Bas pudi wari, lanai aku ragu janah mulai me aku merintis. Mulai je nari, melala kel kesempaten man bangku bas ngelayani Jahwe lebihen asa si kubayangken. (Ep. 3:20) Tapi, banci saja itehndu atendu ngkai maka banci aku lanai ragu. Nta kuceritaken tangtangna nari.

Aku lahir i Berlin, Jerman, piga-piga bulan kenca Perang Doni II imulai bas tahun 1939. Tapi bas tahun 1945 sanga perang nandangi ngadi, melala pesawat tempur lewat i datas kota Berlin janah idabuhkenna bom. Bas sada wari, ndabuh bom bas dalan deher rumah kami. Kiam me aku ras keluargaku ku ingan perlindungen. Dungna, pindah kami ku Erfurt, kuta mamakku gelah banci selamat.

Semangat kel mamak ndarami kebenaren. Ibacana buku-buku si itulis kalak si meganjang sekolahna janah ipelajarina mbue agama. Tapi, la ia puas. Kira-kira tahun 1948, lit dua Saksi Jahwe ndahi rumah kami. Iahken mamak kalak e masuk janah melala penungkunenna man kalak e. La seh sejam pe ikatakenna bangku ras adekku, “Nggo kudat kebenaren!” La ndekah kenca si e, mulai me kami teluna reh ku perpulungen i Erfurt.

Bas tahun 1950, mulih kami ku Berlin janah gabung kami bas Runggun Berlin-Kreuzberg. Sanga pindah kami ku daerah si deban i Berlin, gabung kami bas Runggun Berlin-Tempelhof. Dungna, iperidiken me Mamak, tapi lenga kuakap aku siap iperidiken. Engkai?

Mesera kuakap ngelakoken terbuen man Jahwe perban permela kel aku. Ikut memang aku erberita, tapi sedekah dua tahun temanku erberita ngenca si lalap ngerana. Tapi banci dungna aku berubah perban rusur aku erteman ras turang senina si nggo mbuktiken maka kalak e pang janah setia ngelayani Jahwe. Lit piga-piga si pernah ipenjaraken bas kamp konsentrasi Nazi ntah pe bas penjara-penjara i Jerman Timur. Lit ka si erbuni-buni  maba buku-bukuta ku Jerman Timur, amin gia banci kalak e ipenjaraken. Kena kel ku pusuhku usihen kalak e. Adi turang senina e pe nggit ngadapi bahaya si ngancam geluhna janah banci ipenjaraken, arusna banci nge kuusahaken gelah ula permelasa.

Lanai aku permelasa kenca ikut bas kegiaten erberita istimewa bas tahun 1955. Bas sada surat si lit bas Informant, * iumumken Turang Senina Nathan Knorr maka kegiaten istimewa e salah sada kegiaten si mbelinna si pernah iaturken organisasi. Ikatakenna maka adi kerina perberita ikut, “pasti bas bulan e, bulan si luar biasana kel i bas erberita.” E me si terjadi! Jenari kubaktiken diriku man Jahwe, janah bas tahun 1956, iperidiken aku radu ras bapak bage pe adekku. Tapi la ndekah kenca e, arus kuban keputusen penting si deban.

Enggom ndekah kuteh merintis e dahin si mehulina kel, tapi lalap aku tertaren-taren. Kupelajari lebe uga cara jual beli barang ku perusahan i luar negeri. Kenca e erdahin ateku kentisik gelah lit pengalamenku. Emaka bas tahun 1961, dat dahin aku i Hamburg, kota pelabuhen si galangna i Jerman. Tapi, perban meriah kel kuakap dahin e, lalap kutunda merintis. Kai si dungna kulakoken?

Ngata bujur kel aku man Jahwe perban iberekenNa turang senina si perkeleng guna nampati aku ngangkai maka ngelayani Jahwe me si pentingna. Piga-piga temanku nggo mulai merintis, janah e jadi usihen bangku. Selain si e, Turang Senina Erich Mundt, si pernah ipenjaraken bas kamp konsentrasi, ngiahken aku gelah tek janah ernalem man Jahwe. Ikatakenna maka turang senina si ngandalken dirina sendiri sanga bas kamp konsentrasi dungna lanai paguh kinitekenna. Tapi, kalak si tuhu-tuhu tek man Jahwe banci terus setia janah nampati organisasiNa.

