Aku lahir tahun 1954 i St. Paul, Minnesota, Amerika Serikat. Keluargaku labo mesera janah labo ka bayak. Kami eragama Katolik. Lit lima anak mamakku janah aku anak nomor dua. Sanga SD, aku sekolah i bas sekolah Katolik, janah i gereja dahinku nampati pastor. Tapi la melala pemetehku kerna Pustaka. Aminna pe tek aku maka Dibata si nciptaken kerinana, tapi sitik pe la aku tek man gereja.

Tahun pertama aku sekolah hukum i William Mitchell, reh dua kalak Saksi Jahwe ku rumahku. Paksa si e aku sangana nuci baju, emaka erjanji kalak e reh mulihi. Sanga kalak e reh mulihi, lit dua penungkunenku, “Engkai maka sikapen pergeluh kalak si jahat asangken kalak si mehuli?” janah “Uga carana gelah banci tuhu-tuhu ermeriah ukur?” Iberekenna man bangku buku Kebenaran Yang Membimbing Kepada Hidup Yang Kekal bage pe Kitab Suci Terjemahan Dunia Baru, si meratah warna sampulna. Nggit ka aku erlajar Pustaka. Melala pemeteh si mbaru si kudat. Meriah kel ukurku mpelajari maka Kerajan Dibata e  eme pemerentahen si merentah pagi bas doni enda. Banci kuidah maka enggo gagal pemerentahen doni enda. Melala kel masalah, kiniseran, ras si la adil bas doni enda.

Kubaktiken diriku man Jahwe bas awal tahun 1982, janah bas tahun e ka aku iperidiken i kebaktin si temana “Kebenaran Kerajaan” si iban i gedung bas kota St. Paul. Minggu si rehna mulihken aku ku gedung e guna ngikuti ujian gelah banci jadi pengacara. I bas awal bulan Oktober, lulus aku ujian. Kenca si e, enggo banci aku erdahin jadi pengacara.

Bas kebaktin si temana “Kebenaran Kerajaan,” jumpa aku ras Mike Richardson, anggota keluarga Betel i Brooklyn. Iceritakenna man bangku maka bagin hukum enggo iban bas kantor pusat. Kuinget kata-kata sekalak pejabat Etiopia si icatat bas Perbahanen Rasul-Rasul 8:36 janah rukur aku, ‘Engkai maka la aku erdahin bas Bagin Hukum saja?’ Emaka ku isi formulir dinas Betel.

La senang orang tuaku adi aku jadi Saksi Jahwe. Isungkun bapakku aku, banci nge kari aku reh suksesna jadi pengacara adi erdahin aku i Betel. Kujelasken maka aku tenaga sukarela. Kukataken ka maka sitik ngenca kualoken sen guna pengganti ongkosku tiap bulan, bali bagi anggota Betel si deban.

Perban enggo erdahin aku bas pengadilen, la aku banci mis erdahin bas Betel. Bas tahun 1984 me maka mulai aku erdahin i Betel Brooklyn, New York. Itugasken aku bas Bagin Hukum. Pengalamenku sanga erdahin bas pengadilen erguna kel man bangku bas ngelakoken tugasku i Betel.

Bas bulan November 1983, Stanley Theater si lit i Jersey City, New Jersey itukur organisasi. Turang senina mindo ijin guna mpesikap listrik bage pe saluren lau si lit bas gedung e. Sanga jumpa kalak e ras pejabat kota e, ijelasken turang senina maka igunaken kalak e atena Stanley Theater jadi ingan kebaktin Saksi-Saksi Jahwe. Kepeken peraturen i Jersey City ngataken maka bangunen si ipake guna ibadah arus iban i bas ingan tading penduduk. Perban Stanley Theater lit i bas daerah bisnis, emaka la ibereken pejabat bas kota e ijin guna mpesikapsa. Naik banding me turang senina, tapi itulak.

