ARTIKEL PELAJAREN 1
“Kalak si Ndarami Jahwe Labo Pagi Kurang Kai Pe si Mehuli”
AYAT TAHUNEN 2022: “Kalak si ndarami Jahwe labo pagi kurang kai pe si mehuli.”—MS. 34:10.
LAGU 4 “Jahwe kap Permakanku”
SI IBAHAS *
Igejapken Daud maka ia ‘labo kurang kai pe si mehuli’ amin pe bas situasi si sulit (Nen paragrap 1-3) *
1. Situasi sulit si uga si adapi Daud?
BAS sada paksa, Daud sangana melariken diri. Engkai? Perban Saul si jadi raja Israel paksa si e, bunuhna tena Daud. Bas sada wari, perlu Daud pangan, emaka lawes ia ku kuta Nop, janah lima roti saja ngenca si pindona. (1 Sam. 21:1, 3) Bas pudi wari, cebuni ia ras anak buahna bas sada gua. (1 Sam. 22:1) Engkai maka Daud banci lit bas situasi si bage?
2. Kai si ilakoken Saul, janah engkai maka e mbahayaken dirina? (1 Samuel 23:16, 17)
2 Cian kel ate Saul man Daud, perban enterem kalak si jadi atena ngidah Daud ras rusur ka ia menang bas perang. Iteh Saul maka enggo itulak Jahwe ia perban la ia patuh, janah enggo ipilih Jahwe Daud si jadi raja. (Baca 1 Samuel 23:16, 17.) Amin pe bage, Saul denga si erkuasa jadi raja bas Israel, lit ka pasukenna si mbelin, ras enterem si ndukung ia. Emaka, terpaksa Daud melariken diri. Akap Saul nge banci ihalangina sura-sura Jahwe erban Daud jadi raja? (Jes. 55:11) La lit ikataken Pustaka kerna si e. Tapi si pasti, perbahanen Saul e mbahayaken dirina, perban ise pe si ngelawan Dibata pasti talu!
3. Uga cara Daud ngadapi situasi si sulit?
3 Daud e kalakna meteruk ukur. Labo lit sura-surana jadi raja bas Israel, Jahwe nge si milih ia jadi raja. (1 Sam. 16:1, 12, 13) Tapi ianggap Saul Daud e musuhna. Amin pe terancam geluh Daud, labo pernah salahkenna Jahwe. Labo ka ia mengeluh sanga kurang panganna, ntah pe sanga arus ia cebuni bas gua. Banci saja bas gua e me iban Daud lagu pujin si mejile si lit i je kata-kata si jadi ayat temata bas artikel enda: “Kalak si ndarami Jahwe labo pagi kurang kai pe si mehuli.”—Ms. 34:10.
4. Penungkunen kai kari sibahas, ras engkai?
4 Gundari, enterem umat Jahwe si kurang panganna bage pe keperlunna si debanna, * terlebih sedekah pandemi mbaru-mbaru enda. Perban “kiniseran si mbelin” enggo reh deherna, situasita pasti reh susahna. (Mat. 24:21) Emaka gundari mari sibahas empat penungkunen enda: Kai maksud Daud ‘labo kurang kai pe si mehuli’? Engkai maka arus puas kita nandangi kai pe si lit bas kita? Engkai maka banci kita tek pasti lindungi Jahwe kita? Uga carata ersikap gundari nari guna ngadapi kiniseran si nandangi reh?
“LABO PAGI AKU KURANG KAI PE”
5-6. Uga Masmur 23:1-6 nampati kita ngangkai kata-kata Daud maka umat Dibata “labo pagi kurang kai pe si mehuli”?
5 Kai maksud Daud sanga katakenna maka umat Jahwe “labo pagi kurang kai pe si mehuli”? Guna ngangkaisa, cuba perdiateken kata-kata si mirip si lit bas Masmur 23. Masmur enda pe Daud si nulissa. (Baca Masmur 23:1-6.) Bas ayat pertama, bagenda nina Daud, “Jahwe kap Permakanku. Labo pagi aku kurang kai pe.” Kenca si e, ikataken Daud kai saja situhu-tuhu penting. Contohna, pasu-pasu si gejapkenna perban andalkenna Jahwe, Permakanna. Ibaba Jahwe ka ia “ku dalan si benar” janah setia Jahwe ndukung ia bas masa si senang ras susah. Iteh Daud maka amin pe ia tading bas ‘mbalmbal Jahwe si meratah,’ labo ertina la lit masalahna. Mon-mon kitik ukurna, tempa-tempa bagi sanga erdalan bas “lembah si gelap.” Selain si e, lit ka musuh si arus adapina. Tapi, perban Jahwe permakanna, ‘la ia mbiar bahaya.’
