1-2. Kai janji Jahwe bas Jesaya 65:16, 17?

“JANGAN MENYERAH!” eme tema pertemuan regional tahun 2017. Bas acara e ibahas uga carana kita megenggeng ngadapi masalahta. Enggo lit empat tahun dekahna kenca pertemuan e janah tetap denga kita arus megenggeng ngadapi doni si jahat enda.

² Kai nge masalah si adapindu mbaru-mbaru enda? Lit nge anggota keluargandu ntah pe temanndu si mate? Latih nge kapndu perban mekelek penakitndu? Mesera nge kapndu perban kam reh tuana? Lit nge pengaruhna man bandu perban terjadi bencana alam, kejahaten, ras penganiayan? Ntah lit nge pengaruhna man bandu perban terjadi wabah penakit, bagi pandemi COVID-19? Ngarap kel kita ngidah paksana kerina masalah enda lanai lit. Paksa si e lanai pagi siinget masalah e janah lanai pernah terjadi masalah si bage!​—Baca Jesaya 65:16, 17.

3. Kai si arus silakoken gundari, ras engkai?

³ Nggeluh bas doni enda memang mesera, tapi banci saja arus kita megenggeng ngadapi masalah si terberaten pagi. (Mat. 24:21) Jelas me, perlu kita terus megenggeng. Engkai? Perban nina Jesus, “Adi megenggeng kena pasti kena tetap nggeluh.” (Luk. 21:19) Reh ngasupna kita megenggeng adi siukuri usihen arah kalak si megenggeng bas ngadapi masalah si bali bagi masalahta.

4. Engkai maka banci sikataken Jahwe me usihen si mehulina bas ncidahken sipat megenggeng?

⁴ Ise nge usihen si mehulina bas ncidahken sipat megenggeng? Dibata Jahwe. Engkai maka banci sikataken bage? Cuba ukuri enda: Setan me si erkuasa bas doni enda, emaka mbue terjadi masalah. Situhuna, lit nge kuasa Jahwe mpengadi kerina masalah e. (Rom. 9:22) Tapi Jahwe Dibatata  terus megenggeng ngasa seh waktuna ikernepkenNa doni si jahat enda. Mari sibahas siwah masalah si adapi Jahwe alu megenggeng.

5. Uga maka gelar Dibata enggo ceda, ras uga perasanndu kerna si e?

⁵ GelarNa icedai. Penting akap Jahwe gelarNa janah ateNa kerina min kalak ngergai gelarNa e. (Jes. 42:8) Tapi gelarNa enggo icedai kira-kira 6.000 tahun enda. (Ms. 74:10, 18, 23) GelarNa mulai icedai bas Taman Eden nari. Paksa si e ipitnah Iblis (si ertina “Tukang Pitnah”) maka la ibere Dibata man Adam ras Hawa kai si erban kalak e ermeriah ukur. (Kej. 3:1-5) Mulai jenari, Jahwe lalap ipitnah la mereken kai si iperluken manusia gelah ermeriah ukur. Latih ukur Jesus ngidah gelar Bapakna icedai. Eme sebapna iajarina murid-muridna guna ertoto bagenda: “O Bapak kami si i surga, ipebadia min gelarNdu.”​—Mat. 6:9.

6. Engkai maka ndekah kel timai Jahwe guna mbuktiken maka Ia ngenca si cocok merentah i surga ras i doni?

⁶ Melala si nentang pemerentahen Dibata. Situhuna, Jahwe ngenca si lit hakNa guna merentah i surga ras i doni. Selain si e, pemerentahenNa ngenca si mehulina. (Ket. 4:11) Tapi usahaken Iblis nipu malekat-malekat ras manusia gelah tek kalak e maka labo pemerentahen Dibata si mehulina. Guna ndungi masalah e iperluken waktu. Perban Dibatata pentar, pediatNa manusia si merentah guna mbuktiken maka labo banci kalak e berhasil adi la begikenna Pencipta. (Jer. 10:23) Perban Jahwe sabar, kerina pagi kalak banci meteh maka Dibata me penguasa si mehulina janah KerajanNa ngenca si banci erban doni enda dame ras aman. Alu bage, lanai pagi lit kalak si nentang pemerentahen Jahwe.