Selain si e, Turang Senina Martin Poetzinger, si bas pudi wari ngelayani jadi anggota Badan Pinpinen, rusur ipegegehina turang senina. Nina, “Adi pang kena, e me erta si mehergana!” Kenca kuukuri kata-kata e, ngadi me aku arah dahinku janah mulai aku merintis bas bulan Juni 1963. E me keputusenku si mehulina kel! Dua bulan kenca si e, iundang aku jadi perintis istimewa lenga pe sempat kudarami dahinku. Piga-piga tahun kenca si e, ipasu-pasu Jahwe aku lebihen asa si kubayangken. Iundang aku ku Sekolah Gilead kelas si pe-44ken.

“Ula meter nyerah i bas ndalanken tugas!” E me salah sada pelajaren si pentingna kel si kudat bas Gilead. Persinget e rusur kel ikataken Turang Senina Nathan Knorr ras Lyman Swingle. Iahkenna kami gelah la tadingken kami tugas kami amin gia mesera. Nina Turang Senina Knorr, “Kai nge si utamana iukurindu? Ingan si melket nge, serangga, kalak si mesera? Ntah perdiatekenndu nge batang kayu, bunga-bunga, bage pe kalak si ermeriah ukur? Arus iusahakenndu ngkelengi kalak si lit i je!” Bas sada wari, sanga khotbah Turang Senina Swingle, ijelaskenna ngkai maka lit turang senina si meter nyerah. Paksa si e, menam naktak iluhna. Sinik ia kentisik gelah banci tenang. Erbekas kel e bas pusuhku, janah ertekad aku gelah la pernah kukecewaken Kristus ras senina-seninana.​—Mat. 25:40.

Sanga dat daerah tugas kami kerina si bas kelas, piga-piga turang senina si erdahin i Betel merhat ia metehsa janah isungkunina kami piga-piga kalak. Sanga ikataken teman sekelasku daerah tugasna, mehuli komentar senina-senina si arah Betel e. Tapi sanga kukataken, “Kongo (Kinshasa),” rempet kalak e sinik janah nina, “O, Kongo! Mbera sampati Jahwe kam ya, Brur!” Paksa si e, melala kel berita kerna perang, kalak si rubat, bage pe pembunuhen i Kongo (Kinshasa). Tapi terus kuinget pelajaren si kudat bas Gilead. La ndekah kenca kami iwisuda bas bulan September 1967, berkat me aku ras Heinrich Dehnbostel bage pe Claude Lindsay ku Kinshasa, ibu kota Kongo.

Seh kenca kami i Kinshasa, pelajari kami bahasa Prancis sedekah telu bulan. Emaka berkat kami alu pesawat ku Lubumbashi, si mbarenda gelarna Elisabethville, deher perbatasen Zambia bas wilayah Kongo bagin selatan. Pindah kami ku rumah utusen injil si lit bas pusat kota e.

Buen kalak bas kuta i Lubumbashi lenga pernah megi berita si meriah. La tanggung kap kami riahna banci mpebetehken kebenaren man anak kuta e. La ndekah kenca pindah kami ku je, nggo melala kel si erlajar Pustaka ras kami. Mon-mon la banci kerina iajari kami. Erberita ka kami man pejabat-pejabat pemerentah ras polisi. Melala si ngergai Pustaka ras pelayanenta. Teremen anak kuta e make bahasa Swahili, emaka aku ras Claude Lindsay ipelajari kami ka bahasa e. La ndekah kenca e, itugasken kami ku runggun si make bahasa Swahili.

Amin gia melala pengalamen kami si luar biasa, tapi lit kang tantangenna. Megati arus adapi kami piga-piga tentera si ersenjata si sangana mabuk ntah pe polisi si seh kel rawana. Rusur ipitnah kalak e kami. Bas sada wari, lit sekelompok polisi si ersenjata masuk ku ingan perpulungen i rumah utusen injil janah ibabana kami ku kantor polisi pusat. I je, isuruhna kami kundul bas lante seh ngasa kira-kira jam sepuluh berngi emaka ibebaskenna kami.

