1. Kai kin “kebenaren” e?

“UGA nge tangtangna kam ndatken kebenaren?” “Kitik-kitik nari nge kam bas kebenaren?” “Asa enggo dekahna kam bas kebenaren?” Banci saja enggo pernah bage penungkunen kalak man bandu ntah pe bage ka penungkunenndu man kalak si deban. Kai kin “kebenaren” e? Biasana, adi sikataken “kebenaren,” kita sangana ncakapken kerna kinitekenta, carata nembah Dibata, bage pe carata ndalani kegeluhenta. Kalak si lit “bas kebenaren” itehna kai si iajarken Pustaka janah idalankenna ka nasehat Pustaka bas geluhna. Asilna, lanai kalak e tek man ajaren-ajaren si salah. (Joh. 8:32) Selain si e, banci meriah ukurna aminna pe nggeluh bas doni Setan enda.

2. Menurut Johanes 13:34, 35, kai tangtangna si banci saja erban kalak tertarik man kebenaren?

² Kai tangtangna si erban kam tertarik man kebenaren? Banci saja erkiteken mehuli idahndu perbahanen umat Dibata. (1 Pet. 2:12) Ntah pe perban kekelengen si icidahkenna man kalak si deban. Enterem kalak si tangtangna reh ku perpulungen, lebih tertarik ia ngidah kekelengen si icidahken turang senina asangken khotbah si ibegina. Si enda labo ateta mamang, perban enggo ikataken Jesus maka murid-muridna itandai perban sikeleng-kelengen. (Baca Johanes 13:34, 35.) Tapi gelah paguh kinitekenta labo bias e saja, lit ka si perlu silakoken.

3. Kai si banci saja terjadi adi kinitekenta erpalasken kekelengen si icidahken turang seninata saja ngenca?

³ Kinitekenta arusna ula min erpalasken kekelengen si icidahken turang senina saja ngenca. Engkai? Perban adi bage, menukah lemah kinitekenta. Cuba bayangkenndu, lit sekalak turang senina ntah e pertua ntah sekalak perintis, ngelakoken kesalahen si serius. Ntah lit sekalak turang senina  si erban kitik ukurndu. Ntah banci saja lit si murtad, janah ikatakenna enda labo kebenaren. Adi bage si terjadi, tertuktuk nge kam janah lanai ilayanindu Jahwe? Adi kinitekenta erpalasken kai si ilakoken kalak si deban, janah labo erkiteken hubungenta ras Jahwe, e bali bagi kalak si mbangun rumah bas taneh kalak si deban. Memang perasanta kerna Jahwe ras umatNa banci erban reh paguhna kinitekenta. Tapi, arus ka tutus ateta mpelajari Pustaka, siusahaken ngangkaisa, janah siban riset. Arus ka sibuktiken sendiri maka Pustaka ngajarken kebenaren kerna Jahwe.​—Rom. 12:2.

4. Menurut Matius 13:3-6, 20, 21, kai nge si terjadi man piga-piga kalak sanga iadapina tentangen?

⁴ Ikataken Jesus maka piga-piga kalak mis ngaloken kebenaren “alu meriah ukur.” Tapi sanga lit tentangen, jadi lemah kinitekenna. (Baca Matius 13:3-6, 20, 21.) Banci saja la iangkaina maka kalak si jadi pengikut Jesus arus ngadapi tentangen. (Mat. 16:24) Banci saja iakapna adi enggo jadi kalak Kristen pasti la ngadapi tentangen ntah pe pasti idungi Dibata lalap masalahna. Tapi i doni enda pasti lit masalah. Keadan banci berubah, janah e banci ngurangi keriahen ukurta.​—Msm. 6:7; Peng. 9:11.

5. Kai buktina maka enggo tek turang seninata adi enggo idatna kebenaren?

⁵ Enterem turang seninata tek maka enggo idat kalak e kebenaren. Kai buktina? La lemah kinitekenna aminna pe kitik ukurna iban turang senina ntah pe idahna perbahanen si la mehuli arah kalak e. (Msm. 119:165) Tiap iadapina masalah labo reh lemahna kinitekenna, tapi reh paguhna. (Jak. 1:2-4) Uga nge carana gelah banci bage paguhna kinitekenndu?

