1. Kai si bayangkenndu sanga ukurindu kerna Jahwe?

 PERNAH nge bayangkenndu uga kin Jahwe e? Sanga ertoto kam man baNa kai nge si ukurindu? Amin pe Jahwe la teridah, bas Pustaka Ia igambarken alu erbage-bage cara. Contohna, Jahwe ikataken “matawari ras perisai” bage pe “api si engkernepken.” (Ms. 84:11; Heb. 12:29) Bas sada pengenehenen, Jahwe igambarken bagi batu sapir, emas putih si ersinar, ras cahaya pelangi. (Esek. 1:​26-28) Piga-piga gambaren enda banci saja erban luar biasa akapndu Jahwe e ntah pe erban la kapndu merga bandu.

2. Kai si erban mesera iakap piga-piga kalak ndeher ras Jahwe?

² Perban la banci siidah Jahwe, banci saja mesera kita tek maka keleng ateNa kita. Lit kalak si erpengakap maka Jahwe e labo banci engkelengi ia perban lit pengalamenna si la mehuli. Banci saja la pernah gejapkenna kekelengen arah sekalak bapak. Iangkai Jahwe perasanta janah tehNa engkai maka mesera siakap rembak ras Ia. Guna nampati kita, ipebetehken Jahwe sipat-sipatNa si mehuli bas Pustaka.

3. Engkai maka perlu sipelajari kerna kekelengen Jahwe?

³ Sada kata si tepatna guna nggambarken Jahwe eme kekelengen. (1 Joh. 4:8) Kerina si ilakokenNa erpalasken kekelengen. Mbelin kel kekelengen Dibata janah mbages. Emaka kalak si la engkelengi Ia pe keleng ateNa. (Mat. 5:​44, 45) Bas artikel enda, sipelajari kari kerna kekelengen Jahwe. Reh buena sipelajari kerna Dibatata, reh kelengna me ateta Ia.

KELENG KEL ATE JAHWE KITA

4. Uga nge perasanndu nandangi kekelengen Jahwe si lembut? (Nen ka gambar.)

⁴ “Lembut kel kekelengen Jahwe.” (Jak. 5:11) Bas Pustaka, ipeseri Jahwe diriNa ras sekalak nande si engkelengi anakna si kitik denga. (Jes. 66:​12, 13) Cuba bayangken  sekalak pernanden si ngampu anakna. Idakepna anakna e janah lembut ia ngerana. Ibanna tenang akap anakna e. Sanga ngandung anakna e ntah pe suin ia, mis iberekenna kai si iperlukenna. Bage ka pe, sanga latih ukurta, tek kita maka pasti sampati Jahwe kita perban keleng ateNa kita. Bagenda itulis sekalak pemasmur, “Sanga kuatir kel aku, apuliNdu aku janah banNdu aku tenang.”—Ms. 94:19.

5. Engkai maka meherga kapndu kekelengen Jahwe si setia?

⁵ Jahwe e setia. (Ms. 103:8) Labo pernah ngadi Ia engkelengi kita amin pe silakoken kesalahen. Bangsa Israel mulih-ulih erban Jahwe kecewa. Tapi, sanga ertobat kalak e, ipetetapNa ukur kalak e maka tetap nge keleng ateNa kalak e. Contohna, nina Jahwe, “Merga Kuakap kam, Kuhamati kam janah keleng ateKu kam.” (Jes. 43:​4, 5) Kekelengen Dibata la berubah. Banci tetap siandalken kekelengenNa e. Amin pe silakoken kesalahen si serius, labo itadingken Jahwe kita. Adi ertobat kita, janah mulihken kita man Jahwe, banci sigejapken maka keleng denga ate Jahwe kita. Erjanji Ia maka ‘tuhu-tuhu pagi ampuniNa kita.’ (Jes. 55:7) Hasilna, sigejapken me maka Jahwe ‘mereken kemalemen ate man banta.’—Perb. 3:19.