Bas tahun 1969, itugasken aku jadi pertua keliling. Bas wilayah e melala kel dukutna, janah arus kami ndauh erdalan ngelewati  dukut-dukut si gedang ras dalan si erkubang. Bas sada kuta, lit manuk ras anak-anakna si medem i teruh ingan medemku bas berngi wari. Kuinget denga, tiap erpagi-pagi nggo imedakina aku perban gangna sorana padahal gelap denga. Bas berngi wari, rusur aku ngerana-ngerana kerna kebenaren Pustaka ras turang senina janah kami cudu-cudu. Meriah kel kuakap ngingetsa.

Salah sada masalah si mbelinna si iadapi kami eme lit senina-senina si palsu, si bali bagi “batu si terbuni.” (Jud. 12) Idukung kalak e geraken Kitawala. * Piga-piga kalak e nggo iperidiken janah lit ka si jadi pertua. Tapi turang senina si setia la tertipu. Dungna, ipedarat Jahwe senina-senina si palsu e arah runggun. Kenca si e, reh buena kalak meteh kebenaren.

Bas tahun 1971, itugasken aku bas kantor cabang i Kinshasa. Melala kel dahinku i je, misalna ngaloken ras ngirim surat, ngurus pesanen publikasi, bage pe kerina si lit hubungenna ras pelayanen. Bas Betel, kupelajari ka uga carana ngaturken pendahinta bas negara si mbelin si terbatas denga listrikna, alat transportasina, bage pe dalanna. Mon-mon, arus erbulan-bulan dekahna ngirim surat ku runggun-runggun. Bas pesawat nari, ipindahken surat-surat e ku perahu, janah ipediat i je erminggu-minggu dekahna bas lau si melala kel enceng gondokna. Tapi tetap nge dung dahin kami aminna pe lit tantangen.

Luar biasa kel kuakap ngidah turang senina si banci erban kebaktin-kebaktin si mbelin amin gia terbatas senna. Iban kalak e panggung arah gun-gunen sarang rayap janah dingdingna arah rumput gajah si gedang. Rumput e pe banci ka igulung jadi bantal guna ingan kundul. Iban turang senina ka buluh jadi tiang-tiang bage pe amak si nggo ibayu gelah banci erban atap ntah pe meja. Perban la lit paku, arus ipotongi kalak e kulit kayu guna ngiket tiang-tiang e. Luar biasa kel kuakap turang senina si melala idena. Keleng kel ateku kalak e, emaka sanga arus aku pindah ku ingan tugas si mbaru, tedeh kel ateku ia kerina.

I bas tahun 1974, pindah aku ku kantor cabang i Nairobi, Kenya. Seh kel sibukna kami i je, perban si iawasi cabang Kenya pendahin erberita bas sepuluh negara tetangga. Bas piga-piga negara e, pendahinta ilarang. Piga-piga kali aku itugasken guna ndahi negara-negara e, khususna Etiopia. Paksa si e, turang seninanta si i je ngadapi erbage tentangen ras penganiayan si kejam. Enterem si isiksa janah ipenjaraken, lit ka si ibunuh. Tapi tetap kalak e megenggeng janah setia perban ndeher ia ras Jahwe bage pe ras turang senina.

Bas tahun 1980, reh riahna kuakap geluhku sanga erjabu ras Gail Matheson. Gail bas Kanada nari, janah sada kelas kami bas sekolah Gilead. Rusur kami surat-suraten. Gail e utusen injil i Bolivia. Kenca 12 tahun la jumpa ras ia, jumpa ka kami dungna i New York. La ndekah kenca e, erjabu kami i Kenya. Ngata bujur kel aku perban Gail e rohani kel janah puas ia nandangi kai si lit bas ia. Ia teman geluh si perkeleng janah terus nampati aku. Meherga kel ia bangku.

Bas tahun 1986, itugasken aku ras Gail bas dahin pertua keliling, janah paksa si e pe ngelayani ka aku jadi anggota Panitia Cabang. Selain jadi pertua keliling i Kenya, kudahi ka melala negara si iawasi cabang Kenya.

