ARTIKEL PELAJAREN 3
LAGU 124 Teruslah Setia
Pasti Sampati Jahwe Kam bas Masa-Masa si Sulit
“Ban [Jahwe] kena nteguh.”—1 PET. 5:10.
INTINA
Si banci silakoken guna ndatken penampat arah Jahwe bas masa-masa si sulit.
1-2. Masalah kai saja si iadapi umat Jahwe?
ADI lit masalahta si mberat banci saja rempet berubah geluhta. Contohna, sekalak turang seninata si setia si gelarna Luis, a itehna maka kena kanker kepe ia. Ikataken dokter maka piga-piga bulan nari ngenca ia banci nggeluh. Monika ras perbulangenna sibuk kel bas kegiaten rohani. Bas sada wari, iteh Monika maka perbulangenna si ngelayani jadi pertua, enggo kepe ertahun-tahun dekahna ngelakoken dosa si serius. Olivia, sekalak turang senina si lajang denga, arus tadingkenna rumahna perban nandangi reh badai si megegeh. Sanga mulih ia ku rumahna, idahna rumahna enggo hancur iban badai e. Arah je siidah maka rempet-rempet berubah kegeluhen kalak e ndai kerina. Pernah nge adapindu masalah si erban geluhndu rempet berubah?
2 Amin pe setia kita ngelayani Jahwe, banci denga nge siadapi masalah janah sakit kita bagi kalak si deban. Banci saja siadapi tentangen ras penganiayan arah kalak si rate segat man umat Dibata. Tapi amin pe la lindungi Jahwe kita arah kerina masalah e, erjanji Ia guna nampati kita. (Jes. 41:10) Alu penampat Jahwe, banci kita tetap ermeriah ukur, siban keputusen si mehuli, tetap setia man baNa, amin pe ngadapi situasi si sulit. Bas artikel enda, sibahas kari empat cara Jahwe nampati kita sanga mberat kel masalahta. Sibahas ka kari kai si banci silakoken gelah penampat Jahwe e erguna man banta.
PASTI IJAGA JAHWE KAM
3. Sanga ngadapi masalah si mberat, banci saja mesera siakap ngelakoken kai?
3 Tentangenna. Sanga mberat kel masalahta, banci saja la kita beluh rukur ras erban keputusen. Engkai? Banci saja perban getem kel pusuhta. Sedih janah kuatir kel kita. Banci saja kita tempa-tempa erdalan bas dalan si mbue kel kabutna janah la siteh ku ja erjingkang. Cuba perdiateken uga dua turang seninata ndai ngadapi masalahna. Bagenda nina Olivia, “Kenca hancur rumahku iban badai, bingung aku janah lanai kuteh kai si arus kulakoken.” Bagenda nina Monika kerna perbulangenna si la setia, “Aku labo saja kecewa. Bagi isayat-sayat kuakap pusuhku. Mesera kel kuakap ndahiken dahin si biasana menukah kuakap ndahikenca. La kusangka si e terjadi man bangku.” Uga cara Jahwe nampati kita sanga lemah kel siakap banta? Mari sinen kai si ijanjikenNa.
4. Menurut Pilipi 4:6, 7, kai janji Jahwe man banta?
4 Si ilakoken Jahwe. Erjanji Jahwe guna mereken man banta kai si igelari bas Pustaka “kedamen bas Dibata nari.” (Baca Pilipi 4:6, 7.) Kedamen e maksudna perasan tenang bas pusuhta perban rembak kita ras Jahwe. Kedamen e banci “naluken perukuren kai pe,” si e lebihen asangken si banci sibayangken. Pernah nge gejapkenndu dame bas pusuhndu kenca kam ertoto man Jahwe? Perasan e me maksudna “kedamen bas Dibata nari.”
5. Uga kedamen arah Dibata njagai pusuh ras perukurenta?
5 Bas Pilipi 4:7 pe ikataken maka kedamen arah Dibata banci ‘njagai pusuh ras perukurenta.’ Bahasa aslina kata “njagai” eme istilah militer si nggambarken prajurit si njaga sada kota arah serangen musuh. Aman akap penduduk kota e janah entabeh pertunduhna perban itehna prajurit-prajurit erjaga i gerbang kota. Bage ka pe, sanga kedamen arah Dibata njagai pusuh ras perukurenta, tenang siakap perban siteh aman geluhta. (Ms. 4:8) Bali bagi si terjadi man Hanna, amin pe situasina la mis berubah, banci denga sigejapken kedamen. (1 Sam. 1:16-18) Adi tenang kita, biasana reh beluhna kita rukur ras erban keputusen si mehuli.
