si penting man murid-muridna kerna toto.
11 Cuba ukuri kai si terjadi. Sanga seh kalak e bas Taman Getsemane, banci saja enggo lewat tengah berngi. Ipindo Jesus gelah rasul-rasulna ‘tetap erjaga-jaga,’ kenca si e lawes ia ertoto. (Mat. 26:37-39) Tapi sanga ia ertoto, enggo tunduh rasul-rasulna e. Sanga dapeti Jesus kalak e enggo tunduh, persingetina mulihi kalak e, nina, “Tetaplah erjaga-jaga janah teruslah ertoto.” (Baca Matius 26:40, 41.) Teh Jesus maka enggo latih kel ukur kalak e janah ngalah kel daging kalak e. Iangka Jesus maka amin pe kalak e semangat, tapi ‘daging kalak e lemah.’ Kenca ertoto Jesus dua kali nari janah mulihken ia, dapetina murid-muridna enggo tunduh, labo ertoto.—Mat. 26:42-45.
Banci nge banndu waktundu guna ertoto sanga lenga kapndu latihsa? (Nen paragrap 12)
12. Kai si banci silakoken adi mesera siakap ertoto perban latihsa siakap rukur ntah pe ngalahsa siakap dagingta?
12 Pilihlah waktu si cocok. Mon-mon sanga latihsa siakap rukur ntah pe ngalahsa siakap dagingta, banci saja mesera siakap ertoto. Bage nge si gejapkenndu? Enterem turang seninata pe bage perasanna. Kai si banci lakokenndu? Piga-piga kalak si biasana ertoto sanga berngi, usahakenna terlampasen ertoto sanga lenga kapna latihsa. Si debanna enggo gejapkenna maka posisina sanga ertoto mbelin pengaruhna. Tapi, uga adi mesera siakap ertoto perban kuatirsa kita ras latihsa siakap? Siturikenlah kerina perasanta man Jahwe. Teklah kita maka pasti angkai Bapakta si perkeleng perasanta.—Ms. 139:4.
Sanga bas perpulungen, banci nge aturndu gelah pesan masuk ras e-mail la ngganggu kam? (Nen paragrap 13-14)
13. Uga maka perangkat elektronik banci ngganggu waktuta ras Jahwe?
13 Ula pediat kai pe ngganggu kita sanga erlajar. Labo ertoto ngenca si banci mpepaguh hubungenta ras Jahwe. Mpelajari Kata Dibata ras reh ku perpulungen pe banci nampati kita reh deherna ras Dibata. Kai deba nari si banci silakoken gelah banci sigunaken waktuta alu mehuli sanga erlajar ntah pe sanga pulung? Cuba ukuri penungkunen enda, ‘Kai nge si banci ngganggu aku sanga pulung ntah pe sanga erlajar?’ Banci saja telepon masuk, e-mail, ntah pe pesan si masuk ku HP-ndu banci ngganggu kam. Perangkat elektronik memang erguna janah miliaren kalak enggo lit perangkat elektronikna. Tapi piga-piga peneliti ngataken maka banci kita terganggu adi lit HP-ta i deherta amin pe la sipake. Bagenda nina sekalak profesor psikologi, “Lanai kam banci konsentrasi ngelakoken kai si dahikenndu . . . pasti ukurkenndu si deban.” Sope lenga acara pertemuan wilayah ntah pe regional, biasana iingetken kita gelah siaturken perangkat elektronikta gelah la ngganggu kalak si deban. Banci nge silakoken bage sanga kita sisada gelah perangkat elektronikta la ngganggu kita sanga sigunaken waktuta ras Jahwe?
14. Bagi si ikataken Pilipi 4:6, 7, uga cara Jahwe nampati kita gelah fokus?
14 Pindolah penampat Jahwe gelah banci kita fokus. Adi mulai siukuri si deban sanga kita erlajar ras pulung, pindolah penampat Jahwe gelah lanai siukuri si deban. Adi lit si man ukurenta, banci saja mesera siakap fokus ngelakoken kegiaten rohani. Tapi perlu tetap silakoken kegiaten rohani. Ertotolah gelah kedamen arah Dibata banci njaga pusuh ras ‘perukurenta.’—Baca Pilipi 4:6, 7.
MBELIN KEL GUNANA NGGUNAKEN WAKTU RAS JAHWE
15. Kai salah sada gunana adi sigunaken waktuta ras Jahwe?
15 Adi sigunaken waktuta ngerana ras Jahwe, megiken Ia, ras ngukuri kerna Ia, melala kel gunana man banta. Kai saja gunana? Si pertama, reh beluhna me kita erban keputusen si mehuli. Ikataken bas Pustaka maka “kalak si erteman ras kalak pentar jadi pentar.” (Kua. 13:20) Jahwe kap Sumber kepentaren. Emaka adi sigunaken waktuta ras Ia, reh pentarna me kita. Alu bage, siban me meriah ukur Jahwe ras la silakoken kai si erban ceda ukurNa.