6. Kai nge dasar kiniteken kalak Kristen bas abad pertama?

⁶ Kalak Kristen bas abad pertama banci paguh kinitekenna perban iangkai kalak e Kata Dibata bage pe ajaren Jesus Kristus. Kai si iangkai kalak e igelari “kebenaren si lit i bas berita si meriah.” (Gal. 2:5) Kebenaren enda eme kerina ajaren Kristen, termasuk tebusen Jesus bage pe kekekenna. Tek Rasul Paulus maka kerina ajaren enda eme kebenaren. Janari siteh? Perban igunakenna Kata Dibata guna njelasken man kalak si deban “maka arus inanami Kristus kiniseran janah ipekeke i bas si mate nari.” (Perb. 17:2, 3) Murid-murid bas abad pertama ngaloken ajaren enda janah ipindo kalak e kesah si badia gelah banci iangkaina Kata Dibata e. Riset kalak e guna mastiken maka si ipelajarina e dasarna arah Kata Dibata. (Perb. 17:11, 12; Heb. 5:14) Kiniteken kalak e labo erpalasken perasanna saja, janah ilayanina Jahwe labo erkiteken meriah akapna erteman ras turang senina. Tapi erkiniteken ia perban ‘pemeteh si tepat kerna Dibata.’​—Kol. 1:9, 10.

7. Kai manpaatna adi tek kita maka isi Pustaka e kebenaren?

⁷ Banci saja kitik ukurta iban turang senina ntah pe ilakokenna dosa si serius. Ntah banci saja melala sangana masalahta. Tapi la soal kai pe si terjadi, kebenaren si lit i bas Pustaka la pernah berubah. (Msm. 119:160) Emaka perlu kel tuhu-tuhu siangkai ajaren Pustaka janah tek kita maka e kebenaren. Adi paguh kinitekenta man ajaren Pustaka, tetap kita setia man Jahwe aminna pe siadapi tentangen. E bali bagi jangkar si erban kapal ngasup ertahan sanga lit badai. Uga  carana gelah banci kam reh tekna maka si ipelajarindu e eme kebenaren?

8. Menurut 2 Timotius 3:14, 15, engkai maka Timotius tek maka enggo idatna kebenaren?

⁸ Tek Timotius maka enggo idatna kebenaren. Kai si erbanca ia tek? (Baca 2 Timotius 3:14, 15.) Mamakna ras ninina me si tangtangna ngajarken “Kitap si Badia” man bana. Tapi pasti igunaken Timotius ka melala waktu ras gegehna guna mpelajari Kitap si Badia e. Asilna, “tek” me ia maka si ipelajarina e eme kebenaren. Bas pudi wari, Timotius, mamakna, ras ninina dungna mpelajari ajaren Kristen. Memang tertarik Timotius ngidah kekelengen si icidahken pengikut Jesus, janah meriah kel iakapna erteman ras nampati kalak e. (Pil. 2:19, 20) Aminna pe bage, erkiniteken ia labo perban si e saja, tapi perban enggo ibuktikenna maka ajaren Pustaka e benar. E me si erbanca maka nggit ia jadi teman Jahwe. Bali bagi Timotius, kam pe arus mpelajari Pustaka. Daramilah bukti-bukti si banci erban kam tek maka kai si ipelajarindu kerna Jahwe e tuhu-tuhu benar.

9. Telu kebenaren kai si perlu ipastikenndu?

⁹ Silang-langna, pastiken lebe telu kebenaren dasar enda. Pertama, arus kam tek maka Dibata Jahwe si nciptaken kerinana. (Kel. 3:14, 15; Heb. 3:4; Ket. 4:11) Si peduaken, arus daramindu bukti-bukti si erbanca kam tek maka Pustaka e berita i bas Dibata nari man manusia. (2 Tim. 3:16, 17) Janah si peteluken, arus kam tek maka lit sada kelompok kalak si nembah Jahwe janah Kristus si minpinsa. Janah arus kam tek maka kelompok e eme Saksi-Saksi Jahwe. (Jes. 43:10-12; Joh. 14:6; Perb. 15:14) Gelah banci kam tuhu-tuhu tek man si telu ndai, labo perlu hapalndu kerina isi Pustaka. Tapi si pentingna gunakenlah ‘kengasupenndu rukur’ gelah banci ibuktikenndu maka kai si ipelajarindu e tuhu-tuhu benar.​—Rom. 12:1.