Teruslah ertoto man Jahwe seh ngasa gejapkenndu “kedamen bas Dibata nari” si njagai pusuh ras perukurenndu (Nen paragrap 4-6)
6. Kai si banci silakoken gelah sidat manpaat kedamen arah Dibata nari? (Nen ka gambar.)
6 Si perlu silakoken. Sanga kuatir kam, tempa-tempa arus kam erlebuh man penjaga-penjaga. Kai maksudna? Ertotolah seh ngasa gejapkenndu kedamen arah Dibata. (Luk. 11:9; 1 Tes. 5:17) Luis, si ituriken ndai, ijelaskenna kai si nampati ia ras diberuna, Ana, sanga teh kalak e maka piga-piga bulan nari ngenca Luis banci nggeluh. Bagenda nina Luis, “Bas situasi si bage, mesera kel erban keputusen kerna perawaten kesehaten ras si debanna. Tapi, banci gejapken kami kedamen bas situasi e perban ertoto kami.” Ikataken Luis ras diberuna maka tutus ate kalak e ertoto janah mulih-ulih kalak e ertoto. Ipindona gelah ibere Jahwe kalak e kedamen, ketenangen, ras kepentaren guna erban keputusen si mehuli. Emaka, banci gejapken kalak e penampat arah Jahwe. Adi sangana adapindu masalah si mberat, tutuslah atendu ertoto, janah gejapkenndu me maka kedamen arah Dibata njagai pusuh ras perukurenndu.—Rom. 12:12.
IBAN JAHWE KAM NTEGUH
7. Kai si banci saja sigejapken sanga siadapi masalah si mberat?
7 Tentangenna. Masalah si mberat banci mbelin kel pengaruhna man perasanta, pikirenta, ras perbahanenta. Mon-mon berubah-ubah siakap perasanta bali bagi kapal si ibabaken badai ku jah ku je. Ana, si ituriken ndai ngataken maka bage me si igejapkenna kenca mate Luis. Bagenda nina, “Mon-mon lanai kuakap lit gunana aku nggeluh janah mekuah ateku bangku. Mon-mon merawa ka aku perban Luis lanai lit.” Selain si e, melungen iakap Ana janah stres kel ia perban arus urusna erbage-bage urusen si biasana Luis si ndahikenca. Mon-mon, bagi i tengah badai kapna ia. Uga Jahwe nampati kita sanga bage perasanta?
8. Menurut 1 Petrus 5:10, kai si pasti ilakoken Jahwe man banta?
8 Si ilakoken Jahwe. IbanNa kita nteguh. (Baca 1 Petrus 5:10.) Sanga sada kapal kena badai, kapal e banci erbalik perban ientam ombak ku jah ku je. Emaka, mbue kapal si iban sirip-siripna si erban ia seimbang ras nteguh. Sirip e lit bas sebelah kanan ras sebelah kiri arah teruh kapal e. Si e erban kapal e reh tenangna. Emaka kalak si lit bas kapal e pe jadi lebih aman ras reh tabehna kapna datas. Tapi, sirip e banci tuhu-tuhu erguna adi kapal e terus erdalan. Bage ka pe, iban Jahwe kita nteguh adi tetap silayani Ia alu setia amin pe mesera situasina.
