1. Kai si enggo lakoken Jahwe man bandu?

UGA maka banci kam jadi Saksi Jahwe? Tangtangna, banci saja begindu “berita si meriah” arah orang tuandu, teman sada dahinndu, teman sekolahndu, ntah pe arah Saksi Jahwe si erberita ku rumahndu. (Mrk. 13:10) Kenca si e lit kalak si nggunaken melala waktu ras tenagana ngajarken Pustaka man bandu. Perban enggo mulai kam erlajar, dungna keleng me atendu Jahwe janah tehndu maka Ia pe keleng ateNa kam. Itarik Jahwe kam ku kebenaren janah gundari perban kam enggo jadi murid Jesus Kristus, lit arapenndu nggeluh si rasa lalap. (Joh. 6:44) Pasti ngata bujur kel kam man Jahwe perban enggo iahkenNa kalak ngajari kam kerna kebenaren janah enggo alokenNa kam jadi umatNa.

2. Kai kari sibahas bas artikel enda?

² Gundari enggo siteh kebenaren, janah sada kehamaten kel siakap banci nampati kalak si deban gelah ikut ras kita erdalan bas dalan si nuju ku kegeluhen. Banci saja nukahen siakap erberita arah rumah ku rumah asangken nawarken pelajaren Pustaka bage pe mandu pelajaren Pustaka. Bage ka nge perasanndu? Adi bage, bas artikel enda lit piga-piga cara si banci nampati kam. Sibahas kari kai si ngiahken kita nampati kalak gelah jadi murid Jesus. Sibahas ka kari uga carata gelah lanai kita mbiar mandu pelajaren Pustaka. Tangtangna, sibahas lebe engkai maka arus kita erberita man kalak si deban janah ngajari kalak e kerna berita si meriah.

3. Engkai maka kita erberita?

³ Sanga Jesus i doni berekenna dua perentah man murid-muridna. Si pertama, suruhna kalak e mberitaken berita si meriah kerna Kerajan Dibata janah cidahkenna uga cara  ngelakokenca. (Mat. 10:7; Luk. 8:1) Contohna, ajari Jesus murid-muridna kerna kai si arus lakoken kalak e adi lit kalak si megiken ntah pe adi la lit kalak si megiken. (Luk. 9:2-5) Katakenna ka maka erberita pagi murid-muridna “man kerina bangsa.” (Mat. 24:14; Perb. 1:8) La soal uga pe tanggapen kalak sanga kita erberita, perlu sipeseh berita kerna Kerajan e man kalak si deban bage pe kerna kai pagi si lakoken Kerajan e.

4. Menurut Matius 28:18-20, kai deba nari si arus silakoken sanga mberitaken berita kerna Kerajan Dibata?

⁴ Kai perentah si peduaken si bereken Jesus man murid-muridna? Suruhna murid-muridna ngajari kalak si deban gelah ndalanken kerina si perentahkenna. Lit si erpengakap maka perentah Jesus guna erberita ras ngajar man kalak si lit bas abad pertama saja ngenca. Payo nge bage? Lang. Ikataken Jesus maka pendahin si penting enda ilakoken pagi “seh ku kedungen jaman enda.” (Baca Matius 28:18-20.) Banci saja bereken Jesus perentah enda sanga cidahkenna dirina man lebih 500 murid-muridna. (1 Kor. 15:6) Bas pengenehenen si aloken Johanes, jelas cidahken Jesus maka arapkenna kerina murid-muridna gelah nampati kalak si deban mpelajari kerna Jahwe.​—Ket. 22:17.

5. Menurut 1 Korinti 3:6-9, pendahin erberita ras ngajar ipeseri Paulus ras kai?

⁵ Ipeseri Paulus pendahin erban murid bagi ngurus sinuan-sinuan, labo terjeng nuan benih saja. Ingetkenna kalak Korinti, nina, “Aku si nuansa, Apolos si niramsa . . . kena kap juma Dibata si sangana dahikenNa.” (Baca 1 Korinti 3:6-9.) Kerina kita erdahin bas “juma Dibata.” Emaka sanga kita erberita kita bali bagi nuan benih, janah sanga siajarken Pustaka tempa-tempa sisiram benih e. (Joh. 4:35) Tapi siteh maka Dibata kap si erban benih e turah.

