1-3. Kai saja si banci erban kita tangis?

 NDIGAN nge terakhir kam tangis? Mon-mon, tangis kita perban meriah kel ukurta, tapi rusuren nge kita tangis perban latih kel ukurta. Contohna, banci saja tangis kita sanga lit kalak si keleng ateta mate. Lori arah Amerika Serikat nari, itulisna bagenda, “Mon-mon sedih kuakap sanga kuinget anakku si enggo mate. Tempa-tempa la lit si banci ngapuli aku. Getem kel pusuhku janah putus asa aku.” *

² Banci saja lit alasen si deban si erban kita tangis. Hiromi, sekalak perintis arah Jepang ngataken, “Mon-mon sedih kuakap perban kalak si kujumpai sanga erberita la nggit megiken kai nina Pustaka. Lit piga-piga kali ertoto aku janahku tangis. Kupindo man Jahwe gelah sampatiNa aku banci jumpa ras kalak si ndarami kebenaren.”

³ Pernah nge nanamindu bagi si igejapken turang senina ndai? Enterem arah kita pernah. (1 Pet. 5:9) Memang ‘silayani ateta Jahwe alu ermeriah ukur.’ Tapi mon-mon tangis kita perban lit kalak si keleng ateta si mate, perban kitik ukurta, ntah pe perban siadapi masalah si erban mesera siakap setia man Dibata. (Ms. 6:6; 100:2) Adi bage perasanta, kai si banci silakoken?

4. Kai kari sibahas bas artikel enda?

⁴ Banci kita erlajar arah usihen si iban Jesus. Mon-mon Jesus pe adapina situasi si erban ia “tangis.” (Joh. 11:35; Luk. 19:41; 22:44; Heb. 5:7) Mari sibahas piga-piga kejadin si erban Jesus tangis ras kai pelajarenna man banta.  Sibahas ka kari kai si banci silakoken sanga siadapi situasi si erban kita tangis.

5. Kai si banci sipelajari kerna Jesus arah Johanes 11:32-36?

⁵ Bas musim mbergeh tahun 32 M, sakit teman si ikelengi Jesus eme Lasarus janah dungna mate ia. (Joh. 11:3, 14) Lit dua turang Lasarus eme Maria ras Marta. Keleng kel ate Jesus man keluarga e. Sedih kel akap Maria ras Marta perban kematen turangna e. Kenca mate Lasarus, berkat me Jesus ku kuta Betani, ingan tading Maria ras Marta. Sanga begi Marta maka Jesus enggo reh, mis ia kiam njumpai Jesus. Cuba bayangkenndu uga cedana ukur Marta sanga katakenna bagenda, “O Tuan, bicara i jenda min ndai kam, labo mate turangku e.” (Joh. 11:21) La ndekah kenca si e, sanga idah Jesus tangis Maria ras kalak si deban, “tangis Jesus.”​—Baca Johanes 11:32-36.

6. Kai si erban tangis Jesus sanga mate Lasarus?

⁶ Engkai maka tangis Jesus paksa si e? Bagenda nina buku Pemahaman Alkitab, “Kematen temanna Lasarus bage pe ceda ate si igejapken duana turang Lasarus erban ‘ceda kel ate Jesus ras tangis ia.’” * Banci saja ukuri Jesus uga suina akap Lasarus sanga sakit ia. Bayangken Jesus ka uga perasan Lasarus sanga tehna enggo nandangi mate ia. Selain si e, tangis Jesus pasti perban gejapkenna uga cedana ukur Maria ras Marta. Adi lit teman kompakndu ntah pe anggota keluargandu si mate, pasti bage ka perasanndu. Mari siperdiateken telu pelajaren si banci sidat arah kejadin e.

7. Kai si banci sipelajari kerna Jahwe sanga tangis Jesus perban lit temanna si mate?

⁷ Angkai Jahwe perasanta. Jesus “tuhu-tuhu gambar Dibata.” (Heb. 1:3) Sanga tangis Jesus, cidahkenna uga perasan Jahwe nandangi kalak si sangana  erceda ate perban kematen. (Joh. 14:9) Adi lit kalak si keleng atendu si enggo mate, teklah kam maka labo terjeng teh Jahwe perasanndu tapi Ia pe ceda kel pusuhNa. Merhat kel Ia mpepalem pusuhndu si getem e.​—Ms. 34:18; 147:3.

8. Engkai maka banci kita tek pasti ipekeke Jesus pagi kalak si keleng ateta si enggo mate?

⁸ Merhat Jesus mpekeke kalak si keleng ateta si enggo mate. Sope tangis Jesus, petetapna ukur Marta, nina, “Nggeluh nge kari turangndu mulihi.” Tek Marta man kata-kata Jesus e. (Joh. 11:23-27) Perban Marta umat Jahwe si erkiniteken, pasti tehna maka mbarenda pernah ipekeke Nabi Elia ras Elisa kalak si enggo mate. (1 Raj. 17:17-24; 2 Raj. 4:32-37) Selain si e, banci saja enggo begina kerna piga-piga kalak si ipekeke Jesus. (Luk. 7:11-15; 8:41, 42, 49-56) Kam pe banci tek maka kalak si keleng atendu si enggo mate banci pagi idahndu mulihi. Emaka kai si banci sipelajari sanga tangis Jesus guna ngapuli teman-temanna si erceda ate? Arah je siteh maka merhat kel Jesus mpekeke kalak si mate.