7. Ise saja si mberontak man Jahwe ras kai pagi si lakoken Jahwe man kalak e?

⁷ Piga-piga anak Jahwe mberontak. Sanga ciptaken Jahwe anak-anakNa eme malekat ras manusia, kerina sempurna. Tapi bas pudi wari, lit malekat si mberontak man Jahwe, ia igelari Setan (si ertina “Si Nentang”). Ipengaruhina Adam ras Hawa ikut mberontak ngelawan Jahwe. Dungna, melala malekat ras manusia ikut mberontak. (Jud. 6) Kalak Israel eme umat si ipilih Dibata, tapi kalak e pe dungna nadingken Dibata janah sembahna berhala. (Jes. 63:8, 10) Hianati kalak e Jahwe, tapi tetap Ia sabar ngasa seh waktuna ikernepkenNa kerina si mberontak ngelawan Ia. Paksa terjadi pagi si e, pasti meriah ukur kerina kalak si setia man Jahwe perban enggo megenggeng kalak e ras Jahwe ngadapi kerina si la mehuli i doni Setan enda.

8-9. Kai saja tuduhen Setan ras uga carata mbuktikenca maka tuduhenna e la tuhu?

⁸ Iblis lalap erbual. Jop eme umat Jahwe si setia. Tapi ikataken Setan maka Jop ras kerina umat Dibata nggit nembah Jahwe perban alasen si mentingken bana. (Jop 1:8-11; 2:3-5) Seh asa gundari bage denga tuduhen Iblis man banta. (Ket. 12:10) Kerina kita banci mbuktiken maka tuduhenna e labo tuhu. Uga carana? Adi megenggeng kita ngadapi tentangen janah setia man Jahwe perban keleng ateta Ia. Alu bage, pasti ipasu-pasu Jahwe kita bali bagi Jop.​—Jak. 5:11.

⁹ Igunaken Setan peminpin-peminpin agama si palsu guna ngajarken maka Jahwe e kejam janah Ia me si erban kita susah. Contohna, sanga lit anak-anak si mate, kataken kalak e maka ia enggo ilebuh Dibata,  perban perlu Dibata terbuen malekat i surga. Tuhu-tuhu kel la ergai kalak e Dibata! Tapi siteh maka Bapakta Jahwe, keleng kel ateNa kita. Bicara mekelek pe penakitta ntah lit keluargata si mate, labo sisalahken Dibata. Tek kita maka bas sada wari pagi imasapkenNa kerina penakit janah pekekeNa kalak si mate. Siusahaken mpebetehkenca man kalak si deban maka Jahwe e Dibata si perkeleng. Alu bage, banci ijawap Jahwe tuduhen si iban Setan.​—Kua. 27:11.

10. Kai si banci sipelajari kerna Jahwe arah Masmur 22:23, 24?

¹⁰ Umat si ikelengiNa ngenanami kesusahen. Jahwe e Dibata si perkuah. Sedih kel Ia adi idahNa kita susah perban ianiaya, perban penakit, ntah pe perban kita lenga sempurna. (Baca Masmur 22:23, 24.) Angkai Jahwe kesusahenta. Nggit Ia nasapken kesusahenta janah ilakokenNa nge pagi. (Bandingken Keluaren 3:7, 8; Jesaya 63:9.) Bas waktuna pagi “apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit.”​—Ket. 21:4.