10. Kenca enggo tuhu-tuhu tek kita man kebenaren bas Pustaka, kai ka si perlu silakoken?

¹⁰ Adi enggo tuhu-tuhu tek kam man si telu ndai eme kebenaren, perlu itehndu carana mbuktiken kebenaren e man kalak si deban alu nggunaken Pustaka. Engkai? Perban selaku kalak Kristen, ertanggung jawap kita ngajari kalak si deban kerna kebenaren si enggo sipelajari. * (1 Tim. 4:16) Janah sanga siusahaken nampati kalak si deban gelah tek man kai si iajarken Pustaka, reh paguhna ka kinitekenta nandangi kebenaren e.

11. Kai si banci siusih arah Rasul Paulus sanga ngajari kalak si deban?

¹¹ Sanga ngajar Paulus, ‘igunakenna Undang-Undang Musa ras Ajaren Nabi-Nabi gelah tek kalak man Jesus.’ (Perb. 28:23) Uga kita banci ngusih Paulus sanga siajari kalak kerna kebenaren? Arus sisampati kalak e gelah tuhu-tuhu iangkaina ras iukurina kai si iajarken Pustaka. Alu bage reh rembakna ia ras Jahwe. Ateta ialoken kalak e kebenaren labo perban ngergai kita, tapi perban enggo ibuktikenna sendiri maka si ipelajarina kerna Dibata e benar.

12-13. Kai si banci ilakoken orang tua guna nampati anak-anakna gelah tetap i bas kebenaren?

¹² Kam orang tua, pasti merhat kel kam gelah anakndu tetap i bas kebenaren. Banci saja iakapndu adi lit temanna si mehuli bas runggun banci erpaguhna kinitekenna. Tapi, gelah tek anakndu maka kai si ipelajarina e benar, la bias ia erteman ras kalak si mehuli saja. Tapi perlu ia rembak ras Dibata janah ibuktikenna sendiri maka Pustaka e isina kebenaren.

¹³ Adi iajari orang tua atena kebenaren kerna Dibata man anak-anakna, orang tua arus leben jadi contoh si mehuli bas mpelajari Pustaka. Arus iban kalak e ka waktuna ngukuri kai si ipelajarina. Alu bage banci iajarina anak-anakna carana mpelajari ras ngukuri isi Pustaka. Perlu iajari orang tua anak-anakna cara nggunaken PERPUSTAKAN ONLINE Sora Ermomo, JW Library, ras si debanna bali bagi ia ngajari kalak si deban erlajar Pustaka. Alu bage banci isampati orang tua anakna ngkelengi Jahwe. Janah isampatina ka anakna ngergai budak si setia janah pentar si igunaken Jahwe guna mereken pangan rohani. (Mat. 24:45-47) Kam orang tua, ula kebenaren-kebenaren dasar saja ngenca si iajarkenndu man anakndu. Tapi ajari ka kerna “kepentaren Dibata si seh kel bagesna”  gelah reh paguhna kinitekenna. Janah sesuaiken ka lah ras umur bage pe kengasupenna.​—1 Kor. 2:10.

14. Engkai maka perlu sipelajari nubuat Pustaka? (Nen ka kotak “ Banci nge Ijelaskenndu Nubuat-Nubuat Enda?”)

¹⁴ Nubuat Pustaka eme salah sada bagin penting arah Kata Dibata si banci nampati kita mpepaguh kinitekenta man Jahwe. Nubuat-nubuat kai si enggo mpepaguh kinitekenndu? Banci saja nubuat kerna “wari-wari pendungi.” (2 Tim. 3:1-5; Mat. 24:3, 7) Tapi lit nge nubuat si deban si banci mpepaguh kinitekenndu? Contohna, banci nge ijelaskenndu uga nubuat i bas Daniel pasal 2 ntah pe bas Daniel pasal 11 enggo terjadi ntah pe si sangana terjadi? * Adi kinitekenndu tuhu-tuhu erpalasken Pustaka, kinitekenndu la banci lemah. Cuba perdiatekenndu usihen turang seninata i Jerman si ianiaya sanga Perang Doni II. Aminna pe lenga iangkai kalak e kel nubuat Pustaka kerna wari-wari pendungi, tapi erkiniteken kel kalak e nandangi Kata Dibata.