9. Bali bagi Jesus, uga carata ngapuli ras nampati kalak si sangana erceda ate? Bereken contohna.

⁹ Banci siapuli ras sisampati kalak si sangana erceda ate. Jesus labo saja tangis radu ras Marta bage pe Maria, tapi begikenna ras apulina kalak e. Kita pe banci ngelakoken si bage man kalak si sangana erceda ate. Denny, sekalak pertua si tading i Australia ngataken, “Kenca mate diberuku, perlu kel aku penampat arah turang senina. Piga-piga senina ras diberuna nggit megiken aku suari ras berngi. Ipediat kalak e aku tangis janah la kalak e terganggu perban aku tangis. Isampati kalak e ka aku ngelakoken piga-piga dahin sanga la aku ngasup ngelakokensa. Contohna, nuci motorku, belanja, ras nanggerken pangan. Rusur ka kalak e ertoto ras aku. Ibuktiken kalak e maka kalak e teman situhu-tuhu ras jadi senina ‘sanga lit kesusahen.’”​—Kua. 17:17.

10. Cuba ceritaken kejadin si lit bas Lukas 19:36-40.

¹⁰ Bas tanggal 9 Nisan tahun 33 M, seh Jesus i Jerusalem. Sanga enggo ndeher ia ku kota e, pulung jelma si enterem janah amparken kalak e uisna si arah darat i dalan guna ngalo-ngalo Jesus selaku Raja kalak e. Pasti meriah kel paksa si e. (Baca Lukas 19:36-40.) Emaka, banci saja la isangka murid-muridna kai si terjadi kenca si e. “Sanga enggo ndeher [Jesus] ku Jerusalem, tatapna kota e janah tangisina.” Janahna teriluh inubuatkenna kejadin si ngeri si nandangi terjadi man penduduk Jerusalem.​—Luk. 19:41-44.

11. Engkai maka tangis Jesus ngidah penduduk Jerusalem?

¹¹ Ceda kel ukur Jesus perban tehna maka amin pe meriah ukur kalak e ngalo-ngalo ia, tapi teremen arah kalak Jahudi la pagi nggit ngaloken berita kerna Kerajan. Akibatna, ikernepken pagi Jerusalem janah kalak Jahudi si selamat arah kota e itaban pagi. (Luk. 21:20-24) Bas pudi wari, terjadi me kai si ikataken Jesus e. Bas inganndu tading, uga nge tanggapen teremen kalak man berita Kerajan? Adi la mehuli tanggapen kalak nandangi berita si ipesehndu, kai si banci pelajarindu kerna Jesus arah kejadin  enda? Lit telu nari si banci sipelajari. Mari sibahas.

12. Kai si banci sipelajari kerna Jahwe sanga tangis Jesus perban ukurina kalak si deban?

¹² Jahwe ermediate man kerina jelma. Sanga tangis Jesus, enda ngingetken kita uga ermediatena Jahwe man kerina jelma. “Labo teNa sekalak pe ikernepken tapi gelah kerina min ertobat.” (2 Pet. 3:9) Gundari banci sibuktiken maka keleng ateta kalak si deban adi lalap siusahaken nampati kalak e ngaloken berita si meriah.​—Mat. 22:39.

13-14. Kai buktina mekuah ate Jesus kalak si deban, janah uga carata mpebelin sipat e?

¹³ Jesus rajin ras semangat bas pelayanen. Perban keleng ate Jesus kalak si deban, katawari pe usahakenna erberita man kalak e. (Luk. 19:47, 48) Kai si ngiahken Jesus? Mekuah ate Jesus kalak e. Mon-mon, Jesus ras murid-muridna ‘man pe lanai sempat,’ perban enterem kel kalak si merhat megiken ia. (Mrk. 3:20) Selain si e, sanga merhat Nikodemus megiken Jesus, nggit Jesus njumpai ia amin pe enggo berngi. (Joh. 3:1, 2) Teremen kalak si megiken Jesus labo jadi muridna, tapi kerina kalak e enggo pernah megiken berita si meriah. Gundari pe siusahaken gelah kerina kalak banci megi berita si meriah. (Perb. 10:42) Guna ngelakoken si e, banci saja perlu siubah waktuta erberita.