Ibaba organisasi me masalah e ku pengadilen. E terjadi bas minggu pertama aku i Betel. Ope masuk Betel, enggo dua tahun aku erdahin bas pengadilen i St. Paul, Minnesota. Janah enggo biasa kutangani kasus si bage. Salah sada pengacarata ngataken maka Stanley Theater enggo rusur igunaken man erbage-bage acara  umum, mulai arah pemutaren film seh asa konser musik. Jadi, engkai maka bangunen e la banci igunaken man acara si lit hubungenna ras agama? Kenca iperiksa pengadilen kasus e, iputuskenna me maka Jersey City la ngergai kebebasen eragama. Iperentahken pengadilen me gelah ibere kota e ijin man Saksi Jahwe. Arah bagin hukum enda, mulai me kuidah uga Jahwe masu-masu organisasiNa gelah ermajuna pendahinNa. Meriah kel ukurku banci nampati pendahin Jahwe.

Mulai me ipesikap turang senina bangunen si galang e. La seh setahun kenca ipekena bangunen e, bas tanggal 8 September 1985 iban me wisuda Sekolah Gilead kelas pe-79-ken i Bale Kebaktin i Jersey City. Sada kehamaten kel kuakap banci ikut erban maju kepentingen Kerajan bas bidang hukum. Meriah kel kuakap banci ikut nampati bas pendahin Jahwe enda. Riahen kuakap erdahin ras Jahwe asangken sanga jadi pengacara ope lenga masuk ku Betel. Kepeken kenca si e, terus denga aku ipake Jahwe guna ngurus kasus hukum si debanna.

Bas tahun 1980-en, rusur la iergai dokter bage pe rumah sakit keputusen Saksi-Saksi Jahwe si dewasa guna ndatken perawaten si la nggunaken dareh. Khususna enda jadi tentangen si mbelin man diberu si hamil. Perban iakap hakim la lit hak diberu e secara hukum nulak transfusi dareh. Nina hakim maka adi la ibereken transfusi man diberu si hamil, banci saja ia mate sanga melahirken janah la lit si ngurus anakna.

Bas tanggal 29 Desember 1988, sanga melahirken turang seninata Denise Nicoleau, mekelek kel pendarahenna. Rendah kel HB darehna la seh 5. Emaka ate dokter itransfusi min ia, adi lang banci kari bahaya. La nggit Turang Senina Nicoleau. Paginna i bas erpagi-pagi, ipindoken rumah sakit ijin man pengadilen gelah banci iberekenna transfusi dareh man turang seninata e. Ibereken hakim ijin padahal lenga itehna uga situasina janah lenga ka icakapkenna man turang seninata Nicoleau bage pe perbulangenna.

Bas wari Jumat tanggal 30 Desember, itransfusi me Turang Senina Nicoleau aminna pe enggo tegas ikataken perbulangenna ras anggota keluargana la banci itransfusi. Berngina, piga-piga anggota keluargana ras piga-piga kalak pertua itangkap polisi perban ikelilingi kalak e ingan medem Nicoleau gelah ula itransfusi. Paginna, wari Sabtu erpagi-pagi tanggal 31 Desember, terberita me kerna penangkapen e i belang-belang New York ras Long Island perban enggo masuk koran, TV, bage pe radio.

 Bas Senin erpagi-pagi, kujumpai sekalak hakim arah pengadilen tinggi eme Milton Mollen. Kujelasken uga kin situhuna kasus e, janah kukataken lit hakim si enggo nandatangani ijin transfusi aminna pe lenga tehna uga situasina. Karabenna, isuruh Hakim Mollen aku reh ku kantorna guna mbahas masalah e. Pengawasku si gelarna Philip Brumley nemani aku ku kantor Hakim Mollen. Iundang Hakim e ka pengacara rumah sakit gelah ras-ras kami mbahas masalah e. Dungna, reh dekahna sijawapen kami i je. Gelah tetap aku tenang, iingetken Turang Senina Brumley aku arah catatenna, nina, “tenang kam ya.” Cocok kel nasehatna e, perban paksa si e kuusahaken kel mbuktiken maka pengacara rumah sakit e salah.

Kenca kira-kira sada jam, ikataken Hakim Mollen maka kasus e me pagi si pertamana ibahas bas acara pengadilen. Sanga lawes ate kami arah kantor Hakim Mollen, ikatakenna maka “mberat nari nge pagi iakap pengacara-pengacara rumah sakit e.” E ertina pasti mesera kel iakap pengacara e mbela pihak rumah sakit. Paksa si e, kuakap ipetetap Jahwe ukur kami maka banci kami menang. Luar biasa kel kuakap ngidah uga Jahwe nggunaken kami i bas ngelakoken peratenNa.