Banci kam nteguh alu nggunaken alat-alat riset (Nen paragrap 8-9)
9. Uga alat-alat riset arah organisasi banci nampati kita tetap nteguh? (Nen ka gambar.)
9 Si perlu silakoken. Adi negatip perasanndu, usahakenlah asa ngasupndu guna terus ngelakoken kegiaten rohani. Memang banci saja labo bagi si mbarenda buena si banci lakokenndu. Tapi, ingetlah maka Jahwe e masuk akal. (Bandingken Lukas 21:1-4.) Kenca si e, banlah waktundu guna pelajaren pribadi ras ngukurisa. Engkai? Perban arah organisasiNa, enggo sikapken Jahwe mbue informasi si mejile si erpalasken Pustaka, si banci nampati kita tetap nteguh. Guna ndatken informasi si iperlukenndu, banci gunakenndu alat-alat guna riset si lit bas bahasandu, contohna bas aplikasi JW Library®, Indeks Publikasi Menara Pengawal, ras Panduan Riset untuk Saksi-Saksi Yehuwa. Monika, si ituriken ndai ngataken maka igunakenna alat-alat guna riset sanga mulai gulut ukurna. Contohna, pernah daramina kata “kemarahan,” “penghianatan,” ras “kesetiaan.” Bacana artikel e seh ngasa reh tenangna ia. Nina, “Sanga mulai aku riset, kuatir kel aku tapi kenca kubaca artikelna bagi tempa-tempa dakep Jahwe aku. Sanga mbaca, kuteh maka angkai Jahwe perasanku si sangana serbut janah sampatiNa aku.” Penampat Jahwe banci nampati kam gelah tetap nteguh janah banci kendalikenndu perasanndu seh ngasa reh tenangna kapndu.—Ms. 119:143, 144.
PASTI ISAMPATI JAHWE KAM
10. Banci saja uga nge perasanta kenca lit kejadin si erban kita trauma?
10 Tentangenna. Kenca terjadi kejadin si erban kita trauma, banci saja latih kel siakap dagingta ras ukurta. Banci saja perasanta bagi atlet si cedera, si mbarenda meter kel kiam tapi gundari enggo mengkah erdalan. Banci saja erjuang kita gundari ngelakoken tugas-tugas si mbarenda menukah siakap ngelakokenca. Ntah banci saja la lit semangatta ngelakoken kegiaten si meriah siakap ngelakokenca mbarenda. Bali bagi Elia, banci saja mesera siakap medak. Medem saja ateta lalap. (1 Raj. 19:5-7) Tapi, kai si ijanjiken Jahwe sanga lemah siakap banta?
11. Kai ka si ilakoken Jahwe guna nampati kita? (Masmur 94:18)
11 Si ilakoken Jahwe. Erjanji Ia mpegegehi ntah pe ndukung kita. (Baca Masmur 94:18.) Sekalak atlet si cedera banci saja perlu isampati gelah banci erdalan. Banci saja kita pe perlu penampat gelah banci terus ngelayani Jahwe. Sanga bage situasina, ipetetap Jahwe ukurta, nina, “Aku kap Jahwe Dibatandu, si ncikep tan kananndu si ngataken man bandu, ‘Ula mbiar. Kusampati kam.’” (Jes. 41:13) Raja Daud enggo pernah gejapkenna penampat si bage. Sanga adapina erbage-bage masalah ras serangen musuh-musuh, bagenda nina man Jahwe, “Tan kananNdu ndukung aku.” (Ms. 18:35) Tapi uga Jahwe ndukung kita?
Alokenlah penampat arah keluargandu, teman-temanndu, ras pertua-pertua (Nen paragrap 11-13)
12. Ise saja si banci igunaken Jahwe nampati kita sanga kita lemah?
12 Rusur igunaken Jahwe kalak si deban nampati kita. Contohna, sanga lemah iakap Daud bana, temanna Jonatan reh ndahi ia bage pe ngapuli ia. (1 Sam. 23:16, 17) Bage ka pe, ipilih Jahwe Elisa nampati Elia. (1 Raj. 19:16, 21; 2 Raj. 2:2) Gundari, banci gunaken Jahwe keluarga, teman-teman, ntah pe pertua-pertua nampati kita. Tapi, sanga getem kel pusuhta, banci saja kisat kita jumpa ras kalak si deban, pangen siakap sisada. E wajar nge. Tapi kai si banci silakoken guna ngaloken penampat Jahwe?
13. Kai si perlu silakoken gelah sidat gunana penampat si bere Jahwe? (Nen ka gambar.)
13 Si perlu silakoken. Usahakenlah la nerapken bana. Sanga kita nerapken bana, rusur siukuri kerna dirita saja ras masalahta. Janah banci kari dungna siban keputusen si la mehuli. (Kua. 18:1) Memang perlu kita waktu sisada, apai ka sanga mbaru denga masalah e terjadi. Tapi adi ndekah kita nerapken bana, banci saja dungna situlak penampat arah Jahwe. Emaka, bas masa si sulit, nggitlah kita ngaloken penampat arah keluargata, teman-teman, ras pertua-pertua, amin pe la nukah. Ingetlah maka sangana igunaken Jahwe kalak e guna nampati kita.—Kua. 17:17; Jes. 32:1, 2.