6 Emaka, kai maksudna Daud ‘labo kurang kai pe si mehuli’? Lit bas ia kerina si iperlukenna gelah tetap rembak ras Jahwe. Keriahen ukurna labo itentuken erta ras sen. Puas Daud nandangi kerina si isikapken Jahwe. Si pentingna man bana eme pasu-pasu ras perlindungen arah Dibatana.
7. Menurut Lukas 21:20-24, tentangen kai si adapi kalak Kristen i Judea bas abad pertama?
7 Arah kata-kata Daud, sipelajari maka ula min sen ras erta siakap si pentingna. Memang meriah siakap adi lit sen ras ertata. Tapi ula min e siakap si pentingna bas geluhta. Si e me si arus iinget kalak Kristen si tading i Judea bas abad pertama. (Baca Lukas 21:20-24.) Enggo persingeti Jesus kalak e maka adi idah kalak e Jerusalem “ikepung tentera si erkemah,” arus kalak e “kiam ku gunung-gunung” gelah banci selamat. Enda ertina arus mbelin kel pengorbanen si iban kalak e. Sada artikel bas Menara Pengawal tahun 1999 ngataken, “Tadingken kalak e jumana, rumahna, janah erta si lit bas rumahna pe la buat kalak e. Tek kel kalak e man perlindungen Jahwe ras penampatNa. Pentingen akap kalak e tek man Jahwe asangken kerina si penting si debanna.”
8. Kai si banci sipelajari arah pengalamen kalak Kristen i Judea bas abad pertama?
8 Kai pelajarenna man banta? Bas artikel Menara Pengawal e pe ikataken maka banci saja siadapi pagi ujin si bage. Carata ngadapi ujin e banci ncidahken apai siakap si pentingna, erta ras sen ntah keselamaten si ijanjiken Dibata. Bas artikel e pe iban kesimpulen bagenda, “Sanga kiam pagi kita, banci saja susah siakap ras arus siban pengorbanen. Arusna enggo min kita ersikap ngelakoken kai pe, bagi si ilakoken turang seninata bas abad pertama si kiam arah Judea nari.” *
9. Nasehat Paulus man kalak Heber erban kam tek nandangi kai?
9 Banci nge bayangkenndu uga perasan kalak Kristen paksa si e? Arus kalak e pindah ku ingan si mbaru janah menam kerina ertana tadingkenna. Pasti mberat kel kap kalak e paksa si e. Arus kalak e tek maka pasti isikapken Jahwe keperlunna. Tapi situhuna, kalak e enggo ipersiapken guna ngadapi ujin kiniteken e. Lima tahun sope Jerusalem ikepung pasuken Roma, enggo bereken Rasul Paulus nasehat si penting enda man kalak Heber: “Ula min kena mata duiten, puaslah kena man kai si lit, sebap enggo kataken Dibata, ‘Labo ndigan pe kam Kutadingken, labo ndigan pe kam Kupediat.’ E me sebapna kita jadi pang janah sikataken, ‘Jahwe kap si nampati aku, emaka labo aku mbiar. Kai kin si banci lakoken manusia man bangku?’” (Heb. 13:5, 6) Kalak Kristen si enggo ngikutken nasehat Paulus e, pasti reh nukahna kapna nggeluh bas ingan si mbaru amin pe sitik kel ngenca sen ras ertana. Tek kel kalak e maka pasti bereken Jahwe keperlunna. Gundari pe, banci kita tek nandangi kata-kata Paulus e.
“PUAS MIN SIAKAP ADI LIT PANGANTA RAS PAKENTA”
10. ‘Rahasia’ kai si bagiken Paulus man banta?
10 Bereken Paulus nasehat si mirip man Timotius, janah nasehatna e erguna ka man banta. Bagenda itulisna, “Emaka puas min siakap adi lit panganta ras pakenta.” (1 Tim. 6:8) Lanai nge banci sipan pangan si entabeh, sikap inganta tading, ntah pe situkur baju si mbaru? Labo bage maksudna. Maksud Paulus eme arus kita puas nandangi kai pe si lit bas kita. (Pil. 4:12) E me ‘rahasia’ Paulus bas ngadapi kerina situasi. Perlu siinget maka si mehergana bas kita labo sen ras erta, tapi hubungenta ras Dibatata.—Hab. 3:17, 18.