¹⁴ Nggitlah kita ngubah jadwalta erberita. Adi seri lalap waktuta erberita, banci saja la kita jumpa ras kalak si nggit megiken berita si meriah. Sekalak perintis si gelarna Matilda ngataken, “Kuusahaken ras dilakiku gelah la seri lalap waktu kami erberita. Sanga erpagi-pagi, erberita kami bas daerah bisnis. Sanga ciger, paksa enterem kalak ndarat, erberita kami alu nggunaken gerai. Sanga karaben, erberita kami arah rumah ku rumah perban biasana enggo enterem kalak i rumah.” Arusna, ula min kita erberita bas waktu si cocok man banta saja. Nggit min kita ngubah jadwalta erberita gelah banci jumpa ras terbuen kalak. Adi bage siban, tek kita pasti meriah ukur Jahwe.

15. Bagi si icatat bas Lukas 22:39-44, kai si terjadi bas berngi terakhir kegeluhen Jesus i doni?

¹⁵ Bas tanggal 14 Nisan tahun 33 M eme berngi terakhir sope Jesus mate, lawes ia ku Taman Getsemane. I je turikenna kerina isi pusuhna man Jahwe. (Baca Lukas 22:39-44.) Paksa si e latih kel ukurna, emaka “tutus atena ertoto, nderkuh ia, mambur iluhna.” (Heb. 5:7) Kai nge si totoken Jesus? Ertoto ia mindo gegeh gelah banci tetap setia man Jahwe ras ngelakoken peratenNa. Begiken Jahwe toto anakNa e janah suruh Jahwe sada malekat mpegegehi ia.

16. Engkai maka tangis Jesus sanga ertoto i Taman Getsemane?

¹⁶ Engkai maka latih kel ukur Jesus janah dungna tangis ia ertoto i Taman Getsemane? Salah sadana perban ianggap kalak ia la ngergai gelar Dibata. Selain si e, tehna maka mbelin kel tanggung jawapna guna mpebadia gelar Bapakna. Adi sangana adapindu situasi si nguji kesetianndu man Jahwe, kai si banci pelajarindu arah Jesus sanga tangis ia perban ngukuri gelar Bapakna? Lit telu nari si banci sipelajari. Mari sibahas.

17. Kai si banci sipelajari kerna Jahwe sanga jawapna toto Jesus?

¹⁷ Begiken Jahwe totota. Begiken Jahwe pemindon Jesus. Engkai? Perban tetap ate Jesus setia man Bapakna janah pebadiana atena gelar Bapakna. Adi tetap ateta setia man Jahwe ras sipebadia ateta gelarNa, pasti ijawapNa totota mindo penampat.​—Ms. 145:18, 19.

18. Engkai maka banci sikataken Jesus e teman si mehuli ras erpengangka?

¹⁸ Angkai Jesus perasanta. Sanga kuatir kel kita, pasti meriah ukurta adi lit temanta si ngangkai perasanta, terlebih adi temanta e pernah adapina masalah si seri ras kita. Jesus me teman si bage. Tehna uga nanamna latih ras merluken penampat. Angkana kelemahenta janah pastikenna sialoken penampat si iperluken “bas waktu si tepat.” (Heb. 4:15, 16) Bas Taman Getsemane, nggit Jesus ngaloken  penampat arah sada malekat. Arusna kita pe nggit ngaloken penampat si isikapken Jahwe, la soal e rehna arah publikasi, video, khotbah, ntah pe sanga reh pertua bage pe turang senina si paguh kinitekenna guna mpegegehi kita.

19. Uga carata ndatken gegeh sanga siadapi situasi si nguji kesetianta man Dibata? Bereken contohna.

¹⁹ Banci ibere Jahwe “kedamen” man banta. Uga cara Jahwe mpegegehi kita? Sanga ertoto kita, sialoken me “kedamen bas Dibata nari si banci naluken perukuren kai pe.” (Pil. 4:6, 7) Kedamen si ibereken Jahwe banci erban pusuhta reh tenangna janah nampati kita gelah beluh rukur. Enda terbukti arah pengalamen Lusi. Bagenda nina, “Rusur kel sisada kuakap bangku. Emaka mon-mon la kuakap keleng ate Jahwe aku. Tapi sanga bage perasanku, mis kuturiken man Jahwe. Dungna reh tenangna kuakap.” Arah pengalamen e, terbukti maka adi ertoto kita, banci sidat kedamen.

20. Kenca sibahas piga-piga kejadin si erban Jesus tangis, pelajaren kai saja si enggo sidat?

²⁰ Terapuli kel kita janah sidat pelajaren si penting arah kai si erban Jesus tangis! Iingetken kita guna nampati teman-temanta si erceda ate, janah reh tekna kita maka pasti sampati Jahwe ras Jesus kita sanga lit kalak si keleng ateta si enggo mate. Iiahken kita gelah jadi kalak si perkuah sanga erberita ras ngajar, bali bagi Dibata Jahwe ras Jesus Kristus. Terapuli ka kita perban enggo siteh maka angkai Jahwe ras Jesus perasanta, angkaina kelemahenta, janah pasti sampatina kita gelah setia. Mbera-mbera terus siinget ras sidalanken kai si enggo sipelajari seh ngasa itepati Jahwe janjiNa si luar biasa sanga ‘apusiNa pagi kerina iluhta!’​—Ket. 21:4.