PASTI APULI JAHWE KAM
14. Situasi kai si banci erban kita mbiar?
14 Tentangenna. Banci saja lit situasi si erban kita mbiar. Bas Pustaka, lit piga-piga kali ituriken kerna umat Dibata si setia, si latih ukurna ras mbiar perban musuh-musuhna ntah pe tentangen si deban. (Ms. 18:4; 55:1, 5) Bage ka pe, banci saja siadapi tentangen bas sekolah, bas ingan erdahin, arah keluarga, ntah pe arah pemerentah. Banci saja siadapi masalah kesehaten si mekelek. Sanga bage situasina, banci saja lemah siakap banta bali bagi anak-anak. Uga Jahwe nampati kita bas situasi si bage?
15. Jaminen kai si ibere Jahwe bas Masmur 94:19?
15 Si ilakoken Jahwe. ApuliNa kita janah banNa kita tenang. (Baca Masmur 94:19.) Ayat enda banci saja erban kita mbayangken kerna sekalak anak diberu si kitik denga si mbiar ras la banci medem perban meder kel udan ras megang kel sora lenggur. Bayangken, reh bapakna ku kamarna janah dakepna ia seh ngasa ia terpedem. Amin pe tetap denga udan, tapi perban dakep bapakna ia, e erban aman akapna. Bage ka pe, sanga siadapi masalah si erban kita mbiar, banci saja perlu kita Bapakta si i surga si tempa-tempa ndakep kita seh ngasa reh tenangna kita. Tapi, kai si perlu silakoken gelah banci sidat pengapul arah Jahwe?
Begikenlah Bapakndu si i surga ngerana arah Pustaka guna ngapuli kam (Nen paragrap 15-16)
16. Kai si perlu silakoken gelah sidat pengapul arah Jahwe? (Nen ka gambar.)
16 Si perlu silakoken. Raturlah kita ertoto man Jahwe ras mbaca Pustaka. (Ms. 77:1, 12-14) Adi enggo biasa lakokenndu si e, pasti mis pindondu penampat Bapakndu si i surga sanga mberat kel masalahndu. Turiken man baNa kai saja si erban kam mbiar ras kuatir. Begiken Ia sanga bacandu Pustaka janah gejapkenndu me pengapul arah Ia nari. (Ms. 119:28) Banci saja datndu bagin-bagin tertentu bas Pustaka si banci tuhu-tuhu ngapuli kam sanga kam mbiar. Contohna, banci saja datndu pergegeh arah buku Jop, Masmur, Kuan-kuanen, bage pe kata-kata Jesus si lit bas Matius pasal 6. Adi terus kam ertoto man Jahwe ras bacandu Pustaka, gejapkenndu me pengapul arah Ia nari.
17. Kerna kai nge kita tek?
17 Tek kita maka banci sampati Jahwe kita sanga mesera kel situasita. Labo kita pernah sisada. (Ms. 23:4; 94:14) Erjanji Jahwe guna njaga kita, erban kita nteguh, nampati ntah pe ndukung kita, ras ngapuli kita. Bagenda nina Jesaya 26:3 kerna Jahwe, “LindungiNdu pagi kalak si ngandalken Kam. Lalap pagi bereNdu kedamen man kalak e, perban tek kalak e baNdu.” Emaka, teklah man Jahwe janah gunaken kerina penampat si iberekenNa. Alu bage, banci datndu gegeh amin pe sangana adapindu masa-masa si sulit.
KAI JAWAPNDU?
-
Ndigan nge perlu kel kita penampat Jahwe?
-
Lit empat cara Jahwe nampati kita sanga mberat kel masalahta, kai saja e?
-
Kai si banci silakoken gelah sidat manpaat arah penampat si bere Jahwe?
LAGU 12 Jahwe, Dibata Si Madakuasa
a Piga-piga gelar enggo iganti.