6. Sanga siajari kalak, kai saja si perlu silakoken?

⁶ Sidarami kalak “si pusuh ras perbahanenna ngaloken kebenaren guna kegeluhen si rasa lalap.” (Perb. 13:48) Gelah banci kalak e iperidiken arus sisampati kalak e guna (1) ngangkai, (2) ngaloken, ras (3) ndalanken kai si pelajarina arah Pustaka. (Joh. 17:3; Kol. 2:6, 7; 1 Tes. 2:13) Kerina kalak bas runggun banci nampati kalak si erlajar Pustaka alu ncidahken kekelengen man kalak e, janah ngalo-ngalo kalak e sanga reh ia ku perpulungen. (Joh. 13:35) Selain si e, perlu melala waktu ras gegeh man kalak si ngajarken Pustaka bas nampati si erlajar nadingken kebiasan ntah pe kinitekenna “si ibentengi alu paguh.” (2 Kor. 10:4, 5) Banci jadi perlu waktu erbulan-bulan dekahna guna nampati kalak si erlajar gelah banci iperidiken. Tapi, kerina si enggo silakoken e la sia-sia.

7. Kai si ngiahken kita guna erberita ras njadiken murid?

⁷ Engkai maka kita nggit erberita ras ngajari kalak? Si pertama, perban keleng ateta Jahwe. Perban tuhu-tuhu keleng ateta Dibata, nggit kita ndalanken perentah guna erberita ras ngajar alu cara si mehulina. (1 Joh. 5:3) Cuba ukuri enda: Kekelengen kap si ngiahken kita guna erberita arah rumah ku rumah. Menukah nge matuhi perentah e? Banci saja lang. Sanga tangtangna kam erberita arah rumah ku rumah, mbiar nge kam? Mbelin kemungkinenna ue. Tapi tehndu maka enda me si arapken Jesus lakokenndu janah patuh kam man perentah e. Kenca piga-piga waktu kam erberita, banci  saja reh nukahna kapndu ngelakokenca. Tapi, uga kerna mandu pelajaren Pustaka? Sanga ukurindu kerna si e, banci saja mbiar kam. Tapi banci pindondu penampat Jahwe gelah lanai kam mbiar. Banci sampati Jahwe kam gelah pang njadiken murid.

8. Menurut Markus 6:34, kai deba nari si ngiahken kita guna ngajari kalak?

⁸ Si peduaken, kekelengenta man kalak si deban ngiahken kita ngajarken kebenaren. Bas sada kesempaten, latih kel akap Jesus ras murid-muridna perban enggo sada warin erberita. Sanga istrahat ate kalak e, reh jelma si enterem ndahi kalak e. Perban mekuah ate Jesus “melala si ajarkenna” man kalak e. (Baca Markus 6:34.) Amin pe enggo latih kap Jesus, nggit ia ngajari kalak e. Engkai? Perban teh Jesus uga perasan kalak e. Merhat ia nampati kalak e perban susah kap kalak e janah la lit arapenna. Kalak si gundari pe bage. Amin pe tempa-tempa meriah janah puas kapna, situhuna susah kel akap kalak e janah perlu ia arapen. Kalak e bali bagi biri-biri si papak la lit si mpermakanisa. Ikataken Rasul Paulus maka kalak si bage la tandaina Dibata janah la lit arapenna. (Ep. 2:12) Kalak e sangana bas dalan si ‘nuju ku kematen.’ (Mat. 7:13) Adi siukuri uga buena kalak si perlu nandai Dibata bas daerahta, teriahken kita nampati kalak e perban keleng ras mekuah ateta kalak e. Cara si mehulina nampati kalak e eme alu nawarken pelajaren Pustaka.