6. Arah Sakaria 2:​8, kai si banci sipelajari kerna Jahwe?

⁶ Baca Sakaria 2:8. Perban keleng ate Jahwe kita, mis angkaiNa perasanta janah merhat kel Ia ngelindungi kita. Latih ukurNa sanga latih ukurta. Emaka tek kita, pasti begikenNa totota sanga ninta, “Jaga min aku bagi anak mataNdu.” (Ms. 17:8) Mata eme bagin si sensitif ras meherga kel bas dagingta. Emaka sanga ipeseri Jahwe kita ras anak mataNa, tempa-tempa ikatakenNa, ‘O umatKu, ise pe si nakiti kam, e ertina isakitina kai si meherga Kuakap.’

7. Engkai maka perlu reh tekna kita maka keleng ate Jahwe kita?

⁷ Ate Jahwe gelah tek kita maka keleng ateNa kita sekalak-sekalak. Tapi, itehNa maka kai si la mehuli si terjadi mbarenda man banta ntah pe si sangana siadapi gundari, banci erban kita ragu nandangi kekelengenNa. Emaka gelah reh tekna kita, mari sipelajari uga Jahwe ncidahken kekelengenNa man Jesus, man kalak si ipilih ku surga, bage pe man kita kerina.

 CARA JAHWE NCIDAHKEN KEKELENGENNA

8. Engkai maka tek Jesus nandangi kekelengen Bapakna?

⁸ Hubungen Jahwe ras AnakNa ndauh dekahen asangken hubungen ise pe. Jahwe ras Jesus enggo ras-ras jutan tahun ntah pe banci saja miliaren tahun. Rembak kel Jahwe ras Jesus janah sikeleng-kelengen. Jelas kel ikataken Jahwe kekelengenNa man Jesus bagi si icatat bas Matius 17:5. Situhuna, banci nge ikataken Jahwe, ‘Ia me si ngena ateKu.’ Tapi, ate Jahwe siteh min maka keleng kel ateNa Jesus. Emaka nina, “Enda me AnakKu si Kukelengi.” Bangga kel Jahwe ngidah Jesus, terlebih perban nggit Jesus ngorbanken kegeluhenna. (Ep. 1:7) Sitik pe la ragu Jesus nandangi kekelengen Bapakna. Banci igejapken Jesus maka mbages kel kekelengen Jahwe man bana. Mulih-ulih ituriken Jesus maka keleng ate Bapakna man bana.—Joh. 3:35; 10:17; 17:24.

9. Kai nge kata si cocok nggambarken kekelengen Jahwe man kalak si ipilih ku surga? Jelasken. (Roma 5:5)

⁹ Ituriken Jahwe ka kekelengenNa man kalak si ipilih ku surga. (Baca Roma 5:5.) Menurut salah sada referensi, kata “curcurken” banci ka ertina “lau si galang.” Cocok kel kata-kata e guna nggambarken kekelengen Dibata Jahwe si mbelin man kalak si ipilih ku surga. Iteh kalak si ipilih ku surga maka “keleng ate Dibata” man kalak e. (Jud. 1) Ituriken Rasul Johanes perasan kalak e sanga itulisna bagenda, “Nenlah uga kelengna ate Bapak man banta, emaka kita ikataken anak-anak Dibata!” (1 Joh. 3:1) Kalak si ipilih ku surga nge ngenca si keleng ate Jahwe? Lang, icidahken Jahwe kekelengenNa man banta kerina.

10. Kai bukti si mbelinna maka keleng ate Jahwe man bandu?

¹⁰ Kai bukti si mbelinna arah kekelengen Jahwe? Tebusen eme bukti kekelengen Jahwe si mbelinna bas alam semesta enda. (Joh. 3:16; Rom. 5:8) Ibereken Jahwe Anak si keleng kel ateNa mate guna kerina manusia gelah dosata banci iampuni janah banci kita jadi teman Dibata. (1 Joh. 4:10) Reh bagesna siukuri kerna pengorbanen Jahwe ras Jesus, reh bagesna ka siangkai maka keleng ate Jahwe ras Jesus man banta sekalak-sekalak. (Gal. 2:20) Cuba bayangken, Jesus kap si mehergana akap Jahwe, tapi ipediatNa Jesus rate mesui ras mate guna kita. Jelas me, tebusen ibereken labo terjeng guna keadilen Jahwe, tapi si e jadi hadiah arah Jahwe perban keleng ateNa kita.