11. Uga perasan Jahwe kerna umatNa si setia si enggo mate?

¹¹ Melala teman-teman Jahwe si enggo mate. Uga nge perasan Jahwe kerna kalak si erkiniteken man baNa si enggo mate? Tedeh kel ateNa kalak e! (Jop 14:15) Banci nge bayangkenndu uga tedehna ate Jahwe man temanNa Abraham? (Jak. 2:23) Ntah pe man Musa si pernah “langsung ngerana” ras Ia? (Kel. 33:11) Pasti tedeh ateNa megiken lagu-lagu si mejile si endeken Daud bage pe penulis masmur si debanna guna muji Ia. (Ms. 104:33) Amin pe teman-temanNa e enggo mate, labo lupaken Jahwe kalak e. (Jes. 49:15) IngetNa kerina kerna kalak e, sebap “menurut Dibata, kerina  kalak e nggeluh.” (Luk. 20:38) IpekekeNa pagi kalak e kerina. Alu bage banci begiNa mulihi toto kalak e janah idahNa kalak e nembah Ia. Mbera-mbera terapuli kita perban siteh perasan Jahwe e, terlebih adi lit kalak si keleng ateta si enggo mate.

12. Kai si erban latih ukur Jahwe bas wari-wari pendungi enda?

¹² Melala kalak si susah perban kalak jahat. Sanga manusia mulai mberontak i Taman Eden iteh Jahwe maka keadan doni enda pasti reh kelekna sope lenga Ia ertindak. Segat ate Jahwe ngidah kejahaten, perbahanen si la adil, ras kekerasen si terjadi gundari. Mbarenda nari ermediate kel Ia man kalak si lemah ras si la ergegeh, bagi anak melumang ras janda. (Sak. 7:9, 10) Latih kel ukurNa sanga idahNa umatNa si setia itindas ras ipenjaraken. Teklah kam maka keleng ate Jahwe kalak si megenggeng radu ras Ia.

13. Perbahanen kai nge si segat ate Dibata janah kai pagi si lakokenNa?

¹³ Manusia reh jahatna. Situhuna, manusia iciptaken mirip ras Dibata. Tapi ate Setan lakoken manusia min kai si jahat. Bas jaman Nuah “idah Jahwe maka jahat kel manusia i doni” emaka “kecewa kel Jahwe perban enggo banNa manusia i doni, sakit hati kel Ia.” (Kej. 6:5, 6, 11) Reh ulina nge keadan doni enda gundari? Sitik pe lang! Erbage-bage perbahanen seks si salah enggo ianggap kalak biasa, la soal antara beda jenis ntah pe sesama jenis. (Ep. 4:18, 19) Enda pasti erban meriah ukur Setan. Reh riahna ka ukurna adi banci ibanna umat Dibata ngelakoken dosa. Tapi kesabaren Jahwe lit batasna. IbuktikenNa pagi maka segat ateNa kerina perbahanen seks si salah. IkernepkenNa pagi kerina kalak si ngelakoken perbahanen seks si salah ras si la nggit robah.

14. Kai akibat ulah manusia man doni bage pe man binatang-binatang?

¹⁴ Ceda ban manusia ciptan Dibata. Manusia labo saja “nguasai manusia.” Tapi perbahanen manusia pe la mehuli akibatna man doni enda ras man binatang-binatang si enggo ibereken Jahwe man kalak e. (Peng. 8:9; Kej. 1:28) Piga-piga peneliti ngataken maka bas piga-piga tahun si reh lit sejuta nari jenis binatang ras sinuan-sinuan si punah perban ulah manusia. Emaka la ateta mamang melala kalak si mbiar maka hancur pagi doni enda. Tapi ngata bujur kita perban enggo erjanji Jahwe maka ‘kernepkenNa pagi kalak si ncedai doni’ janah ubahNa pagi doni enda jadi pardis.​—Ket. 11:18; Jes. 35:1.

15-16. Kai nge si ngiahken kita gelah megenggeng bagi Jahwe? Ban perumpamanna.

