1. Engkai maka arus sipersiapken dirita guna ngadapi penganiayan?

ITEH Tuan Jesus maka pasti segat ate kalak murid-muridna. Emaka ipersingetina murid-muridna bas berngi sope ia iukum mate. (Joh. 17:14) Ngasa gundari, nterem umat Jahwe isiksa ntah pe ianiaya kalak si la nembah Jahwe. (2 Tim. 3:12) Perban nggo reh deherna kita ku kedungen doni enda, pasti reh buena siadapi penganiayan arah musuh-musuhta.​—Mat. 24:9.

2-3. (a) Kai bahayana adi kita mbiar? (b) Kai si man bahasenta bas artikel enda?

² Uga carana ersikap ngadapi penganiayan? La perlu siukuri kai si la mehuli si banci saja terjadi pagi banta, sebap banci erban kita kuatir ras mbiar. Dungna ngadi kita ngelayani Jahwe lenga pe reh tentangen e. (Kua. 12:25; 17:22) Adi mbiar kita, enda banci jadi senjata ampuh ‘musuhta, Iblis’ guna ngelawan kita. (1 Pet. 5:8, 9) Emaka, kai si banci silakoken gelah banci kita setia sanga reh penganiayan?

³ Bas artikel enda, sibahas kari uga carana gelah reh rembakna kita ras Jahwe, janah ngkai maka arus silakoken e gundari nari. Sibahas ka uga carana gelah banci kita reh pangna. Selain si e, sibahas kari kai si banci silakoken sanga segat ate kalak kita.

4. Menurut Heber 13:5, 6, kai si arus siteki? Engkai?

⁴ Teklah kam maka keleng ate Jahwe kam janah la kam pernah itadingkenNa. (Baca Heber 13:5, 6.) Puluhen tahun si nggo lewat, pernah ikataken Menara Pengawal, “Kalak  si tuhu-tuhu itehna uga Dibata e tek kel ia man baNa sanga ianiaya.” Pasti setuju kita! Gelah banci kita setia sanga ianiaya, arus keleng ateta Jahwe janah tuhu-tuhu kita tek man baNa. Selain si e, ula pernah kita ragu maka Jahwe pe keleng kel ateNa kita.​—Mat. 22:36-38; Jak. 5:11.

5. Kai si banci silakoken gelah sigejapken keleng ate Jahwe kita?

⁵ Bacalah Pustaka tiap wari, janah banlah tujunndu mbacasa gelah reh rembakna ras Jahwe. (Jak. 4:8) Sanga bacandu Pustaka, daramilah sipat-sipat Jahwe, misalna kekelengenNa, perkuah ateNa, bage pe lias ateNa. Arah ranan bage pe perbahanen Jahwe, gejapkenlah uga kelengna ateNa kam. (Kel. 34:6) Piga-piga kalak la ia tek keleng ate Dibata ia perban lenga pernah igejapkenna keleng ate kalak ia. Adi bage perasanndu, banlah tiap wari daftar kerna kai saja si nggo ilakoken Jahwe bandu si jadi bukti maka mekuah janah keleng ateNa kam. (Msm. 78:38, 39; Rom. 8:32) Adi sigejap-gejapken kai si nggo ilakoken Jahwe banta janah siukuri kai si nggo sibaca bas Pustaka, banci melala sidat bukti maka keleng ate Jahwe kita. Adi tuhu-tuhu siergai kai si ilakoken Jahwe man banta, reh rembakna me kita ras Ia.​—Msm. 116:1, 2.

6. Menurut Masmur 94:17-19, kai hasilna adi ratur kam ertoto?

⁶ Raturlah kam ertoto. Bayangken lit sekalak anak idakep bapakna. Aman kel akapna janah kai pe si terjadi man bana la ia mbiar nceritakenca. Hubungenndu ras Jahwe pe banci bage adi tutus atendu ertoto tiap wari. (Baca Masmur 94:17-19.) Sanga ertoto man Jahwe turikenlah isi pusuhndu, kataken kai saja si erban kam kuatir ras mbiar. (Perng. 2:19) Kai hasilna? Banci igejapkenndu “kedamen i bas Dibata nari si banci naluken perukuren kai pe.” (Pil. 4:6, 7) Reh rusurna kam ertoto, reh deherna kam ras Jahwe.​—Rom. 8:38, 39.

7. Engkai maka arus kita tek janji-janji Dibata pasti terjadi?

⁷ Teklah kam maka janji-janji Dibata pasti terjadi. (Bil. 23:19) Adi la kam tek janji Dibata pasti terjadi, menukah iakap Setan ras pengikutna pebiar-biar kam. (Kua. 24:10; Heb. 2:15) Uga carana gelah reh paguhna kinitekenndu nandangi Kerajan Dibata? Pelajarilah janji-janji Dibata kerna KerajanNa bage pe kai alasenna maka banci kam tek janji e pasti terjadi. Kai gunana? Perdiatekenlah pengalamen Stanley Jones, si ipenjaraken pitu tahun perban kinitekenna. * Engkai maka banci ia tetap setia? Nina, “Banci  paguh kinitekenku perban kupelajari Kerajan Dibata ras kai saja si ilakoken Kerajan e pagi. La kupernah sangsi kerna si e. Emaka ise pe la banci erban aku nadingken Jahwe.” Adi tek kel kam maka janji Dibata pasti terjadi, reh deherna me kam ras Jahwe janah la kam pernah mbiar ngelayani Ia.​—Kua. 3:25, 26.