11. Kai si banci sipelajari arah Jeremia 31:3?

¹¹ Bali bagi si enggo sipelajari, kekelengen Jahwe labo terjeng bas perasanNa saja, tapi ibuktikenNa uga kelengNa ateNa kita. (Baca Jeremia 31:3.) Enggo itarik Jahwe kita gelah rembak ras Ia perban keleng ateNa kita. (Bandingken Ulangen 7:​7, 8.) La lit si banci nirangken kita arah kekelengen Jahwe. (Rom. 8:​38, 39) Uga nge perasanndu nandangi kekelengenNa e? Bacalah Masmur 23, janah perdiateken kai pengaruh kekelengen Jahwe si lembut man Daud janah kai pengaruhna man banta.

UGA NGE PERASANNDU PERBAN TEHNDU KELENG ATE JAHWE KAM?

12. Kai si ikataken Daud bas Masmur 23?

¹² Baca Masmur 23:​1-6. Masmur 23 eme lagu si itulis Daud. Bas lagu e, iturikenna maka tek kel ia keleng ate Jahwe man bana janah iperdiatekenNa ia. Ituriken Daud uga rembakna hubungenna  ras Jahwe, ilebuhna Jahwe Permakanna. Aman akap Daud itegu-tegu Jahwe janah tuhu-tuhu iandalkenna Ia. Iteh Daud maka banci gejapkenna kekelengen Jahwe tiap wari bas segedang geluhna. Kai si erban Daud tek kel kerna si e?

13. Engkai maka tek Daud pasti iperdiateken Jahwe ia?

¹³ “Labo pagi aku kurang kai pe.” Banci bage perasan Daud perban lalap ibereken Jahwe kerina keperlunna. Daud pe rembak ras Jahwe janah tehna maka keleng ate Jahwe ia. E me sebapna kai pe pagi si terjadi, tek ia maka lalap pagi bereken Jahwe keperlunna. Kiniteken Daud man Jahwe erban ia la kuatir, meriah ukurna, janah puas akapna.—Ms. 16:11.

14. Kai si banci lakoken Jahwe sanga siadapi masalah si mberat?

¹⁴ Ermediate kel Jahwe man banta, khususna sanga siadapi masalah bas geluhta. Clara, a si lebih 20 tahun enggo ngelayani bas Betel, lanai tehna uga cara nampati keluargana sanga ngadapi masalah si serius. Kena stroke bapakna, salah sada seninana ipedarat arah runggun, janah bangkrut bisnis keluarga kalak e, lanai ka lit rumah kalak e. Uga Jahwe ncidahken kekelengenNa man kalak e? Nina Clara, “Ipastiken Jahwe maka tiap wari keperlun keluarga kami tercukupi. Rusur kel bereken Jahwe lebihen asangken si banci kubayangken. Rusur kuukuri kerna uga Jahwe enggo nampati kami janah ndigan pe la kulupaken kekelengen Jahwe e. Kenangen enda nampati aku gelah terus megenggeng sanga ngadapi masalah.”

15. Engkai maka terpegegehi Daud? (Nen ka gambar.)

 ¹⁵ “PegegehiNa aku.” Mon-mon, latih kel ukur Daud perban kerina masalah ras tentangen si adapina. (Ms. 18:​4-6) Tapi, kekelengen Jahwe si lembut mpegegehi ia. Tempa-tempa ibaba Jahwe temanNa si latih e ku “mbalmbal si meratah” janah “ngadi-ngadi bas ingan si melala launa.” Emaka, terpegegehi Daud janah banci ia terus ngelayani Jahwe alu ermeriah ukur.—Ms. 18:​28-32.

16. Uga nge kekelengen Jahwe mpegegehi kam?

¹⁶ Gundari pe, “perban kekelengen Jahwe si setia, la kita kernep” sanga siadapi masalah ras tentangen bas geluhta. (Pern. 3:22; Kol. 1:11) Cuba ukuri pengalamen Rahel. Sanga pandemi COVID-19, itadingken perbulangenna ia janah lanai ilayani perbulangenna e Jahwe. Emaka getem kel pusuhna. Uga Jahwe mpegegehi ia? Nina, “Iban Jahwe gelah kugejapken kekelengenNa. IberekenNa man bangku teman-teman si nggit nemani aku. Baba kalak e pangan, ikirimna pesan si mehuli ras mpegegehi, bage pe ayat-ayat Pustaka. Cirem kalak e man bangku janah terus ingetken kalak e maka keleng ate Jahwe aku. Lalap aku ngata bujur man Jahwe perban bereNa man bangku keluarga si perkeleng janah seh kel teremna.”