¹⁵ Cuba ukuri uga buena masalah si enggo ribun tahun dekahna si arus iadapi Bapakta si i surga. (Nen kotak “ Si Adapi Jahwe alu Megenggeng.”) Situhuna ndigan pe banci nge ikernepken Jahwe doni si jahat enda. Tapi nggit Ia sabar janah kesabarenNa e jadi pasu-pasu man banta. Perumpamanna bagenda: Ipeseh man sepasang perbulangen ras ndeharana maka anak kalak e cacat pagi sanga lahir. Labo banci gedang umurna janah latih kapna ndalani geluh enda. Iteh kalak e maka labo nukah ngurus anakna e. Amin pe bage tetap meriah ukur kalak e sanga lahir anakna e. Perban keleng atena anakna e, nggit kalak e megenggeng ras mereken si mehulina bas ngurus anakna e.

¹⁶ Bage ka pe, perban kita keturunen Adam ras Hawa, kerina kita la sempurna. Tapi tetap keleng ate Jahwe kita janah perdiatekenNa kita. (1 Joh. 4:19) Bagi orang  tua bas perumpaman ndai, amin pe enggo lakokenna si mehulina banci jadi tetap denga susah akap anakna e. Tapi Bapakta Jahwe ngasup nasapken kerina kesusahen manusia janah enggo tetapkenNa ndigan waktuna. (Mat. 24:36) Adi siukuri kerna kekelengen Jahwe, pasti teriahken kita guna megenggeng radu ras Ia, la soal asa kai nari dekahna kita arus megenggeng.

17. Uga usihen si iban Jesus si icatat bas Heber 12:2, 3, banci nampati kita gelah megenggeng?

¹⁷ Jahwe me usihen si sempurna bas ncidahken sipat megenggeng janah enggo berhasil Jesus ngusih Bapakna e. Sanga Jesus i doni, nggit ia itokohi, ipermelaken, ras mate guna kita i tiang siksan. (Baca Heber 12:2, 3.) Banci Jesus megenggeng ngadapisa pasti perban ukurina usihen arah Jahwe. Kita pe banci megenggeng adi siukuri si e.

18. Menurut 2 Petrus 3:9, kai hasilna perban Jahwe megenggeng?

¹⁸ Baca 2 Petrus 3:9. Iteh Jahwe ndigan waktu si cocokna guna engkernepken doni si jahat enda janah sabar Ia nimai ngasa seh waktuna. Perban Jahwe sabar, mbue kalak si banci nandai Ia. Gundari, lit jutan kalak si ngelayani ras muji Ia selaku rarasen si mbelin. Ngata bujur kalak e perban nggit Jahwe megenggeng seh asa gundari, alu bage lit kesempaten kalak e erlajar guna engkelengi Ia janah mbaktiken diri man baNa. Adi kalak e terus megenggeng seh ku kedungen, pasti meriah ukur Jahwe masu-masu kalak e. Paksa si e siteh me maka keputusen Jahwe guna megenggeng sedekah enda memang keputusen si tepat.

19. Kai tekadta, janah kai pasu-pasuna?

¹⁹ Banci kita megenggeng janah tetap ermeriah ukur adi siusih Jahwe. Amin pe enggo melala kesusahen ras ceda ate si iban Setan, Jahwe tetap “Dibata si ermeriah ukur.” (1 Tim. 1:11) Kita pe banci tetap ermeriah ukur janahta sabar nimai Jahwe mpebadia gelarNa, mbuktiken hakNa guna merentah, engkernepken kerina kejahaten, ras ndungi kerina masalahta. Emaka teruslah kita megenggeng perban Bapakta si i surga pe megenggeng. Alu bage, kita kerina banci ndatken kegeluhen si rasa lalap bagi si ikataken bas ayat enda: “Ermeriah ukurlah kalak si ertahan [megenggeng] bas erbage-bage percuban, sebap adi ngena ate Dibata man bana, datna mahkota kegeluhen si enggo janjiken Jahwe man kalak si terus engkelengi Ia.”​—Jak. 1:12.