Bangsa Israel “la kurang kai pe” sanga kalak e i taneh mesawang 40 tahun dekahna. Banci nge puas siakap nandangi kai si lit bas kita gundari? (Nen paragrap 11) *
11. Kai si banci sipelajari kerna perasan puas arah kata-kata Musa man kalak Israel?
11 Situhuna teh Jahwe nge kai keperlunta, tapi banci saja la seri perukurenta ras Jahwe kerna keperlunta. Cuba perdiateken kai nina Musa man kalak Israel sanga kalak e tading sedekah 40 tahun bas taneh mesawang. Nina, “Enggo pasu-pasu Dibata Jahwe kena bas kerina si lakoken kena. TehNa perdalanen kena bas taneh mesawang si mbelang enda. Lit 40 tahun dekahna temani Jahwe kena janah la kena kurang kai pe.” (Ul. 2:7) I bas 40 tahun e, bereken Jahwe manna jadi pangan kalak e. Selain si e, baju si ipake kalak e mulai ndarat arah Mesir nari, la ceda-ceda. (Ul. 8:3, 4) Banci saja, lit kalak Israel si erpengakap maka si bereken Jahwe e lenga bias. Tapi persingeti Musa kalak e maka situhuna kerina si iperluken kalak e enggo lit. Gundari pe, bereken Jahwe keperlunta. Amin pe pemereNa e teridah biasa saja, perlu kita puas nandangi kerina pemereNa e. Pasti meriah ukurNa adi tetap kita ngata bujur ras sianggap maka si e kerina pasu-pasu arah Ia nari.
TEKLAH MAKA PASTI LINDUNGI JAHWE KITA
12. Kai si mbuktiken maka Daud ngandalken Jahwe, labo dirina?
12 Teh Daud maka Jahwe setia ras ermediate kel man kalak si engkelengi Ia. Sanga tulisna Masmur 34, situhuna geluh Daud sangana terancam. Tapi perban erkiniteken ia, tempa-tempa banci idahna ‘malekat Jahwe erkemah i sekelilingna.’ (Ms. 34:7, ctt.) Banci saja, bayangken Daud malekat Jahwe bagi prajurit si sangana erkemah ras erjaga-jaga, alu bage enggo ersikap ngelawan musuh. Situhuna, Daud e sekalak prajurit si perpang janah enggo erjanji Jahwe maka banNa ia jadi raja. Daud pe beluh make kalimbawang ras pedang. Amin pe bage, andalkenna Jahwe, labo dirina. (1 Sam. 16:13; 24:12) Tek Daud maka malekat Jahwe banci ‘nelamatken kalak si mbiar man Dibata.’ Memang gundari, la banci siarapken ban Jahwe mukjizat ngelindungi kita. Kalak si ngandalken Jahwe pe banci saja mate. Tapi siteh maka kalak e pasti ipekeke ras nggeluh seh rasa lalap.
Bas kiniseran si mbelin, banci saja iserang Gog arah Magog kita bas inganta tading. Tapi, banci kita tetap tenang perban iteh Jesus ras malekat-malekatna kai si sangana terjadi ras pasti belana kita. (Nen paragrap 13)
13. Engkai maka iakap Gog arah Magog nukah naluken kita, tapi engkai maka la perlu kita mbiar? (Nen gambar sampul.)
13 Ntisik nari, siadapi me ujin kiniteken. Umat Dibata nandangi iserang Gog arah Magog eme gabungen arah bangsa-bangsa. Banci saja terancam siakap geluhta. Sanga si e terjadi, arus kita tek maka pasti nge kita iselamatken Jahwe janah ngasup nge Ia. I lebe-lebe bangsa-bangsa, kita bagi biri-biri si la ergegeh ras la lit si ngelindungisa. (Esek. 38:10-12) La lit senjatata, janah la ka kita pernah iajari erperang. Emaka, akap kalak e nukah nge kita italuken. Tapi situhuna, lit pasuken malekat si erkemah i sekelilingta ras enggo ersikap guna mbela kita. Engkai maka la banci idah bangsa-bangsa kerna si e? Perban kalak e la seri ras kita. La kalak e erkiniteken man Jahwe. Sengget kel pagi kalak e sanga pasuken malekat erperang guna kita!—Ket. 19:11, 14, 15.