9. Menurut Pilipi 2:13, uga cara Jahwe nampati kita?

⁹ Banci saja ragu kam nawarken pelajaren Pustaka. Engkai? Perban tehndu maka perlu mbue waktu erban persiapen ras ngajarken Pustaka. Adi bage si gejapkenndu, totokenlah e man Jahwe. Pindolah man baNa gelah pebelinNa sura-surandu guna ndarami kalak si nggit erlajar Pustaka. (Baca Pilipi 2:13.) Ipetetap Rasul Johanes ukurta maka pasti ijawap Jahwe toto si sesuai ras peratenNa. (1 Joh. 5:14, 15) Emaka, teklah kam pasti sampati Jahwe kam mpebelin sura-surandu njadiken murid.

10-11. Banci saja kai si ngambati kita mandu pelajaren Pustaka?

¹⁰ Siteh maka penting kel ngajarken Pustaka, tapi banci jadi mesera siakap ngelakokenca. Mari sibahas piga-piga tentangenna ras uga cara ngatasisa.

¹¹ La banci silakoken bagi siarapken. Contohna, piga-piga perberita enggo metua ntah pe enggo kurang kesehatenna. Bage nge sangana situasindu? Adi bage, mari sibahas salah sada manpaat si banci sidat perban pandemi COVID-19. Enggo sipelajari uga carana mandu pelajaren Pustaka arah HP ntah pe arah alat elektronik si debanna. Emaka enggo banci simulai ntah pe siban pelajaren Pustaka arah rumahta nari. Lit ka manpaat si deban. Piga-piga kalak nggit erlajar Pustaka, tapi waktuna la cocok ras waktu si biasa gunaken turang senina bas erberita. Banci saja pagi-pagi si lampas ntah pe tengah berngi maka lit waktu kalak e erlajar. Banci nge banndu waktundu mandu pelajaren Pustaka bas waktu si bage? Mbarenda, Jesus ngajari Nikodemus bas berngi wari, bas waktu si cocok akap Nikodemus.​—Joh. 3:1, 2.

12. Kai saja si mpetetap ukurta maka ngasup nge kita mandu pelajaren Pustaka?

¹² La kapndu ngasup bandu. Banci saja kurang mbue kapndu pemetehndu ntah pe reh beluhna min kam lebe ngajar sope  imulaindu pelajaren Pustaka. Adi bage perasanndu, lit telu alasen si banci mpetetap ukurndu. Si pertama, ngasup akap Jahwe kam ngajari kalak si deban. (2 Kor. 3:5) Si peduaken, “kerina kuasa i surga ras i doni enggo ibereken man” Jesus janah ia me si mereken tugas e man bandu. Tek ia maka ngasup kam ngelakokenca. (Mat. 28:18) Si peteluken, banci kam erlajar arah Jahwe ras turang senina si deban. Ikataken Jesus maka kerina si ajarkenna rehna arah Bapakna. E mbuktiken maka melala si pelajari Jesus arah Jahwe. Kita pe banci siusih ia. (Joh. 8:28; 12:49) Selain si e, banci ka kam erlajar arah pengawas kelompok dinasndu, perintis ntah pe perberita si mbue pengalamenna guna nampati kam mbenaken ras mandu pelajaren Pustaka. Banci kam ikut ras kalak e sanga ia mandu pelajaren Pustaka.

13. Engkai maka perlu siban penyesuaien?

¹³ Mesera siakap nggunaken cara ngajar si mbaru ras publikasi si mbaru. Carata mandu pelajaren Pustaka enggo berubah gundari. Alat pengajarenta si utama eme buku Ermeriah Ukur Seh Rasa lalap! Iarapken kel gelah siban persiapen sope nggunaken buku enda janah carata mandu pelajaren Pustaka pe lanai bagi si mbarenda. Sitik ngenca paragrap si ibaca janah buen kita ercakap-cakap ras si erlajar. Sanga kita ngajar sigunaken terbuen video ras bahan-bahan arah situs webta, bage pe JW Library^®. Adi lenga kam beluh nggunaken cara ngajar si mbaru e, banci pindondu penampat arah kalak si beluh nggunakenca. Biasana riahen siakap ngelakoken kai si biasa silakoken. Labo menukah siakap ngelakoken kai si mbaru denga siteh. Tapi alu penampat Jahwe ras penampat kalak si deban banci reh nukahna siakap erban penyesuaien janah reh riahna siakap ngajari kalak kerna Pustaka. Ikataken sekalak perintis maka cara erlajar enda “erban meriah ukur si erlajar bage pe si ngajar.”