Salah sada kenangen si erban meriah kel ukurku eme sanga nikapken kebaktin i Asmara (Eritrea) bas tahun 1992. Paksa si e, dahin erberita lenga ilarang i je. Tapi, lenga lit dat kami ingan kebaktin selain sada gudang peternaken si mejin kel daratna. Sanga masuk kami ku bas, kepeken bas pe ndauh mejinen. Tapi bas wari kebaktin, sengget kel aku. Bagin arah bas gudang ndai nggo ipesikap turang  senina jadi ingan si seh kel jilena, janah metunggung dungna ipake guna nembah Jahwe. Melala keluarga si maba uis si mejile janah beluh kel kalak e nutupi bagin-bagin si kurang jilena itatap. Meriah kel ukur kami banci ngikuti kebaktin e, janah lit 1.279 kalak si reh.

Sanga ngelayani bas dahin keliling, arus iadapi kami piga-piga tantangen perban tiap minggu pindah-pindah ingan kami erberngi. Pernah kami erberngi bas sada rumah si mewah i deher pantai. Pernah ka kami erberngi bas sada bangunen si sederhana si iban arah seng, janah adi ku kamar mandi ate kami arus kami erdalan kira-kira 100 meter. Tapi la soal i japa pe kami ngelayani, meriah kel ukur kami banci terus sibuk ras perintis-perintis bage pe perberita si semangat. Sanga dat kami tugas si deban, arus itadingken kami teman-teman si pasti tedeh kel ate kami pagi.

Sedekah pendungi tahun 1980-en ngasa awal tahun 1990-en, piga-piga negeri si iawasi cabang Kenya nggo resmi ngakui pendahinta. Emaka iban me piga-piga kantor cabang ras kantor negeri si mbaru. Bas tahun 1993, itugasken kami ku kantor cabang i Addis Ababa, Etiopia. Kenca puluhen tahun, dungna iakui me pendahinta secara hukum janah lanai perlu erbuni-buni ngelakokenca.

Ipasu-pasu Jahwe pendahinta i Etiopia. Melala turang senina si jadi perintis. Mulai tahun 2012, lit lebih 20 persen perberita si merintis biasa tiap tahun. Selain si e, iban me sekolah-sekolah teokratis guna mereken pelatihen, janah lit lebih 120 Bale Kerajan si ibangun. Bas tahun 2004, pindah me keluarga Betel ku ingan si mbaru, janah lit me sada Bale Kebaktin i je. Enda pasu-pasu Jahwe man turang senina i Etiopia.

Aku ras Gail nggo ndeher kel ras turang senina i Etiopia. Keleng kel ate kami kalak e perban mekacar kalak e janah mehuli. Mbaru-mbaru enda, ipindahken kami ku cabang Eropa Tengah perban lit masalah kesehaten. Sikap kel kami irawat i jenda, tapi tedeh kel ate kami teman-teman kami i Etiopia.

Enggo idah kami berhasil pendahin Jahwe. (1 Kor. 3:6, 9) Misalna, sanga tangtangna aku erberita man kalak i pertambangen tembaga si reh Rwanda nari ku Kongo, la lit perberita si ilaporken bas Rwanda nari. Tapi gundari, lit lebih 30.000 turang senina bas negeri e. Bas tahun 1967, lit kira-kira 6.000 perberita i Kongo (Kinshasa). Gundari lit kira-kira 230.000 perberita, janah lebih sada juta kalak si reh ku acara Peringet-ingeten bas tahun 2018. Bas kerina negeri si mbarenda iawasi cabang Kenya, lit pertambahen jumlah perberita ngasa lebih 100.000 kalak.

Lebih 50 tahun si nggo lewat, melala igunaken Jahwe turang senina guna nampati aku ikut dinas sepenuh waktu. Permela denga nge aku asa gundari, tapi erlajar aku gelah tuhu-tuhu tek man Jahwe. Pengalamenku bas Afrika nampati aku gelah reh sabarna janah puas. Luar biasa kel kuakap ras Gail ngidah turang senina si i je si meriah akapna mere, megenggeng, janah tek man Jahwe. Ngata bujur kel aku kerna lias ate Dibata si mbelin. Ipasu-pasu Jahwe aku lebihen asa si kubayangken.​—Msm. 37:4.