16. Engkai maka banci reh beluhna kita ngajar adi sigunaken waktuta ras Jahwe?
16 Si peduaken, reh beluhna me kita ngajar. Sanga siajarken Pustaka man kalak si deban, salah sada tujunta si pentingna eme nampati kalak si erlajar e gelah reh rembakna ras Jahwe. Adi reh rusurna kita ertoto man Bapakta si i surga, reh belinna ka me kekelengenta man baNa, janah reh beluhna kita nampati kalak si erlajar Pustaka ras kita gelah keleng atena Jahwe. Bage me si ilakoken Jesus. Ceritakenna uga perkelengna Jahwe e, alu bage murid-muridna pe banci ka keleng atena Jahwe.—Joh. 17:25, 26.
17. Engkai maka ertoto ras erlajar pribadi banci mpepaguh kinitekenta?
17 Si peteluken, reh paguhna me kinitekenta. Pernah nge kam ertoto mindo petunjuk, pengapul, ras penampat arah Dibata? Tiap ijawap Jahwe totota, pasti reh paguhna kinitekenta. (1 Joh. 5:15) Kai deba nari si banci mpepaguh kinitekenta? Pelajaren pribadi. Bagi si ikataken Pustaka banci kita erkiniteken kenca megi ntah pe erlajar kerna Dibata. (Rom. 10:17) Tapi, guna mpepaguh kinitekenta labo bias terjeng erlajar saja. Kai deba nari si perlu silakoken?
18. Engkai maka perlu siukuri kai si enggo sipelajari? Ban contohna.
18 Perlu siukuri kai si enggo sipelajari. Cuba perdiateken pengalamen arah penulis Masmur 77. Latih kel ukurna perban akapna ia ras kalak Israel si debanna enggo itulak Jahwe. Lanai ia banci tunduh sanga berngi perban kuatir kel ia ngukuri si e. (Ayat 2-8) Memang tehna kai saja si enggo lakoken Jahwe man umatNa. Amin pe bage, tersungkun-sungkun denga ia, “Lupa nge Dibata ncidahken ateNa jadi, ntah bene nge perkuah ateNa perban rawaNa?” (Ayat 9) Emaka, kai si lakokenna? Bagenda nina man Jahwe, “Kuukuri pagi kerina perbahanenNdu, kuukuri kerina si enggo lakokenNdu.” (Ayat 12) Ukurina ka kai si enggo ilakoken Jahwe bage pe kekelengen ras perkuah ate si enggo buktikenNa mbarenda. (Ayat 11) Kenca ukurina si e kerina, dungna tek me ia maka labo pernah itadingken Jahwe umatNa. (Ayat 15) Bage ka pe gundari, kinitekenta banci reh paguhna adi siukuri kai si enggo ilakoken Jahwe man umatNa, ras kai si enggo lakokenNa man banta sekalak-sekalak.
19. Kai deba nari gunana adi sigunaken waktuta ras Jahwe?
19 Si peempatken, ras si pentingna, reh belinna me kekelengenta man Jahwe. Kekelengen me si ngiahken kita patuh man Jahwe, erban pengorbanen si erban meriah ukurNa, ras megenggeng ngadapi kerina ujin kiniteken. (Mat. 22:37-39; 1 Kor. 13:4, 7; 1 Joh. 5:3) La lit si ergan asangken banci rembak ras Jahwe!—Ms. 63:1-8.
20. Kai nge si ateta silakoken gelah lit waktuta ras Jahwe?
20 Ingetlah maka ertoto, erlajar, ras ngukuri kai si ipelajari eme bagin arah carata nembah Jahwe. Bali bagi Jesus, sanga sigunaken waktuta ras Jahwe, daramilah ingan si tenang. Pedauhlah kerina si banci erban kita terganggu. Pindolah penampat Jahwe gelah banci kita fokus ngelakoken kegiaten rohani. Adi sigunaken waktuta alu mehuli, pasti bere Jahwe kita upah guna nggeluh si rasa lalap bas doni si mbaru.—Mrk. 4:24.
LAGU 28 Teman Jahwe
^ Jahwe kap Temanta si mehulina. Siergai hubungenta ras Ia janah merhat kita nandai Ia terdeheren. Biasana perlu waktu adi sitandai ateta sekalak jelma janah erteman ras ia, bage ka pe perlu waktu gelah banci terus reh rembakna ras Jahwe. Tapi, nggeluh bas jaman gundari seh kel sibukna. Emaka uga carana gelah lit waktuta guna reh deherna ras Bapakta si i surga, janah kai gunana man banta?