14. Uga 1 Korinti 3:6, 7 mpegegehi kita sanga erberita bas daerah si enterem kalak la nggit megiken beritata?

¹⁴ Enterem kalak bas daerahta la nggit erlajar Pustaka. Piga-piga kalak la nggit megiken beritata janah lit ka si nentang. Kai si banci nampati kita gelah tetap positip? Tetaplah siinget maka bas doni enda meter kel berubah kegeluhen kalak, janah kalak si la nggit megiken banci saja dungna sadar maka perlu ia penampat Dibata. (Mat. 5:3) Lit piga-piga kalak si mbarenda lalap la nggit ngaloken baca-bacanta, tapi dungna nggit ia erlajar Pustaka. Siteh ka maka Jahwe kap Si Mada peranin. (Mat. 9:38) AteNa tetap min kita nuan benih ras sisiram, janah Ia kari si erbanca turah. (1 Kor. 3:6, 7) Amin pe lenga lit kalak si erlajar Pustaka ras kita, ula kitik ukurta. Ipasu-pasu Jahwe kita labo perban uga buena kalak si enggo sisampati meteh kebenaren, tapi perban idahNa usahata. *

15. Uga perasan Jahwe sanga lit kalak si nggit erlajar Pustaka ras ngelakoken kai si ipelajarina?

¹⁵ Meriah ukur Jahwe sanga lit kalak si nggit ngaloken kebenaren Pustaka janah bagikenna kebenaren si enggo tehna man kalak si deban. (Kua. 23:15, 16) Pasti meriah kel ukur Jahwe ngidah umatNa semangat bas erberita ras ngajarken Pustaka gundari. Contohna, cuba perdiateken laporen tahun dinas 2020. Amin pe terjadi  pandemi i belang-belang doni lit 7.705.765 pelajaren Pustaka ras lit 241.994 kalak si iperidiken. Murid-murid si mbaru e iajarina ka pagi kalak si deban janah reh buena me kalak si jadi murid. (Luk. 6:40) Tek kel kita maka pasti meriah ukur Jahwe sanga siajari kalak si deban gelah jadi murid.

16. Kai nge tujun si mehuli si banci siban?

¹⁶ Memang labo nukah njadiken murid. Tapi alu penampat Jahwe, banci kita ikut nampati kalak si erlajar gelah keleng atena Bapakta si i surga. Banci nge imulaindu silang-langna sada pelajaren Pustaka? Tawarkenlah pelajaren Pustaka man tiap kalak si jumpaindu sanga erberita. Banci saja sengget kam ngidah hasilna. Tek kita maka pasti pasu-pasu Jahwe usahata.

17. Uga nge perasanta sanga sisampati kalak erlajar Pustaka?

¹⁷ Sada kehamaten si mbelin kel man banta banci erberita ras ngajarken kebenaren man kalak. Pendahin enda erban tuhu-tuhu meriah kel ukurta. Enterem kalak bas Tesalonika enggo sampati Rasul Paulus jadi murid janah bagenda nina nuriken perasanna, “Adi la kena, ise nari si jadi arapen kami, keriahen ukur kami, ntah pe mahkota kami si erban kami bangga i lebe-lebe Tuanta Jesus sanga kerehenna? Kena kap kemulian ras keriahen ukur kami.” (1 Tes. 2:19, 20; Perb. 17:1-4) Enterem turang senina si bali perasanna ras Paulus perban ikut njadiken murid. Sekalak turang seninata Stéphanie ras perbulangenna enggo nampati enterem kalak gelah banci iperidiken. Bagenda nina, “La lit keriahen ukur si belinen asangken nampati kalak mbaktiken dirina man Jahwe.”