8. Engkai maka arus kita ratur reh ku perpulungen? Jelasken.

⁸ Raturlah kam reh ku perpulungen. Perpulungen banci erban kam reh deherna ras Jahwe. Ratur ntah lang kita ku perpulungen banci nentuken setia ntah lang pagi kita sanga ianiaya. (Heb. 10:24, 25) Engkai maka bage? Adi perban masalah si kitik saja pe la kita reh ku perpulungen gundari, apai ka pagi adi reh beratna tentangenna. Janah adi sitekadken terus reh ku perpulungen, la kita mbiar sanga lit pagi si ngelarang kita pulung. Gundari me waktuna ratur reh ku perpulungen. Adi penting siakap perpulungen, la lit tentangen si banci ngambati kita termasuk larangen pemerentah, sebap patuhen kita man Dibata asangken manusia.​—Perb. 5:29.

9. Engkai maka gundari nari perlu sihapal ayat-ayat Pustaka?

⁹ Hapallah ayat-ayat favoritndu. (Mat. 13:52) Amin gia la mejile pengingetta, banci igunaken Jahwe kesahNa si badia ngingetken kita kerna ayat-ayat Pustaka. (Joh. 14:26) Lit sekalak turang seninata si pernah ipenjaraken bas penjara khusus i Jerman Timur, nina, “Meriah kel kuakap perban nggo kuhapal lebih 200 ayat! Amin gia aku sisada bas penjara e, melala si banci kuukuri kerna Pustaka.” Perban melala ihapalna ayat-ayat Pustaka, banci ia tetap rembak ras Jahwe janah terus setia.

10. Engkai maka arus sihapal lagu-lagu si muji Jahwe?

¹⁰ Hapallah janah endeken lagu-lagu si lit bas buku ende-endenta bage pe bas jw.org. Sanga Paulus ras Silas ipenjaraken i Pilipi, banci kalak e rende muji Jahwe perban nggo ihapalna laguna. (Perb. 16:25) Bage ka me si ilakoken turang seninata si tading i daerah bekas Uni Soviet si iasingken ku Siberia. Nina turang seninata si gelarna Mariya Fedun, “Endeken kami kerina lagu si inget kami si lit bas buku ende-endenta.” Ikatakenna ka  maka terpegegehi kalak e kerina perban lagu-lagu e janah igejapken kalak e maka reh deherna ia ras Jahwe. Terpegegehi nge kam sanga endekenndu lagu favoritndu? Adi bage hapalndulah!​—Nen kotak “La Kel Aku Mbiar.”

11-12. (a) Menurut 1 Samuel 17:37, 45-47, ngkai maka banci perpang kel Daud? (b) Kai si banci sipelajari arah Daud?

¹¹ Arus kita pang sanga ngadapi penganiayan. Kai si banci silakoken adi kurang siakap kita pangna? Pang ntah lang kita labo itentuken galang dagingta, gegehta, ntah pe kengasupenta. Perdiatekenlah uga Daud si nguda denga ngelawan Goliat. Adi ibandingken ia ras raksasa e, kitik kel ia, lemah, janah la lit perlengkapen perangna. Pedangna pe la lit. Tapi pang kel ia, ilawanna raksasa si sombong e.

¹² Engkai maka banci perpang kel Daud? Tek kel ia maka pasti isampati Jahwe ia. (Baca 1 Samuel 17:37, 45-47.) Labo ibandingken Daud dirina ras Goliat, tapi ibandingkenna Goliat e ras Jahwe. Kai si banci sipelajari je nari? Banci kita pang adi tek kita maka pasti kita isampati Jahwe janah tek kita maka seh kel kitikna kalak si nentang kita adi ibandingken ras Dibata Si Madakuasa. (2 Kro. 20:15; Msm. 16:8) Kai si banci silakoken gelah reh pangna kita gundari sope kita ianiaya?

13. Uga carana gelah banci kita reh pangna? Jelasken.

¹³ Banci kita reh pangna adi ikut kita mberitaken berita si meriah kerna Kerajan Dibata. Engkai maka bage? Perban sanga kita erberita, erlajar kita i je gelah tek man Jahwe janah la mbiar man manusia. (Kua. 29:25) Bali bagi otot, banci ia reh gegehna adi terus ilatih, kita pe banci reh pangna adi ikut kita erberita arah rumah ku rumah, bas ingan si nterem jelma, daerah bisnis, ntah pe kesaksin si la resmi. Adi gundari pe pang kita erberita, pagi pe pang kita amin gia ilarang pemerentah.​—1 Tes. 2:1, 2.

