Tehndu nge?
Alat transportasi kai nge si igunaken pejabat Etiopia sanga jumpa ia ras Pilipus?
BAS bahasa aslina, kata ‘gereta kuda’ si ipake bas Terjemahen Doni si Mbaru banci maksudna piga-piga jenis gereta kuda. (Perb. 8:28, 29, 38) Tapi, banci saja gereta kuda si ipake pejabat Etiopia e galangen asangken gereta kuda si ipake guna erperang ntah pe guna balapen. Cuba perdiateken piga-piga alasenna.
Kalak Etiopia e eme pejabat tinggi si enggo ndauh perdalanenna. “Dilaki e pejabat bas pemerentahen Kandake, ratu Etiopia, ia si ngurus kerina erta ratu.” (Perb. 8:27) Daerah Etiopia si nai termasuk Sudan ras bagin si arah selatanna kel arah Mesir. Bas tiap perdalanenna, banci saja labo seri alat transportasi si ipakena. Tapi perban ndauh perdalanenna, pasti mbue babana barang. Salah sada alat transportasi si ipake bas abad pertama eme gereta kuda si empat rodana janah lit atapna. Buku si erjudul Acts—An Exegetical Commentary ngataken, “Gereta kuda si bage banci mbue babana barang, reh tabehna ka datas, janah banci saja reh dauhna dalan si banci idalanina.”
Kalak Etiopia e sangana mbaca paksa ideheri Pilipus ia. Ikataken bas cataten e maka “kiam Pilipus i samping gereta e janah begina dilaki e mbaca kitap Nabi Jesaya.” (Perb. 8:30) Gereta kuda si ipake guna perdalanen ndauh biasana la meter perdalanna. Emaka sedekah perdalanen, pejabat e banci mbaca janah banci ka ayaki Pilipus ia janahna kiam i samping gereta e.
‘Ipindoken kalak Etiopia e gelah nangkih Pilipus ku geretana janah kundul ras ia.’ (Perb. 8:31) Biasana, gereta si ipake guna balapen, arus cinder si mabasa. Tapi gereta si ipake guna perdalanen, pasti lit i je ingan kundul. Engkai? Perban banci iajak kalak Etiopia e Pilipus kundul ras ia.
Mbarenda, igambarken bas publikasita maka kalak Etiopia e nangkih gereta kuda si kitik, bagi si ipake guna erperang ntah pe balapen. Tapi perban kai si icatat bas Perbahanen Rasul-Rasul pasal 8 bage pe bukti-bukti sejarah si debanna, mbaru-mbaru enda igambarken bas publikasita maka kalak Etiopia e nangkih gereta kuda si tergalangen.