ERSIKAPLAH GUNDARI NARI
14. Kai si banci silakoken gundari gelah ersikap ngadapi ujin si nandangi reh?
14 Kai si banci silakoken gundari gelah ersikap ngadapi ujin si nandangi reh? Si pertama, perlu sipastiken maka labo siban sen ras erta si pentingna bas geluhta. Perban bas sada wari pagi, arus sitadingken si e kerina. Perlu puas siakap nandangi kai si lit bas kita. Perlu ka siinget maka arusna si erban kita ermeriah ukur eme hubungenta si rembak ras Jahwe. Reh bagesna sitandai Dibatata, reh tekna kita maka ngasup Ia ngelindungi kita sanga kita iserang Gog arah Magog.
15. Pengalamen kai saja si erban Daud tek maka pasti lalap isampati Jahwe ia?
15 Cuba perdiateken kai deba nari si banci sipelajari arah Daud gelah banci kita ersikap guna ngadapi ujin. Bagenda nina Daud, “Gejapkenlah janah nenlah maka mehuli kap Jahwe, kalak si erlindung man baNa pasti ermeriah ukur.” (Ms. 34:8) Arah kata-kata Daud e, banci siteh kai si erban ia tek maka Jahwe banci iandalken. Enggo rusur andalkenna Jahwe janah la pernah ban Jahwe ia kecewa. Sanga Daud nguda denga, pernah ilawanna Goliat, sekalak prajurit Pilisti, si dagingna seh kel galangna janah seh kel gegehna. Ikataken Daud bagenda man bana, “Bas wari enda serahken Jahwe kam ku tanku.” (1 Sam. 17:46) E me si terjadi. Bas pudi wari, sanga Daud ngelayani Raja Saul, mulih-ulih rusaha kel raja e munuh Daud. Tapi “Jahwe ras Daud” kap. (1 Sam. 18:12) Perban enggo rusur gejapken Daud penampat Jahwe, emaka tek ia pasti nge sampati Jahwe ia ngadapi masalahna.
16. I bas situasi kai saja banci ‘sigejapken’ maka Jahwe e mehuli?
16 Adi gundari nari lalap siandalken Jahwe, banci reh tekna kita maka ngasup Ia nelamatken kita pagi. Mon-mon, banci saja perlu sipindo ijin man bosta gelah banci siikutken pertemuan wilayah ntah pe pertemuan regional. Ntah banci saja perlu sipindo ijin gelah jamta erdahin isesuaiken, gelah banci kita ngikutken kerina acara perpulungen ras reh rusurna erberita. Guna ngelakoken si e, perlu kita tek man Jahwe ras siandalken Ia. Tapi uga adi la bere bosta kita ijin ras pecatna kita? Tek nge kita maka pasti nge lalap bere Jahwe keperlunta ras labo pernah kita ipediatNa ntah pe itadingkenNa? (Heb. 13:5) Siingetlah maka Jahwe setia kap. Enterem turang senina si ngelayani sepenuh waktu, enggo nggejapken uga Jahwe nampati ia ngadapi situasi si susah.
17. Kai ayat tahunenta bas tahun 2022, ras engkai maka e cocok?
17 Perban Jahwe ras kita, la perlu kita mbiar kerna kai si nandangi terjadi. Adi lalap sipelebe KerajanNa, labo ndigan pe kita itadingken Dibatata. Emaka mulai gundari nari, perlu kita ersikap ngadapi masa si sulit si nandangi reh ras tek kita maka pasti nge lalap kita isampati Jahwe. Guna ngingetken kita maka penting kel kerna si e, enggo ipilih Badan Pinpinen Masmur 34:10 jadi ayat tahunenta bas tahun 2022 eme: “Kalak si ndarami Jahwe labo pagi kurang kai pe si mehuli.”
LAGU 38 Pasti Kam IpegegehiNa
^ Ayat tahunenta bas tahun 2022 ibuat arah Masmur 34:10: “Kalak si ndarami Jahwe labo pagi kurang kai pe si mehuli.” Enterem umat Jahwe si setia si mesera pergeluhna. Emaka, kai maksudna kalak e ‘labo kurang kai pe si mehuli?’ Uga ayat e banci nikapken kita ngadapi kiniseran si nandangi terjadi?
^ Nen “Pertanyaan Pembaca” bas Menara Pengawal 15 September 2014.
^ Nen Menara Pengawal 1 Mei 1999, hal. 19.