14-15. Kai si banci sipelajari arah Nancy Yuen ras Valentina Garnovskaya?

¹⁴ Banci kita erlajar arah pengalamen dua turang seninata si seh kel perpangna. Si pertama Nancy Yuen. Amin gia gedangna kira-kira 150 sentimeter ngenca,  tapi perpang kel ia. * Sanga ilarang ia erberita si meriah kerna Kerajan Dibata, tetap ia erberita. Dungna, ipenjaraken ia lebih 20 tahun i Cina. Sanga ia iintrogasi, ikataken kalak e maka ia me “jelma si mekengna kel” bas negara kalak e.

¹⁵ Si peduaken, Valentina Garnovskaya. Enggo telu kali ia ipenjaraken i Rusia, janah dekahna ia bas penjara e lit kira-kira 21 tahun. * Engkai? Terus atena erberita, emaka igelari ia “penjahat kelas kakap.” Kai nge si erbanca maka perpang kel duana turang seninata e ndai? Tek kalak e maka pasti ia isampati Jahwe.

16. Kai nge kuncina gelah banci kita tuhu-tuhu perpang?

¹⁶ Bagi si nggo sibahas ndai, gelah banci kita pang, ula gegehta ras kengasupenta saja siandalken. Tapi, teklah kita man Jahwe maka pasti kita isampatiNa janah situhuna Ia nge si erjuang guna kita. (Ul. 1:29, 30; Sak. 4:6) Enda me kuncina gelah banci kita tuhu-tuhu perpang.

17-18. Menurut Johanes 15:18-21, kai persinget Jesus man banta? Jelasken.

¹⁷ Adi iergai kalak kita pasti meriah ukurta, tapi adi lit si segat atena kita ula min kitik ukurta. Nina Jesus, “Ermeriah ukurlah kena adi segat ate kalak kena, itulakna kena, ihinana kena, janah ikatakenna kena jahat erkiteken Anak manusia.” (Luk. 6:22) Kai maksudna?

¹⁸ Labo maksud Jesus maka pasti meriah ukurta adi segat ate kalak kita. Tapi, ipersingetina kita kerna kai si banci saja terjadi man banta perban kita labo bagin bas doni enda. Sidalanken kai si iajarken Jesus janah siberitaken kai si iberitakenna, emaka segat ate doni enda kita. (Baca Johanes 15:18-21.) La siakap dalih adi segat ate kalak kita perban keleng  ateta Jahwe janah meriah ateta siban ukurNa.

19. Kai buktina siusih rasul-rasul Jesus?

¹⁹ Ula perban ranan ntah pe perbahanen kalak, mela kita jadi Saksi Jahwe. (Mi. 4:5) Gelah la kita mbiar man manusia, siukurilah kai si ilakoken rasul-rasul i Jerusalem la ndekah kenca Jesus ibunuh. Segat kel ate peminpin-peminpin agama Jahudi kalak e. (Perb. 5:17, 18, 27, 28) Aminna pe bage, tetap denga kalak e lawes ku rumah pertoton tiap wari janah terus erberita bukti ia murid Jesus. (Perb. 5:42) La ia mbiar man manusia. Janah kita pe banci la mbiar man manusia adi sipetandaken kita sekalak Saksi Jahwe man temanta erdahin, temanta i sekolah, ntah pe tetanggata.​—Perb. 4:29; Rom. 1:16.

20. Engkai maka meriah ukur rasul-rasul amin pe segat ate kalak ia?

²⁰ Engkai maka meriah ukur rasul-rasul Jesus? Perban iteh kalak e ngkai maka segat ate kalak ia, janah megah akapna ianiaya perban ngelakoken peraten Jahwe. (Luk. 6:23; Perb. 5:41) Ikataken Rasul Petrus ka, “Aminna pe arus inanami kena kiniseran erkiteken kai si benar, ermeriah ukur me kena.” (1 Pet. 2:19-21; 3:14) Adi segat ate kalak kita perban silakoken si benar, la kita mbiar janah la sitadingken Jahwe.

21-22. (a) Kai si banci silakoken guna ersikap ngadapi penganiayan? (b) Kai si man bahasenta bas artikel seterusna?

²¹ La siteh ndigan kita ianiaya ntah pe ilarang pemerentah ngelayani Jahwe. Tapi siteh uga carana ersikap guna ngadapisa. Emaka reh rembaknalah kita ras Jahwe, silakokenlah kai si banci erban kita reh pangna, janah sipelajari uga carana ngadapi kalak si segat atena kita. Adi ersikap kita gundari nari banci kita pang bas wari si pepagi.

²² Uga adi ilarang pemerentah kita ngelayani Jahwe? Bas artikel seterusna, sibahas kari pedah Pustaka si banci nampati kita terus ngelayani Jahwe amin pe ilarang.