15-17. Engkai maka turang seninata si ianiaya Nazi banci tetap setia?

¹⁵ Sanga pemerentahen Nazi si erkuasa i Jerman, ribun turang seninata ikirim ku kamp konsentrasi. Hitler ras salah sada pejabat tinggi si gelarna Heinrich Himmler, rate segat man Saksi-Saksi Jahwe. Menurut sekalak turang senina, pernah bagenda nina Himmler man sada kelompok turang senina i kamp konsentrasi, “Dibata kena Jahwe, merentah i surga, tapi i bas doni enda kami si merentah! Ibuktiken kami kari man kena maka dekahen nge kari kami lit asangken kena!” Kai si erbanca umat Jahwe tetap setia?

¹⁶ Iteh Ajar-Ajar Pustaka si Badia e maka Kerajan Dibata enggo mulai merentah bas tahun 1914. La mamang ate kalak e sanga ianiaya alu kejam. Tapi, tek umat  Jahwe maka la lit pemerentahen manusia si banci mpengadi peraten Dibata. Iteh kalak e maka la banci ikernepken Hitler umat Jahwe ntah pe ibanna pemerentahen si hebaten asangken Kerajan Dibata. Tek turang seninata maka masap nge kari dungna pemerentahen Hitler e.

¹⁷ Janah e me si terjadi. Piga-piga tahun kenca si e lanai lit pemerentahen Hitler. Janah Heinrich Himmler si ngataken “i bas doni enda kami si merentah!” dungna kiam. Paksa si e, jumpa ia ras turang seninata si gelarna Lübke, si pernah ipenjaraken. Stres kel ia janah nina man Turang Senina Lübke: “O, Ajar-Ajar Pustaka, menurutndu kai nge kari si nandangi terjadi?” Ijelasken Turang Senina Lübke man Himmler maka tek kel Saksi Jahwe adi pemerentahen Nazi e pasti gagal janah Saksi Jahwe pasti ibebasken. Mbarenda mbue si la mehuli si ikataken Himmler kerna Saksi Jahwe, tapi gundari kai pe lanai lit belas-belasna. Lanai ndekah kenca si e, bunuh diri me Himmler. Kai pelajarenna? Adi tutus kel ateta mpelajari Pustaka, termasuk nubuat-nubuatna, kinitekenta banci reh paguhna man Dibata janah tetap kita megegeh sanga ianiaya.​—2 Pet. 1:19-21.

18. Menurut Johanes 6:67, 68, engkai maka perlu ‘benar pemetehta, janah mbages pengangkanta’?

¹⁸ Arus kita sikeleng-kelengen guna mbuktiken maka kita kalak Kristen situhu-tuhu. Tapi perlu ‘benar pemetehta, janah mbages pengangkanta.’ (Pil. 1:9) Adi lang, banci kita ipengaruhi “erbage-bage ajaren palsu arah penipu nari si make cara si licik,” termasuk arah kalak si murtad. (Ep. 4:14) Bas abad pertama Masehi, enterem murid-murid ngadi ngikutken Jesus, tapi Rasul Petrus tetap tek maka ‘kata-kata Jesus e kap si mereken kegeluhen si rasa lalap.’ (Baca Johanes 6:67, 68.) Amin pe la iangkai Petrus kerina ajaren Jesus, tapi tetap ia setia perban tek ia maka Jesus e utusen Dibata. Kam pe banci ipegegehindu kinitekenndu nandangi kai si ipelajarindu arah Pustaka. Adi bage banndu, la soal kai pe si terjadi banci tetap paguh kinitekenndu janah banci ka isampatindu kalak si deban mpepaguh kinitekenna.​—2 Joh. 1, 2.