17. Engkai maka la ‘mbiar Daud kena bahaya’?

¹⁷ “La aku mbiar kena bahaya, sebap Kam ras aku.” Rusur kel terancam geluh Daud janah melala musuh-musuhna si megegeh. Tapi, kekelengen Jahwe erban aman akapna janah terlindungi. Banci gejapken Daud maka Jahwe lalap lit ras ia janah si e erban ia tenang. Emaka banci rende Daud nina, “Bebasken [Jahwe] aku arah kerina kebiarenku.” (Ms. 34:4) Memang mon-mon mbiar kel Daud, tapi banci talukenna kebiarenna e perban tehna maka keleng ate Jahwe ia.

18. Uga kekelengen Jahwe mpegegehi kam sanga kam mbiar?

¹⁸ Uga kekelengen Jahwe banci mpegegehi kita ngadapi situasi si erban kita mbiar? Sekalak perintis si gelarna Susi, nuriken kai si gejapkenna ras perbulangenna sanga bunuh diri anakna. Nina, “Adi rempet adapindu kejadin si erban kam trauma, mbelin kel pengaruhna man bandu janah banci lanai kapndu lit si banci nampati kam. Tapi kekelengen Jahwe si lembut erban tenang akap kami janah terlindungi.” Rahel, si enggo ituriken ndai  ngataken, “Bas sada berngi, sedih kel aku janah kuatir aku ras mbiar, ngandung aku ertoto man Jahwe. Kenca si e, tenang kel kuakap janah apuliNa aku, bali bagi sekalak nande si mpetenang anakna si kitik denga. Emaka terpedem me aku. Ndigan pe la kulupaken pengalamen e.” Sekalak pertua si gelarna Tasos, pernah ipenjaraken empat tahun dekahna perban la ia nggit jadi tentera. Uga ia nggejapken kekelengen Jahwe si lembut? Nina, “Ibereken Jahwe keperlunku lebihen asangken si kubayangken. Si e erban aku reh tekna man baNa. Selain si e, arah kesahNa si badia, iberekenNa keriahen ukur man bangku amin pe lingkungenku banci erban latih kel ukurku. Si enda erban aku tek maka reh rusurna aku kerja sama ras Jahwe, reh buena kugejapken kiniulinNa. Emaka, mulai aku merintis biasa sanga aku bas penjara.”

REMBAKLAH KAM RAS DIBATA SI LEMBUT

19. (a) Adi siteh keleng ate Dibata kita, kai pengaruhna man totota? (b) Kerna kekelengen Jahwe, ayat si apai nge si kena ku pusuhndu ntah pe si pernah gejapkenndu? (Nen kotak “ Ayat-Ayat si Nampati Kita Nggejapken Kekelengen Jahwe si Lembut.”)

¹⁹ Kerina pengalamen si enggo sibahas, mbuktiken maka Jahwe “Dibata si dem kekelengen” tetap lit ras kita. (2 Kor. 13:11) Jadi ateNa kita sekalak-sekalak. Tek kita maka kita “ikelilingi kekelengenNa si setia.” (Ms. 32:10) Reh rusurna siukuri kekelengen Jahwe man banta, reh jelasna siidah maka ermediate kel Ia man banta janah reh rembakna kita ras Ia. Banci kita ertoto man baNa katawari pe janah sikataken man baNa maka perlu kel kita kekelengenNa. Banci situriken man baNa kerina si erban kita kuatir. Tek kita maka angkaiNa kai si erban kita kuatir janah nggit Ia nampati kita.—Ms. 145:​18, 19.

20. Uga kekelengen Jahwe erban kita nggit rembak ras Ia?

²⁰ Bali bagi api si banci erban kita la bergehen sanga mbergeh wari, bage ka me kekelengen Jahwe si lembut banci mpegegehi kita bas masa-masa si sulit. Emaka alokenlah kekelengen Jahwe si lembut si banci erban pusuhndu tenang ras dame. Mbera-mbera kerina kita ngaloken kekelengen Jahwe si lembut alu ngataken, “Keleng ateku Jahwe.”—Ms. 116:1.