Ngayak tengah berngi kami erdahin guna nikapken kai si arus ikataken kami pagi. Paginna, enterem turang senina arah Bagin Hukum erdalan ku kantor pengadilen perban ndeher ras Betel Brooklyn. Kenca empatna hakim megi penjelasen kami, iputusken kalak e maka arusna ijin transfusi dareh la ibereken. Emaka, menang me Turang Senina Nicoleau bas pengadilen e. Ikataken pengadilen ka maka adi iban sada keputusen ope ibegiken lebe penjelasen pasien, e sada pelanggaren hak asasi manusia.

La ndekah kenca si e, iputusken pengadilen tinggi i New York maka lit hak Turang Senina Nicoleau guna nulak transfusi dareh. Kenca kasus enda, ikut ka aku nampati telu kasus si deban si lit hubungenna ras dareh, si imenangken pengadilen-pengadilen tinggi i Amerika Serikat. (Nen kotak “ Kasus-Kasus si Imenangken i Pengadilen Tinggi.”) Aku pe kerja sama ras pengacara-pengacara i Betel bas kasus si lit hubungenna ras hak asuh anak, kasus cerai, bage pe kerna taneh ras bangunen.

Tangtangna aku jumpa ras ndeharaku si gelarna Dawn, ia enggo cerai janah lit telu anakna.  Ia erdahin janahna merintis. Melala kel masalah si arus iadapina janah kena kel ku pusuhku ngidah perjuangenna i bas ngelayani Jahwe. Bas tahun 1992, reh kami ku Kebaktin Distrik i New York City si temana “Para Pembawa Terang.” I je kusungkuni ia banci nge kutandai ia terdeheren ntah lang. Setahun kenca si e, erjabu kami. Sada pemere si meherga kel kuakap ia arah Jahwe perban lalap iutamakenna Jahwe janah lucu ka kalakna. Sedekah perjabun kami, mehuli kel lalap perbahanen Dawn man bangku.​—Kua. 31:12.

Sanga kami erjabu, anak-anak Dawn umurna enggo 11, 13, ras 16 tahun. Jadi bapak si mehuli ateku man kalak e. Emaka tutus kel ateku mbaca ogen-ogenta kerna orang tua tiri janah kudalanken kerina si kubaca e. Memang ertahun-tahun dekahna mbue tentangen si arus kuadapi, tapi meriah ukurku perban ianggap anak-anak e aku jadi temanna bage pe bapakna si perkeleng. Teman-teman kalak e katawari pe banci reh ku rumah kami. Meriah iakap kami perban enterem anak-anak muda i rumah kami.

Bas tahun 2013, pindah aku ras Dawn ku Wisconsin guna ngurus orang tuana. Tapi kepeken banci denga aku ngelayani i Betel. Iundang aku gelah terus nampati organisasi bas bagin hukum janah aku nampati jadi sukarelawan sementara.

Bas September 2018, rusur aku mbatuk ope ngerana. Sanga ipereksa dokter aku, la itehna kai si erbanca maka bage. Dungna kujumpai dokter si deban, suruhna aku ertambar ku ahli saraf. Bas Januari 2019, ikataken ahli saraf maka jarang kel lit bagi pinakitku enda. Janah nina, pinakitku enda pagi reh dekahna reh kelekna ras banci mpengaruhi kerina dagingku.

Telu wari kenca si e, sanga aku olahraga, ndabuh aku janah retak tanku. Padahal mbarenda nari rusur nge aku olahraga. Jadi kuteh maka pinakitku enda si erbanca maka mesera kuakap ngendaliken geraken dagingku. Sitik pe la kusangka maka meter kel pinakitku e reh kelekna. Reh dekahna reh serana kuakap ngerana, erdalan, man, bage pe minem.

Meriah kel ukurku perban banci kugunaken pengalamenku selaku pengacara i bas nampati organisasi Jahwe. Meriah kel ukurku banci nulis artikel bas majalah si ibaca dokter, pengacara, bage pe hakim. Ikut ka aku ku acara-acara seminar i belang-belang doni guna mbela hak umat Jahwe bas milih perawaten medis ntah pe operasi si la nggunaken dareh. Tapi, banci kukataken bagi si ikataken penulis Lukas 17:10, ‘Aku budak-budak si la erguna. Kai si kulakoken enggo kewajipenku.’